Bidii Jesús ni gudó mil de binni né gaayuʼ si pan ne chupa benda

Guizáʼ nayecheʼ biʼniʼ predicar ca 12 apóstol ndaaniʼ guidxi Galilea ne ora bibiguétacabe gúdxicabe Jesús xi guiráʼ bíʼnicabe ne ni bisiidicabe. Nánnanu guizáʼ maʼ bidxágacabe. Qué gápacabe tiempu nin para gócabe gueta, purtiʼ zeʼ zeeda binni ra nuucabe. Ngue runi gudxi Jesús laacabe: «Latananda naa, chuunu ti lugar zitu para guiziiláʼdxitu ti ratu» (Marcos 6:30, 31).

Ngue runi gudxíʼbacabe ndaaniʼ ti canuá, zándaca gaxha de Capernaúm, zécabe ti lugar zitu, ladu este stiʼ guiiguʼ Jordán, xcaadxi zitu de Betsaida. Peru biiyaʼ binni ora bireecabe, ne laaca gunna xcaadxi binni ni, ngue runi ziguxooñecaʼ guriá nisadóʼ que para chindacaʼ primé que laacabe.

Ora biete Jesús ndaaniʼ canuá que, biiyabe nuu stale binni raqué ne guizáʼ biabe laacaʼ purtiʼ nuucaʼ casi dendxuʼ ni qué gapa pastor. Nga runi, «bizulú bisiidibe laacaʼ stale cosa» de Reinu stiʼ Dios (Marcos 6:34). Ne laaca bisiándabe ca ni caquiiñeʼ guianda (Lucas 9:11). Gunda si huadxí, gudxi ca discípulo laabe: «Zitu ndiʼ ra nuunu ne maʼ huadxí ndiʼ. Gudxi guiráʼ binni riʼ checaʼ ndaaniʼ ca guidxihuiiniʼ ne sicaʼ ni gocaʼ» (Mateo 14:15).

Peru ná Jesús rabi laacaʼ: «Cadi caquiiñeʼ diʼ chécabe. Lagudii ni gócabe» (Mateo 14:16). Neca maʼ nanna Jesús xi chiguni, peru para gúʼyabe xi caníʼ ique Felipe, gunabadiidxabe laa: «¿Paraa sinu pan para gó ca binni riʼ pue?». Gunabadiidxaʼ Jesús Felipe purtiʼ de Betsaida laa. Peru guizáʼ nagana sícabe pan para gó guiráʼ binni que. Raqué nuu 5,000 hombre ne pa ugábanu gunaa ne xcuidi la? biaʼ si biaʼ 10,000 binni. Ngue runi bicabi Felipe: «Qué zugaanda 200 denariu pan para guicaa cada tobi de laacabe ti ndaa ti ndaa» (Juan 6:5-7). Guníʼ ique, ¡ti denariu nga runi ganárcabe ti dxi dxiiñaʼ!

Zándaca para guluíʼ Andrés qué zanda gudiicabe ni gó guiráʼ binni que, guníʼ: «Nuu ti hombrehuiiniʼ raríʼ napa gaayuʼ pan de cebada ne chupa bendahuiiniʼ. Peru ¿zugaanda xa ndiʼ para guiráʼ ca binni riʼ?» (Juan 6:9).

Cumu maʼ primavera ngue nuucabe —cayaadxaʼ xhupa xhonna gubidxa para gaca Pascua de iza 32—, ngue runi nagáʼ nuu ca guixi que. Pur nga, gunabaʼ Jesús ca discípulo stiʼ gábicaʼ ca binni que cuicaʼ lu ca guixi que pur grupu de 50 ne de 100. Óraque gucuaabe gaayuʼ pan ne guiropaʼ benda que ne bidiibe xquixe peʼ Dios. Despué, gundaabe ca pan que ne ca benda que ne bidiibe ni ca discípulo stibe para gudiicaʼ ni binni. Ne guiráʼ binni que gudó dede bidxá ndaanicaʼ.

Despué, gudxi Jesús ca discípulo stiʼ: «Lagutopa ca pedazu ni biʼniʼ sobra ti cadi gusáʼbinu gastiʼ» (Juan 6:12). Para bitópacabe guiráʼ ca pedazu que ne bidxá 12 dxumi de ni biʼniʼ sobra que.