Biʼniʼ Jesús stale milagru Capernaúm

Maʼ biʼniʼ invitar Jesús tapa discípulo —Pedro, Andrés, Santiago ne Juan— para gácacaʼ pescador de binni. Yanna, maʼ sábadu ndiʼ, guyécabe ndaaniʼ ti sinagoga ni nuu Capernaúm. Raqué, bizulú Jesús cusiidiʼ, ne cadxagayaa ca binni que laabe sti biaje, purtiʼ cusiidibe casi tobi ni napa autoridad, cadi casi ca escriba.

Ndaaniʼ sinagoga que nuu ti hombre ni nuu ti demonio lu cuerpu stiʼ, ne bizulú bicaa ridxi: «¿Xi napanedu lii, Jesús de Nazaret? ¿Beeduʼ para gunitiluluʼ laadu la? Nannaʼ dxiicheʼ tu lii: ¡lii nga Santo stiʼ Dios!». Peru gudindené Jesús demonio nuu lu cuerpu stiʼ hombre que, ne ná: «¡Bigani, ne biree lu cuerpu stiʼ hombre ca!» (Marcos 1:24, 25).

Óraque, guizáʼ reciu bicaa demonio que ridxi, bisaba demonio que hombre riʼ layú, biree lu cuerpu stibe ne «qué ñuniná laabe» (Lucas 4:35). Nabé bidxagayaa guiráʼ binni nuu ndaaniʼ sinagoga que ni bíʼyacaʼ, ne nacaʼ: «Peru ¿xii ndiʼ pue? [...] Né autoridad rudiibe orden ca espíritu malu, ne ruzuubacaʼ stiidxabe» (Marcos 1:27). Guiráʼ binni de Galilea bidxagayaacaʼ ora gúnnacaʼ ni biʼniʼ Jesús.

Ora biree Jesús ne ca discípulo stiʼ ndaaniʼ sinagoga que, guyecaʼ ra lidxi Simón Pedro. Guyuusícabe raqué, gunábacabe Jesús gusianda suegra Pedro, purtiʼ dxiʼbaʼ xindxáʼ laa. Ngue runi, bidxiña Jesús laabe, gunaaze nabe ne gundisaʼ laabe. Oraqueca bianda suegra Pedro ne bizulú biʼniʼ tender Jesús ne ca discípulo stiʼ, zándaca bíʼnibe ni gocaʼ.

Gunda si huadxí, beeda stale binni ra lidxi Pedro, dede ruluíʼ guidubi guidxi zuhuaa ra puertaʼ que. Zinécabe ca binni huará ra nuu Jesús para gusiándabe laacaʼ, ne «quixhenásibe luguiáʼ cada tobi de laacaʼ» maca biándacaʼ (Lucas 4:40). Casi maca gucuá, gucané Jesús guirácabe, neca gadxé gadxé guendahuará nápacabe (Isaías 53:4). Dede ribeebe demonio lu cuerpu stiʼ binni. Ora guiree ca demonio que lu cuerpu stiʼ binni, rucaacaʼ ridxi ne nacaʼ: «¡Lii nga Xiiñiʼ Dios!» (Lucas 4:41). Peru gudindené Jesús ca demonio que ne qué niná niníʼcabe gastiʼ. Nanna ca demonio que Jesús nga Cristu, peru qué náʼ Jesús gusihuinni ca demonio riʼ laaca runi adorarcaʼ Dios purtiʼ cadi dxandíʼ ni.