Cayuni Jesús xhiiñaʼ Dios guidubi naca Galilea

Guizáʼ maʼ stale cosa biʼniʼ Jesús né guidapaʼ discípulo stiʼ dxi riʼ, ndaaniʼ guidxi Capernaúm. Huaxhinni que yené ca binni de raqué ca ni huará para gusiándabe laacaʼ, ngue runi huaxiéʼ tiempu gúpabe para guiziiláʼdxibe.

Sti dxi que, siadóʼ guieʼruʼ, laga nacáhuiruʼ, biree Jesús ziyubi ti lugar para chuʼ stubi ne guni orar Bixhoze. Peru ti ratu si guyuube stúbibe. Ora bidii Simón Pedro cuenta ne ca ni nuu raqué qué guinni Jesús, yeyúbicaʼ laabe. Zándaca primé ca Pedro yeyubi Jesús, purtiʼ ra lidxi biaanabe (Marcos 1:36; Lucas 4:38).

Ne ora bidxélacaʼ Jesús, gudxi Pedro laabe: «Canayubi guiráʼ binni lii» (Marcos 1:37). Guizáʼ nayecheʼ nuu ca binni de Capernaúm pur guiráʼ ni maʼ biʼniʼ Jesús, dede nuucaʼ gucueezacaʼ laabe para guiaanabe raqué (Lucas 4:42). Peru ¿ñee beeda Jesús ndaaniʼ Guidxilayú para si gusianda binni la? ¿Ñee ndaaniʼ guidxi riʼ si nga naquiiñeʼ gúnibe xhiiñaʼ Dios la? Laca laabe guniʼbe:

«Chuunu sti lugar, ca guidxi nuu gaxha —rábibe ca discípulo stibe—, para guneʼ predicar raqué, purtiʼ para nga bendaʼ». Ne laaca gúdxibe ca binni ni nuu gucueeza laabe que: «Laaca naquiiñeʼ guneʼ predicar ca noticia galán stiʼ Reinu stiʼ Dios ndaaniʼ xcaadxi guidxi, purtiʼ para nga bendaʼ» (Marcos 1:38; Lucas 4:43).

Beeda Jesús lu Guidxilayú riʼ pur ti razón nabé risaca, para guni predicar mensaje stiʼ Reinu stiʼ Dios. Zuni santificar Reinu riʼ lá Bixhózebe ne zunduuxeʼ Reinu riʼ guiráʼ guendanagana napa binni tobi si tiru. Pa zacá ni, ¿xiñee cayuni Jesús milagru ra cusianda binni yaʼ? Para gusihuinni laa nga ni biseendaʼ Dios. Stale iza ante, laaca biʼniʼ Moisés milagru para gusihuinni Dios ngue biseendaʼ laa (Éxodo 4:1-9, 30, 31).

Nga runi, biree Jesús de ndaaniʼ guidxi Capernaúm para guni predicar xcaadxi guidxi, ne zinanda guidapaʼ discípulo que laa: Pedro, ne biʼchiʼ, Andrés, Juan ne biʼchiʼ, Santiago. Guietenaláʼdxinu, ti semana ante biʼniʼ invitar Jesús ca hombre riʼ para chinándacaʼ laabe ra tiica chebe.

Stale ni guleendú Jesús ne guidapaʼ discípulo stiʼ ra biʼniʼ predicarcaʼ Galilea. Guiráʼ ladu binadiaga binni de Jesús: binni de Siria, binni de región ra nuu chii guidxi ni runibiáʼcabe casi Decápolis ne binni de ca guidxi nuu deche guiiguʼ Jordán (Mateo 4:24, 25). Stale binni de ca guidxi riʼ, cásica de Judea, yenándacaʼ Jesús ne ca discípulo stiʼ. Ne yenecaʼ stale binni huará ra nuube para gusiándabe laacaʼ. Bisianda Jesús guiráʼ binni huará que ne gulee demonio lu xcuerpu binni.