¿Xiñee qué runi ayunar ca discípulo stiʼ Jesús?

Cadi xadxí de biʼniʼ Jesús Pascua lu iza 30, biseguyoocabe Juan Bautista. Gucalaʼdxiʼ Juan ninanda ca discípulo stiʼ Jesús, peru nuuruʼ xhupa xhonna caʼruʼ chinándacaʼ Jesús.

Yanna, mayaca ganda Pascua lu iza 31, guyé caadxi de ca discípulo stiʼ Juan ra nuu Jesús ne gunabadiidxacaʼ laabe: «¿Xiñee laadu ne ca fariseu nápadu costumbre de guni ayunardu peru ca discípulo stiluʼ coʼ pue?» (Mateo 9:14). Para ca fariseu, ti costumbre si ni runi religión sticaʼ nga guni ayunarcaʼ. Despué, guníʼ Jesús ti historia de modo biʼniʼ orar ti fariseu orgulloso: «Cudieeʼ xquixe peʼ lii Dios, purtiʼ cadi nacaʼ casi xcaadxi binni [...]. Chupa biaje lu ti semana runeʼ ayunar» (Lucas 18:11, 12). Zándaca laaca maʼ pur costumbre nga biʼniʼ ayunar ca discípulo stiʼ Juan, cásica hombre ni bizeeteʼ Jesús riʼ. O laaca zándaca bíʼnicaʼ ni purtiʼ nuucaʼ triste deguyoo Juan. Pa zacá ni la? zándaca pur nga gunabadiidxacabe Jesús xiñee qué runi ayunar ca discípulo stiʼ para gusihuínnicaʼ laaca nuucaʼ triste pur ni bizaaca Juan.

Gudixhe Jesús ti ejemplu para bicabi laacabe: «Ora cayaca ti guendaxheelaʼ, qué riuu diʼ ca xhamigu novio triste laga nuuné novio que laacaʼ, ¿njaʼ? Peru zedandá dxi ziaaxhacaʼ novio que, ne óraque maʼ zuni ayunarcaʼ» (Mateo 9:15).

«Novio» ca nga Jesús, casi maca guníʼ Juan ni (Juan 3:28, 29). Laga nuuruʼ Jesús né ca discípulo stiʼ, cadi caquiiñeʼ guni ayunarcaʼ. Peru ora gátibe, zuunacaʼ pur laabe ne qué zocaʼ. Peru, ora guiasa Jesús de lade gueʼtuʼ la? cadi caquiiñeʼ guni ayunar ca discípulo stiʼ, purtiʼ guizáʼ ziéchecaʼ.

De raqué la? gudixhe Jesús xhupa ejemplu: «Guirutiʼ riquiiñeʼ ti ndaa lari cubi para gucaa ti parche lu ti lari yooxhoʼ, purtiʼ ora guidopa lari cubi que zusigaani lari yooxhoʼ que ne jma xiroobaʼ zareza ni. Laaca qué rigaacabe vinu cubi ndaaniʼ odre yooxhoʼ. Pa gúnicabe ni la? zareza odre que ne zaxii vinu que ne maʼ qué zaquiiñeʼ odre que. Ni runi binni nga rigaa vinu cubi ndaaniʼ odre cubi ne zacá riaapaʼ guiropaʼ ni» (Mateo 9:16, 17). ¿Xi nuu Jesús gusiidiʼ laacabe yaʼ?

Nuu Jesús guluíʼ ca discípulo stiʼ Juan cadi caquiiñeʼ chinanda ca discípulo stiʼ costumbre yooxhoʼ stiʼ ca judíu, casi guni ayunarcaʼ. Qué ñeeda diʼ Jesús lu Guidxilayú para guchii lu guiráʼ ni cayaca ne ganda guindaaruʼ sistema religioso yooxhoʼ ni mayaca guinitilú que, casi ora rucaacabe parche lu ti lari yooxhoʼ para guindaa. Sínuque bisiidiʼ Jesús modo gaca adorar Dios, maʼ gadxé de modo runi ca judíu de tiempu que, purtiʼ laacaʼ rinándacaʼ costumbre stiʼ binni. Rihuinni dxichi cadi zeeda gucaa Jesús ti parche de lari cubi lu ti lari yooxhoʼ, ninca para caʼ vinu cubi ndaaniʼ ti odre yooxhoʼ.