Nuu Jesús ndaaniʼ sinagoga ni nuu Nazaret

Cayaca ti bulla ndaaniʼ guidxi Nazaret. Raca jma de ti iza, biʼniʼ Jesús dxiiñaʼ de carpinteru ndaaniʼ guidxi riʼ, peru bireebe de guidxi riʼ ne guyebe ra nuu Juan para cúʼnisa laabe ne yanna guiráʼ binni caníʼ de ca milagru cayúnibe. Ngue runi, cabeza ca binni de lugar riʼ gúʼyacaʼ gúnibe milagru.

Cabeza si ca binni que xi guni Jesús ora chindá ndaaniʼ sinagoga. Maca biaa Jesús cheʼ ndaaniʼ sinagoga. Raca orar ne riuundaʼ ni bicaa Moisés en voz alta, guiráʼ sábadu ndaaniʼ ca sinagoga (Hechos 15:21). Laaca riuundaʼ ca relatu ni bicaa ca profeta. Zándaca ora bizuhuaa Jesús para guʼndaʼ, binibiáʼ stale de ca ni nuu raqué, purtiʼ stale iza guyé ndaaniʼ sinagoga que. Ne despué, bidiicaʼ laabe rollo stiʼ profeta Isaías, ne biyúbibe relatu ra caníʼ de ungidu stiʼ Jehová, ni gulí né espíritu santu. Yanna riʼ, zeeda relatu riʼ lu libru stiʼ Isaías capítulo 61 versículo 1 ne 2.

Biindaʼ Jesús ca diidxaʼ ni caníʼ de ungidu ni maca biete gueeda que, ne ungidu ca zaníʼ zaca liberar ca ni deguyoo, zuuyaʼ ca ciegu ne zedandá iza guni aceptar Jehová binni. Ora biluxe biindaʼ Jesús rollo que, bidii ni ayudante nuu ra sinagoga que ne gurí. Guiráʼ ca binni que biiyadxicaʼ Jesús. Ne zándaca despué de guniʼbe ti ratu, gúdxibe laacaʼ ca diidxaʼ riʼ: «Yannadxí cayaca cumplir parte de Stiidxaʼ Dios ni binadiágatu riʼ» (Lucas 4:21).

Guiracaʼ bidxagayaacaʼ purtiʼ guizáʼ «sicarú ca diidxaʼ ni caniʼbe» que ne caníʼ stiidxacaʼ: «¿Cadi laabe nga xiiñiʼ José que la?». Bidii Jesús cuenta racalaʼdxiʼ ca binni que gúʼyacaʼ gúnibe milagru cásica huayúnibe ndaaniʼ xcaadxi guidxi. Ngue runi, gúdxibe laacaʼ: «Dxandíʼ peʼ zábitu naa ni ná dichu riʼ: “Doctor, bisianda laca lii”. Ne laaca zaniʼtu: “Biʼniʼ ndaaniʼ xquídxiluʼ ca cosa ni binadiágadu bíʼniluʼ Capernaúm”» (Lucas 4:22, 23). Zándaca para ca binni de Nazaret, primeru nga ñúnibe ca milagru que ndaaniʼ xquídxibe para ñacanebe laacaʼ, peru cumu qué ñuni Jesús ni la? guníʼ íquecaʼ cayuni despreciarbe laacaʼ.

Cumu nanna Jesús xi caníʼ ique ca binni que la? gudxi laacabe caadxi cosa ni huazaaca guidxi Israel. Primé, gúdxibe laacaʼ neca guyuu stale viuda ndaaniʼ guidxi Israel ca dxi bibani Elías, peru qué nuseendacabe Elías ra nuu ca viuda riʼ, sínuque guyebe Sarepta, ti guidxi ni riaana gaxha de Sidón, ra lidxi ti viuda ni cadi israelita laa. Raqué bíʼnibe ti milagru ni bilá gunaa riʼ ne xiiñiʼ (1 Reyes 17:8-16). Laaca bisiene Jesús laacabe, ca dxi bibani Eliseo guyuu stale binni guca huará de lepra ndaaniʼ guidxi Israel, peru ti hombre si de Siria ni láʼ Naamán nga bisianda profeta que (2 Reyes 5:1, 8-14).

¿Xi biʼniʼ ca binni nuu ra sinagoga que ora binadiágacaʼ ni guníʼ Jesús yaʼ? Bidxiichicaʼ, zándaca biʼniʼ sentir ca binni riʼ gudxi Jesús laacaʼ ni bizaaca guidxi Israel, para guluíʼ nisi racaláʼdxicaʼ puru si para laacaʼ ne qué gápacaʼ fe. Ngue runi, biasa ca binni que ne guleecaʼ Jesús ndaaniʼ guidxi que ne yenecaʼ laabe dede punta dani ra zuba guidxi Nazaret para gusábacaʼ laabe de raqué. Peru gunda biree Jesús lu nácabe ne guyé Capernaúm, ruaa nisadóʼ ni riaana ladu noroeste stiʼ Galilea.