Ñee maca nanna Dios zuchee Adán ne Eva la?

ORA riníʼ binni de dxi bichee Adán ne Eva ne ora ruzeetecaʼ xiñee nuu stale cosa malu ndaaniʼ Guidxilayú riʼ, stale de laacaʼ nabé rinabadiidxacaʼ: «Pa nanna Dios guiráʼ cosa, ñee cadi laaca ñánnabe pa zucheené Adán ne Eva laabe la?».

Gudíxhepeʼ lii ñánnabe ni. Xi nusihuinni nga yaʼ. Primé la? Nusihuínnini nuu ra ruchee Dios, ni bizáʼ guiráʼ xixé ni nuu. Ñanda niníʼ binni cadi jneza cani runi Dios, rucaachibe tu nácabe ne qué riabe binni. Pa ñaca ñánnabe cadi jneza chiguiree ca cosa ca la? ñanda nininu malu laabe o cadi jneza bíʼnibe ra bizaʼbe Adán ne Eva. Ne ni jma feu nga né laabe ñápabe donda —o laapebe ñápabe donda— de guiráʼ yuubaʼ napa binni.

Peru, ñee nuu razón para guiníʼ íquenu cadi jneza nga ni gudixhe ique Jiobá Dios guni la? Guidúʼyanu xi caníʼ Stiidxaʼ Dios de ca guenda stibe ne cani bizaʼbe.

«Nabé galán» guiráʼ cani

Libru stiʼ Génesis cuzeeteʼ xi biʼniʼ Dios biluxe bizáʼ si guiráʼ cosa —dede né Adán ne Eva—, Dios biiyaʼ «guiráʼ ni biʼniʼ» ne guníʼ «nabé galán cani» (Génesis 1:31). Adán ne Eva guyaʼcaʼ biáʼsipeʼ para guibánicaʼ ndaaniʼ Guidxilayú riʼ ne qué ñápacaʼ ra niguiñeyúcabe laacaʼ. Nga runi ñanda ñúnicabe guiráʼ ni ninabaʼ Dios laacabe. Ne laaca guyáʼcabe «casi Dios» (Génesis 1:27). Pur nga ñanda ñápacabe ca guenda stiʼ Dios, ñácacabe binni nuu xpiaaniʼ, ñannaxhiicabe, qué nucheecabe, ñúnicabe ni jneza ne ñácacabe nachaʼhuiʼ. Pa ñápacabe ca guenda ca la? ñúnicabe stale cosa ni ñacané laacabe lu xquendanabánicabe ne laaca ñúnicabe ca cosa ni riuulaʼdxiʼ Bixhózecabe ni nuu Guibáʼ.

Jiobá bisaana lu náʼ guiropaʼ binni ni nuu xpiaaniʼ ne ni qué ruchee riʼ cuicaʼ xi gúnicaʼ. Jiobá qué nuzáʼ diʼ laacabe para gúnicabe ni na casi ti robot ni maca nexheʼ xi guni. Nga runi jneza biʼniʼ Jiobá ra bisaana lu nácabe cuícabe xi gúnicabe. Yanna, tu laa riuulaʼdxiʼ guni sti binni ni na purtiʼ si naquiiñeʼ guni ni ne cadi purtiʼ nadxii laabe yaʼ. Casi ridúʼyanu ca, para Jiobá nabé risaca ti cosa: de Adán ne Eva si ñale nuzuubacaʼ stiidxabe. Ni racaláʼdxibe nga nuzuubacaʼ stiidxabe de guidubi ladxidoʼcaʼ (Deuteronomio 30:19, 20).

Ti Dios ni runi jneza ne nachaʼhuiʼ

Jiobá, ti Dios ni ruzeeteʼ Biblia modo laa, qué zanda guni cosa malu ne qué zanda guchee. Lu Salmo 33:5 rieeteʼ nadxii Dios ni jneza. Ne Santiago 1:13 na: «Qué zanda uquiinde ni nadxaba Dios, ne qué ruquiinde Dios irutiʼ». Bisihuinni Jiobá runi ni jneza ne nadxii Adán ora gudxi laabe: «Guiráʼ cuananaxhi stiʼ yaga ni nuu ndaaniʼ jardín ca zanda goloʼ dede guidxá ndaaniluʼ. Peru cuananaxhi stiʼ yaga stiʼ guendananna ni jneza ne ni cadi jneza cadi liica goloʼ ni, purtiʼ dxi lii goloʼ ni [...] zátiluʼ» (Génesis 2:16, 17). Casi bidúʼyanu ca, bisaana Jiobá lu náʼ Adán ne Eva cuicaʼ guendaguti o guendanabani ni qué zaluxe. Peru, ñee ñabi Dios laacabe cadi gucheecabe pa maca nanna zucheecabe la? Pa ñúnibe zacá, nusihuínnibe riniʼbe ti cosa ne gadxé ni rúnibe. Qué ñuu dxi ñabi Dios laacabe nibícabe ñúnicabe xiixa cosa ni qué zanda gúnicabe, purtiʼ laabe nadxiibe ni jneza.

Biblia laaca rusiidiʼ naca Jiobá ti Dios nachaʼhuiʼ (Salmo 31:19). Jesús guníʼ: «Lácaxa nuu tuuxa [...] pa ninaba xiiñi laa ti gueta, nudii ti guie. O pa ninaba be laa ti benda, ñee nudii laabe ti beenda la? Pa laatu cadi nachaʼhui tu casi Dios ne nanna tu gudii tu ni galán xiiñi tu la? lágaxa Bixhoze tu ni nuu ibáʼ qué gudii ni galán cani inaba laa» (Mateo 7:9-11). Lu relatu riʼ rihuinni rusigaʼdeʼ Dios «ni galán» binni. Pur modo bizáʼ Jiobá Adán ne Eva ne pur guluube laacaʼ ndaaniʼ ti paraísu, rihuinni dxíchica nabé nachaʼhuiʼ Jiobá ne rudiibe stale cosa galán binni. Ñee nudii Jiobá laacabe ca cosa riʼ pa nanna zuníticabe cani la? Ni nánnanu nga Dios ni nadxii laanu ne ni runi ni jneza, cadi laa diʼ napa donda pur bichee Adán ne Eva.

«Tobi lucha Dios nga riene chaahui irá cosa»

Stiidxa Dios cayabi laanu: «Tobi lucha [Jiobá] nga riene chaahui irá cosa» (Romanos 16:27). Ca ángel ni nuu guibáʼ laapecaʼ biiyacaʼ pabiáʼ nuu xpiaaniʼ Dios. Ora biiyacabe guyáʼ Guidxilayú ne guiráʼ cosa sicarú ni nuu ndaaniʼ ni bizulú «bisisácacaʼ laabe ne ridxi nadipaʼ» (Job 38:4-7). Nga runi, nánnanu cayuuyacabe guiráʼ ni cayaca ndaaniʼ jardín ni guyuu Edén que. Yanna, bizáʼ si Dios Guibáʼ ne Guidxilayú, ñee nilúxebe cani bizaʼbe nezalú ca ángel que ra ñúnibe chupa binni ni nánnacabe zuchee, pa nácabe ti Dios ni nabé nuu xpiaaniʼ la? cadi liica naquiiñeʼ guiníʼ íquenu nga.

Neca zacá, zándaca chuʼ tu guinabadiidxaʼ: «Pa nanna Dios guiráʼ cosa, xiñee qué ñánnabe xi chiguizaaca yaʼ». Dxandíʼ, pur nuu xpiaaniʼ Jiobá nga randa «riníʼ ximodo riluxe xiixa ni ruzulú» (Isaías 46:9, 10). Peru cadi pur nga ñúnibe ni guiráʼ biaje, cásica qué riquiiñebe poder stibe guiráʼ ora. Cumu nuu xpiaanibe la? laabe riguíxhebe pora zanda gánnabe xiixa ni chiguizaaca ne pora coʼ. Ne rúnibe ni ora ruuyabe zanda.

Zeeda gácani casi ora nidúʼyanu ti videu ni biʼniʼ grabar tuuxa ra gudxite chupa equipu. Pa rápanu gana la? zanda gusanu videu ca dede ra maʼ chiguilúxeni para guidúʼyanu tu biʼniʼ ganar. Peru cadi caquiiñepeʼ gúninu zacá. Zándaca ni jma racaláʼdxinu nga guidúʼyanu dede ra bizulú partidu ca. Zacaca nga biʼniʼ Dios ni bizáʼ laanu, laabe qué ninabe ñánnabe xi chiguni Adán ne Eva. Lugar de ñúnibe nga gulézabe para gúʼyabe xi guizaaca.

Casi maʼ bidúʼyanu ca, dxi bizáʼ Jiobá binni cadi bizaʼbe laacaʼ casi ti robot ni maca nexheʼ xi guni. Cumu nuu xpiaanibe ne nadxiibe binni la? bisaanabe lu nacaʼ quixhe íquecaʼ xi gúnicaʼ. Pa niguixhe íquecabe nuzuubacabe stiidxabe, nusihuínnicabe nadxiicabe laabe ne cudiicabe xquíxepeʼ laabe. Ne zacá ñuucabe nayecheʼ ne laaca nusiéchecabe Bixhózecabe ni nuu guibáʼ (Proverbios 27:11; Isaías 48:18).

Stale biaje rieeteʼ lu Biblia qué niná diʼ Dios ñanna xi chiguizaaca. Casi dxi chiguuti Abrahán Isaac, gudxi Jiobá laabe ca diidxaʼ riʼ ora maʼ chigúnibe ni: «Yanna huaxa maʼ nannaʼ dxandíʼ ridxíbiluʼ Dios, purtiʼ qué nucueezaluʼ lii de nudiiluʼ naa xiiñiluʼ» (Génesis 22:12). Ne stale biaje rieeteʼ luni «bininácabe ladxidoʼbe». Biʼniʼ sentirbe sicaríʼ pur xpiaʼ caadxi binni. Cadi zacá diʼ ñuni sentirbe pa ñaca maca nánnabe qué zuni ca binni que ni jneza (Salmo 78:40, 41; 1 Reyes 11:9, 10).

Pur guiráʼ ni maʼ bizéʼtenu ca ridúʼyanu qué niná diʼ Dios ni nuu xpiaaniʼ riʼ niquiiñeʼ poder stiʼ para ñanna pa zuchee Adán ne Eva. Racá ridúʼyanu cadi jneza diʼ ñuni Dios nuzáʼ binni pa maca nánnabe xi zazaacacaʼ.

«De Dios nga reeda enda ranaxhii»

Binidxabaʼ nga bicaa Adán ne Eva gudxiidéchecaʼ Dios ndaaniʼ Jardín ni guyuu Edén que, ne pur nga nuu yuubaʼ, guendaruchee ne guendaguti. Nga runi, Biblia na naca Binidxabaʼ tuuxa ni ruuti binni. Peru laaca ruzeeteni «rusiguii be ne laabe nga bixhoze gola enda rusiguii» (Juan 8:44). Ne ruyúbibe modo guni crenu cadi jneza diʼ ni biʼniʼ Bixhózenu ni nadxii laanu. Racaláʼdxibe guni crenu napa Dios donda pur bichee Adán ne Eva.

Ni nánnanu nga nadxii Dios binni ne pur laani qué ninabe ñánnabe dede ante pa zuchee Adán ne Eva. Ne nga nga guenda ni jma rusihuínnibe, 1 Juan 4:8 na: «De Dios nga reeda enda ranaxhii». Ora nadxii tuuxa sti binni la? rusihuinni riuulaʼdxiʼ chuʼ binni ca galán. Pur nga gucalaʼdxiʼ Jiobá nibani Adán ne Eva galán.

Nécapeʼ zanda quixhe íquecabe gúnicabe ni cadi jneza, peru Dios qué niná niníʼ ique zucheenécabe laa. Jiobá bidii laacabe guiráʼ ni caquiiñecabe para guibánicabe ne para chúʼcabe nayá nezalú. Ni guleza si Jiobá de laacabe nga nusihuínnicabe nadxiicabe laa ne ruzuubacabe stiidxaʼ. Jiobá nanna ñanda nibani Adán ne Eva sin nucheenecaʼ laabe. Ne ñanda nuzuubacaʼ stiidxaʼ Dios purtiʼ dede binni ruchee gunda biʼniʼ ni casi Abrahán, Job ne Daniel.

Ti cosa ni riguixhedxí ladxidoʼno nga gánnanu zanda cuee Jiobá ca yuubaʼ ni redané guendaruchee ne guendaguti ne racaláʼdxibe gúnibe ni. Jesús guníʼ: «Para Dios gasti ni nagana» (Mateo 19:26). Ne ca guenda ni jma rusihuinni Dios —guendarannaxhii, guendaruni jneza, guendanuuxpiaaniʼ, ne poder— racané cani laanu para guni crenu dxandíʼ zúnibe ni (Apocalipsis 21:3-5).

Pur guiráʼ ni maʼ bizéʼtenu ca ridúʼyanu ti cosa: Dxi bizáʼ Jiobá Adán ne Eva qué gánnadibe pa zucheecaʼ. Dxandíʼ, biuubaʼ ladxidóʼ Dios ora biiyaʼ qué nuzuubacabe diidxaʼ ne laaca biuubaʼ ladxidoʼbe pur guiráʼ yuubaʼ gúpacabe ra bicheecabe. Peru Jiobá nanna ziuu dxi zuchaa modo nabani binni ne zaca ni maʼ gudixhe ique guni lu Guidxilayú ne para binni. Yanna, ximodo zanda gaca ni gudixhe íquebe ca yaʼ. Xi caquiiñeʼ gúninu para cueendunu ni galán de cani chigúnibe ca yaʼ. Pa riuuláʼdxiluʼ gánnaluʼ cani gunabadiidxanu riʼ la? rinábadu lii cadi gusaana de guiziidiluʼ de tema riʼ.a

[Ni cá ñee yaza]

[Ni caníʼ yaza 14]

Cadi bizáʼ diʼ Jiobá binni casi robot ni maca nexheʼ xi guni

[Ni caníʼ yaza 15]

Jiobá nanna ñanda nibani Adán ne Eva sin nucheenecaʼ laabe