3, 4. 1) Xi gudxi Jiobá Adán ne Eva. 2) Xiñee risaca ngue nuzuubacabe diidxaʼ.

³ Neca bidii Dios Adán ne Eva ti guendanabani ni qué zaluxe, naquiiñeʼ guicaacabe bi, gócabe, guécabe ne gásicabe ti guibánicabe, purtiʼ qué nuzáʼ diʼ Jiobá laacabe para cadi chuʼ dxi gáticabe. Peru jma risaca nga chúʼcabe gaxha de Jiobá, purtiʼ de laabe nga ridá guendanabani (Deut. 8:3). Para guibánicabe nayecheʼ la? naquiiñeʼ gúnicabe guiráʼ ni gabi Jiobá laacabe. Ante guzáʼ Jiobá Eva, gúdxibe Adán: «Guiráʼ cuananaxhi stiʼ yaga ni nuu ndaaniʼ jardín ca zanda goloʼ dede guidxá ndaaniluʼ. Peru cuananaxhi stiʼ yaga stiʼ guendananna ni jneza ne ni cadi jneza cadi lica goloʼ ni, purtiʼ dxi lii goloʼ ni, dxandipeʼ zátiluʼ» (Gén. 2:16, 17).

⁴ «Cuananaxhi stiʼ yaga stiʼ guendananna ni jneza ne ni cadi jneza» rusihuínnini derechu ni napa Dios para guiníʼ xii nga ni jneza ne xii nga ni cadi jneza. Adán maʼ nanna caadxi cosa ni zacané laa guni ni jneza, purtiʼ bizáʼ Dios laabe casi laa ne riníʼ íquebe xi gúnibe. Peru yaga que rusietenalaʼdxiʼ ni Adán ne Eva caquiiñecaʼ gabi Jiobá laacaʼ xi gúnicaʼ. Pa gócabe cuananaxhi stiʼ yaga que, casi ñaca ñábicabe Dios ni bizáʼ laacabe: «Cadi caquiiñedu ca ley stiluʼ». Pa gúnicabe ni nácabe, zedané ni stale guendanagana luguiácabe ne luguiáʼ ca xiiñicabe. Pa gócabe cuananaxhi que, záticabe, cásica maca gudxi Jiobá laacabe.

⁷ Dios maca gudxi Adán: «Dxi lii goloʼ [cuananaxhi stiʼ yaga stiʼ guendananna ni jneza ne ni cadi jneza], dxandipeʼ zátiluʼ». Zándaca guníʼ ique Adán «dxi» ni bizeeteʼ Dios nácani ti dxi de 24 hora ne zátibe ante guiaaziʼ Gubidxa. Peru despué, «neza ra rundubi bi nisa», bibiguetaʼ bicaa ridxi Jiobá Adán ne Eva (Gén. 3:8). Cumu nácabe ti juez nachaʼhuiʼ, primé bicaadiágabe xi guiníʼ cani bichee que (Gén. 3:9-13). Despué gúdxibe laacaʼ záticaʼ (Gén. 3:14-19). Yanna, pa ñuutibe laacaʼ oraqueca, qué ñaca diʼ ni gudixhe íquebe para binni guidxilayú (Is. 55:11). Neca nagueendaca gupa Adán ne Eva ca yuubaʼ stiʼ guendaruchee, bidii Jiobá lugar laacabe guibánicabe para gápacabe xiiñicabe ne laacaʼ zanda guibánicaʼ jma galán. Peru para Jiobá gúticabe dxi bicheecabe. Ne cumu para laabe ti dxi zeeda gaca casi ti mil iza la? gúticabe «dxi» bicheecabe (2 Ped. 3:8).