Biluxe clase 123 stiʼ scuela stiʼ Galaad
Gúdxicabe cani binduuxeʼ clase que caañecaʼ
BIAʼ 6,352 binni ni beeda de 41 guidxi roʼ bidagulisaacaʼ sábadu 8 stiʼ septiembre 2007 para gúʼyacaʼ ra biluxe clase 123 stiʼ Scuela stiʼ Galaad stiʼ Watchtower. Guendaridagulisaa que bizuluni las 10:00 a.m. ne Anthony Morris, tobi de cani nuu lu Grupu ni Zaniruʼ, bizulú guendaridagulisaa que. Bíchinu Morris bidii xquíxepeʼ guiráʼ cani nuu raqué, ne despué de guniʼbe chupa chonna diidxaʼ, guniʼbe chigudii Gary Breaux primé libana, ne bíchinu riʼ naca tobi de cani ni nuu lu Grupu ni Ruuyaʼ Modo Raca Dxiiñaʼ Betel stiʼ Estados Unidos.
Xi guníʼ bíchinu Breaux lu libana stiʼ yaʼ. Guniʼbe nabé sicarú modo ruuyaʼ Jiobá guiráʼ cani runi ni na, ne qué ruuyaʼ pa feu o pa galán binni, ne guluube gana laacaʼ gúnicaʼ dxiiñaʼ ti guʼyaʼ Jiobá laacaʼ zacá (Jer. 13:11). De raqué, Gerrit Lösch, tobi de cani nuu lu Grupu ni Zaniruʼ, bizeeteʼ galán cuézanu uguu ndaayaʼ Jiobá laanu pur dxiiñaʼ ni cayúninu (Heb. 11:6). Peru cadi purtiʼ chiguicaanu xiixa gacaláʼdxinu gúninu ni na Jiobá, sínuque naquiiñeʼ gúninu ni purtiʼ dxandíʼ nadxiinu laabe.
William Samuelson, ni ruuyaʼ modo naquiiñeʼ gaca dxiiñaʼ ndaaniʼ ca Oficina para ca Scuela ni nuu Patterson, gúdxibe cani guyé clase que cadi guiaanadxicaʼ de guiniʼcaʼ maʼ zuba Jesús casi Rey. Laaca guniʼbe caquiiñeʼ gúnicaʼ ne guibánicaʼ jneza guiráʼ ora.a Sam Roberson, ni racané bíchinu Samuelson lu dxiiñaʼ stiʼ, bizeetebe galán gúʼyacabe modo naca ca bíʼchicabe ne ca bizáʼnacabe ti cadi gaca nagana para laacabe gannaxhiicabe «iráʼ ca hermanu» (1 Ped. 2:17).
Despué de bicaadiágacabe ca libana riʼ, Mark Noumair, ti maestru ni rusiidiʼ ra Scuela stiʼ Galaad, gunábabe stale de cani guyé clase que guzeetecaʼ xiixa de ni bizaacacaʼ ora canagucheechecaʼ diidxaʼ dxi canazacaʼ clase. Raqué bihuinni nabé riuuláʼdxicabe gucheechecabe diidxaʼ ne racaláʼdxicabe gacanécabe binni. De raqué bíchinu Kent Fischer, ni runi dxiiñaʼ ndaaniʼ Oficina stiʼ Betel ni nuu Patterson, gunabadiidxabe caadxi bíchinu ni nuu lu Grupu ni Ruuyaʼ Modo Raca Dxiiñaʼ Betel stiʼ chonna guidxi roʼ ra nuu misioneru. Ca diidxaʼ ni guníʼ cani gunabadiidxabe que gudixhedxini ladxidóʼ guiráʼ cani cucaadiaga, purtiʼ bisihuínnicani ziuu tu zacané ca misioneru que neza zecaʼ. Ne lade cani cucaadiaga que nuu bixhoze ne jñaa stale de cani guyé clase que. Izak Marais, ti bíʼchinu ni runi dxiiñaʼ ndaaniʼ Oficina ni Racané ca Binni ni Rutiixhi sti Diidxaʼ, gunabadiidxabe ca misioneru ni maʼ xadxí cayuni dxiiñaʼ riʼ, ne cani guníʼcabe que bisihuínnicabe zapa cani chiguzulú dxiiñaʼ riʼ stale guendanayecheʼ.
Geoffrey Jackson, tobi de cani nuu lu Grupu ni Zaniruʼ, bidii libana ni jma risaca stiʼ guendaridagulisaa que. Libana que láʼ: «Xi gúnitu ne guiráʼ ni maʼ bicaadiágatu». Bíchinu Jackson guca misioneru biaʼ veinticinco iza neza gueteʼ stiʼ Pacífico, ne lu libana stibe bisiénebe ca diidxaʼ ni biluxené Jesús lu Libana de lu Dani stiʼ. Raqué Jesús bizeeteʼ de ti hombre huati ne tobi nuu xpiaaniʼ, ne cada tobi de ca hombre riʼ bicuicaʼ ti yoo. Bisiénebe zándaca guiropaʼ hombre riʼ bicuicaʼ yoo sticaʼ ti lugar si. Xi si la? hombre huati que bicuí lidxi lu yuxi, peru hombre nuu xpiaaniʼ que gundaa gueteʼ dede yendá ra nuu guié ne luni bicuí lidxi. Dxi biaba ti nisaguié ne biete ti bi yooxhoʼ, qué nixá diʼ yoo ni zuba lu guié que, peru yoo ni gurí lu yuxi que bixá (Mat. 7:24-27; Luc. 6:48).
Jesús bisiene tuu ngue zeeda gaca hombre huati que. Laacaʼ nga zeeda gácacaʼ ca binni ni rucaadiaga si, peru qué rúnicaʼ gastiʼ. Peru hombre ni nuu xpiaaniʼ que, cadi rucaadiaga si, sínuque runi guiráʼ ni rucaadiaga. Óraque gudxi bíchinu Jackson cani guyé clase que: «Ra quixhe íquetu gúnitu guiráʼ ni biziiditu de lu Biblia ora maʼ canagucheechetu diidxaʼ, zeeda gácatu casi hombre nuu xpiaaniʼ que». Maʼ para guilúxebe gúdxibe laacaʼ caquiiñeʼ caañecaʼ dede gueteʼ ora chindacaʼ ra chigucheechecaʼ diidxaʼ.
De raqué, cani guyé clase que gucuaacaʼ diploma sticaʼ ne gúdxicabe laacaʼ paraa chigucheechecaʼ diidxaʼ, ne bíchinu Morris bidii laacabe xcaadxi conseju ni naquiiñeʼ chinándacabe. Gúdxibe laacaʼ cadi gusaana de chinándacaʼ Cristu ne guinábacaʼ Jiobá gudii stipa laacaʼ. Ne cani guniʼbe que biluxe guendaridagulisaa que.
[Cani cá ñee yaza]
a Grupu ni Rusiidiʼ, ruuyaʼ dxiiñaʼ ni raca ndaaniʼ ca Oficina para ca Scuela ni nuu Patterson, casi Scuela stiʼ Galaad, Scuela stiʼ ca Bíchinu ni Ruuyaʼ Modo Raca Dxiiñaʼ Betel ne Scuela stiʼ ca Binnigola ni Riganna ca Binni Ridagulisaa.
[Cuadru ni zeeda lu yaza 31]
RA CAYEETEʼ XCAADXI DE LAACABE
Zeedacabe de 10 guidxi roʼ
Zécabe ndaaniʼ 24 guidxi roʼ
Pándacabe: 56
Zándaca nápacabe biaʼ: 33.5 iza
Zándaca nápacabe biaʼ 17.9 iza de nuucabe ndaaniʼ xquidxi Dios
Zándaca nápacabe biaʼ 13.8 iza de rúnicabe xhiiñaʼ Dios guidubi dxi
[Dibuju/foto ni zeeda lu yaza 32]
Clase 123 stiʼ Scuela de Galaad stiʼ Watchtower
Cani zuhuaa delante nga cani cá lá primé, de racá maʼ zeeda cani nuu neza déchecabe, ne zeeda lácabe de bigaʼ a ladu derechu.
1) Esparza, E.; Papaya, S.; Bilal, A.; Suárez, M.; Evers, E.; Dimichino, K. 2) Rosa, M.; Fujii, R.; Ratey, O.; Leveton, J.; Van Leemputten, M. 3) Boscaino, A.; Beck, K.; Budanov, H.; Braz, C.; Peltz, K.; Siaw, A. 4) Leveton, S.; Santikko, H.; Conte, S.; Wilson, J.; Rylatt, J.; Pierce, S.; Fujii, K. 5) Rosa, D.; Boscaino, M.; Austin, V.; Rodiel, P.; Bilal, P.; Dimichino, P. 6) Ratey, B.; Czyzyk, D.; Clarke, C.; Riedel, A.; Esparza, F.; Siaw, P.; Van Leemputten, T. 7) Rodiel, J.; Evers, J.; Green, J.; Czyzyk, J.; Santikko, M.; Rylatt, M. 8) Peltz, L.; Austin, D.; Riedel, T.; Beck, M.; Pierce, W.; Conte, S.; Green, S. 9) Suárez, J.; Clarke, J.; Papaya, S.; Budanov, M.; Wilson, R.; Braz, R.