16, 17. 1) Xii nga últimu cosa bizeeteʼ Jesús lu ejemplu stiʼ. 2) Xiñee nánnanu chigácaruʼ ni na ca diidxaʼ ni guninu riʼ.

¹⁶ Gaayuʼ: zuzaaniʼ cani nachaʼhuiʼ. Biluxe Jesús ca diidxaʼ riguixhená stiʼ sicaríʼ: «Ne dxi ca nga guzaani cani nachaʼhui ra runi mandar Dios, casi ruzaani gubidxa» (Mat. 13:43). Padxí ne paraa gaca ni guníʼ Jesús riʼ yaʼ. Zácani guibáʼ, cadi ndaaniʼ Guidxilayú.f Xiñee riníʼ íquenu sicaríʼ yaʼ. Guidúʼyanu chupa razón.

¹⁷ Primeru guidúʼyanu padxí gaca ni na ca diidxaʼ guníʼ Jesús riʼ: «Ne dxi ca nga guzaani cani nachaʼhui». Ora guníʼ Jesús «ne dxi ca» caniʼbe de tiempu gulaacabe guiʼxhiʼ malu que lu guí. Ne zácani ora maʼ ziluxe ca dxi jma nagana. Nga runi, laaca tiempu que nga «guzaaniʼ» dxindxi cani bibí pur espíritu santu. Guiropa, guidúʼyanu paraa chigaca ni. Jesús guníʼ zuzaaniʼ cani nachaʼhuiʼ «ra runi mandar Dios». Xi riníʼ ca diidxaʼ riʼ yaʼ. Riníʼcani zacaa guiráʼ ca xpinni Cristu ni bibí ni nuuruʼ lu Guidxilayú riʼ sellu stiʼ Dios ora guiluxe primé ndaa stiʼ ca dxi jma nagana. De racá, casi guníʼ Jesús lu ca diidxaʼ riguixhená que, zadopa cani bibí para checaʼ guibáʼ (Mat. 24:31). Racá nga guzaanicabe «ra runi mandar Dios» ne guiluxe si Armagedón, zeeda gácacabe xnovia Jesús ne zachaganácabe «Dendxu huiini que» (Apoc. 19:6-9).