Nápanu stale cosa risaca para gudiʼnu binni
1 Guiranu nga nánnanu pabiáʼ risaca guiráʼ ni zeeda lu Stiidxaʼ Dios (Sal. 12:6; 119:11, 14). Ti biaje, despué de guníʼ Jesús caadxi ejemplu de ximodo nga zeeda gaca Reinu stiʼ Dios la? «unaba diidxa be ca discípulu stibe pa biene ca ni gudxi be laaca que». Óraque bicábicaʼ: «Biene du, Señor». Para rabi be laacaʼ: «Tobi ni ma riene chaahui ley sti Moisés ne óraque gueda iziidi ni rusiide de modo runi mandar Dios la? zeda gaca casi ti ricu ni ribee de lu irá ni napa, caadxi nacubi ne caadxi nayooxhoʼ» (Mat. 13:1-52).
2 Xii nga ca cosa nayooxhoʼ ca yaʼ. Zanda guininu laacani nga ca primé cosa ni bizíʼdinu lu Biblia. Yanna ca nacubi ca yaʼ. Nga nga ca cosa jma nagana ni maʼ ziyénenu ora maʼ cayúʼndanu Stiidxaʼ Dios yanna (1 Cor. 2:7). Xcaadxi de cani nacubi ca nga ni rusiene «mozo ni nuu xpiaaniʼ ne ni runi jneza» laanu (Mat. 24:45).
3 Pa maʼ xadxí de nánnanu cani o pa deruʼ bizíʼdinu cani la? nánnanu nabé risácacani. Nga runi, rúninu stipa pur gúʼndanu Stiidxaʼ Dios para gánnanu ximodo gusíʼdinu binni ca cosa ni jma risaca ni maʼ bizíʼdinu.
4 Ejemplu stiʼ Jesús. Jesús biʼniʼ stale stipa pur gusiidiʼ binni cani zeeda lu Stiidxaʼ Dios, ne zaqué bisihuínnibe pabiáʼ risácacani para laabe. Ne neca maʼ bidxágabe bisiidirube binni de ca diidxaʼ ni risaca ca (Juan 4:6-14).
5 Jesús gunnaxhii ca binni ni huaxiéʼ nanna de Stiidxaʼ Dios, ngue nga ni bicaa laabe gusiidibe laacaʼ ca cosa jma risaca para guilacaʼ (Sal. 72:13). Biabe ca binni ni racalaʼdxiʼ guiziidiʼ de Dios, ngue runi «bisiidi [be] laaca [...] stale cosa» (Mar. 6:34).
6 Naquiiñeʼ gúninu cásica bíʼnibe. Pa rusisácanu ca cosa ni rizíʼdinu, cásica Jesús la? ziuuláʼdxinu gusíʼdinu ca cosa sicarú ni zeeda lu Biblia ca xcaadxi binni (Pro. 2:1-5). Zaninu de laani de guidubi ladxidoʼno neca maʼ bidxáganu (Mar. 6:34). Gúninu stipa pur gucheechenu diidxaʼ ratiica nuunu, purtiʼ nabé rusisácanu ca cosa ni cazíʼdinu de lu Stiidxaʼ Dios.