Ñee nannuʼ ni la?
Xi guiráʼ bizáʼ Jesús dxi guca carpinteru
Jesús biziidiʼ dxiiñaʼ de carpinteru purtiʼ José nga bisiidiʼ ni laabe. Nga runi, dxi nápabe treinta iza ne bizulú bicheechebe diidxaʼ la? maʼ runibiáʼ binni laabe casi ti carpinteru ne laaca binibiáʼcabe laabe casi «xiiñi carpinteru» (Lucas 3:23; Mateo 13:55; Marcos 6:3).
Zándaca ra gulézabe nabé biʼniʼ mandar binni gaca xiixa cosa de yaga para guniné dxiiñaʼ lu layú, casi aradu ne ayubu para gataʼ xayanni ca maniʼ que. Ca carpinteru que laaca bíʼnicaʼ mexaʼ, asientu, banguhuiiniʼ, guiña, puertaʼ ne pasador stiʼ, ventana ne xcaadxi cosa de yaga. Dxiiñaʼ stícabe nga gúnicabe ni riquiiñeʼ binni para gucuí yoo.
Ca carpinteru ni guyuu dxiqué bisábacaʼ yaga ne jacha, ne bizeeteʼ Juan ni Riguunisa de laani lu ti ejemplu ni guníʼ. Gusabasícabe ca yaga que la? zanda ugácabe ni raqué para gúnicabe xiixa casi ti moriu o chinécabe ra taller stícabe para gúnicabe ni. Rarí ridúʼyanu nadipaʼ nga dxiiñaʼ bíʼnicabe ca (Mateo 3:10, NM). Isaías laaca bizeeteʼ de xcaadxi cosa ni biquiiñeʼ ca carpinteru ni guyuu ca dxi stibe, nabe: «Ni runi dxiiñaʼ ne yaga la? riguubiaʼ ni ne ti doo; rutieebe ni ne gis naxiñá; riquiiñebe ti lima raayaʼ para gúnibe ni modo racaláʼdxibe; ne riquiiñebe ti compás para gutieebe modo chigúnibe ni» (Isaías 44:13). Ca arqueólogo ca laaca nacaʼ dxandíʼ nga biquiiñeʼ binni sierra, martiu de guié ne clavu de bronce tiempu ni ruzeeteʼ Biblia (Éxodo 21:6; Isaías 10:15; Jeremías 10:4). Nga runi, zanda guininu biquiiñeʼ Jesús guiráʼ ca cosa riʼ dxi biʼniʼ dxiiñaʼ de carpinteru.
Tuu ngue ca binni ni guyuu ra «bancu» dxiqué, ne xi dxiiñaʼ bíʼnicaʼ
Lu ti ejemplu ni guníʼ Jesús bizeeteʼ de ti esclavu ni qué ñanna niquiiñeʼ bueltu ni bidii xpixuaanaʼ laa. Lu ejemplu ca guníʼ xpixuaanabe sicaríʼ: «Xiñee qué niguu lu bidxichi stinne lu bancu, ne ora ñenda la? ma ñaca ni jma stale» (Mateo 25:27).
Dxiqué la? gastiʼ bancu naroʼbaʼ casi cani runibiaʼnu yanna. Peru guyuu binni biʼniʼ dxiiñaʼ ra bancu, ca binni que biquíxecaʼ bueltu nabé caru ne laaca gudíxecaʼ pur chisaana binni bueltu ra nuucaʼ. Ti libru ni láʼ: The Anchor Bible Dictionary na maca ruquixe binni bueltu guidxi Grecia lu siglu lV ante de ca dxi stiʼ Jesús. Ne dxi guyuu guendariuudxi guidxi Roma la? xpueltu binni biʼniʼ ganar lu ti iza biaʼ 4 ne 6%.
Ley stiʼ Moisés que na cadi naquiiñeʼ diʼ guquíxecabe bueltu binni pobre (Éxodo 22:25). Peru ruluíʼ ca binni pobre que si nga qué nuquíxecabe bueltu. Yanna, ejemplu bizeeteʼ Jesús que rusihuinni maca biaa binni quíxecabe laa pur bueltu chisaana ra nuu ca binni runi dxiiñaʼ ra «bancu», o cani ruquixe bueltu que. Racá ridúʼyanu biquiiñeʼ Jesús ejemplu ni maca runibiáʼ binni para gusiidiʼ.