Ñee nannuʼ ni la?

Xiñee bisianda Jesús hombre nacheepaʼ lú que chaahuidugá

Lu Marcos 8:22 dede 26 cá modo bisianda Jesús ti hombre nacheepaʼ lú de guidxi Betsaida. Textu riʼ ruzeeteʼ guxúbibe nisa xhinni lú, de raqué gunabadiidxabe laa xi cayuuyaʼ. Sicaríʼ bicabi hombre que: «Ruuya binni peru ruuya laaca casi yaga zizá». Pur modo bicabi hombre riʼ rihuinni caʼruʼ diʼ guuyaʼ chaahuiʼ, óraque gudaʼnaʼ Jesús lube sti biaje ne ndiʼ nga ni guca: «Ma biiya chaahui be ne bianda be. Ma ruuya be irá cosa nayaʼniʼ». Yanna, xiñee bisianda Jesús hombre nacheepaʼ lú que chaahuidugá yaʼ.

Biblia cadi cuzeeteʼ diʼ xiñee, peru guzéʼtenu xiixa ni zanda gacané laanu guiénenu ni. Tuuxa ni nacheepaʼ lú maʼ raca stale iza, o dede dxi gule nacheepaʼ lú la? maʼ gadxé si zácani para laa ora gueeda guuyaʼ. Quíxhenu ti ejemplu, guyuu ti tiempu biquiiñecabe caballu poni para guni dxiiñaʼ ndaaniʼ ca mina guyuu dxiqué. Cumu xadxí ngue riuucame ra nacahui la? biaacame ni, ngue runi ora cueecabe laacame naquiiñeʼ tiidiʼ guidubi ti dxi para guiaa lúcame xpiaaniʼ Gubidxa. Jma que nga nga ni biʼniʼ sentir xa hombre nacheepaʼ lú que. Ca dxi stinu riʼ, nuu biaje huasianda ca doctor ca caadxi binni nacheepaʼ lú. Peru, cumu stálepeʼ cosa nacubi nga cayuu lu xquendabiaanicabe pur guiráʼ ni cayuuyacabe la? dede rusidxaga ni laacabe. Nuu biaje ridxé lúcabe ne qué redasilú laacabe xi láʼ xiixa ni nabé runibiáʼ binni purtiʼ deruʼ cayuuyacabe ni, cayuuyacabe stale cosa de gadxé gadxé color ne de gadxé gadxé modo. Peru ra zidiʼdiʼ dxi maʼ ziyunibiáʼ xquendabiaanicabe guiráʼ ni ruuyacabe.

Zándaca bisianda Jesús hombre nacheepaʼ lú que chaahuidugá para guluiʼbe nadxiibe ne rizaaláʼdxibe laa. Bisianda si Jesús lú hombre que, «ma [biʼ]ya be irá cosa nayaʼniʼ» ne maʼ biénebe guirá ni biiyabe.

Xiñee guca nagana para binni guʼndaʼ ca rollo ni guyuu tiempu stiʼ Jesús que

Ca yaza ni biquiiñecabe dxiqué para bíʼnicabe ca rollo que gúpacani 23 hasta 28 centímetru de ziuulaʼ ne 15 hasta 23 centímetru de xilaga. Riguíxhecabe ca yaza riʼ tobi cueʼ stobi para guquiidicabe cani o quíbacabe cani ne hilu de linu, nuu biaje biquiiñecabe yaza jma ziuulaʼ. Rollo stiʼ Isaías ni bidxélacabe gaxha de mar Muerto que nápani diecisiete yaza de pergamino, o guidiladi maniʼ ni biquiiñeʼ dxiqué para gucaacabe, biaʼsi 7 metru nápani de ziuulaʼ. Zándaca laaca biaʼ ca nga ziuulaʼ rollo stiʼ Isaías ni biquiiñeʼ Jesús ndaaniʼ yuʼduʼ stiʼ Nazaret que (Lucas 4:16, 17).

Alan Millard bicaa de ca rollo ca lu libru stiʼ ni láʼ Discoveries From the Time of Jesus (Ni bidxélacabe de tiempu stiʼ Jesús): «Binni ni cayuundaʼ libru [o rollo] que, rinaazeni ne guiropaʼ chú náʼ, ladu bigaʼ ca maʼ ziuchiabe ni ne ladu derechu maʼ ziuchendabe ni biaʼ ra maʼ ziyuundabe. Para yendá Jesús lu capítulo 61 stiʼ Isaías, ni biindabe ndaaniʼ yuʼduʼ que la? gúpabe xidé bichiabe ne bichéndabe casi guidubi naca rollo que».

Dxiqué qué gapa diʼ libru stiʼ Isaías capítulo ne versículo casi nuuni yanna. Nga runi, ora bidiicabe rollo stiʼ Isaías que Jesús ndaaniʼ yuʼduʼ stiʼ Nazaret que, gúpabe xidé biyúbibe historia ni cá lu Isaías 61:1, 2 ni nápanu lu Biblia stinu yanna. Nagueenda bidxela Jesús ni, ne nga rusihuinni nabé biindabe Stiidxa Dios.