Cadi gudiʼnu lugar chuʼ ni gucueeza laanu para guininu ca diidxaʼ nacubi ne galán ca

RA PUERTAʼ stiʼ guidxi Samaria que nuu tapa hombre ni napa lepra canabaʼ guna ne guirutiʼ tu gudii laacabe gastiʼ. Ca siriu que naguucaʼ leʼ guidxi que ne ca binni guidxi que maʼ cayáticaʼ purtiʼ gastiʼ ni gocaʼ. Ne qué zanda diʼ chúʼcabe ndaaniʼ guidxi que para sícabe ni gócabe purtiʼ nabé caru ni. Dede nuu tu laa maʼ gudó ti binni raqué (2 Rey. 6:24-29).

Ca hombre napa lepra que guníʼ íquecaʼ checaʼ ra riaana ca soldadu siriu que huaxhinni. Purtiʼ ngueca si zareeni laacabe pa qué chécabe. Peru dxidóʼ nuu raqué ora yendácabe. Biiyacabe liibi ca caballu ne ca burru que, peru guirutiʼ tu cayapa laacame ne nin ti soldadu qué guinni raqué. Bidxagayaacabe ni biiyacabe, nga runi guluu lúcabe ndaaniʼ tobi de ca yoo de lari stiʼ ca binni que ne biiyacabe guirutiʼ guinni ndaaniʼ ni. Laacabe guyuucabe ne gudócabe ne güecabe guiráʼ ni nuu raqué. Laaca biiyacabe stale cosa de oro ne de plata, lari sicarú ne xcaadxi cosa risaca. Guiráʼ ni gunda gucuaacabe yenécabe ne bicaachicabe cani ne bibiguétacabe para guicaacabe xcaadxi. ¡Ca siriu que bisaanacaʼ ra riaanacaʼ! Xiñee yaʼ. Jiobá biʼniʼ ti milagru para gunadiaga ca siriu que casi ridxi stiʼ stale soldadu ni chitinde. Laacabe guníʼ íquecabe nuu tu chigucaalú laacabe, ngue runi biree guxooñecabe ne bisaacabe guiráʼ stícabe.

Ca hombre napa lepra que yecaarucaʼ jma cosa, málasi bietenaláʼdxicabe ca binni de Samaria cayáticaʼ purtiʼ gastiʼ ni gocaʼ ne bichiiñaʼ ngue xquendabiaanicabe. Sicaríʼ guníʼcabe: «Cadi jneza diʼ ni cayúninu. ¡Ndiʼ nga dxi para guininu diidxaʼ nacubi ne galán!». Ngue runi nagueendaca guyécabe ndaaniʼ guidxi que para gábicabe ca binni que xi biiyacabe (2 Rey. 7:1-11).

Cásica ca hombre ni gupa lepra que, laanu laaca nabáninu lu ti «dxi para guininu diidxaʼ nacubi ne galán». Xii nga diidxaʼ nacubi ne galán ca yaʼ. Laani nga ni guníʼ Jesús ora bizeeteʼ de «seña ihuinni dxi mayaca [...] iluxe guidx[i]layú riʼ»: «Ne zuiʼ cabe stiidxa Dios de idubi naca guidxilayú para ganna irá xixé guidxi modo runi mandar, ne dxi que ru nga iluxe guidxilayú riʼ» (Mat. 24:3, 14). Xi zucaa nga laanu gúninu yaʼ.

Zusiáʼndanu dxi ca pa guicá íquenu ni ricá ique binni

Ora biiyaʼ ca hombre ni napa lepra que guiráʼ ni bisaana ca siriu que la? biechenecaʼ ni dede bisiaandacaʼ ximodo nuu ca binni de Samaria. Jma gucuá íquecabe ni caquiiñesícabe. Laanu laaca zanda guizaacanu zacá. Purtiʼ Jesús laaca guníʼ «zaca gubiña» ora maʼ guiluxe guiráʼ cosa malu nuu yanna riʼ (Luc. 21:7, 11). Jesús gudixhená ca discípulo stiʼ ne ca diidxaʼ riʼ: «Laguuya gá laatu cadi ma canazá tu canaxudxi tu ne nisi icá ique tu ni ricá ique binni ni qué runibiáʼ Dios» (Luc. 21:34). Nga runi, naquiiñeʼ gápanu laanu para cadi guicá íquenu ni ricá ique binni guidxilayú dede gusiáʼndanu maʼ nabáninu «dxi para guininu diidxaʼ nacubi ne galán» ca.

Guidúʼyanu ni bizaaca Blessing, ti gunaa xpinni Cristu ni nabé bicaa ique guni xhiiñaʼ Dios. Laabe gúcabe precursora dxi mayaca guilúxebe scuela stibe. Despué bichaganabe ti betelita ne laaca guca invitarbe chuʼbe betel ni nuu guidxi Benín. Sicaríʼ guniʼbe: «Naa rusiayaʼ ca cuartu nuu raqué ne nabé riuuladxeʼ guneʼ ni». Blessing nuu nayecheʼ purtiʼ maʼ ziné doce iza de cayuni xhiiñaʼ Dios ne laaca nuube nayecheʼ purtiʼ cadi cusiaandabe nabánibe ti «dxi para guininu diidxaʼ nacubi ne galán».

Ca cosa ni zanda cuee tiempu stinu

Dxi biseendaʼ Jesús 70 discípulo stiʼ que gúdxibe laacaʼ: «Ma stale binni cabeza si ucaa diaga stidxa Dios. Tu güi ni nga huaxiéʼ. Yanna lainaba lu Dios guseenda stale tu guni dxiiña ca, ti laa nga xpixuaana ni» (Luc. 10:2). Pa ti hombre ni runi dxiiñaʼ lu layú qué gutopa cosecha stiʼ ora naquiiñeʼ guni ni la? zunítibe stale de laani. Zaqueca nga laanu pa qué gucheechenu diidxaʼ ne stale gana zándaca gueeda gati stale binni. Nga runi laaca guníʼ Jesús ca diidxaʼ riʼ: «Ne cadi ma ziyaana tu neza güi né tu binni diidxaʼ» (Luc. 10:4). Lu diidxaʼ griegu ni bitiixhicabe casi «güi né tu binni diidxaʼ» ca riniʼni «ugapadiuxitu». Laaca riniʼni quiidxicabe binni ne guiniʼnécabe laa xadxí casi rúnicabe ora guidxaagacabe tuuxa xhamígucabe. Cumu ca diidxaʼ ni zinécabe que naquiiñeʼ ganna binni cani nagueenda la? ca discípulo que cadi naquiiñeʼ gudiicaʼ lugar chuʼ ni gucá laacaʼ, sínuque iquiiñecabe tiempu stícabe jneza.

¡Nabé runiti binni tiempu lu ca cosa ni qué risaca! Maʼ stale iza huahuinni televisión ca nga ni ribee tiempu stiʼ binni. Peru, xi zanda guininu de ca celular ca ne ca computadora ca yaʼ. Gunabadiidxacabe biaʼ 1,000 binni huaniisi de guidxi Gran Bretaña, ne bihuinni «casi guirácabe riquiiñecabe 88 minutu lu ti dxi para guiníʼcabe lu teléfono ni nápacabe ralídxicabe, 62 minutu riquiiñecabe lu celular, 53 minutu para gucaacabe correu lu Internet ne 22 minutu para gucaacabe mensaje». Pa ugaabanu guiráʼ ca minutu ca la? biaʼsi nudiicani doble de biaʼ tiempu riquiiñeʼ ca precursor auxiliar para gucheechecaʼ diidxaʼ ti dxi. Zanda guinabadiidxanu laca laanu: «Pabiáʼ tiempu riquiiñeʼ para guneʼ cani maʼ bizéʼtenu ca yaʼ».

Ti guendaxheelaʼ ni láʼ Ernst ne Hildegard Seliger biquiiñecabe tiempu stícabe jneza. Pa ugábanu ca iza biseguyoo ca nazi cada tobi de laacabe la? rudii ni jma de cuarenta iza, peru dxi bireecabe gúcacabe precursor dede dxi gúticabe.

Nabé gucalaʼdxiʼ stale binni nucaa carta ra nuu guendaxheelaʼ ca, ne ñándaca niquiiñecabe tiempu stícabe para ñuundacabe ca carta sticaʼ ne nicábicabe laacaʼ. Peru ni jma bisaca para laacabe nga gúnicabe xhiiñaʼ Jiobá.

Guiranu nga riuuláʼdxinu gucaʼnu ra nuu ca binni ni nadxiinu. Ne gastiʼ naca gúninu nga. Ne galan nga cueenu caadxi tiempu stinu para gúninu xcaadxi cosa. Peru galán nga cadi gunítinu jma tiempu lúcani, purtiʼ pa gúninu zacá zunítinu tiempu ni niquiiñenu para gucheechenu ca diidxaʼ nacubi ne galán ca.

Gucheechenu ca diidxaʼ nacubi ne galán ca ne stale gana

Ti ndaayaʼ para laanu nga nabáninu «dxi para guininu diidxaʼ nacubi ne galán». Cadi gudiʼnu lugar chuʼ xiixa ni gucá laanu casi bizaaca guidapa hombre ni gupa lepra que. Laacabe guníʼcabe: «Cadi jneza diʼ ni cayúninu». Laanu laaca cadi jneza diʼ nga gudiʼnu lugar gucueeza cani riuuláʼdxinu ca laanu o xcaadxi cosa para cadi gucheechenu diidxaʼ ne stale gana.

Nabé sicarú ejemplu bisaana apóstol Pablu para laanu. Sicaríʼ bicaabe ora guníʼ íquebe xi guiráʼ bíʼnibe lu gande iza bicheechebe diidxaʼ, nabe: «Ma bisiide chaahue stiidxa evangeliu sti Cristu» (Rom. 15:19). Zacá ni, Pablu qué nudii lugar ñuu xiixa ni nucueeza laa de nucheeche diidxaʼ ne stale gana. Nga runi, chinándanu ejemplu stibe ne gucheechenu stiidxaʼ Reinu ne stale gana yanna ra maʼ nuunu «dxi para guininu diidxaʼ nacubi ne galán» ca.

[Dibuju/foto ni zeeda lu yaza 28]

Blessing qué nudii lugar cani riuulaʼdxiʼ nucueeza laa ñuni jma lu xhiiñaʼ Dios

[Dibuju/foto ni zeeda lu yaza 29]

Guendaxheelaʼ Seliger biquiiñecaʼ tiempu sticaʼ jneza