«Laguuya gá laatu ne enda ruyubi gapa bidxichi»
«Purtiʼ [neca napa binni stale la?] cadi nga si nga enda nabani sti.» (LUCAS 12:15.)
1, 2. 1) Xii nga rábiluʼ jma rizaalaʼdxiʼ binni gapa yanna. 2) Xi zándaca gucaacabe laanu gúninu.
STALE binni na jma galán zieni laacaʼ ne gastiʼ ziaadxaʼ laacaʼ pa gápacaʼ bidxichi, pa gápacaʼ stale cosa ni risaca, pa guʼyaʼ binni risácacaʼ, pa gápacaʼ ti dxiiñaʼ galán ne gápacaʼ ti familia. Rihuinni dxíchica, neca pobre o ricu binni la? jma nga ricá íquecaʼ guni ganarcaʼ stale bueltu ne guibánicaʼ jma galán. Peru stale binni óraca maʼ qué rizaaláʼdxipecaʼ guiziidicaʼ de Dios, ne zeʼ dxi jma cadale clase binni ca.
2 Ngapeʼ nga ni cuzeeteʼ Biblia chigaca: «Jma nagana zaca ni ora mayaca izaa xhi guidxilayú. Purti zuyubi binni para laa si, ne nisi bidxichi zacá ique caʼ. [...] Zuyubi cabe ni chuʼlaʼdxi cabe lugar de nuyubi cabe Dios. Zaná cabe runi cre cabe Dios, peru qué zusihuinni cabe enda nandxóʼ stiʼ» (2 Timoteo 3:1-5). Cumu lade guiráʼ clase binni ca nga nuu ca xpinni Cristu la? ora tiica si ruquiinde ca binni ca laacabe guiníʼ íquecabe casi laacaʼ ne guibánicabe cásica nabánicaʼ. Yanna, xi zacané laanu guni huantarnu cani ne xi zacané laanu cadi chinándanu binni guidxilayú yaʼ (Romanos 12:2).
3. Xi conseju bidii Jesús chiguidúʼndanu.
3 Jesucristu nga ni culuíʼ laanu xi neza sanu ne racané gaca fe stinu naguidxi, nga runi bisiidibe stale cosa ni risaca ni zanda gacané laanu cadi guicá íquenu bidxichi (Hebreos 12:2). Ti dxi, laga cayacanebe jma binni guiénecaʼ Stiidxaʼ Dios la? málasi bichuuguʼ ti hombre lu stiidxabe para guinabaʼ laabe gúnibe xiixa: «Maistru, gudxi biche icaa nia laa biaʼca ni bisaana né bixhoze laadu». De raqué bidii Jesús ti conseju nabé risaca para laabe ne para ca binni ni cucaadiaga que. Primé la? gúdxibe laacaʼ xi naquiiñeʼ gúnicaʼ para cadi guicá íquecaʼ nisi gápacaʼ bidxichi, ne para guiénecaʼ ne guiníʼ ique chaahuicaʼ de laani la? bidiibe laacaʼ ti ejemplu. Nga runi, pa racaláʼdxinu gacané conseju bidii Jesús ca laanu la? galán guidúʼyanu xi guniʼbe ti gánnanu ximodo chinándanu ni (Lucas 12:13-21).
Cadi jneza diʼ ni gunabaʼ hombre que
4. Xiñee cadi jneza ngue ni biʼniʼ ti hombre ora bichuuguʼ lu stiidxaʼ Jesús.
4 Ante guiniʼné hombre que Jesús la? Jesús maca cusiidiʼ binni xiñee malu nga gusiguiicaʼ ne cayábibe laacaʼ guiniʼcaʼ xpínnibe laacaʼ sin guidxíbicaʼ, laaca cayábibe laacaʼ zacané espíritu santu laacaʼ (Lucas 12:1-12). Risácapeʼ ngue para ca discípulo stibe ne para xcaadxi binni gucaadiaga chaahuicaʼ cani guniʼbe que. Peru laga caniʼbe ca cosa ni risaca ca bichuuguʼ ti hombre lu stiidxabe para gabi laabe guiniʼbe ximodo guilaa herencia ni nuudindené binnilidxi. Guidúʼyanu xi zanda guizíʼdinu lu ni bizaaca riʼ.
5. Xi bisihuinni hombre que pur ni gunábabe Jesús.
5 Sicaríʼ guníʼ ti binni: «Rihuínnica ximodo nga tuuxa pur ni maʼ caníʼ ique ora maʼ cucaadiaga ximodo nga guni adorar Dios». Yanna hombre que la? ruluíʼ si laga caníʼ Jesús de ca cosa ni risaca que, laa caníʼ ique ximodo gapa jma bidxichi. Lu historia ca cadi cayeeteʼ diʼ pa biaʼsi ngue gunábabe Jesús guindaa herencia que. Zándaca gucaláʼdxibe ñacané Jesús laabe purtiʼ ruzuubaʼ binni stiidxaʼ ne runibiáʼ binni laa casi ti juez chaʼhuiʼ (Isaías 11:3, 4; Mateo 22:16). Peru ni bíʼnibe ca bisihuinni cadi jneza diʼ nuube, bisihuínnini qué risaca para laabe guiziidibe de Dios. Yanna laanu yaʼ, ñee cadi laaca naquiiñeʼ guidúʼyanu pa zacá laanu la? Cásixa ora maʼ nuunu ra guendaridagulisaa, ñee jma nagueenda riníʼ íquenu xcaadxi cosa o guiníʼ íquenu xi chigúninu despué la? Lugar de gúninu nga naquiiñeʼ gucaadiaga chaahuinu xi cayeeteʼ ne guidúʼyanu ximodo chinándanu cani ti ganda chuʼnu galán ne Jiobá Dios, Bixhózenu ni nuu guibáʼ, ne zaqueca chuʼnu galán ne ca bíʼchinu ne ca bizáʼnanu (Salmo 22:22; Marcos 4:24).
6. Xiñee qué ñuni Jesús ni gudxi hombre que laa.
6 Intiica razón ni gupa hombre que para gunabaʼ ngue Jesús la? Jesús qué ñuni ni gunábabe laa ne gudxi laabe sicaríʼ: «Tu gudxi lii juez naa para quiize sti binni yaʼ» (Lucas 12:14). Ora guníʼ Jesús ca diidxaʼ ca la? cuzeetebe ni cá lu Ley ni gucuaa Moisés que, luni na ca juez stiʼ ca guidxi ca nga gúʼyacaʼ xi naquiiñeʼ gaca ora nuudinde xiixa herencia (Deuteronomio 16:18-20; 21:15-17; Rut 4:1, 2). Ne Jesús cadi nuu para guni ni gunabaʼ hombre que laa, purtiʼ nápabe xcaadxi cosa jma risaca gúnibe, casi gusiidibe binni de Reinu stiʼ Dios ne gusiidibe binni guni ni na Dios (Juan 18:37). Laanu laaca zanda chinándanu ejemplu stibe. Ximodo yaʼ. Ra cadi gudiʼnu lugar guchiiñaʼ xcaadxi cosa ni qué risaca laanu ne iquiiñenu stipa stinu ne xtiémpunu para gucheechenu ca diidxaʼ nacubi ne galán ca ne gusíʼdinu binni chinanda Cristu (Mateo 24:14; 28:19).
«Laguuya gá laatu ne enda ruyubi gapa bidxichi»
7. Xi guníʼ Jesús ni rusihuinni xipeʼ nuu ndaaniʼ ladxidóʼ binni.
7 Cumu runibiáʼ Jesús xipeʼ nga nuu ndaaniʼ ladxidóʼ binni la? ora gunabaʼ hombre que laabe guiníʼnebe biʼchiʼ que biiyabe cadi jneza diʼ ni nuu ndaaniʼ ladxidóʼ. Ngue runi, lugar de ñabi si Jesús laabe qué zuni ni la? gudxi laabe xii ngue cucaa laabe guicaabe herencia que. Jesús guníʼ: «Laguuya gá laatu ne enda ruyubi gapa bidxichi, purti [neca napa binni stale la?] cadi nga si nga enda nabani sti» (Lucas 12:15).
8. Xi runi ti binni ni ruyubi nisi bidxichi, ne xi zucaa nga laabe gúnibe.
8 Ora ruyubi binni gapa bidxichi la? runi ni cadi purtiʼ si racalaʼdxiʼ gapa bueltu o xcaadxi cosa ni chiguiquiiñeʼ. Caadxi diccionariu na ni racaláʼdxicabe nga gápacabe stale cosa neca cadi jneza modo gápacabe cani ne neca nuu tu stiʼ cani. Nuu biaje rihuinni zacá stale binni purtiʼ qué ridxacaʼ, ne nisi maʼ cuyúbicaʼ gápacaʼ stale cosa peru cadi purtiʼ caquiiñecaʼ ni ne qué riníʼ íquecaʼ pa zuninacaʼ sti binni. Binni ni ruyubi gapa bidxichi la? nisi laani nga maʼ cá ique ne zacá rihuínnini lu cani runi, dede runi ni ti dios stiʼ. Yanna, guieteláʼdxinu ni guníʼ apóstol Pablu que, laabe nabe ora nisi cuyubi binni gapa bidxichi la? jma rusisaca ni que gusisaca Dios, ne guniʼbe qué ziuu ca binni ca lu Reinu stiʼ Dios (Efesios 5:5; Colosenses 3:5).
9. Ximodo zanda guluíʼ binni rachelú gapa ni cadi stiʼ. Guníʼ caadxi ejemplu de laani.
9 Nabé risaca nga guininu bisiene Jesús xi naquiiñeʼ gúninu para cadi guiábanu lu «enda ruyubi gapa bidxichi». Ne gadxé gadxé modo nga rusihuinni binni cá ique nisi gapa bidxichi. Lu chii mandamientu que rieeteʼ caadxi modo: «Cadi naquiiñeʼ gacaláʼdxiluʼ gápaluʼ lidxi sti binni. Cadi naquiiñeʼ gacaláʼdxiluʼ gápaluʼ xheelaʼ sti binni, nin esclavu stibe, nin esclava stibe, nin yuze stibe, nin burru stibe, nin xiixa stiʼ sti binni» (Éxodo 20:17). Biblia cuzeeteʼ stale ejemplu stiʼ ca binni ni bíʼnicaʼ cosa malu purtiʼ guchelucaʼ gápacaʼ ni napa stobi. Binidxabaʼ nga ni biʼniʼ zacá primé, laa biyubi gudxiibaʼ binni laa, gusisácacabe laa ne guiníʼcabe nandxóʼ neca nanna Jiobá si nga naquiiñeʼ gusisaca binni zacá (Apocalipsis 4:11). Yanna Eva la? gucalaʼdxiʼ gaca mandar laasi, purtiʼ guníʼ ique cadi caquiiñeʼ Dios. Ngue runi, bidiibe lugar guyuu tu bisiguii laabe ne pur nga bisaananebe binni donda ne guendaguti (Génesis 3:4-7). Zacaca biʼniʼ ca ángel ni beeda gaca demonio que, laacaʼ «qué nin[acaʼ] ñaana[caʼ] ra bisaana Dios laaca» para guicaacaʼ xiixa ni cadi sticaʼ (Judas 6; Génesis 6:2). Laaca naquiiñeʼ guietenaláʼdxinu de Balaam, Acán, Guehazí ne Judas Iscariote. Lugar de ñuucaʼ nayecheʼ ne ni nápacaʼ la? laga gucuálucaʼ gápacaʼ jma dede bíʼnicaʼ cosa malu ne pur ngue bisabanáʼ Dios laacaʼ o gúticaʼ.
10. Xiñee guníʼ Jesús «laguuyaʼ gá laatu».
10 Jneza ngue guníʼ Jesús «laguuyaʼ gá laatu» ora bizulú cusiene de «enda ruyubi gapa bidxichi». Xiñee yaʼ. Purtiʼ jma nagueenda nga guidúʼyanu pa naca sti binni zacá que guidúʼyanu pa zacá laanu. Yanna, apóstol Pablu na «enda ranaxhii bidxichi nga xcu enda ruchee» (1 Timoteo 6:9, 10). Ne discípulo Santiagu na ora «qué usaana de icá ique [binni] ni cadi jneza la? zuchee» (Santiago 1:15). Nga runi, naquiiñeʼ guidúʼyaganu laanu casi guníʼ Jesús que. Peru cadi cuzéʼtenu ndiʼ para guidúʼyanu pa zacá xcaadxi binni, sínuque para guidúʼyanu xipeʼ nga ni nuu ndaaniʼ ladxidoʼno. Zacá nga zápanu laanu para cadi guiábanu lu «enda ruyubi gapa bidxichi».
Ora napa binni stale cosa ni risaca
11, 12. 1) Xiñee na Jesús cadi galán diʼ guicá íquenu gápanu bidxichi. 2) Xiñee naquiiñeʼ guiníʼ íquenu ca diidxaʼ ni guníʼ Jesús.
11 Nuu sti razón para cadi guyúbinu gápanu bidxichi. Guidúʼyanu ni guníʼ Jesús riʼ: «[Neca napa binni stale la?] cadi nga si nga enda nabani sti» (Lucas 12:15). Naquiiñeʼ guiníʼ íquenu ca diidxaʼ ni guniʼbe ca, purtiʼ yanna riʼ na ca binni ni ruyubi gapa bidxichi ca zabánicaʼ nayecheʼ ne zieni laacaʼ galán pa gápacaʼ stale cosa ni risaca. Ne ca diidxaʼ ni guníʼ Jesús ca biluiʼbe cadi purtiʼ gápanu ca cosa ni risaca nga dxandíʼ zabáninu nayecheʼ, neca ñácani jma stale.
12 Ya, zándaca nuu tu gadxé ni riníʼ ique. Zándaca nácabe jma galán gápacabe stale cosa risaca purtiʼ zacá zabánicabe jma nayecheʼ ne qué ziaadxaʼ laacabe gastiʼ, nga runi ruyúbicabe modo gápacabe cani. Ne pur nga riquiiñecabe stipa stícabe para gápacabe guiráʼ ni racaláʼdxicabe, purtiʼ ruzulúcabe zacá zabánicabe jma galán. Peru cani riníʼ ique zacá la? cusiaandacaʼ ni guníʼ Jesús que.
13. Ximodo naquiiñeʼ guidúʼyanu guendanabani ca ne ca cosa ni risaca ca.
13 Jesús cadi guníʼ diʼ pa jneza o pa cadi jneza nga gapa binni stale cosa. Ni nabe nga cadi purtiʼ nápanu cani guininu nga nga guendanabani. Guiranu nánnanu cadi stale diʼ nga ni caquiiñenu para guibaninenu. Ni caquiiñenu nga caadxi si ni guidoʼno, caadxi si lari para gácunu ne ti lugar ra gásinu. Ca binni ricu ca nápacaʼ stale cosa, yanna ca pobre ca nápacaʼ xidé gúnicaʼ stale dxiiñaʼ para gápacaʼ ni iquiiñesicaʼ. Peru ora gáticabe la? ngueca si riaanacabe, purtiʼ gastiʼ rinécabe (Eclesiastés 9:5, 6). Nga runi, qué zanda diʼ guininu dxandíʼ nabani binni galán ora napa stale cosa. Zanda guininu dxandíʼ ni bizéʼtenu ca ora gánnanu xi clase guendanabani nga guníʼ Jesús.
14. Ra maʼ nánnanu de diidxaʼ ni biquiiñecabe para bitiixhicabe «guendanabani» ca, xi rusiidini laanu.
14 Lu Evangeliu stiʼ Lucas guníʼ Jesús neca napa binni stale cosa la? «cadi nga si nga enda nabani sti». Xi guníʼ Jesús ne ca diidxaʼ riʼ yaʼ. Diidxaʼ griegu zo·é ni biquiiñecabe para diidxaʼ «guendanabani» ca la? qué riquiiñedícabe ni para guiníʼcabe modo nabani binni, sínuque riquiiñecabe ni para guiníʼcabe de guendanabani capeʼ.a Ne ca diidxaʼ ca bisihuinni Jesús cadi laadinu nga riguíxhenu pabiáʼ dxi guibáninu o pa zabáninu guixíʼ neca ricu o pobre laanu, neca nápanu stale cosa ni risaca o nabé rúninu dxiiñaʼ para gápanu ni caquiiñenu. Casi guníʼ Jesús lu libana ni bidii lu dani que, nabe: «Neca ñuu tu xizaa ne nuyubi tu modo nibani tu xcaadxi, ñee ñanda nibani tu jma [...] la?» (Mateo 6:27). Biblia cusiene laanu Jiobá nga «ni rudii guendanabani», ne laasibe nga ni zanda gudiibe «enda nabani ni qué zaluxe» cani qué gusaana de guzuubaʼ stiidxabe, ne zudiibe ni cani cheʼ guibáʼ ne cani guiaana lu Guidxilayú riʼ (Salmo 36:9; 1 Timoteo 6:12, 19).
15. Xiñee na stale binni zacané ca cosa ni risaca ca laacaʼ.
15 Ca diidxaʼ ni guníʼ Jesús ca culuíʼcani laanu qué raca nagana para binni guiníʼ galán nabani ora napa stale bidxichi peru cadi nga diʼ nga laani. Guiráʼ binni gulené donda ne tobi si modo riluxe xquendanabánicaʼ neca ricu o pobre laacaʼ. Moisés, ni riguixhená stiʼ Dios que, guníʼ sicaríʼ: «Ca dxi biaʼ ridxiña ca iza stinu nga setenta iza; ne pa naguídxinu la? ochenta iza, peru puru si guendanagana ne yuubaʼ nga ca iza ca; purtiʼ napa xidé tiidiʼ cani nagueenda ne zidídisinu» (Salmo 90:10; Job 14:1, 2; 1 Pedro 1:24). Nga runi, ca binni ni cadi nuu galán ne Dios nga ni riníʼ ique casi na ca diidxaʼ ni bizeeteʼ apóstol Pablu riʼ: «[Guidoʼno ne guideʼnu], purtiʼ qué ganna nu pa nabani ru nu ixíʼ» (1 Corintios 15:32). Xcaadxi binni ni ruuyaʼ nagueenda ridiʼdiʼ xquendanabáninu ne zanda gunítinu ni ora tiica la? ruyúbicaʼ gápacaʼ bidxichi ne stale cosa ni risaca para cadi cuʼ xaíquecaʼ gastiʼ ne chuʼcaʼ galán. Zándaca riníʼ íquecabe qué zácacabe gastiʼ pa gápacabe stale cosa ni risaca. Nga runi, dede nin riziiláʼdxicabe ti ganda gutálecabe cani, purtiʼ nácabe zacá ziuucabe nayecheʼ ne maʼ gastiʼ ziaadxaʼ laacabe (Salmo 49:6, 11, 12).
Gastiʼ ziaadxaʼ laanu
16. Xii nga ca cosa ni qué risaca lu xquendanabani binni.
16 Dxandíʼ nga jma sicarú zabáninu pa gápanu stale ni guidoʼno, ni gácanu, ne gápanu ra chuʼnu ne stale cosa ni galán. Ne pa gápanu bidxichi la? zándaca dede zacané nga laanu guni tender ca doctor ni jma nanna ca laanu ne zacá ganda guibáninu xhupa xhonna iza. Yanna, ñee jma nayecheʼ zabáninu zacá la? Jma risaca guendanabani ca óraca ne maʼ gastiʼ liica ziaadxaʼ laanu la? Cadi biaʼ iza ribani binni nga ni jma risaca lu xquendanabani o pa napa stale cosa ni risaca. Apóstol Pablu biluíʼ laanu cadi jneza diʼ nga guicálunu zacané ca cosa ni risaca ca laanu. Sicaríʼ bicaabe lu ti carta ni biseendabe ra nuu Timoteu: «Gudxi cani napa bidxichi cadi aca nayá né ca xpidxichi caʼ, ne cadi icá lú ca ni purti zanda guiaana ca sin gastiʼ. Sínuque icá lú ca Dios ni nabani purti laa rudii laanu irá ni usieche laanu» (1 Timoteo 6:17).
17, 18. 1) Gunáʼ nga ca ejemplu ni naquiiñeʼ chinándanu para gánnanu xi naquiiñeʼ gusisácanu. 2) Xi ejemplu bidii Jesús ni chiguidúʼyanu lu sti tema ca.
17 Cadi jneza diʼ guni crenu zacané ca cosa risaca ca laanu, «purtiʼ zanda guiaana[nu] sin gastiʼ». Casi Job la? guizáʼ guca ricu. Peru ora málasi bizaacabe caadxi desgracia la? qué ñacané guiráʼ ni nápabe que laabe, purtiʼ dxi laabe biiyabe maʼ gastiʼ gápabe. Dios nga ni gucané laabe ora gudíʼdibe lu ca guendanagana que, purtiʼ nabé guyuube gaxha de laa (Job 1:1, 3, 20-22). Yanna Abrahán la? qué nudiibe lugar nucá guiráʼ xixé ni nápabe que laabe para cadi ñúnibe ni gudxi Jiobá laabe neca nagana ni. Ne Dios guluu ndaayaʼ laabe pur ni bíʼnibe, purtiʼ de laabe zá stale guidxi (Génesis 12:1, 4; 17:4-6). Guiropaʼ hombre ca ne xcaadxi casi laacabe la? nabé sicarú ejemplu bidiicabe para chinándanu. Nga runi, pa nahuiininu o pa maʼ huaniisinu, naquiiñeʼ guidúʼyanu xii nga ca cosa ni jma risaca para laanu ne xii nga ni rábinu zacané laanu (Efesios 5:10; Filipenses 1:10).
18 Casi maʼ bidúʼyanu ca, neca huaxiéʼ nga ni guníʼ Jesús de cani ruyubi gapa bidxichi ne modo naquiiñeʼ guidúʼyanu xquendanabáninu la? nabé rusiidicani laanu xi naquiiñeʼ gúninu. Peru, cadi nga si nga ni guníʼ Jesús, purtiʼ despué laaca guniʼbe de ti hombre ricu ni gúdxicabe laa binni huati. Yanna, xiñee naquiiñeʼ gánnanu de ejemplu ni bidiibe ca, ne xi zanda guizíʼdinu luni yaʼ. Zacábinu ca diidxaʼ ca lu sti tema ca.
[Cani cá ñee yaza]
a Sti diidxaʼ griegu bíos ni rutiixhicabe para «guendanabani» ca la? laani nga riquiiñecabe lu diidxastiá para guiníʼcabe biografía ne biología. Diccionario expositivo de palabras del Antiguo y del Nuevo Testamento exhaustivo, de W. E. Vine, na diidxaʼ bíos ca riniʼni «biaʼ rindaa guendanabani ca», «modo nabani binni» o «cani riquiiñeʼ para guendanabani ca».
Xi nicábiluʼ
• Jesús qué niná ñuni ni gudxi ti hombre laa, yanna, xi rusiidiʼ nga laanu yaʼ.
• Xiñee naquiiñeʼ gápanu laanu de guendaruyubi gapa bidxichi, ne ximodo zanda gúninu ni.
• Xiñee cadi pur gápanu bidxichi nga zanda guininu nabáninu nayecheʼ.
• Xi zanda gúninu para guisaca xquendanabáninu ne para cadi guiaadxaʼ gastiʼ laanu.
[Dibuju/foto ni zeeda lu yaza 23]
Xiñee qué niná Jesús ñuni ni gudxi ti hombre laa
[Dibuju/foto ni zeeda lu yaza 23]
Qué zabeendunu ni jneza pa cuyúbinu puru si bidxichi
[Dibuju/foto ni zeeda lu yaza 25]
Ximodo bisihuinni Abrahán qué nusisaca bidxichi jma que xhiiñaʼ Dios