Cadi gusaananu de gannaxhiinu ca xpinni Cristu jma
«Lausihuinni nadxii saa tu casi nadxii Cristu laanu.» (EFE. 5:2)
1. Xi guníʼ Jesús zusihuinni tuu nga cani dxandíʼ xpínnibe.
NABÉ runibiáʼ binni ca testigu stiʼ Jiobá purtiʼ rucheechecaʼ diidxaʼ de yoo pur yoo. Peru Jesús guníʼ sti cosa ni zacané binni gunibiáʼ cani dxandíʼ xpínnibe laa. Sicaríʼ guniʼbe: «Chi tixhe caʼ xiixa nacubi guni tu, ganaxhii saa tu cásica huayanaxhiee laatu. Zacá laganaxhii saa. Pa ganaxhii saa tu zacá la? zanna binni xpinne laatu» (Juan 13:34, 35).
2, 3. Xi runi stale binni ora gúʼyacaʼ nadxiisaa ca binni ridagulisaa.
2 Guirútiruʼ tu nadxii casi nadxiisaa cani dxandíʼ xpinni Cristu. Modo nadxiisaacabe ca zeeda gácani casi ti imán ni rigubayú xiixa guiibaʼ, purtiʼ tobi si rúnini ca xpinni Jiobá ne rucaani binni guidxiña ndaaniʼ xquídxibe. Zacá rihuinni ni pur ni bizaaca Marcelino, ti hombre de Camerún ni bicheepaʼ lú pur ti desgracia ni bizaaca ra dxiiñaʼ. Despué de bizaacabe desgracia ca bizulú binni guníʼ bicheepaʼ lube purtiʼ bruju laabe. Peru lugar de niguixhedxí pastor stibe ladxidoʼbe la? laa ne ca binni ni rié ra yuʼduʼ stiʼ guládxicaʼ laabe. Ti dxi biʼniʼ invitar ti testigu stiʼ Jiobá laabe para chebe guendaridagulisaa, peru qué ninagá diʼ Marcelino ñé, purtiʼ bidxíbibe ñúnicabe laabe zaqueca.
3 Despué maʼ guná Marcelino cheʼ ra Yoo stiʼ Reinu ne nabé bidxagayaabe modo bidxaagalúcabe laabe. Cani binadiágabe de ni rusiidiʼ Biblia que nabé gudixhedxícani ladxidoʼbe. Laabe maʼ qué ñaadxabe ca guendaridagulisaa que, ne biniisibe ndaaniʼ xquidxi Dios ne guyuunísabe lu iza 2006. Yanna maʼ rusiidibe ca binnilídxibe ne ca xpesínube de Biblia ne ruundanebe stale binni de Biblia. Laabe racaláʼdxibe guni sentir ca binni ni ruundanebe nuu tu nadxii laacaʼ cásica runi sentirbe nadxii ca xpinni Jiobá laabe.
4. Xiñee naquiiñeʼ chinándanu conseju ni bidii apóstol Pablu ra caníʼ cadi gusaana de gannaxhiisaanu.
4 Modo nadxiisaa ca xpinni Cristu ca rucaani binni guidxiña laacaʼ, peru guiranu naquiiñeʼ gúninu stipa pur cadi gusaananu de gannaxhiisaanu. Bixuiʼlú ti huaxhinni nabé nananda bicaaguí tuuxa caadxi yaga para guidxaa ne ora biiyaʼ xcaadxi ni la? bidxíñacaʼ para guidxaacaʼ. Yanna, xi nizaaca pa guirutiʼ tu niguuruʼ yaga ra cayaʼquiʼ que yaʼ, ñee cadi dxandíʼ nizuíʼ ni la? Zacaca nga laanu, para cadi gusaananu de gannaxhiinu la? cada tobi de laanu naquiiñeʼ gúninu xiixa. Apóstol Pablu guníʼ xii nga ni naquiiñeʼ gúninu: «Lausihuinni nadxii saa tu casi nadxii Cristu laanu. Gunaxhii be laanu dede uná be bisigaʼde be xpida be Dios para biaxa stonda nu. Ne uyulaʼdxi Dios ni biʼni be que dede guca ni casi ti xhoʼ naxhi para laa» (Efe. 5:2). Xi zanda gúninu para cadi gusaana de gannaxhiisaanu yaʼ. Chiguidúʼyanu ximodo gúninu ni.
Gannaxhiinu ca xpinni Cristu jma
5, 6. Xiñee gunabaʼ Pablu ca xpinni Cristu de Corinto gannaxhiicaʼ laabe jma.
5 Sicaríʼ bicaa apóstol Pablu ra nuu ca xpinni Cristu de guidxi Corinto: «Huaní né du laatu sin ucaʼchi du gastiʼ. Huayabi du laatu irá ni nuu ndaani ladxidóʼ do. Laadu nabé nadxii du laatu, peru laatu huaxiéʼ nadxii tu laadu. Canié nia laatu casi ñaca tu xiiñeʼ, ne rinaba laatu ganaxhii tu naa casi nadxiee laatu» (2 Cor. 6:11-13). Xiñee gunabaʼ Pablu laacabe gannaxhiicabe laa jma yaʼ.
6 Guietenaláʼdxinu ximodo bizulú neza binni ridagulisaa ni guyuu ndaaniʼ guidxi Corinto. Pablu guyé ndaaniʼ guidxi ca ra maʼ ziluxe iza 50, ne neca nabé gúpabe guendanagana dxi nacubi bizulú bicheechebe diidxaʼ raqué la? qué nireedibe gana. Qué nindaa maʼ biʼniʼ cré stale binni stiidxaʼ Dios. Apóstol Pablu biaana raqué «tubiza aronda», ne ca dxi ca bíʼnibe stale stipa pur gusiidibe ne gacanebe ca binni ridagulisaa ni nacubi bizulú que. Rihuínnica nabé gunnaxhii Pablu ca xpinni Cristu que (Hech. 18:5, 6, 9-11). Ne laacabe naquiiñeʼ ñannaxhiicabe laabe purtiʼ maʼ bíʼnibe stale cosa pur laacaʼ. Peru guyuu tu bidxiichiné laabe, zándaca purtiʼ qué ñuuláʼdxicaʼ nudiibe conseju laacaʼ pur ni cayúnicaʼ (1 Cor. 5:1-5; 6:1-10). O zándaca purtiʼ biʼniʼ crécabe guiráʼ cani cadi dxandíʼ guníʼ «cani na apóstol laa» que (2 Cor. 11:5, 6). Intiica razón gúpacabe para bíʼnicabe zacá la? ni racalaʼdxiʼ Pablu nga gannaxhiicabe laa. Ngue runi gunabaʼ Pablu laacabe gannaxhiicabe laa jma ne xcaadxi xpinni Cristu.
7. Xi zanda gúninu para gannaxhiinu ca xpinni Cristu jma yaʼ.
7 Yanna laanu, ximodo zanda gannaxhiinu ca xpinni Cristu jma yaʼ. Gastiʼ naca nga chuuláʼdxinu chuʼnu gaxha de ca binni ni biaʼca laanu laacaʼ o ni napa ngueca costumbre ni nápanu o ni riuulaʼdxiʼ laaca ni riuuláʼdxinu. Peru pa pur nga guixélenu de xcaadxi binni la? naquiiñeʼ gúninu stipa pur gápanu jma xhamígunu. Guníʼ ique: «Ñee ca xhamiguasiáʼ rucheecheniáʼ diidxaʼ la? Ñee raca nagana para naa guneʼ invitar xcaadxi xpinni Cristu guneniáʼ laacaʼ xiixa casi chizayaniáʼ laacaʼ la? Ñee qué ridxiñaʼ cani nacubi cadagulisaa ndaaniʼ Yoo stiʼ Reinu, purtiʼ rabeʼ gapa si dxi nga para gaca xhamígucabe naa la? Ñee rudieenaʼyaʼ guiráʼ ca binni ridagulisaa cásica nahuiiniʼ ne zaqueca ni huaniisi la?».
8, 9. Ximodo zacané Romanos 15:7 laanu para gannaxhiinu ca xpinni Cristu jma.
8 Ca diidxaʼ ni bicaa Pablu ra nuu ca xpinni Cristu de Roma ca laaca racanécani laanu guiníʼ íquenu jneza de xcaadxi xpinni Cristu (biindaʼ Romanos 15:7). Diidxaʼ ni biquiiñecabe lu griegu para bitiixhicabe diidxaʼ «cadi udxii deche saa tu» ni zeeda lu versículo riʼ, laaca riniʼni «guidxaagalunu binni galán ne gaca xhamígunu laacaʼ». Dxiqué gúpacabe ti costumbre, ora guni invitar ti binni ca xhamigu ralidxi la? naquiiñeʼ gabi laacabe guizáʼ nayecheʼ nuu pur nuucabe ralidxi. Zacaca nga ridxaagalú Cristu laanu, ne laaca zacaca naquiiñeʼ gúninu ne guiráʼ ca xpinni Cristu.
9 Ora maʼ cudiinaluʼ cani ridagulisaaneluʼ ndaaniʼ Yoo stiʼ Reinu o stiʼ lugar, xiñee qué cueeluʼ ti tiempu huiiniʼ para ugapadiúxiluʼ cani maʼ xadxí de qué huayuuyaluʼ o cani qué huaníʼneluʼ yaʼ. Ne pa zacaca gúniluʼ ne xcaadxi lu sti guendaridagulisaa ni gápatu la? qué zandaa maʼ stale de laacabe nabé sicarú modo zaníʼneluʼ. Cadi guizaaláʼdxiluʼ pa qué ganda guiníʼneluʼ guiráʼ ca xpinni Cristu lu ti guendaridagulisaa; guirutiʼ naquiiñeʼ guidxiichi pa qué ganda gudiinaluʼ laa cada biaje guidagulisaatu.
10. Paraa zanda gunibiaʼnu xcaadxi xpinni Cristu, ne xi zanda gúninu para gaca xhamígunu laacabe.
10 Ora gudiinaluʼ xcaadxi binni la? zacané nga lii guzulú guiníʼneluʼ laacabe diidxaʼ ne zándaca dede guizáʼ gaca xhamíguluʼ laacabe. Casi pa guidxíñanu xcaadxi xpinni Cristu lu ti guendaridagulisaa roʼ, ne gábinu laacaʼ tu lanu ne guinínenu laacaʼ diidxaʼ la? zaca xhamígunu laacaʼ ne dede ziuuláʼdxinu gúʼyanu laacaʼ sti biaje. Cani rigacané ra ribí ca Yoo stiʼ Reinu o ra bizaaca xiixa desgracia la? raca xhamígucaʼ purtiʼ jma runibiáʼ chaahuicaʼ pur guiráʼ ni rúnicaʼ juntu. Dxandíʼ nga nuu stale lugar ra zanda gunibiaʼnu xcaadxi xpinni Cristu ndaaniʼ xquidxi Dios. Pa gannaxhiinu ca xpinni Cristu jma la? jma zápanu xhamígunu, ne jma zannaxhiinu ca xpinni Cristu.
Cueenu tiempu para guinínenu xcaadxi
11. Xi ruzeeteʼ Marcos 10:13-16 biʼniʼ Jesús.
11 Guiráʼ ca xpinni Cristu naquiiñeʼ gusihuínnicaʼ zanda guidxiña binni laacaʼ cásica guca Jesús. Ti biaje dxi ziné caadxi binni ca xiiñiʼ ra nuube la? gucalaʼdxiʼ ca discípulo stibe nucueezacaʼ laacabe. Xi biʼniʼ Jesús yaʼ. Sicaríʼ gúdxibe ca discípulo stibe: «Cadi ucueeza tu ca baʼdu ca. Zaa gueeda cabe ra nuaaʼ purti stícabe irá ni napa Dios ladxi náʼ, laacabe ne irá casi laacabe ca». De racá «ucuaa be ca baʼdu que, uluu be laaca ndaani ná be ne udixhe ná be luguiá caʼ, uluu be ndaaya laacaʼ» (Mar. 10:13-16). Bixuiʼlú pabiáʼ nayecheʼ biʼniʼ sentir ca baʼduhuiiniʼ que purtiʼ bisihuinni Maestru ni Jma Nanna Gusiidiʼ que nadxii laacabe.
12. Xii nga ca cosa ni zusihuinni qué gápanu gana guinínenu binni.
12 Cada tobi de laanu naquiiñeʼ guiníʼ íquenu: «Ñee rusihuinneʼ zanda guidxiña binni naa la? o rusihuinneʼ nabé nuu xhiiñaʼ». Nuu caadxi cosa ni rúninu cadi malu diʼ cani, peru zanda gucueezacani binni de guiniʼné laanu. Pa iquiiñenu celular stinu o gucaadiáganu xiixa saa o sti cosa ne audífono stinu ora nuunu lade xcaadxi binni la? zuluinu casi ora qué racaláʼdxinu chuʼnu ra nuucabe. Ne pa gúʼyacabe puru si agenda electrónica stinu maʼ caquiiñenu la? zándaca guiníʼ íquecabe qué racaláʼdxinu guinínenu laacabe. Dxandíʼ nga maca nuu ti «tiempu para cadi guininu». Peru ora nuunu ra nuu xcaadxi binni la? stale biaje óraca nga «tiempu para guininu» (Ecl. 3:7). Zándaca chuʼ tu guiníʼ: «Naa huaxiéʼ riniéʼ» o «Qué liica rapaʼ gana guinieniáʼ guirutiʼ ora guiraʼyaʼ gueelaʼ». Neca zacá laanu la? naquiiñeʼ gúninu stipa pur guinínenu xcaadxi binni, zacá zusihuínninu nadxiinu laacabe, purtiʼ ora nadxii binni stobi la? qué zuyubi para laa si (1 Cor. 13:5).
13. Xi conseju bidii Pablu Timoteu para ganna xi guni ora maʼ nuu lade ca binni ridagulisaa.
13 Pablu gúdxibe Timoteu gusihuinni napa respetu guiráʼ ca binni ridagulisaa (biindaʼ 1 Timoteo 5:1, 2). Laanu laaca naquiiñeʼ gápanu respetu ca binni huaniisi casi ñácacaʼ bixhózenu o jñaanu ne cani jma nahuiiniʼ ca casi ñácacaʼ bíʼchinu o bizáʼnanu. Pa gúninu zacá la? nin tobi de laacabe qué zuni sentir casi ora qué runibiaʼnu laa ora nuucaʼ ra nuunu.
14. Xi ribeendunu ora guininu de xiixa tema ni gacané ca xpinni Cristu.
14 Pa guiaʼnu guinínenu ca xpinni Cristu de xiixa tema ni gacané laacaʼ la? zacanenu laacabe chúʼcabe galán ne Dios ne chúʼcabe nayecheʼ. Ti xpinni Cristu ni runi dxiiñaʼ Betel, nayecheʼ riuu ora rietenalaʼdxiʼ stale de ca betelita ni maʼ xadxí de nuu raqué, purtiʼ guleecaʼ tiempu para guiníʼnecaʼ laabe dxi nacubi yendabe raqué. Ca diidxaʼ gúdxicabe laabe bicaani laabe guni sentirbe nadxiicabe laabe Betel. Yanna laabe rúnibe stipa pur gúnibe zacá ne xcaadxi ni nacubi cayuu Betel.
Pa qué gudxíʼbanu laca laanu zacaneni chuʼnu tobi si
15. Xi ejemplu rusihuinni zanda chúʼdinde tuuxa lade ca xpinni Cristu.
15 Evodia ne Síntique, chupa gunaa xpinni Cristu ni gulézacaʼ guidxi Filipos, guca nagana para laacaʼ guni chaahuicaʼ ti guendanagana ni gúpacaʼ (Fili. 4:2, 3). Pablu ne Bernabé gudinde diidxacaʼ ne pur nga bixálecaʼ ne stale tu gunna xi gúcacabe (Hech. 15:37-39). Cani guninu riʼ cusihuínnicani zanda chúʼdinde tuuxa de ca xpinni Cristu. Peru Jiobá racané laanu guni chaahuinu ca guendanagana ni rápanu ne chuʼnu tobi si, ne laaca ribézabe gúninu xiixa.
16, 17. 1) Pabiáʼ risaca nga cadi gudxiibaʼ binni laca laa ora guni chaahuiʼ guendanagana ni gapané stobi. 2) Ximodo rusihuinni ni bizaaca Jacob ne Esaú que pabiáʼ risaca nga cadi gudxíʼbanu laca laanu.
16 Ni zaquiiñenu primé para ganda gucáʼguinu ti carru nga llave stini, zacaca nga laanu, para ganda guni chaahuinu xiixa guendanagana gápanu la? primeru naquiiñeʼ gúninu stipa pur cadi gudxíʼbanu laca laanu (biindaʼ Efesios 4:1, 2). Zacá rihuínnini lu ejemplu ni zeeda lu Biblia ni chiguidúʼyanu riʼ, pa qué rudxíʼbanu laca laanu zusihuínninu zinándanu ca conseju stiʼ Biblia para chuʼnu tobi si ne tuuxa xpinni Cristu ni gupanenu xiixa guendanagana.
17 Ora gucuaa Jacob derechu ni napa Esaú biʼchiʼ casi baʼduʼ lugola que la? guizáʼ bidxiichi Esaú dede gucalaʼdxiʼ ñuuti laabe, ne pur nga bixooñebe de laa. Gudiʼdiʼ si gande iza biiyacabe sti biaje, peru ante guidxagalúcabe guizáʼ «bidxibi Jacob, ne guyuu xizaa», purtiʼ guníʼ íquebe zándaca gucaalú bíʼchibe laabe. De raqué bíʼnibe xiixa ni qué niníʼ ique Esaú ñúnibe: «Bizuxíbibe gadxe biaje dede ora yendabe ra nuu bíʼchibe». Xi guleendube yaʼ. «Bixooñeʼ Esaú yeguidxaagalú laabe, ne gudiidxi laabe ne gudixhe ique cueʼ yánnibe ne bidii bixiduʼ laabe, ne bizulú biinacabe». Cumu bisihuinni Jacob qué nudxiibaʼ laca laa la? ngue gucané para maʼ cadi ñacananalaʼdxiʼ Esaú laabe ne maʼ qué nidíndecabe (Gén. 27:41; 32:3-8; 33:3, 4).
18, 19. 1) Xiñee nabé risaca nga guyúbinu chinándanu conseju ni zeeda lu Biblia para guni chaahuinu xiixa guendanagana ni gapanenu ti xpinni Cristu. 2) Xiñee cadi naquiiñeʼ guireʼnu gana pa qué náʼ tuuxa guni chaahuiʼ guendanagana ni napanenu laa.
18 Lu Biblia zeeda stale conseju ni zacané laanu guni chaahuinu ca guendanagana ni gápanu (Mat. 5:23, 24; 18:15-17; Efe. 4:26, 27).a Peru pa qué nanu chinándanu ca conseju ni zeeda lu Biblia la? zaca nagana para laanu guni chaahuinu xiixa guendanagana gapanenu tuuxa. Qué zabeendunu gastiʼ pa cuézanu primé ca binni ni napanenu guendanagana ca gusihuinni qué rudxiibaʼ laca laa, pa laanu laaca zanda gúninu ni.
19 Pa cayúninu stipa pur guni chaahuinu guendanagana ca ne gastiʼ cabeendunu la? cadi guireʼnu gana. Zándaca caquiiñeʼ binni ca tiempu para guchaa. Guietenaláʼdxinu ejemplu stiʼ ca biʼchiʼ José. Ora bidxaagalube laacaʼ, dxi maʼ nácabe ti hombre risaca ra nuu faraón la? maʼ gudiʼdiʼ stale iza dede dxi bitoocaʼ laabe. Peru dxi maʼ bisihuínnicabe maʼ guca arrepentírcabe ne gunábacabe laabe gutiidiláʼdxibe stóndacaʼ la? bitiidilaʼdxiʼ José stóndacabe. Ne de laacabe biree ti guidxi naroʼbaʼ ni yené lá Jiobá (Gén. 50:15-21). Cadi guiaandaʼ laanu, ora gúninu stipa pur cadi chuʼdindenenu ca xpinni Cristu la? zacané nga chuʼ xquidxi Jiobá tobi si ne nayecheʼ (biindaʼ Colosenses 3:12-14).
Gannaxhiinu ca xpinni Cristu de guidubi ladxidoʼno ne gusihuínninu ni
20, 21. Xi bisiidiʼ Jesús laanu ora gudiibiʼ ñee ca discípulo stiʼ.
20 Caadxi dxi ante gati Jesús gudxi ca apóstol stiʼ ca diidxaʼ riʼ: «Purti ma bilué laatu xi guni tu, ti casi bine laatu ca, zacaca guni tu» (Juan 13:15). Jesús guníʼ ca diidxaʼ ca casi biluxe gudiibiʼ ñee ca doce apóstol stiʼ, peru bíʼnibe ni cadi pur costumbre o purtiʼ si nacháʼhuibe. Ante guiníʼ Juan ni biʼniʼ Jesús ca bicaabe ca diidxaʼ riʼ: «Cásica bizulú gunaxhii be ca xpinni be ni nuu ndaani guidxilayú zaqueca nadxii be laaca dede yanna ra ma chi iluxe xhiiña be» (Juan 13:1). Casi maʼ bidúʼyanu ca, pur gunnaxhii Jesús ca discípulo stiʼ nga biʼniʼ ti dxiiñaʼ ni runi cani naca esclavu. Yanna maʼ laacabe naquiiñeʼ gusihuínnicabe pabiáʼ nadxiisaacabe. Zacá ni, pa dxandíʼ nadxiinu ca xpinni Cristu la? zucaa nga laanu gusihuínninu rizaaláʼdxinu guirácabe.
21 Apóstol Pedru, ni gudiibiʼ Xiiñiʼ Dios ñee que, biene xi pur ngue biʼniʼ Jesús ni. Despué bicaabe ca diidxaʼ riʼ: «Hermanu caʼ, dede dxi ucané Espíritu Santu laatu uzuuba tu stiidxa Cristu la? bia ladxidóʼ to, ne ma zanda ganaxhii tu hermanu stitu. Ne zacá laguni, laganaxhii saa de idubi ladxidóʼ to» (1 Ped. 1:22). Ne apóstol Juan, stobi de cani nuu dxi biʼniʼ Jesús zacá, bisietenaláʼdxibe ca xpinni Cristu ca diidxaʼ riʼ: «Xiiñe huiine caʼ, cadi gabi si nu nadxii nu binni sínuque ganaxhii nu laaca de idubi ladxidóʼ no ne usihuinni nu ni ra acané nu laacaʼ» (1 Juan 3:18). Nga runi, cadi gusaananu de gusihuínninu lu cani gúninu nadxiinu ca bíʼchinu ne ca bizáʼnanu.
[Cani cá ñee yaza]
a Biiyaʼ ni rizaané Xhiiñaʼ Reinu ni Rúninu stiʼ julio 2007, yaza 5-7.
Rietenalaʼdxuʼ la?
• Xi zanda gúninu para gannaxhiinu ca xpinni Cristu jma.
• Xi zanda gúninu para gápanu jma tiempu para guinínenu ca xpinni Cristu.
• Pa qué gudxíʼbanu laca laanu, ximodo zacané nga laanu chuʼnu tobi si ne tuuxa ni gupanenu xiixa guendanagana.
• Xi naquiiñeʼ gucaa laanu gusihuínninu rizaaláʼdxinu ca xpinni Cristu.
[Dibuju/foto ni zeeda lu yaza 21]
Naquiiñeʼ guidxaagalunu ca xpinni Cristu galán
[Dibuju/foto ni zeeda lu yaza 23]
Cadi gusaananu de guyúbinu modo guinínenu xcaadxi xpinni Cristu