Ñee nannuʼ ni la?

Padxí yeganna ca hombre ni ruundaʼ de ca beleguí que Jesús

Lu libru stiʼ Mateo na guyé «caadxi hombre nuu xpiaani ne riene de luceru» yegánnacaʼ Jesús ne yenecaʼ ni bisigáʼdecaʼ laabe, ne zeedacabe «neza rindani gubidxá» (Mateo 2:1-12). Qué rieeteʼ diʼ panda de ca hombre riene de ca beleguí, o nuu xpiaaniʼ (ni runibiáʼ binni casi magu), yegaʼnnaʼ Jesús. Nga runi, guirutiʼ zanda guiníʼ pa chónnacabe, casi runi cré binni. Ne lu Biblia qué liica rieeteʼ diʼ tu lácabe.

Lu Biblia de Estudio de la NVI (Nueva versión Internacional) ruzeeteʼ xiixa de ni zeeda lu Mateo 2:11: «Qué runi crédidu casi runi cré stale binni, purtiʼ ca hombre nuu xpiaaniʼ que, qué ñuudicabe ne ca hombre rapa dendxuʼ que huaxhinni gule Jesús, sínuque guyécabe gudiʼdiʼ si caadxi beeu, ne maʼ ra lídxibeʼ yegánnacabe laabe». Zanda guininu zacá purtiʼ, cumu Herodes gucalaʼdxiʼ ñuuti Jesús la? biʼniʼ mandar gati guiráʼ ca xcuidihuiiniʼ ni napa chupa iza o ni chigusaa chupa iza ni nabeza Belén ne ca guidxihuiiniʼ nuu gaxha de laani. Ne bíʼnibe zaqué «purti ulee be cuenta mayaca izaa chupa iza dede dxi biʼya ca hombre nuu xpiaani que luceru que» (Mateo 2:16).

Pa ñaca niganna ca hombre ni riene de ca beleguí que Jesús huaxhinni gule que ne nusigáʼdecaʼ laabe oro ne xcaadxi cosa risaca la? zándaca qué niné diʼ María chupa si guuguhuiiniʼ ora guyé ndaaniʼ yuʼduʼ nuu Jerusalén que gudiʼdiʼ si cuarenta dxi de gule Jesús (Lucas 2:22-24). Nga nga ofrenda ni na Ley naquiiñeʼ gudii ca binni pobre ni qué  gapa bueltu para gudii ti dendxuhuiiniʼ (Levítico 12:6-8). Peru, zándaca ca cosa risaca ni bisigáʼdecabe Jesús que biquiiñecabe ni biaʼ dxi gulézacabe Egipto (Mateo 2:13-15).

Xiñee bindaa Jesús tapa gubidxa para yendá ra baʼ stiʼ Lázaro

Ruluíʼ si Jesús peʼ biʼniʼ pur guindaa biaʼ ca. Xiñee rininu zacá yaʼ. Guidúʼndanu historia zeeda lu capítulo 11 de libru stiʼ Juan.

Dxi guca huará Lázaro, ti xhamigu Jesús, ni nabeza Betania la? ca bizáʼnabe biseendaʼ tídxicaʼ Jesús xi cayácabe (versículo 1-3). Ne dxi gunna Jesús ngue la? nuube biaʼ chupa gubidxa de Betania (Juan 10:40). Zándaca Lázaro guti dxica gunna Jesús huarabe. Xi biʼniʼ Jesús yaʼ. «Biaana be xhupa gubidxa ra nuu be que» ne oraqueruʼ bireebe zebe Betania (versículo 6 ne 7). Cumu gulézabe xhupa gubidxa ne para yendabe lugar que bindaabe xhupa gubidxa la? yendá Jesús ra baʼ que tapa gubidxa despué de guti Lázaro (versículo 17).

Jesús maca gundisaʼ gueʼtuʼ dede ante: tobi de laani nga dxi gundísabe ti binni cásipeʼ guti, ne stobi ca la? zándaca gudiʼdiʼ si caadxi hora despué de guti, peru dxíqueca (Lucas 7:11-17; 8:49-55). Ñee zanda guindísabe ti binni ni maʼ napa tapa gubidxa de guti ne maʼ cayuʼdxuʼ la? (Versículo 39.) Ti libru ni riníʼ de Biblia na, caadxi de ca judíu que biʼniʼ crecaʼ «maʼ qué zanda diʼ guibani binni sti biaje pa maʼ tapa gubidxa de guti, purtiʼ para dxicá la? ladi ti binni maʼ cayuʼdxuʼ, ne casi biʼniʼ cré ca judiu que, alma stiʼ ti binni ni maʼ guti maʼ bireeni de lu xcuérpube ne maʼ chonna gubidxa de canazá ni lu bi, nga runi, maʼ qué zabiguetaʼ ni».

Pa ca binni ni nuu ra baʼ que naca qué zanda guiasa ti binni ni maʼ napa dxi de guti la? yanna nga chiguuyacaʼ ra chiguihuiini poder ni napa Cristu luguiáʼ guendaguti. Zuhuaa Jesús ra puertaʼ stiʼ baʼ que bicaa ti ridxi nadipaʼ ne na: «¡Lázaro, gudáʼ raríʼ!». Oraqué «biree gueʼtu que» (versículo 43 ne 44). Ni cabézanu nga guiasa ca binni ni maʼ guti, ne cadi casi runi cré binni ora na nabániruʼ alma stiʼ binni ni maʼ guti (Ezequiel 18:4, Juan 11:25).