Cadi gusaana de guzúʼbanu stiidxaʼ Cristu, Rey stinu
«Ne bidiicabe laabe guendaruni mandar ne guendarisaca ne reinu, para guni guiráʼ ca guidxi ca, ca guidxi roʼ ne guiráʼ diidxaʼ ni nabe.» (DANIEL 7:14.)
1, 2. Ximodo nánnanu qué nuzulú Jesús ñuni mandar lu Reinu stiʼ Dios iza 33 que.
ÑEE nuu ti rey ni niná ñati pur ca xpinni ne ñanda nibani para ñuni mandar sti biaje la? Tu rey ñanda nibani lu Guidxilayú riʼ, ne nucaa ca xpinni ñuni crecaʼ laa ne nuzuubacaʼ stiidxaʼ ne oracá ñuni mandar dede guibáʼ yaʼ. Jesucristu si nga zanda guni ndiʼ ne xcaadxi cosa, guirútiruʼ (Lucas 1:32, 33). Lu Pentecostés stiʼ iza 33, guti si Jesús ne biásabe zebe guibáʼ la? «biʼni [Dios] laabe xaíque sti ca xpinni» (Efesios 1:20-22; Hechos 2:32-36). Zacá bizulú Jesús cayuni mandar peru luguiáʼ caadxi si binni. Ca primé xpinni Jesús ni gulí Dios ne espíritu stiʼ nga cani beeda gaca Israel stiʼ Dios, o xquídxibe (Gálatas 6:16; Colosenses 1:13).
2 Gudiʼdiʼ si biaʼ treinta iza de guca Pentecostés que, apóstol Pablu bizeeteʼ caʼruʼ diʼ guzulú Cristu guni mandar lu Reinu stiʼ Dios casi ti rey, sínuque «zuba be cueʼ Dios. Ne raqué cabeza be dede dxi ma guta dxí irá ni rucaa lú laabe xa ñee be» (Hebreos 10:12, 13). Ra maʼ ziluxe primé siglu que, apóstol Juan gúpabe ti visión ne luni biiyabe cucuí Jiobá Jesús casi rey stiʼ ti Reinu ni nacubi gule, o ni deruʼ bizulú (Apocalipsis 11:15; 12:1-5). Ca dxi nabáninu riʼ, nápanu stale razón para guininu maʼ bizulú Cristu cayuni mandar guibáʼ dede iza 1914.a
3. 1) Xi caníʼ cani rucheeche ca diidxaʼ nacubi ne galán stiʼ Reinu stiʼ Dios dede 1914. 2) Xi naquiiñeʼ guinabadiidxanu laca laanu.
3 Dede 1914, cani rucheeche ca diidxaʼ nacubi ne galán stiʼ Reinu stiʼ Dios caniʼcaʼ maʼ cayuni mandar Cristu dede guibáʼ «lade ca xhenemigu» (Salmo 110:1, 2; Mateo 24:14; Apocalipsis 12:7-12). Ne lu Guidxilayú riʼ, ca xpínnibe ruzuubacaʼ stiidxabe de guidubi ladxidoʼcaʼ, nga runi rusiidicabe guiráʼ binni ni zeeda lu Biblia; qué huayuu dxi gaca dxiiñaʼ riʼ biaʼ cayaca ni yanna (Daniel 7:13, 14; Mateo 28:18). Ca xpinni Cristu riʼ bibícabe pur espíritu santu ne zacá beeda gácacabe «xiiñiʼ reinu», ne laacabe nga cani «biseenda Cristu» para gúnicaʼ xhiiñabe. Nuu sti grupu ni láʼ «xcaadxi dendxu» stiʼ Jesús ne laaca caniʼcaʼ de Reinu stiʼ Dios, zacá cayanécabe ca binni ni biseendaʼ Cristu (Mateo 13:38, NM; 2 Corintios 5:20; Juan 10:16). Neca nuunu lade ca binni ni ruzuubaʼ stiidxaʼ Cristu ca la? cada tobi de laanu naquiiñeʼ guiníʼ íquenu pa cuzúʼbanu stiidxabe. Nga runi naquiiñeʼ guinabadiidxanu laca laanu: «Ñee ruzuubaʼ stiidxabe de guidubi ladxiduáʼ la? Ximodo zanda gusihuinneʼ ruzuubaʼ stiidxaʼ Jesús pa laabe nácabe Rey guibáʼ». Primeru guidúʼyanu xiñee naquiiñeʼ guzúʼbanu stiidxabe.
Ti Rey ni riuuláʼdxinu guzúʼbanu stiidxaʼ
4. Xi biʼniʼ Jesús, Rey ni gulí Dios, dxi bibánibe lu Guidxilayú riʼ.
4 Ruzúʼbanu stiidxaʼ Cristu pur guiráʼ ni bíʼnibe pur laanu ne purtiʼ guizáʼ galán ca guenda nápabe (1 Pedro 1:8). Dxi bibani Jesús lu Guidxilayú riʼ la? maca bihuinni laabe chigácabe rey ni gulí Dios, ne ca ni bíʼnibe que nga caadxi de guiráʼ ca cosa ni chigúnibe ora guidxiña dxi maʼ guni mandarbe lu guidubi naca Guidxilayú riʼ casi Rey stiʼ Dios. Laabe biyaanabe binni ne bisiándabe laacaʼ, laaca bixhélebe lú cani qué ruuyaʼ, bisiándabe cani qué rizá, cani qué runadiaga, cani qué riníʼ dede gundísabe gueʼtuʼ (Mateo 15:30, 31; Lucas 7:11-16; Juan 6:5-13). Ora gánnanu guiráʼ ni biʼniʼ Jesús lu Guidxilayú riʼ, racané cani laanu gunibiaʼnu ximodo zácabe ora maʼ guidxiña dxi guni mandarbe lu Guidxilayú riʼ. Ni jma bihuinni de laabe nga gunnaxhiibe binni neca gucanabe ora bisihuínnibe ni (Marcos 1:40-45). Pur modo gunnaxhiibe binni, Napoleón Bonaparte guníʼ: «Alejandro, César, Carlomagno ne naa la? bínidu stale guidxi roʼ, peru xi biquiiñeʼ para gunda bínidu cani yaʼ. Bicaʼdu binni guni ni rábidu. Peru Jesucristu si biquiiñeʼ guendarannaxhii para gunda bizáʼ reinu stiʼ, ne yanna riʼ millón de binni niná ñati pur laabe».
5. Xiñee stale binni nabé guyuulaʼdxiʼ modo guca Jesús.
5 Jesús guca nadóʼ ne qué nudxiibaʼ laca laa, ngue runi neca maʼ bidxaga ca binni que pur guiráʼ ca guendanagana ni gúpacaʼ la? guyuucaʼ nayecheʼ ora bisiidibe laacaʼ purtiʼ guluube gana laacaʼ ne biyúbibe ximodo gacanebe ca binni que (Mateo 11:28-30). Ca hombrehuiiniʼ ne ca dxaapahuiiniʼ que guyuucaʼ nayecheʼ ora maʼ nuucaʼ ra nuube, ne ca hombre ni racalaʼdxiʼ guiziidiʼ guiráʼ ni cusiidibe ne guiene cani caniʼbe que dede gucaláʼdxicaʼ ñácacaʼ discípulo stibe (Mateo 4:18-22; Marcos 10:13-16). Cumu biabe binni ne biʼniʼ respetarbe laacaʼ la? stale gunaa ni bidxibi Dios qué ninacaʼ nusaanacaʼ laabe, chupa chonna de laacaʼ bidiicaʼ tiempu sticaʼ, stipa sticaʼ ne ni nápacaʼ para gunda gucanecaʼ laabe bíʼnibe xhiiñabe (Lucas 8:1-3).
6. Xi biʼniʼ sentir Jesús ora guti Lázaro.
6 Ora guti Lázaro, ti xhamigu Jesús, bisihuínnibe pabiáʼ riuubaʼ ladxidoʼbe ora racaná binni. Dede «uyuu yuuba ladxidóʼ[be]» ne «biina[be]» ora biiyabe pabiáʼ naná nuu Marta ne María. Nga runi «uca diti» ladxidoʼbe, neca nánnabe qué zandaa zandísabe laa. Cumu nadxiibe Lázaro ne biabe ca binnilidxi la? biquiiñebe poder ni bidii Dios laabe para bisibánibe gueʼtuʼ que (Juan 11:11-15, 33-35, 38-44).
7. Xiñee naquiiñeʼ guzúʼbanu stiidxaʼ Cristu. (Biiyaʼ cuadru ni nuu lu yaza 31.)
7 Jesús riuuláʼdxipeʼ gaca ni jneza, ne laabe nanaláʼdxibe ni cadi jneza ne nanaláʼdxibe ora rucaachiʼ binni modo laa; ndiʼ rucaa laanu guidxíbinu ne gusisácanu laabe. Chupa tiru guládxibe cani cutoo ndaaniʼ yuʼduʼ stiʼ Dios purtiʼ nisi bidxichi ca íquecaʼ ne zaqué bisihuínnibe nadxibalube (Mateo 21:12, 13; Juan 2:14-17). Ne dxi bibánibe lu guidxilayú riʼ gúpabe stale guendanagana, nga runi jma nánnabe pabiáʼ naná nga riuu binni ora cadiʼdiʼ lu xiixa guendanagana ni cusiubaʼ laa (Hebreos 5:7-9). Laaca guyuu binni ni gucananalaʼdxiʼ ne bininá laabe (Juan 5:15-18; 11:53, 54; 18:38–19:16). Últimu la? qué nidxíbidibe ora chiguuticabe laabe para gúnibe ni maca guníʼ Bixhózebe ne zacá ganda guicaa ca xpínnibe ti guendanabani ni qué zaluxe (Juan 3:16). Ñee qué rucaa ca guenda ni napa Jesús ca lii cadi gusaana de guzuubaluʼ stiidxabe la? (Hebreos 13:8; Apocalipsis 5:6-10.) Yanna, xi naquiiñeʼ gúninu ti gácanu xpinni Cristu, Rey stinu yaʼ.
Xi caquiiñeʼ gúninu para gácanu xpinni Cristu
8. Xi caquiiñeʼ guni ca xpinni Cristu.
8 Guiníʼ íquenu de ejemplu riʼ: para gaca ti binni de sti guidxi la? naquiiñeʼ gaca xpiaʼbe galán ne chuʼbe nazaaca biaʼ rinabaʼ guidxi ca. Zacaca ca xpinni Cristu, naquiiñeʼ gaca xpiáʼcabe nayá ne chúʼcabe nazaaca nezalú Dios, o chúʼcabe galán ne laabe (1 Corintios 6:9-11; Gálatas 5:19-23).
9. Ximodo rusihuínninu cuzúʼbanu stiidxaʼ Cristu.
9 Jesucristu laaca canábabe ca xpínnibe guzuubacaʼ stiidxabe ne gúnicaʼ ni na Reinu stibe, ne zusihuínnicabe ni ra guibánicabe modo bisiidibe dxi bibánibe lu Guidxilayú riʼ casi Rey ni gulí Dios. Ca xpínnibe ricá íquecaʼ gúnicaʼ xhiiñaʼ Reinu ne ni na Dios primeru ne cadi guyúbicaʼ ni racaláʼdxisicaʼ (Mateo 6:31-34). Rúnicabe stipa pur gácacabe casi Jesucristu, neca tiidicabe ra jma nagana (1 Pedro 2:21-23). Zacá rusihuínnicabe zinándacabe ejemplu stibe purtiʼ riale de laacabe gacanécabe binni (Mateo 7:12; Juan 13:3-17).
10. Ximodo rihuinni ruzúʼbanu stiidxaʼ Cristu 1) ndaaniʼ lídxinu ne 2) lade ca binni ridagulisaanenu.
10 Sti modo rusihuinni ca xpinni Jesús ruzuubacaʼ stiidxabe nga ora gácacaʼ casi laabe ndaaniʼ lídxicaʼ. Ca hombre ni maʼ bichaganáʼ rusihuínnicabe cuzuubacabe stiidxaʼ Cristu purtiʼ rápacabe xheelacabe ne ca xiiñicabe cásica modo ñuni Cristu ni (Efesios 5:25, 28-30; 6:4; 1 Pedro 3:7). Ca gunaa ni maʼ bichaganáʼ laaca rusihuínnicabe cuzuubacabe stiidxaʼ Rey nuu guibáʼ ora rúnicabe ni jneza ne «gaca[cabe] nadóʼ» (1 Pedro 3:1-4; Efesios 5:22-24). Ca xiiñicabe laaca rúnicaʼ ni na Cristu ora ruzuubacaʼ diidxaʼ cásica bíʼnibe, purtiʼ dxi guca Jesús nahuiiniʼ la? bizuubabe stiidxaʼ bixhózebe ne jñaabe, neca gúcacaʼ binni ruchee (Lucas 2:51, 52; Efesios 6:1). Guiráʼ ca xpinni Cristu laaca rúnicabe stipa pur gácabe casi laabe, ne rusihuínnicabe ni ora rúnicabe ni na ca diidxaʼ riʼ: «Lailaselaʼdxi saa, ne laganaxhii saa casi enda biʼchiʼ. [...] Ne cadi udxiiba tu laca laatu. Neca uchee né binni laatu, cadi uquixe tu ni laacaʼ, ne pa cuʼ dí ca laatu, cadi cuʼ dí tu laacaʼ» (1 Pedro 3:8, 9; 1 Corintios 11:1).
Ca xpinni Cristu rúnicaʼ ni na ley
11. Gunáʼ ndiʼ ca ley ni rinanda ca xpinni Cristu.
11 Cásica binni ni racalaʼdxiʼ gaca de sti guidxi naquiiñeʼ chinanda ley stiʼ guidxi ca la? zaqueca rinanda ca xpinni Cristu ca ley ni gudíxhebe ora ribánicaʼ casi modo bisiidibe ne rúnicaʼ guiráʼ ni biʼniʼ mandarbe (Gálatas 6:2). Peru jma nga rannaxhiicabe purtiʼ laani nga «ley [...] ni jma risaca» ni zinándacabe (Santiago 2:8). Ximodo zanda gúninu ni na ca ley riʼ yaʼ.
12, 13. Ximodo rúninu ni na ley ni gudixhe Cristu.
12 Ca xpinni Cristu laaca gulenecaʼ donda ne rucheecaʼ (Romanos 3:23). Nga runi, naquiiñeʼ gannaxhiirucabe ca bíʼchicabe ne ca bizáʼnacabe ne gúnicabe ni de guidubi ladxidóʼcabe (1 Pedro 1:22). Pa ti bíʼchinu o ti bizáʼnanu ni zinanda Cristu guni laanu xiixa la? galán gúninu ni na ley stiʼ Cristu: «Cadi ixhacalaʼdxi saa tu, ne laguni perdonar ni guni stobi laatu». Gúninu ni na ley riʼ zacaneni laanu cadi gúʼyasinu ra cuchee ca bíʼchinu ne ca bizáʼnanu ti ganda gannaxhiinu laacabe. Ca binni ni ruzuubaʼ stiidxaʼ Rey ni nadxii laanu riʼ nadxiisaacaʼ. Nga runi, cadi dxandíʼ riuuláʼdxiluʼ chuʼluʼ lade ca binni ni ruzuubacaʼ stiidxaʼ Rey ni nadxii laanu riʼ la? (Colosenses 3:13, 14.)
13 Casi bisiene Jesús que, tuuxa zanda gannaxhii sti binni, peru qué zanda diʼ gannaxhiibe biaʼ rannaxhii Jesús (Juan 13:34, 35). Pa gannaxhiinu ca binni si ni nadxii laanu la? cadi cayannaxhiinu biaʼ naquiiñeʼ gúninu, ne nga cadi jneza diʼ ni. Jesús gunabaʼ laanu gannaxhiinu binni casi nadxii Dios laacabe, purtiʼ zacá cá lu Biblia gúninu ni, dede ne ca xhenemígunu ni nanalaʼdxiʼ ne rizananda laanu naquiiñeʼ gannaxhiinu laacaʼ (Mateo 5:46-48). Guendarannaxhii riʼ rucaani ca xpinni Cristu gúnicaʼ dxiiñaʼ ni jma risaca ni gucuaacaʼ ne cadi gusaana de gúnicaʼ ni. Xi dxiiñaʼ riʼ yaʼ.
Ruzuubacabe diidxaʼ neca cadíʼdicabe ra nagana
14. Xiñee nabé risaca gucheechenu diidxaʼ.
14 Dxiiñaʼ ni jma risaca ni cayuni ca xpinni Cristu yanna nga gusiidicaʼ binni guiráʼ ni caquiiñeʼ ganna de Reinu stiʼ Dios (Hechos 28:23). Ne risaca stale nga gaca dxiiñaʼ riʼ, purtiʼ Reinu ca nga chigusihuinni napa Jiobá derechu para guni mandar lu guidubi naca guibáʼ ne Guidxilayú (1 Corintios 15:24-28). Ora rucheechenu ca diidxaʼ nacubi ne galán ca la? racanenu binni guiziidiʼ para gueeda gaca xpinni Cristu. Ora maʼ guni juzgar Jesús binni la? zietenaláʼdxibe ni bíʼnicaʼ ora binadiágacaʼ stiidxaʼ Reinu (Mateo 24:14; 2 Tesalonicenses 1:6-10). Nga runi, ti modo zanda gusihuínninu ruzúʼbanu stiidxaʼ Cristu nga chigucheechenu stiidxaʼ Reinu (Mateo 28:18-20).
15. Xiñee rudxiilú ca xpinni Cristu stale guendanagana ora ruzuubacaʼ stiidxabe.
15 Maca nánnanu cucaalú Binidxabaʼ dxiiñaʼ ni cayúninu riʼ de stale modo ne laaca nánnanu qué na diʼ ca gobiernu nuu yanna riʼ guni crecaʼ pa Dios nga bidii poder Jesús para guni mandar (Salmo 2:1-3, 6-8). Nga runi, Jesús gudixhená ca discípulo stiʼ ne ca diidxaʼ riʼ: «Qué risaca ti mozo jma que xpixuaanaʼ. Pa huazabi nanda cabe naa, laca zazabi nanda cabe laatu» (Juan 15:20). Pur nga cudxiilú ca xpinni Jesús stale guendanagana ni cusihuinni pa dxandíʼ ruzuubacabe stiidxabe (2 Corintios 10:3-5; Efesios 6:10-12).
16. Ximodo runi ca xpinni Reinu ni na ca diidxaʼ riʼ: «Laudii Dios sti Dios».
16 Ca binni ni runi ni na ca ley stiʼ Reinu stiʼ Dios qué rusaana de guzuubacaʼ stiidxaʼ Jesús, Rey sticaʼ ni nuu guibáʼ, neca qué ruuyacabe laabe. Peru cadi pur rúnicabe ni na Rey ca maʼ qué runi respetárcabe ca gobiernu ni nuu ndaaniʼ guidxilayú riʼ (Tito 3:1, 2). Jesús guníʼ: «Laudii César sti César, ne laudii Dios sti Dios» (Marcos 12:13-17). Nga runi, ca xpinni Cristu rúnicaʼ ni na ley stiʼ xquídxicaʼ ora qué gucaani laacabe gucheenécabe ley stiʼ Dios (Romanos 13:1-7). Casi dxi yené ca juez ni jma risaca stiʼ ca judíu que ca discípulo stiʼ Jesús «nezalú ca justicia» ne biʼniʼ mandárcabe laacaʼ cadi gucheecherucaʼ diidxaʼ la? ne stale respetu guníʼcabe sicaríʼ: «Jma naquiiñe uzuʼba du stiidxa Dios que stiidxa binni» (Hechos 1:8; 5:27-32).
17. Xiñee naquiiñeʼ gácanu binni nadxibalú ti cadi gusaana de guzúʼbanu stiidxaʼ Rey stinu neca cadídinu ra nagana.
17 Dxandíʼ nga caquiiñeʼ gácanu binni nadxibalú ti cadi gusaana de guzúʼbanu stiidxaʼ Rey stinu ora gucaalúcabe laanu. Neca cadídinu ca guendanagana ca, Jesús guníʼ: «Dichoso laatu ora rulaa binni diidxa laatu, ne riladxi ca laatu ne ribee ca falsu luguiá tu purti xpinne laatu. Laguiecheʼ neca cazaaca tu irá nga, purti nabé sicarú ni chi gudii Dios laatu ibáʼ» (Mateo 5:11, 12). Ca primé discípulo stiʼ Cristu que biiyacaʼ dxandíʼ ni na ca diidxaʼ ca. Neca gudíñecabe laacaʼ pur canagucheechecaʼ stiidxaʼ Reinu la? biéchecaʼ «purti bidii Dios lugar usituí binni lú ca purti xpinni Jesús laacaʼ. Ne qué ñaana dxí cabe de ñuiʼ cabe stiidxa Cristu» (Hechos 5:41, 42). Cásica lii ne guiráʼ ca xpinni Jiobá la? jneza nga cayúnitu dxiiñaʼ, purtiʼ cusihuínnitu ruzuubatu stiidxaʼ Rey stinu ora cadíʼditu xiixa guendanagana, ora gápatu ti guendahuará, ora gucaalúcabe laatu ne ora gati tuuxa ni nadxiitu (Romanos 5:3-5; Hebreos 13:6).
18. Xi rusihuinni ca diidxaʼ ni gudxi Jesús Poncio Pilatu que.
18 Jiobá nga gulí Jesús para gaca Rey, nga runi laabe gúdxibe Poncio Pilatu, gobernador stiʼ Roma, ca diidxaʼ riʼ: «Cadi beda aca diaʼ rey ndaani guidxilayú riʼ, purti pa ñaca beda aca rey rarí la? ñasa ca xpinneʼ, nucaa lú para cadi ninaaze ca judíu naa. Peru cadi rarí di nga zeda aca rey» (Juan 18:36). Nga runi ca xpinni Reinu stiʼ Dios riʼ, qué rinaazecabe guiibaʼ ne qué riuucabe lu guendaridinde stiʼ xquídxicabe. Cumu ruzuubacabe stiidxaʼ Jesús ni naca «Príncipe stiʼ Guendariuudxi» la? qué liica ridíndecabe pur guiráʼ ni raca lu guidxilayú riʼ (Isaías 2:2-4; 9:6, 7).
Qué zará ca ndaayaʼ ni guicaa cani qué rusaana de guzuubaʼ diidxaʼ
19. Xiñee nanna ca xpinni Cristu dxandíʼ zaca guiráʼ ni cabézacaʼ.
19 Cristu nga «xaíque sti irá rey ne irá ni runi mandar», nga runi ca xpínnibe nánnacaʼ zaca guiráʼ ni maʼ biziidicaʼ, purtiʼ cabézacaʼ guidxiña dxi gusihuinni Rey sticaʼ pabiáʼ napa poder (Apocalipsis 19:11-20:3; Mateo 24:30). «Ca xiiñiʼ reinu», ni bibí pur espíritu santu ni nabániruʼ ndaaniʼ guidxilayú riʼ la? cabézacabe guidxiña dxi guni mandarnécabe Cristu guibáʼ (Mateo 13:38, NM; Lucas 12:32). Ne «xcaadxi dendxu» ni cadi cusaana de guzuubacaʼ stiidxaʼ Cristu la? cabézacaʼ guidxiña dxi gabi Rey sticaʼ laacaʼ ca diidxaʼ riʼ: «Ma guluu Bixhoze ndaaya laatu, yanna latáʼ laicaa [Paraísu ndaaniʼ guidxilayú riʼ ni] ma nexhe chaahui para laatu dede ante cha guidxilayú» (Juan 10:16; Mateo 25:34). Nga runi, laanu ca xpinni Reinu la? naquiiñeʼ quixhe íquenu cadi gusaana de guzúʼbanu stiidxaʼ Cristu, Rey stinu.
[Cani cá ñee yaza]
a Biiyaʼ ra na: «1914: iza nabé risaca ni zeeda lade ca diidxaʼ ni na Biblia chigaca», yaza 215-218 stiʼ libru Xipeʼ ndiʼ cusiidiʼ Biblia, stiʼ ca testigu stiʼ Jiobá
Zanda gusiéneluʼ ni la?
• Xiñee qué riquiiñeʼ gusaana de guzúʼbanu stiidxaʼ Cristu.
• Ximodo rusihuinni ca xpinni Cristu qué rusaanacaʼ de guzuubacaʼ stiidxabe.
• Xiñee racaláʼdxinu guzúʼbanu stiidxaʼ Cristu, Rey stinu ne cadi gusaana de gúninu ni.
[Cuadru ni zeeda lu yaza 31]
XCAADXI GUENDA GUIZÁʼ GALÁN STIʼ CRISTU
Risaca guiráʼ binni para laabe (Juan 4:7-30).
Riabe binni (Mateo 9:35-38; 12:18-21; Marcos 6:30-34).
Rannaxhiibe binni neca gacanabe ora gúnibe ni (Juan 13:1; 15:12-15).
Ruzuubabe diidxaʼ (Mateo 4:1-11; 28:20; Marcos 11:15-18).
Nánnabe xi runi sentir binni (Marcos 7:32-35; Lucas 7:11-15; Hebreos 4:15, 16).
Nánnabe pora nga zanda guidxaa modo gaca xiixa (Mateo 15:21-28).