9. Xiñee bichaaga Pablu ca xpinni Cristu ni bibí pur espíritu santu ne ca ndaa stiʼ ti cuerpu.

⁹ (Biindaʼ Romanos 12:4, 5, 9, 10). Pablu bichaaga ca xpinni Cristu ni bibí pur espíritu santu casi ti cuerpu ni napa ique ne napa stale ndaa, ne ique ca nga rabi ca ndaa ca xi gúnicaʼ, zacá nga rúnicani dxiiñaʼ tobi si (Col. 1:18). Cásica gadxé gadxé nga ni runi ca ndaa stiʼ xcuerpu binni la? zacaca nga ca xpinni Cristu ni bibí pur espíritu, «neca stale[cabe]», «ma naca né[cabe] Cristu tobi si», ni naca Xaíque stícabe. Zacagá gudxi apóstol Pablu ca xpinni Cristu de Éfeso: «Zanaxhii saa nu, ti jma rusi gaca né nu Cristu tobi si. Laa nga xaíque stinu. Laanu zeda aca nu casi cuerpu stibe, ne ma gudixhe chaahui be laanu casi nexhe chaahui irá ndaa lu ti cuerpu, ne biʼni be laanu tobi si, casi guiʼdi cada ndaa lu ti cuerpu, para cadi iree cueʼ nu. Pa jneza cayuni cada ndaa de ti cuerpu dxiiña la? jneza zaniisi binni que. Zaqueca laanu, pa cada tobi nu guni nu dxiiña ni gucuaa nu la? ze dxi jma rusi ziuzuhuáʼ chaahui nu ne ziyanaxhii saa nu» (Efe. 4:15, 16).

11. 1) Xi racané laanu chuʼnu tobi si. 2) Xi xcaadxi conseju bidii Pablu.

¹¹ Rúninu stipa pur chuʼnu tobi si purtiʼ nadxiisaanu (Col. 3:14). Lu capítulo 12 stiʼ Romanos, laaca bizeeteʼ Pablu zacagá ora guniʼbe «laganaxhii saa de idubi ladxidóʼ to» ne ora guniʼbe «laganaxhii saa casi enda biʼchiʼ». Ora guni binni zacá la? racaneni laacaʼ guni respetársaacaʼ. Sicaríʼ guníʼ apóstol ca: «Cada tobi usisaca stobi ne cadi laca laa». Peru naquiiñeʼ gánnanu cadi purtiʼ nadxiinu ti binni qué zábinu laa paraa cuchee. Naquiiñeʼ gúninu stipa pur chuʼ ca binni ridagulisaa nayá. Nga runi, ora guníʼ Pablu gannaxhiisaanu que laaca guniʼbe ca diidxaʼ riʼ: «Laucaa ná ni nadxabaʼ, ne lachinanda ni nachaʼhuiʼ».