Zácanu binni nadxibalú pa gacané Jiobá laanu

«Guleza gacané Jiobá lii; guca nadxibalú, ne biʼniʼ ladxidoʼloʼ naguidxi. Guleza gacané Jiobá lii.» (SALMO 27:14.)

1. Xiñee risaca gánnanu dxandíʼ zaca ni cabézanu, ne xi para riquiiñeʼ diidxaʼ ca lu Biblia.

ORA ruzaaniʼ biaaniʼ ti lugar la? randa ridúʼyanu guiráʼ ni nuu ra cuzaanini. Zacaca nga laanu, ora nánnanu dxandíʼ zaca xiixa ni cabézanu gaca la? racaneni laanu gudiʼnu cuenta zanda gaca chaahuiʼ ca guendanagana nuu yanna riʼ. Laaca racaneni laanu guibáninu nayecheʼ ne cadi guireʼnu gana. Jiobá si nga rusiidiʼ laanu ximodo zanda gaca chaahuiʼ ca guendanagana ca, ne riquiiñebe Stiidxabe para gábibe cani laanu (2 Timoteo 3:16). Nabé stale biaje ruzeeteʼ Biblia naquiiñeʼ cuézanu gaca xiixa, ne riquiiñeni diidxaʼ riʼ ora ruzeeteni de tuuxa ni dxandíʼ runi cré zaca xiixa cosa galán ni cabeza gaca.a Ora cabézanu gaca xiixa zacá la? maʼ gadxé ni que ora rápasinu gana gaca xiixa ni ruluíʼ qué zanda.

2. Xiñee gunda bidxiilú Jesús guiráʼ ni bidxaagalú.

² Guiráʼ biaje bidxaagalú Jesús xiixa guendanagana la? nabé guníʼ íquebe ximodo gaca chaahuiʼ ni ne bidiibe lugar gucané Jiobá laabe. «Guietenalaʼdxi nu pabiáʼ naná guca para laabe ra ucuá be lu [yaga] que, peru qué nizaalaʼdxi be gati be zaqué, purti nanna be nabé zieche be ora ma udiʼdi be ni. Ne zaqué uca ni, udiʼdi si irá enda naná stibe que la? ze be ibáʼ, ne ma zuba be cueʼ Dios ni nandxóʼ.» (Hebreos 12:2.) Jesús bibani ndaaniʼ guidxilayú riʼ para gusihuinni napa Jiobá derechu de guni mandar guibáʼ ne lu guidubi naca Guidxilayú ne para gusisácabe lá Bixhózebe. Ngue runi bizuubabe stiidxaʼ Dios guiráʼ ora, nécapeʼ nánnabe naná modo zuninácabe laabe pur laani.

3. Pabiáʼ risaca para ca xpinni Dios gánnacaʼ zaca ni chigúnibe.

³ Rey David guníʼ raca binni nadxibalú ora nanna dxandíʼ zaca xiixa ni cabeza gaca, nabe: «Guleza gacané Jiobá lii; guca nadxibalú, ne biʼniʼ ladxidoʼloʼ naguidxi. Guleza gacané Jiobá lii» (Salmo 27:14). Nga runi, pa racaláʼdxinu gaca ladxidoʼno naguidxi la? qué chuʼ dxi guiníʼ íquenu qué zaca ni cabézanu guni Dios; sínuque jma naquiiñeʼ guiníʼ íquenu de laani guiráʼ ora ne guni crenu ni de guidubi ladxidoʼno. Zacá qué zaca nagana para laanu chinándanu ejemplu stiʼ Jesús, purtiʼ qué zadxíbinu para gucheechenu diidxaʼ ne zápanu stale gana para gacanenu binni gaca xpinni Cristu (Mateo 24:14; 28:19, 20). Galán nga guni crenu zaca ni cabézanu guni Dios cásica nápanu fe ne cásica nadxiinu binni, purtiʼ zusihuinni cani dxandíʼ xpinni Dios laanu (1 Corintios 13:13).

Cadi gusaana de guicálunu Dios

4. Xi cabeza ca xpinni Cristu ni cheʼ guibáʼ ne xi cabeza «xcaadxi dendxuʼ» ca.

⁴ Ca xpinni Dios nánnacaʼ dxandíʼ zaca guiráʼ ni chigúnibe. Ca binni ni bibí para cheʼ guibáʼ maʼ cabézasicaʼ guidxiña dxi guni mandárnecaʼ Cristu. Ne «xcaadxi dendxuʼ» ca cabézacaʼ dxi maʼ guixédxecaʼ de lu naʼ ca cosa malu ra cacaʼ yaga, ti ganda guibánicaʼ casi modo riuulaʼdxiʼ Dios guibani ca xiiñiʼ (Juan 10:16; Romanos 8:19-21; Filipenses 3:20). Ora gaca nga maʼ qué zuniná pecadu laacabe ne laaca zaree guiráʼ ca yuubaʼ stini. Jiobá nga Dios ni rudii «irá ni nachaʼhui ne irá ni dxandí sicarú», nga runi guizáʼ galán nga ni chigudibe ca binni ni ruzuubaʼ stiidxabe (Santiago 1:17; Isaías 25:8).

5. Xi naquiiñeʼ gúninu para cadi gusaana de guicálunu Dios.

⁵ Pabiáʼ risaca para laanu gánnanu dxandíʼ zaca ni cabézanu guni Dios yaʼ. Guidúʼyanu xiná Romanos 15:13: «Dios nga racané laanu para ganda icá lú nu laa. Rinaba laabe usieche be laatu ne quixhe dxí be ladxidóʼ to ra guni cre tu laabe. Zacá zacané Espíritu Santu laatu ti jma rusi icá lú tu laabe». Nga runi, ora nánnanu dxandíʼ zaca xiixa ni cabézanu la? reeda gácani casi xtuxhu gubidxa ni rihuinni siadóʼ, purtiʼ riguixhedxini ladxidoʼno, rusiécheni ne riguuni gana laanu, ne racaneni gánnanu xi pur nabáninu. Laaca cusiene textu ca sti cosa: para cadi gusaana de guicálunu Dios la? naquiiñeʼ guni crenu ni cá lu Stiidxabe ne gápanu espíritu stibe. Romanos 15:4 na: «Laganna dxichi: irá ni ucuá lu Xquiʼchi Dios ucuá para usiidi laanu, ti pur laani gata dxí ladxidóʼ no ne cadi ixhacalaʼdxi nu. Ne zacá cadi guiaana nu de icá lú nu Dios». Nga runi galán guinabadiidxanu laca laanu: «Ñee rihuinni cá luaʼ Dios purtiʼ riuuladxeʼ guundaʼ Biblia ne ruundaʼ ni guiráʼ dxi la? Ñee stale biaje rinabaʼ Dios gudii espíritu stiʼ naa la?» (Lucas 11:13).

6. Xi qué riquiiñeʼ gúninu para cadi guiaandaʼ laanu xi chiguni Dios.

⁶ Jesús nga ejemplu stinu. Laabe nabé biindabe Stiidxaʼ Dios ne bidiini stipa laabe. Pur ni bíʼnibe ca bisihuínnibe naquiiñeʼ guiníʼ íquenu lu guiráʼ ni zeeda lu Biblia, ti cadi guidxáganu ne cadi cuísanu atrá (Hebreos 12:3). Yanna, xi zazaaca pa guiaandaʼ laanu xi chiguni Jiobá ne maʼ qué guni crenu ni de guidubi ladxidoʼno yaʼ. O xi zazaaca pa guicá íquenu sti cosa, casi chuuláʼdxinu gápanu jma bueltu o guicá íquenu gácanu tuuxa binni risaca ndaaniʼ guidxilayú riʼ yaʼ. Zusidxaga cani laanu de guni adorarnu Dios ne zabee cani gana laanu. Laaca zusirá cani guendanayecheʼ stinu ne maʼ qué zanda diʼ guibáninu casi modo na Dios. Pa zacá nuunu la? zará fe stinu ne chaahuidugá zadxáganu de gúninu ni na Dios (1 Timoteo 1:19). Peru ni zacané para gaca fe stinu naguidxi nga, gánnanu dxandíʼ zaca ni cabézanu guni Dios.

Zahuinni nápanu fe pa runi crenu zaca ni cabézanu

7. Xiñee riquiiñeʼ guni crenu zuni Dios ni maʼ guníʼ para guihuinni nápanu fe.

⁷ Sicaríʼ na Biblia: «Pa dxandí [nápanu fe] Dios la? qué zagúʼ xa ique nu de ni cabeza nu udii be laanu, ne neca caʼru ihuinni irá ni» (Hebreos 11:1). Casi bidúʼyanu lu textu ca, riquiiñeʼ nga gápanu fe para ganda guni crenu zaca xiixa ni cabézanu guni Dios. Guiníʼ íquenu de Abrahán ne xheelabe Sara. Jiobá gudxi laacabe zápacabe ti xiiñicabe dxi guizáʼ maʼ huaniisicabe. Para laanu la? maʼ qué ñanda diʼ ñápacabe xiiñicabe biaʼ iza nápacabe que (Génesis 17:15-17). Peru, xi guníʼ ique Abrahán yaʼ. «Neca ruluíʼ ma qué ñapa Abraham xiiñiʼ, peru bini cre ni gudxi Dios laa, uleza beda aca bixhoze stale binni.» (Romanos 4:18.) Cumu nánnabe zuni Dios ni maʼ guníʼ la? gucaneni para guca fe stibe jma naguidxi, ngue runi jmaruʼ si biʼniʼ crebe dxandíʼ zápabe xiiñibe. Nga runi cásica laabe ne xheelabe Sara, bisaanacabe lídxicabe ne chupa chonna de ca binni lídxicabe para yebíʼcabe sti guidxi. Biaʼ xcaadxi iza bibánicabe gulézacabe ndaaniʼ yoo de lari.

8. Ximodo rihuinni runi crenu zaca xiixa ni cabézanu ora qué rireʼnu gana.

⁸ Abrahán qué niree diʼ gana laga cabeza guni Dios ni maʼ guníʼ, purtiʼ bizuubabe stiidxaʼ guiráʼ ora, dede ne dxi gudíʼdibe ra jma nagana (Génesis 22:2, 12). Zacaca nga yanna riʼ, pa laanu guzúʼbanu diidxaʼ ne qué gusaana de gúninu ni na Jiobá la? jmaruʼ si zuni crenu dxandíʼ zaca ni cabézanu gúnibe. Pablu bicaa ca diidxaʼ riʼ: «Pa qué ixhacalaʼdxi nu la? zieche né Dios laanu, ne zacá jma rusi zacá lú nu laabe. Ne cadi pur gana si cá lú nu laabe» (Romanos 5:4, 5). Nga runi laaca guniʼbe: «Ne racaladxe cadi guiaana dxí nin tobi de laatu de guni xhiiña be ne enda nayecheʼ, ti icaa tu irá ni racalaʼdxi be udii be laatu» (Hebreos 6:11). Pa laanu guiníʼ íquenu zacá la? zahuinni nuunu gaxha de Jiobá, ne zacaneni laanu chuʼnu nayecheʼ ti cadi guireʼnu gana ora gudxíʼlunu ca guendanagana stinu.

«Laguieche né ni cabeza tu udii Dios laatu»

9. Xi riquiiñeʼ gúninu gatigá para chuʼnu nayecheʼ «ne ni cabeza [nu] udii Dios laa[n]u».

⁹ Jma galán ni cabézanu gudii Dios que intiica cosa ni gacalaʼdxiʼ binni gudii laanu yanna riʼ. Sicaríʼ na Salmo 37:34: «Guleza gacané Jiobá lii ne cadi guiree cueʼluʼ de ca neza stibe, ne laabe zandísabe lii para guicaaluʼ guidxilayú. Ora iruugu ca binni qué iquiiñeʼ ca, zuuyuʼ ni». Nga runi nápanu stale razón para chuʼnu nayecheʼ «ne ni cabeza [nu] udii Dios laa[n]u» (Romanos 12:12). Peru para ganda gúninu nga la? cadi liica naquiiñeʼ guiaandaʼ laanu ni cabézanu guni Dios. Ñee riníʼ íquenu gatigá de laani la? Ñee riníʼ íquenu maʼ nuunu ndaaniʼ Paraísu ca, nazaacanu, gastiʼ cadi cuchiiña laanu, nabaninenu ca binni lídxinu nayecheʼ ne cayúninu dxiiñaʼ ni gusiecheʼ laanu la? Ñee riníʼ íquenu pabiáʼ galán ca dibuju ni reeda lu libru ne ca revista ra rihuinni Paraísu ca la? Ca dibuju ca racané cani laanu guiníʼ íquenu ximodo chigaca Paraísu ca. Zeeda gácani casi ora ridúʼyanu neza ra ti ventana, pa nayá ni la? nayaʼni zadúʼyanu deche ni. Peru pa gaca biidiʼ ni maʼ nachuundu zadúʼyanu. Nga runi pa gásinu ne gudiʼnu lugar chuʼ xcaadxi cosa ni guchélunu la? nin qué zandaa ziaandaʼ laanu pabiáʼ galán nga ni chiguni Dios, ne maʼ zacá íquenu gúninu xcaadxi cosa ni qué risaca. ¡Qué liica chuʼ dxi gúninu nga!

10. Xiñee rihuinni nuunu galán ne Jiobá ora qué riaandaʼ laanu xi chigudiibe laanu.

¹⁰ Laanu rúninu ni na Jiobá purtiʼ nadxiinu laabe, nga nga razón ni jma risaca para laanu (Marcos 12:30). Neca zacá, cadi naquiiñeʼ gusiáʼndanu ni chigudiibe laanu, purtiʼ dede Jiobá ribeza gúninu zacá. Hebreos 11:6 na: «Qué zanda guni binni ni riulaʼdxi Dios pa qué [gapa fe]. Purti para idxiña cabe laabe la? napa cabe xidé guni cre cabe nuu be ne rulabi be cani uyubi laabe». Xiñee racalaʼdxiʼ Jiobá guidúʼyanu laa casi tuuxa ni rudii laanu xiixa yaʼ. Purtiʼ zacá rusihuínninu laabe nga Bixhózenu ni nuu guibáʼ, nachaʼhuiʼ ne nadxii laanu. Pa ñaca qué zaca chaahuiʼ ca guendanagana nuu yanna riʼ ne cadi cabézanu guni Jiobá xiixa pur laanu la? qué ñanda diʼ nibáninu nayecheʼ ne qué nidxélanu xi ñúninu ora nidídinu ra nagana (Jeremías 29:11).

11. Xi biʼniʼ Moisés purtiʼ biʼniʼ cré zudii Dios laa ni guníʼ.

¹¹ Moisés bisihuinni dxandíʼ qué nusiaandaʼ ni chigudii Dios laa, ne ngaca nga ni naquiiñeʼ gúninu. Cumu beeda gácabe «xiiñi xiñi dxaapa rey Faraón» la? gúcabe tobi hombre ni biʼniʼ mandar, binibiáʼ stale binni laabe ne ñanda niquiiñebe guiráʼ bidxichi guyuu Egipto. Yanna, ñee gucuá íquebe guiráʼ ca cosa que la? o gudixhe íquebe gúnibe ni na Jiobá. Laabe gudixhe íquebe gúnibe ni na Jiobá. Xiñee yaʼ. «Purti bicaa ique be ni chi udii Dios laabe.» (Hebreos 11:24-26.) Bihuinni dxíchica dxandíʼ biʼniʼ crebe zudii Jiobá laabe ni maʼ guníʼ.

12. Xi zanda gúninu pa runi crenu zaca ni cabézanu guni Dios.

¹² Apóstol Pablu na riquiiñeʼ ti cascu para gapa ique binni. Laaca guniʼbe zanda gápanu guendabiaaniʼ stinu pa dxandíʼ runi crenu dxandíʼ zaca ni cabézanu guni Dios. Xiñee yaʼ. Purtiʼ racaneni laanu guiníʼ íquenu jneza, gánnanu xii nga ni naquiiñeʼ gúninu ne cadi guchéʼnenu Jiobá (1 Tesalonicenses 5:8). Galán nga guiníʼ íquenu lu guiráʼ ni chiguni Dios, purtiʼ zacaneni laanu gúninu cásica biʼniʼ Moisés ne Pablu. Pa gúninu nga la? qué zacálunu guiráʼ ca cosa ni ruluíʼ risaca nuu ndaaniʼ guidxilayú riʼ, «sínuque icá lú [nu] Dios ni nabani purti laa rudii laanu irá ni usieche laanu». Cumu qué ricá íquenu guyúbinu puru si para laanu la? riuu tu riníʼ laanu, peru naquiiñeʼ gácanu binni nadxibalú para guni huantarnu ni gábicabe laanu, purtiʼ nga nga ni jma risaca. Ne cadi guiaandaʼ ndiʼ laanu: Jiobá zudii «enda nabani ni qué zaluxe» guiráʼ ca binni ni nadxii laabe ne ribézacaʼ gacanebe laacaʼ. Nga runi, cadi galán diʼ chuʼnu nayecheʼ ne ca cosa ni qué risaca ni nuu ndaaniʼ guidxilayú riʼ (1 Timoteo 6:17, 19).

«Qué ziuu dxi gusaana [lii]»

13. Xi cayabi Jiobá ca binni ni ruzuubaʼ stiidxabe.

¹³ Ca binni ni cá lú zadxiña dxi gaca chaahuiʼ guiráʼ ca cosa malu nuu yanna riʼ la? cudiicaʼ cuenta qué zanda diʼ gaca chaahuiʼ ni, purtiʼ zeʼ dxi jmaruʼ si zidale ca yuubaʼ nuu lu guidxilayú riʼ (Mateo 24:8). Peru binni ni cabeza gacané Jiobá laa la? maʼ qué riniʼ ique zacá, purtiʼ nanna cayapa Dios laa, ne maʼ qué riuu xizaa pur guiráʼ ca cosa malu cayaca yanna riʼ (Proverbios 1:33). Cumu cadi cá lube guni chaahuiʼ ca gobiernu ca guidxilayú riʼ la? rúnibe ni na conseju bidii Pablu riʼ: «Cadi ibani tu para gapa si tu bidxichi, sínuque laguieche né biaʼ tiica napa tu, purti na Dios rabi laanu: “Qué zusaana [lii] ne qué ziaana dxie de acaniá [lii]”» (Hebreos 13:5).

14. Xiñee cadi naquiiñepeʼ chuʼnu xizaa pur gápanu ni guibaninenu.

¹⁴ Pur ca diidxaʼ ni bidúʼndanu lu textu ca rihuinni zapa Jiobá laanu. Cumu nanna Jesús dxandíʼ zapa Jiobá laanu ne zudii guiráʼ ni caquiiñenu la? guniʼbe ca diidxaʼ riʼ: «Cadi guiaanadxitu de guyúbitu primeru Reinu stiʼ Dios ne guendaruni jneza stibe» (NM). Laaca guniʼbe: «Ne óraque zudii [Dios] laatu cani riuu tu xizaa pur laa. Nga runi cadi chuʼ tu xizaa de ni chi gaca ixíʼ, purti ixí ru nga guʼya tu xi gacaʼ» (Mateo 6:33, 34). Jiobá nanna pabiáʼ nagana para gúninu ni na Reinu stibe ne stale gana, ne laaca nánnabe nagana para guidxélanu guiráʼ ni caquiiñenu para guibáninu. Cumu zacá ni la? caquiiñeʼ guni crenu de guidubi ladxidoʼno zanda gudiibe ni cayaadxaʼ laanu, ne laabe dxandíʼ racaláʼdxibe gúnibe ni (Mateo 6:25-32; 11:28-30).

15. Ximodo ruuyadxí ca xpinni Cristu ti lugar si.

¹⁵ Rihuinni runi crenu Jiobá de guidubi ladxidoʼno ora ridúʼyadxinu ti lugar si (Mateo 6:22, 23, NM). Binni ni ruuyadxí ti lugar si la? qué rusiguii, riníʼ ique puru cosa jneza, qué rachelú gapa ni napa stobi ne qué raca nanalaʼdxiʼ binni. Peru cadi pur nga guibánibe lu guendapobre ne gusiaandabe ca binni lídxibe, sínuque zabánibe ne guendabiaaniʼ ne primeru zúnibe ni na Jiobá (2 Timoteo 1:7).

16. Xiñee riquiiñeʼ gápanu fe ne gácanu binni nadxibalú para ganda guidúʼyadxinu ti lugar si.

¹⁶ Para ganda guidúʼyadxinu ti lugar si la? riquiiñeʼ gápanu fe ne gácanu binni nadxibalú. Casi pa ra rúninu dxiiñaʼ nabé rinábacabe laanu guiaananu órapeʼ nápanu guendaridagulisaa la? naquiiñeʼ quixhe íquenu chuunu cani purtiʼ para Dios jma risaca cani para laanu. Pa huaxiéʼ runi crenu zudii Jiobá guiráʼ ni caquiiñenu la? Binidxabaʼ zanda gusaba laanu, purtiʼ zucaabe laanu guiníʼ íquenu qué zanda gusaananu dxiiñaʼ stinu, ne guni nga maʼ qué ziuunu ca guendaridagulisaa ni rápanu. Nga runi, pa huaxiéʼ fe nápanu la? zúninu ni nabe, ne maʼ qué zudiʼnu lugar gabi Jiobá laanu xii nga ni jma risaca ni naquiiñeʼ gúninu. ¡Guizáʼ zacananu pa gúninu xcustu Binidxabaʼ! (2 Corintios 13:5.)

«Guleza gacané Jiobá lii»

17. Xi ndaayaʼ napa binni ni runi cré Jiobá de guidubi ladxidóʼ yanna riʼ.

¹⁷ Stiidxa Dios na qué ziuu dxi guniti ca binni ni rudii lugar gacané Jiobá laacaʼ (Proverbios 3:5, 6; Jeremías 17:7). Binni ni rudii lugar gacané Jiobá laa la? nuu nayecheʼ ne ca cosa ni napa. Nécapeʼ ñuuláʼdxibe ñápabe jma la? qué risaca diʼ cani para laabe, purtiʼ jma stale ndaayaʼ cabézabe gudii Dios laabe. Zacá rihuinni rudiibe lugar gacané Jiobá laabe, ne nánnabe dxandíʼ rudii Dios guiráʼ ni rinabaʼ ladxidóʼ ca binni ni ruzuubaʼ stiidxaʼ, purtiʼ jneza ni rinábacabe (Salmo 37:4, 34). Nga racané laabe guibánibe nayecheʼ yanna. «Ni cabeza ca binni runi ni jneza la? rusiécheni laacaʼ; peru qué zaca ni cabeza ca binni qué iquiiñeʼ.» (Proverbios 10:28.)

18, 19. 1) Xi cayabi Jiobá laanu. 2) Ximodo rihuinni nuu Jiobá ladu derechu stinu.

¹⁸ Ora ti baʼduhuiiniʼ naaze naʼ bixhoze la? nanna qué zúnicabe laa gastiʼ. Ngaca nga nánnanu ora canazanenu Bixhózenu ni nuu guibáʼ. Jiobá gudxi ca diidxaʼ riʼ Israel: «Cadi guidxíbiluʼ, purtiʼ naa nuaaniáʼ lii. [...] Dxandipeʼ zacaniáʼ lii. [...] Purtiʼ naa, Jiobá Dios stiluʼ naazeʼ dxiicheʼ ladu derechu stiluʼ, [naa] cayabeʼ lii: “Cadi guidxíbiluʼ. Naa dxandipeʼ zacaniáʼ lii”» (Isaías 41:10, 13).

¹⁹ ¡Guizáʼ galán nga guiníʼ íquenu casi ñaca naaze Jiobá nanu! Zacá ga guníʼ ique David ora bicaa ca diidxaʼ riʼ: «Naguixheʼ Jiobá nezaluáʼ ora tiica si. Purtiʼ laabe nuube ladu derechu stinneʼ, qué zucaa biequedícabe naa» (Salmo 16:8). Ximodo nga nápanu Jiobá «ladu derechu» stinu yaʼ. Chiguzéʼtenu chupa modo. Tobi ca la? ora rudiʼnu lugar gabi Stiidxabe laanu modo naquiiñeʼ guibáninu, ne stobi ca ora qué rusaana de guiníʼ íquenu lu premiu sicarú ni nápabe para laanu. Asaf, tobi de ca hombre ni bicaa Salmo biindaʼ sicaríʼ: «Nuaa gaxha de lii guiráʼ ora; lii naaze dxiichiluʼ ladu derechu. Ne ca conseju stiluʼ cayaʼbuʼ naa xi guneʼ, ne zusisácaluʼ naa» (Salmo 73:23, 24). Cumu zacá racané Jiobá laanu la? zanda guni chaahuinu intiica guendanagana ni guidxaagalunu.

«Ma cadxiña dxi ilá tu»

20, 21. Xi zuni Jiobá pur ca binni ni rudii lugar gacanebe laacaʼ.

²⁰ Zeʼ dxi jma caquiiñeʼ gápanu Jiobá ladu derechu stinu. Maʼ cadxiña dxi guinitilú religión ni cadi dxandíʼ, ne ora gaca nga maʼ zuzulú ca dxi jma nagana para ca binni cayuni ni na Binidxabaʼ (Mateo 24:21). Guiráʼ binni ni qué runi cré Dios zaca díticaʼ dxi ca. Peru neca nuu guiráʼ ca yuubaʼ ca la? ca xpinni Dios ni nadxibalú ziéchecaʼ purtiʼ nánnacaʼ zalacaʼ, cásipeʼ modo guníʼ Jesús: «Ora guʼya tu uzulú gaca irá nga la? lauzuhuaa chaahuiʼ, laindisa ique purti ma cadxiña dxi ilá tu» (Lucas 21:28).

²¹ Nga runi, riquiiñeʼ chuʼnu nayecheʼ pur ni cabézanu guni Jiobá, ne cadi gudiʼnu lugar quite guiráʼ ni napa Binidxabaʼ lu guidxilayú riʼ laanu, o gucaa cani laanu gúninu xiixa ni cadi jneza. Laaca riquiiñeʼ guquídxinu fe stinu, gannaxhiinu casi rusiidiʼ Biblia ne guidxíbinu Dios. Zacá qué zadxíbinu ora gudxíʼlunu Binidxabaʼ ne zuzúʼbanu stiidxaʼ Jiobá, neca guizaacanu intiica cosa (Santiago 4:7, 8). Sicarupeʼ ca diidxaʼ cayabi Biblia laanu: «Lagaca nadxibalú, ne laguni ladxidoʼto naguidxi, purtiʼ cabézatu gacané Jiobá laatu» (Salmo 31:24).

[Cani cá ñee yaza]

Xi guicábiluʼ

• Xiñee gunda guca Jesús ti binni nadxibalú.

• Xiñee riquiiñeʼ gápanu fe ne guni crenu zaca ni maʼ guníʼ Jiobá.

• Xi zanda gúninu pa nápanu fe ne pa runi crenu zuni Dios ni maʼ guníʼ.

• Xiñee nanna binni ni rudii lugar «gacané Jiobá» laa zaca chaahuiʼ ca cosa malu nuu yanna riʼ.