«Cadi chuʼ dinde né tu irutiʼ»
«Laguni biaʼ ganda para cadi chuʼ dinde né tu irutiʼ. Zaa guni cabe ni laacabe peru cadi né rusi ca laatu.» (ROM. 12:18)
1, 2. 1) Xi gudxi Jesús ca discípulo stiʼ zazaacacaʼ. 2) Paraa zanda guidxélanu conseju ni zacané laanu gánnanu xi gúninu ora chuʼ tu gucaalú laanu.
JESÚS maca gudxi ca discípulo stiʼ zucaalú binni guidxilayú laacaʼ, ne gueelaʼ ante gátibe que gúdxibe laacaʼ xiñee. Sicaríʼ gúdxibe ca apóstol stibe: «Pa ñaca de laacabe laatu la? ñanaxhii cabe laatu, peru ma ulee laatu de lade cabe, nga runi nanalaʼdxi cabe laatu, purti cadi de laacabe laatu» (Juan 15:19).
2 Pablu biiyaʼ dxandíʼ ca diidxaʼ ni guníʼ Jesús que pur cani bizaaca. Lu guiropa carta bicaabe ra nuu Timoteu, gúdxibe laa sicaríʼ: «Lii, ma nanna chaahui lu ni bisiideʼ ne modo bibaneʼ, xi cá ique guneʼ, ne xi rune cre. Qué huaxhacaladxe irutiʼ, sínuque huayanaxhieeʼ iráʼ, ne nannu irá ni udide ra uzabi nanda cabe naa, ne irá modo ucanaʼyaʼ». Ne laaca guniʼbe: «Irá ni racalaʼdxi sa modo na Cristu Jesús, zazabi nanda cabe laacaʼ» (2 Tim. 3:10-12). Lu capítulo 12 stiʼ Romanos, carta ni bicaa apóstol Pablu que, bidiibe caadxi conseju galán para ganna ca xpinni Cristu xi gúnicaʼ ora gucaalú binni laacaʼ. Ca conseju ca laaca zanda gacanécani laanu lu ca últimu dxi riʼ.
«Laguni ni jneza si»
3, 4. Ximodo zanda chinanda ca xpinni Cristu conseju ni zeeda lu Romanos 12:17 ora 1) cadi Testigu xheelacaʼ, 2) guizaaca ca xpesínucabe xiixa desgracia.
3 (Biindaʼ Romanos 12:17.) Ca diidxaʼ ni guníʼ Pablu ca cusihuínnicani ora chuʼ tu gucaalú laanu cadi guquíxenu laacaʼ ni gúnicaʼ laanu. Cani jma zacané conseju riʼ nga cani cadi Testigu xheelacaʼ. Ti xpinni Cristu naquiiñeʼ gucueeza laa para cadi guicabi ora gabi tuuxa laa diidxaʼ ni guniná laa ne ora gúnicabe laa xiixa cosa feu. Qué ribeendú diʼ binni gastiʼ pa guquixe ni gúnicabe laa, sínuque laga jmaruʼ si rapa guendanagana.
4 Pablu bidii conseju riʼ: «Laguni ni jneza si, ti qué gapa binni xi pur iníʼ laatu». Pa ti gunaa xpinni Cristu cadi Testigu xheelaʼ, ne hombre ca guiníʼ mal de cani runi crebe la? galán guiníʼnebe laa ne diidxaʼ nadóʼ para cadi tinde diidxacabe (Pro. 31:12). Ti betelita ni láʼ Carlos rietenalaʼdxiʼ nabé bicaalú bixhózebe jñaabe dxi gúcabe nahuiiniʼ, peru despué maʼ qué ñuni bixhózebe zaqué purtiʼ guca jñaabe nachaʼhuiʼ ne laa ne biʼniʼ stipa pur guni tender binnilidxi. Sicaríʼ guníʼ Carlos: «Jñaaʼ gudxi laadu naquiiñeʼ guni respetardu bixhózedu, bixhozeʼ ndaʼ nabé rabi naa chichiteniáʼ laa ti juegu ni riuulaʼdxiʼ. Naa ndaʼ huaxiéʼ riuuladxeʼ juegu que, peru bixhozeʼ nabé rusiecheʼ ni laa». Despué bizulú biindanécabe bixhoze Carlos Biblia ne guyuunisa. Ca testigu stiʼ Jiobá rúnicabe «ni jneza si, ti qué gapa binni xi pur iníʼ laa[cabe]», zacá nga rucaacabe binni ni riníʼ ique mal de laacabe guchaacaʼ modo riníʼ íquecaʼ. Ne rúnicabe zacá ora gacanécabe ca xpesínucabe ora rizaacacaʼ xiixa desgracia.
Zucueezanu cani cucaalú laanu ora gácanu nachaʼhuiʼ ne laacaʼ
5, 6. 1) Ximodo nga rucuí ndáninu «buu ni caguí» galaa ique ca xhenemígunu. 2) Bizeeteʼ ejemplu stiʼ tuuxa ni yenanda conseju ni zeeda lu Romanos 12:20 ne guleendú ni galán.
5 Apóstol Pablu bicaa ca diidxaʼ riʼ: «Pa candaana xhenemíguluʼ, bidii ni gobe; pa cayátibe nisa, bidii nisa guebe; purtiʼ pa gúniluʼ zacá zucuí ndániluʼ buu ni caguí galaa íquebe» (Rom. 12:20, NM). Xcaadxi conseju ni bidúʼyanu lu capítulo 12 stiʼ Romanos ca racanécani laanu gánnanu cadi bizeeteʼ diʼ Pablu buu ca para guiniʼbe guninanu cani cucaalú laanu o gusituinu lucaʼ. Ni caniʼbe racá nga biquiiñecabe buu ca dxiqué para gusiácabe xiixa guiibaʼ. Sicaríʼ bicaa Charles Bridges, ti hombre ni nabé biindaʼ Biblia ni bibani lu siglu XIX que: «Cadi lu guí si quíxhetu guiibaʼ naguidxi; lagucuí ndani buu luguiáʼ ni ti zacá gaca nandáʼ luguiáʼ ni ne xagueteʼ ni. Huaxiéʼ si binni nga naguidxi ladxidóʼ para cadi iguudxi, o guiá [casi riá ti guiibaʼ], ora gusihuínnicabe nadxiicabe laacaʼ ne guni huantárcabe laacaʼ ne gúnicabe stale cosa pur laacaʼ, zacá zeeda gaca cani gúnicabe ca casi guí».
6 Ora gácanu nachaʼhuiʼ ne binni ni cucaalú laanu zanda ucuudxinu ladxidóʼcabe ne gusaanacabe de gucaalúcabe ca xpinni Dios, zacá nga casi ñaca nucuí ndáninu buu ni caguí galaa íquecabe. Pur cani gúninu zanda gucaʼnu binni guchaa modo riníʼ ique de xquidxi Jiobá ne cani rusiidicabe de Biblia. Sicaríʼ bicaa apóstol Pedru: «Lasá jneza lade cani qué runi cre Dios, neca riníʼ cabe laatu ne napa cabe laatu casi binni malu, peru zuuya cabe pabiáʼ jneza runi tu, ne zacá zusisaca cabe Dios dxi cuidxi cuenta irá xixé» (1 Ped. 2:12).
«Cadi chuʼ dinde né tu irutiʼ»
7. 1) Ximodo nga riguixhedxí Cristu ladxidóʼ ca discípulo stiʼ. 2) Xi rucaa nga laanu gúninu.
7 (Biindaʼ Romanos 12:18.) Últimu gueelaʼ guyuu Jesús ne ca discípulo stiʼ que gúdxibe laacaʼ: «Zaguixhe dxie ladxidóʼ to casi nexhe dxí ladxiduáʼ» (Juan 14:27). Cristu riguixhedxí ladxidoʼno purtiʼ laabe ne Bixhózebe nadxiicabe laanu ne riuuláʼdxicabe ni cayúninu. Ne cumu riguixhedxibe ladxidoʼno la? naquiiñeʼ gucaa nga laanu cadi chuʼdindenenu binni. Cani dxandíʼ xpinni Cristu cadi riuuláʼdxisicaʼ chuʼcaʼ galán ne sti binni, sínuque rucaacabe xcaadxi binni guni cásica cayúnicabe, nga runi zanda guininu laacabe nga cani «riguixhe dxí enda ridinde» (Mat. 5:9).
8. Xi zanda gúninu para cadi chuʼdindenenu binnilídxinu ne ca binni ridagulisaa.
8 Ti modo zanda gusihuínninu riguixhedxinu guendaridinde nga nagueendaca guni chaahuinu intiica guendanagana gapanenu binnilídxinu ne nga zacané cadi gácacani jma naroʼbaʼ (Pro. 15:18; Efe. 4:26). Zaqueca nga naquiiñeʼ gúninu lade ca binni ridagulisaa. Apóstol Pedru guníʼ naquiiñeʼ gucueezanu lúdxinu para cadi chuʼdindenenu binni (1 Ped. 3:10, 11). Santiagu laaca guníʼ xi zándaca guizaaca binni pa cadi iquiiñeʼ ludxi jneza, ne guniʼbe pabiáʼ risaca nga cadi gapa binni envidia ne gacalaʼdxiʼ tiidiʼ lu stobi. Despué de nga guniʼbe ca diidxaʼ riʼ: «Ni ma bisiene Dios laa la? ma qué lica zucaa ique ni nadxabaʼ, qué zuyubi diidxaʼ, ne qué zucaa lú, sínuque zaca nadóʼ ne ziuu razón. Ziá binni ne zuni stale enda nachaʼhui de idubi ladxidó, ne cadi para udxiiba binni laa. Zaree ndu xhiiña cani runi pur chuʼ binni tobi si, purti cayuni ca jneza ne laca cayacané ca ca xcaadxi guni jneza» (Sant. 3:17, 18).
9. Neca racaláʼdxinu «cadi chuʼ dinde né [n]u irutiʼ», xi cadi naquiiñeʼ gusiáʼndanu.
9 Lu Romanos 12:18 guníʼ Pablu cadi ca binnilídxisinu ne ca binni ridagulisaa nga cadi chuʼdindenenu. Laabe guniʼbe «cadi chuʼ dinde né tu irutiʼ», casi ca xpesínunu, cani runinenu dxiiñaʼ, cani rinenu scuela ne ca binni ni rinínenu de stiidxaʼ Dios. Peru apóstol Pablu bisiene chaahuiʼ ximodo naquiiñeʼ gúninu ni ora guniʼbe ca diidxaʼ riʼ: «Laguni biaʼ ganda». Nga riníʼ neca rúninu stipa pur cadi chuʼdindenenu binni la? qué ziuu dxi gusaananu de chinándanu ca conseju stiʼ Dios pur gúninu ni.
Jiobá nga guquixe ni laacabe
10, 11. Xiñee cadi jneza guquíxenu binni ni guni laanu.
10 (Biindaʼ Romanos 12:19.) Ti xpinni Cristu rucueeza laa ora chuʼ tu guni laa xiixa, ne raca «nadóʼ» dede ne «cani qué na icaa stiidxa Dios», laacabe nga cani qué náʼ gucaadiaga laanu o dede rucaalucaʼ laanu ora gucheechenu diidxaʼ (2 Tim. 2:23-25). Despué de gudxi Pablu ca xpinni Cristu que cadi guquíxecaʼ ni gúnicabe laacaʼ la? laaca guniʼbe: «Lausaana ni lu ná Dios». Laanu, ca xpinni Cristu, nánnanu cadi naquiiñeʼ guquíxenu binni ni guni laanu. Hombre ni bicaa salmo que na: «Bisaana de guidxiichiluʼ ne bisaana de guidaaluʼ xiana; cadi guidxiichiluʼ dede gúniluʼ cosa malu» (Sal. 37:8). Salomón laaca bidii conseju riʼ: «Cadi guiniʼluʼ: “¡Naa zuquixe laabe ni bíʼnibe!”. Guleza gacané Jiobá lii, ne laabe zulabe lii» (Pro. 20:22).
11 Pa guni ca xhenemígunu laanu xiixa la? ni jma galán gúninu nga gudiʼnu lugar gusabanáʼ Jiobá laacabe ora nabe gúnibe ni ne pa gúʼyabe naquiiñeʼ gácani. Pablu laaca guníʼ: «Xcuenta nuu ni [na Jiobá], ne naa uquixe ni laacabe», ca diidxaʼ ca cusihuínnicani caníʼ ique Pablu de xiana stiʼ Dios (zanda gúʼndaluʼ Deuteronomio 32:35). Pa gacaláʼdxinu guquíxenu binni ni biʼniʼ laanu la? naquiiñeʼ gánnanu cadi laadinu nga nápanu xidé gúninu ni, purtiʼ Jiobá si nga napa derechu ca. Ne laaca zusihuínninu qué runi crenu ni guníʼ Jiobá riʼ: «Naa uquixe ni laacabe».
12. Ximodo ne padxí zusihuinni Jiobá xiana stiʼ.
12 Ra bizulú Pablu carta ni bicaa ra nuu ca xpinni Cristu de Roma que guníʼ sicaríʼ: «Xiana sti Dios nuu luguiá irá cani qué rulabi laa, ne irá cani ruchee, purti pur irá ni cuchee cabe que, qué ganda ihuinni ni jneza» (Rom. 1:18). Jiobá zaquiiñeʼ Xiiñiʼ para gusihuinni «xiana sti» ora guzulú ca dxi «jma nagana» ca (Apo. 7:14). «Zacá nga [za]huinni jneza [z]uni Dios» ora guedandá dxi stiʼ, casi bisiene Pablu ni lu sti carta stiʼ: «Zuni Dios jneza. Zusaba ná cani cayaani ná laatu ca. Ne laca zudii iziilaʼdxi cani cayacaná casi laanu. Zuni be ni dxi guiete Señor Jesús de ibáʼ ne ca ángel ni jma nandxóʼ stiʼ. Purti ziete lade bele para usaba ná cani qué nicaa stiidxaʼ, ne qué ñunibiáʼ Dios» (2 Tes. 1:5-8).
Quixhedxinu ni nadxabaʼ pur ni nachaʼhuiʼ
13, 14. 1) Xiñee qué ridxagayaanu ora gucaalú binni laanu. 2) Xi naquiiñeʼ gúninu pur cani rizananda laanu.
13 (Biindaʼ Romanos 12:14, 21.) Cumu dxandíʼ runi crenu zuni Jiobá guiráʼ cani maʼ gudixhe ique guni la? zanda gatadxí ladxidoʼno ne quixhe íquenu gúninu dxiiñaʼ ni maʼ bidiibe laanu: gucheechenu ca diidxaʼ nacubi ne galán stiʼ reinu ca lu «idubi naca guidxilayú» (Mat. 24:14). Nanna dxíchinu zadxiichi ca xhenemígunu pur gucheechenu diidxaʼ, purtiʼ Jesús maca guníʼ ca diidxaʼ riʼ: «Ne zaca nanalaʼdxi binni de irá ladu laatu purti xpinne laatu» (Mat. 24:9). Nga runi, qué ridxagayaadinu ne qué riréʼdinu gana ora rucaalú binni laanu. Apóstol Pedru bicaa ca diidxaʼ riʼ: «Hermanu ni nadxiee caʼ, cadi idxagayaa tu ora gueeda xiixa ni nabé naná luguiá tu, maca nanna tu zaca ni. Sínuque laguieche purti cayacaná tu casi ucaná Cristu» (1 Ped. 4:12, 13).
14 Lugar de guidaʼnu xiana ne cani rizananda laanu la? rúninu stipa pur gusíʼdinu laacabe stiidxaʼ Dios, purtiʼ nánnanu nuu de laacabe runi ni purtiʼ qué gánnacaʼ gastiʼ (2 Cor. 4:4). Rúninu stipa pur chinándanu conseju bidii Pablu riʼ: «Lainíʼ né Dios pur cani riguu dí laatu, lainaba lu Dios cuʼ ndaaya laacaʼ ne cadi inaba tu mal para laacaʼ» (Rom. 12:14). Nga runi, jneza guni orarnu Dios para uguu ndaayaʼ cani rucaalú laanu. Jesús guníʼ ca diidxaʼ riʼ lu libana ni bidii lu dani que: «Laganaxhii cani qué na chuʼ né laatu tobi si, ne lagacané cani nanalaʼdxi laatu. Lacuu ndaaya cani riguu dí laatu, lainíʼ né Dios pur cani riníʼ laatu» (Luc. 6:27, 28). Apóstol Pablu nanna zanda gaca ti binni ni rizananda ca xpinni Dios ti xpinni Cristu ne zanda guni ni na Jiobá ne stale gana purtiʼ laabe zacá gúcabe (Gál. 1:13-16, 23). Sicaríʼ bicaabe ra nuu ca xpinni Cristu de Corinto: «Ora riguu dí cabe laadu la? rabi du laacabe Dios cuʼ ndaaya laacabe. Ne qué rixhacalaʼdxi du ora riladxi cabe laadu. Neca riguixhe cabe mal laadu, peru ruyubi du pur ucuudxi du laacabe» (1 Cor. 4:12, 13).
15. Ximodo nga jma jneza quixhedxinu ni nadxabaʼ pur ni nachaʼhuiʼ.
15 Cani dxandíʼ xpinni Cristu laaca rúninu stipa pur chinándanu conseju ni zeeda lu últimu versículo stiʼ capítulo 12 stiʼ Romanos ra na: «Cadi udiiu lugar cuaqui dxí ni nadxaba lii, sínuque gudixhe dxí ni nadxaba pur ni nachaʼhuiʼ». Binidxabaʼ nga xcu guiráʼ cosa malu (Juan 8:44; 1 Juan 5:19). Lu visión ni gucuaa apóstol Juan que guníʼ Jesús maʼ gudixhedxí ca xpínnibe ni bibí pur espíritu que Binidxabaʼ «purti guti Dendxu huiini que pur laacaʼ, ne purti qué nidxibi ca ñuiʼ ca xpinni Cristu laacaʼ» (Apo. 12:11). Casi maʼ bidúʼyanu ca, ni jma jneza gúninu para quixhedxinu Binidxabaʼ ne ca cosa malu ni rucaabe binni guidxilayú guni nga gucheechenu ca diidxaʼ nacubi ne galán ca, zacá zusihuínninu cayúninu ni nachaʼhuiʼ.
«Laguieche né ni cabeza tu udii Dios laatu»
16, 17. Casi na capítulo 12 stiʼ Romanos, ximodo naquiiñeʼ 1) guibáninu, 2) gácanu ne ca binni ridagulisaa, 3) gácanu ne ca binni ni rucaalú laanu ora maʼ zigucheechenu diidxaʼ.
16 Cani maʼ bizíʼdinu lu capítulo 12 stiʼ Romanos ca cusietenaláʼdxini laanu stale cosa. Cani maʼ bidiʼnu laanu Jiobá, maʼ bidúʼyanu rusaananu stale cosa ni riuuláʼdxinu para gúninu ni nabe, purtiʼ espíritu stiʼ Dios racané laanu gúninu ni ne purtiʼ rudiʼnu cuenta zacá nga racaláʼdxibe gúninu. Ne laaca rúninu xhiiñaʼ Dios ne stale gana ne espíritu ne riquiiñenu ca gracia bidiibe laanu sin guicháʼbanu. Rúninu ni na Dios sin gudxíʼbanu laca laanu ne riníʼ íquenu zaquiiñenu gacanebe laanu para gúninu xhiiñanu, ne rúninu stipa pur cadi chuʼdíndenu ne ca binni ridagulisaa. Ne ridxaagalunu laacabe galán ne rúninu stipa pur guni sentirnu ni cayuni sentírcabe.
17 Capítulo 12 stiʼ Romanos laaca cusiidiʼ laanu ximodo naquiiñeʼ gácanu ne ca binni ni rucaalú laanu. Qué ruquíxenu ni guni binni laanu, sínuque rácanu nachaʼhuiʼ ne laacaʼ. Rúninu stipa pur cadi chuʼdindenenu guirutiʼ, peru ora gúninu ni qué rusaananu de gúninu ni na ca conseju ni zeeda lu Biblia. Ruyúbinu chuʼnu tobi si ne binnilídxinu, ne ca binni ridagulisaa, ne ca xpesínunu, ne cani runinenu dxiiñaʼ, ne cani rinenu scuela ne ora maʼ zigucheechenu diidxaʼ. Ne nécapeʼ nuu tu rucaalú laanu la? rúninu stipa pur quixhedxinu ni nadxabaʼ pur ni nachaʼhuiʼ ne qué riaandaʼ diʼ laanu Jiobá nga guquixe ni laacabe.
18. Xi chonna conseju bidii Pablu zeeda lu Romanos 12:12.
18 (Biindaʼ Romanos 12:12.) Pablu cadi bidii si ca conseju sicarú ca, sínuque laaca cayábibe laanu xi chonna cosa naquiiñeʼ gúninu. Primé ni guniʼbe nga «cadi usaana [n]u de iníʼ né [n]u Dios», purtiʼ qué zanda diʼ chinándanu guiráʼ ca conseju ni zeeda lu capítulo 12 stiʼ Romanos ca pa qué gacané Jiobá laanu. Ora guinínenu Dios laaca zacané laanu chinándanu guiropa conseju bidii Pablu riʼ: «Cadi ixhacalaʼdxi tu neca gueeda xiixa enda naná luguiá tu». Ne guionna conseju bidiibe laanu nga cadi gusiaandanu ni chigudii Jiobá laanu despué. Zacá nga ziechenenu «ni cabeza [n]u udii Dios laa[n]u», ti guendanabani ni qué zaluxe para cani cheʼ guibáʼ ne cani chiguibani lu Guidxilayú riʼ.
Xi bizíʼdinu
• Xi naquiiñeʼ gúninu ora chuʼ tu gucaalú laanu.
• Pora nga naquiiñeʼ gúninu stipa pur cadi chuʼdindenenu binni ne ximodo rúninu ni.
• Xiñee cadi naquiiñeʼ guquíxenu ni guni binni laanu.
[Dibuju/foto ni zeeda lu yaza 8]
Ora gacanenu xcaadxi binni zucaʼnu cani riníʼ ique mal de laanu guchaacaʼ modo riníʼ íquecaʼ
[Dibuju/foto ni zeeda lu yaza 9]
Ñee rúniluʼ stipa pur cadi chuʼdindeneluʼ ca binni ridagulisaa la?