Laatu ca hombre, ñee ruzuubatu stiidxaʼ Cristu casi xaíque la?

«Cristu nga xaíque sti irá hombre.» (1 COR. 11:3)

1. Xi rusihuinni riuulaʼdxiʼ Jiobá gata chaahuiʼ guiráʼ cosa.

APOCALIPSIS 4:11 na: «[Jiobá] Dios stidu, lii siouʼ nga naquiiñe udxiʼba du ne usisaca du ne iní du nandxóʼ loʼ. Purti lii bizáʼ lu irá xixé ni nuu. Uyáʼ ni ne nuu ru ni purti nga ni na luʼ». Cumu Jiobá nga bizáʼ guiráʼ xixé cosa la? nga runi laabe nga xaíque stiʼ cani. Laabe nga jma nápabe poder luguiáʼ guiráʼ xixé cosa. Ne modo gudíxhebe guni cada grupu de ca ángel stibe dxiiñaʼ rusihuínnini «riulaʼdxi be gata chaahui irá cosa» (1 Cor. 14:33; Isa. 6:1-3; Heb. 12:22, 23).

2, 3. 1) Tuu nga bizáʼ Jiobá primé. 2) Tuu nga na Biblia naca xaíque stiʼ Jesús.

² Stale millón de iza bibani Jiobá stubi. Peru bedandá dxi guníʼ íquebe guzaʼbe sti binni de espíritu ni binibiáʼcabe laa casi «Diidxaʼ», purtiʼ biquiiñebe laa para guiníʼ xi racaláʼdxibe. Jiobá biquiiñeʼ Xiiñiʼ para guzáʼ xcaadxi cosa, ne despué biseendaʼ laabe para guibánibe casi ti hombre ni qué ruchee, Jesucristu (biindaʼ Juan 1:1-3, 14).

³ Tuu nga na Biblia naca xaíque stiʼ Jesús ya. Apóstol Pablu bicaa ca diidxaʼ riʼ pur espíritu santu: «Peru racaladxe ganna tu, Cristu nga xaíque sti irá hombre, ne hombre nga xaíque sti gunaa, ne Dios nga xaíque sti Cristu» (1 Cor. 11:3). Cristu ruzuubaʼ stiidxaʼ Bixhoze casi xaíque. Ne para cadi tinde guiráʼ xixé binni ne cadi tinde ca ángel ni bizáʼ Dios ne chuʼcaʼ tobi si la? naquiiñeʼ guzuubacaʼ stiidxabe. Dede ne Xiiñibe ni gucané «dxi bizáʼ be irá xixé» cosa naquiiñeʼ guzuubaʼ stiidxabe (Col. 1:16).

4, 5. Ximodo biiyaʼ Jesús derechu ni napa Jiobá de guni mandar.

⁴ Ximodo biiyaʼ Jesús derechu ni napa Jiobá de guni mandar ne xi bíʼnibe ora guníʼ Jiobá zuseendaʼ laabe lu Guidxilayú riʼ. Guidúʼyanu xi caníʼ Biblia de laani: «Cristu Jesús [...] neca Dios laabe peru qué ña be tu naca be, sínuque bisaana be enda Dios que para beda gaca be casi ti mozo ra gule be ndaani guidxilayú. Ne ra ma naca be binni guidxilayú, bidii be lugar uca be biaʼ ri tiʼ, ne bizuuba be diidxa dede uná be guti be lu [yaga] casi rati cani qué iquiiñeʼ» (Fili. 2:5-8).

⁵ Jesús qué liica nuyubi nudxiibaʼ laaca laa ne guiráʼ ora biʼniʼ ni na Bixhoze. Ngue runi guniʼbe sicaríʼ: «Qué zanda gune gasti de naa siaʼ [...]. Ne jneza rudxiiba donda purti qué rune ni racaladxe sínuque rune ni na Bixhoze ni biseenda naa» (Juan 5:30). Laaca guniʼbe: «Qué riaana dxie de gune ni riulaʼdxi [Dios]» (Juan 8:29). Dxi mayaca gátibe gúdxibe Bixhózebe ca diidxaʼ riʼ lu ti oración: «Ma bisisaca lii ndaani guidxilayú riʼ, ne ma binduuxe ni biseendu naa beda guneʼ» (Juan 17:4). Rihuinni dxíchica qué ñaca nagana para laabe ñuuyabe Bixhózebe casi xaíque stibe.

Ribeendú Xiiñiʼ Dios ni galán ora guzuubaʼ stiidxaʼ Bixhoze

6. Xi guenda sicarú bisihuinni Jesús.

⁶ Pur ca guenda sicarú ni gupa Jesús dxi bibani lu Guidxilayú riʼ qué nusaana de ñaca ti ejemplu. Ne tobi de ca guenda ni jma bisihuínnibe nga nabé gunnaxhiibe Jiobá, ne laapebe guniʼbe ni: Naa «nadxiee Bixhozeʼ» (Juan 14:31). Ne laaca qué nusana de nusihuínnibe nadxiibe binni (biindaʼ Mateo 22:35-40). Laabe qué ñácabe naduxhuʼ, sínuque gúcabe nachaʼhuiʼ ne biénebe binni. Ngue runi gúdxibe ca binni nadóʼ sicaríʼ: «Latáʼ ra nuaa irá ni ma bidxaga de cuyubi modo guia ladxidóʼ, cani ma qué ganda guni irá ni rucaa cabe laa guni, purti para laa ruluíʼ naguixhe cabe ti ayubu xa yanni. Latáʼ ra nuaaʼ, zaziilaʼdxi ladxidóʼ to. Laudxiiba ayubu stinne xa yanni tu purti nasisi ni, cadi nanaa ni casi ni nua tu ca» (Mat. 11:28-30). Cásica cani nahuiiniʼ zaqueca cani maʼ huaniisi ratadxí ladxidoʼcaʼ ora gunibiáʼ chaahuicaʼ ximodo Cristu ne gánnacaʼ guiráʼ ca diidxaʼ sicarú ni guniʼbe, jma pa maʼ huayuu tu huaquichiná laacaʼ.

7, 8. 1) Casi na Ley que, xi cadi naquiiñeʼ ñuni gunaa ni caxii rini que. 2) Xi biʼniʼ Jesús ne gunaa ni huará que.

⁷ Yanna guidúʼyanu modo bidxaaga Jesús ca gunaa. Biaʼ dxi maʼ bibani binni lu Guidxilayú riʼ, maʼ bihuinni nabé runi ca hombre ca menu ca gunaa ca. Ne ca xaíque yuʼduʼ ni bibani ndaaniʼ guidxi Israel que laaca bíʼnicaʼ zacaca. Peru Xiiñiʼ Dios nabé biʼniʼ respetar laacabe. Ne ti ejemplu ni rusihuinni dxandíʼ ni nga ni bíʼnibe ne ti gunaa ni maʼ ziné doce iza de caxii rini. Maʼ birá guiráʼ ni nápabe pur huayebe ra nuu stale doctor purtiʼ racaláʼdxibe guiándabe, peru laga bininacaʼ laabe ne jmaruʼ si guca xiroo guendahuará stibe. Ne lu Ley ni gucuaa Moisés que na qué zanda diʼ chuʼbe lade binni ni nazaaca ne pa chuʼ tu canaʼ laabe laaca cadi naquiiñeʼ chuʼ lade binni (Lev. 15:19, 25).

⁸ Ora binadiágabe cusianda Jesús binni huará guyuube lade guiráʼ binni que ne guníʼ íquebe: «Neca xhaba si Jesús [canaʼ], [ziandaʼ]». Biʼniʼ gunaa que zaqué ne oraqueca bianda. Cristu nanna cadi naquiiñeʼ diʼ nigaʼnaʼ gunaa que laa. Peru lugar de nidindené Jesús laabe laga guca nachaʼhuiʼ ne laabe. Cumu nanna Jesús maʼ stale iza de qué guidxélabe ximodo guiándabe la? gudxi laabe ne diidxaʼ nadóʼ: «Bianda lu, xiiñeʼ, purti bini cre luʼ. Yanna, sicarú uyé, ma bianda lu ne ma qué zabigueta ru ni» (Mar. 5:25-34).

9. Xi biʼniʼ Jesús ora gucalaʼdxiʼ ca discípulo que nucueezacaʼ de nidxiña ca baʼduhuiiniʼ que laa.

⁹ Dede ne cani nahuiiniʼ biʼniʼ sentircaʼ galán ora nuucaʼ ra nuu Jesús. Ti biaje yené caadxi binni xiiñiʼ ra nuube, peru ca discípulo que gudindenecaʼ laacabe purtiʼ zándaca guníʼ íquecaʼ zuchiiñacabe Jesús. ¡Nin cadi jneza ngue modo guníʼ ique ca discípulo que! Relatu ni zeeda lu Biblia ca cusiene: «Ne ora biʼya Jesús xi cayaca la? bidxiichi, ne na: Cadi ucueeza tu ca baʼdu ca. Zaa gueeda cabe ra nuaaʼ purti stícabe irá ni napa Dios ladxi náʼ». Ne «oraque ucuaa be ca baʼdu que, uluu be laaca ndaani ná be ne udixhe ná be luguiá caʼ, uluu be ndaaya laacaʼ». Bíʼnibe ngue cadi purtiʼ si riuuláʼdxibe chuʼcaʼ gaxha de laabe, sínuque dxandíʼ nadxiibe laacaʼ (Mar. 10:13-16).

10. Ximodo beeda gapa Jesús ca guenda sicarú stiʼ.

¹⁰ Ximodo beeda gapa Jesús ca guenda ni bisihuinni lu Guidxilayú riʼ yaʼ. Gúpabe cani purtiʼ bibánibe mil de iza cueʼ Bixhózebe guibáʼ, biiyaʼ chaahuibe ximodo Laa, ne ni jma gucané laabe nga ora bíʼyabe pabiáʼ nadxii Dios binni pur modo runi mandar laacabe (biindaʼ Proverbios 8:22, 23, 30). Qué ñanda diʼ ñúnibe nga pa qué nuzuubabe diidxaʼ. Rihuínnica nabé guyuuláʼdxibe gúnibe ni na Jiobá, ne laa nabé guyuulaʼdxiʼ gapa ti Xiiñiʼ ni nabé ruzuubaʼ diidxaʼ. Dxi bibani Jesús lu Guidxilayú casi hombre qué nusaana de nusihuinni ca guenda sicarú stiʼ Bixhoze. ¡Nabé riuʼnu nayecheʼ nga gánnanu gulí Dios laabe para gácabe Rey guibáʼ! Dxandíʼ, ti ndaayaʼ nga guni mandarbe laanu.

Gápanu ca guenda ni napa Cristu

11. 1) Tu ejemplu stiʼ nga rúninu stipa pur chinándanu. 2) Xiñee naquiiñeʼ guni ca hombre stipa pur gusihuínnicaʼ ca guenda stiʼ Jesús.

¹¹ Nécapeʼ guiráʼ ca xpinni Cristu ni nuu ndaaniʼ neza binni ridagulisaa nga naquiiñeʼ gúnicaʼ stipa guiráʼ dxi para guibánicaʼ casi bibani Jesús la? ca hombre nga jma naquiiñeʼ gúnicaʼ ni. Xiñee yaʼ. Casi maʼ bidúʼyanu ca, Biblia ruzeeteʼ «Cristu nga xaíque sti irá hombre». Ne cásica yenándabe ejemplu stiʼ Dios ni dxandíʼ, Xaíque stibe, zacaca ca hombre ni maʼ guyuunisa naquiiñeʼ gúnicaʼ stipa pur gácacaʼ casi Jesús, xaíque sticaʼ. Ne ngaca nga ni biʼniʼ Pablu dxi beeda gaca xpinni Cristu, pur nga gunda bidiibe conseju riʼ ca xpinni Cristu de dxiqué: «Lachinanda ejemplu stinne casi zinanda ejemplu sti Cristu» (1 Cor. 11:1). Pedru laacaʼ bizeeteʼ de laani ora guníʼ ca diidxaʼ riʼ: «Para nga uníʼ né be laatu, purti laca ucaná Cristu pur laatu. Yanna laguni casi biʼni Cristu» (1 Ped. 2:21). Sti razón ni nuu para chinanda ca hombre ejemplu stiʼ Jesús nga purtiʼ laacabe zanda gácacabe siervu ministerial ne binnigola. Cásica biecheʼ Jesús ora yenanda ejemplu stiʼ Jiobá la? laacabe laaca naquiiñeʼ chúʼcabe nayecheʼ ora chinándacabe ejemplu stiʼ Maestru stícabe.

12, 13. Ximodo naquiiñeʼ gaca ca binnigola ca ne ca dendxuʼ ni cayápacaʼ.

¹² Ca binnigola ni nuu ndaaniʼ ca neza binni ridagulisaa nga naquiiñeʼ gusihuínnicaʼ ca guenda stiʼ Cristu. Zacatiʼ nga zanda gúnicabe ni na conseju ni bidii Pedru laacabe: «Lagapa ca xpinni Dios, cani bisaana be lu ná tu. Laguni ni de idubi ladxidóʼ to casi racalaʼdxi Dios, ne cadi purti napa tu xidé guni tu ni, nin pur bidxichi, sínuque laguni ni de idubi ladxidóʼ to. Cadi guni mandar tu laacabe casi ñaca laatu nga xpixuaana cabe, sínuque lasá jneza ti guʼya cabe ximodo ibani cabe» (1 Ped. 5:1-3). Ca binnigola ca qué zanda diʼ guiniʼcaʼ de laasicaʼ xi naquiiñeʼ guni ca xpinni Cristu ne laaca cadi naquiiñeʼ guquichinacaʼ laacabe. Naquiiñeʼ gácacabe casi Cristu, gannaxhiicabe ca xpinni, guiénecabe laacaʼ, cadi gudxiibacabe laca laacabe ne gácacabe nachaʼhuiʼ ne ca dendxuʼ ni maʼ bisaana Jiobá gápacabe.

¹³ Cani naca xaíque lade ca binni ridagulisaa cadi naquiiñeʼ guiaandaʼ laacaʼ nácacaʼ binni ruchee (Rom. 3:23). Nga runi naquiiñeʼ gúnicabe stipa pur gunibiáʼ chaahuicabe Cristu ne gannaxhiicabe binni cásica bíʼnibe. Laaca naquiiñeʼ guiníʼ íquecabe ximodo Jiobá ne ximodo Jesús para ne binni ne gúnicabe zacaca. Cadi naquiiñeʼ gusiaandacabe conseju ni bidii Pedru riʼ: «Ne irá tu laizaalaʼdxi saa, sin udxiiba tu laca laatu, purti cá lu guiʼchi ra na ni: “Nanalaʼdxi Dios ni runi cani rudxiiba laca laa, peru racané be cani qué rudxiiba laca laa”» (1 Ped. 5:5).

14. Xi guenda naquiiñeʼ gusihuinni ca binnigola ni cayapa ca xpinni Dios.

¹⁴ Ca hombre ni cayapa ca xpinni Dios ni nuu ndaaniʼ neza binni ridagulisaa naquiiñeʼ gusihuínnicaʼ ca guenda ni rieeteʼ lu Romanos 12:10: «Laganaxhii saa casi enda biʼchiʼ, cada tobi usisaca stobi ne cadi laca laa». Primeru ca binnigola ne ca siervu ministerial nga naquiiñeʼ gusisácacaʼ xcaadxi. Guiráʼ xpinni Cristu naquiiñeʼ gúnicaʼ ni na ca diidxaʼ riʼ: «Cadi guni tu xiixa para si tidi tu lú stobi, nin para chuʼ tu udxiiba laatu, sínuque cada tobi gaca nadóʼ ne usisaca stobi, ne cadi laca laa» (Fili. 2:3). Guiráʼ cani napa xiixa dxiiñaʼ ndaaniʼ xquidxi Dios cadi naquiiñeʼ guiníʼ íquecaʼ jma risácacaʼ que xcaadxi. Pa gúnicabe zacá zusihuínnicabe cayúnicabe ni na conseju bidii Pablu riʼ: «Laanu pa ma zuhuáʼ dxiichi nu la? cadi ixhacalaʼdxi nu de acané nu ca hermanu ni huaxiéʼ ru riene, ne cadi guni nu ni chuʼlaʼdxi si nu, sínuque guni nu ni chuʼlaʼdxi stobi, ti acané nu laa uzuhuaa chaahuiʼ. Nin Cristu qué ñuni di ni gucalaʼdxi laa si» (Rom. 15:1-3).

«Lagaca nachaʼhui» ne xheelatu

15. Ximodo naquiiñeʼ gaca ti xpinni Cristu ne xheelaʼ.

¹⁵ Yanna guidúʼyanu conseju bidii Pedru ca hombre ni maʼ bichaganáʼ: «Lauyubi modo guiene tu xheela tu. Lagaca nachaʼhui ne laacabe, [...] purti [...] jma nadá cabe que laatu (1 Ped. 3:7). Ximodo nga raca binni nachaʼhuiʼ ne xheelaʼ yaʼ. Gaca binni nachaʼhuiʼ nga gucaadiaga ora guiníʼ xheelaʼ xiixa, ora guʼyaʼ xi racaláʼdxibe, xi caquiiñebe ne guni ni riuuláʼdxibe, peru naquiiñeʼ chuʼ cuidadu cadi gácani xiixa ni uguu laacabe lu guendanagana. Zacá nga naquiiñeʼ gaca hombre ne xheelaʼ.

16. Xiná Biblia zándaca guizaaca ti hombre pa qué gusisaca xheelaʼ.

¹⁶ Apóstol Pedru cadi guluusi gana ca xpinni Cristu gusisácacaʼ xheelacaʼ. Laaca gúdxibe laacaʼ pa qué gúnicaʼ ni zándaca ziuu xiixa ni «uchiiña [laacaʼ] ora iníʼ né [caʼ] Dios» (1 Ped. 3:7). Ca diidxaʼ ca rusihuinni cani racalaʼdxiʼ Jiobá gusisaca ca hombre ca xheelacaʼ. Pa qué guni hombre ca zacá qué zucaadiaga diʼ Dios ca oración stibe. Ne pa gusihuínnibe rusisácabe xheelabe la? ziuu gunaa ca jma nayecheʼ ne zaná gacané laabe lu cani gúnibe.

17. Pabiáʼ nga naquiiñeʼ gannaxhii hombre xheelaʼ.

¹⁷ Pablu bidii sti conseju riʼ cani maʼ bichaganáʼ. Laabe gúdxibe laacaʼ: «Naquiiñe ganaxhii hombre xheela casi nadxii cuerpu stiʼ. Ni nadxii xheela la? nadxii laca laa. Purti iruti raca nanalaʼdxi cuerpu stiʼ, sínuque ruyaana ni ne ranaxhii ni. Ne zacaca runi Cristu ca xpinni. [...] Naquiiñe ganaxhii hombre xheela casi nadxii laca laa» (Efe. 5:28, 29, 33). Pabiáʼ nga naquiiñeʼ gannaxhii hombre xheela yaʼ. Laaca lu relatu ca bicabi apóstol ca guendarinabadiidxaʼ ca: «Ne laatu, ca hombre ni ma bichaganáʼ, laganaxhii xheela tu cásica gunaxhii Cristu ca xpinni, dede bidii xpida pur laacaʼ» (Efe. 5:25). Cásica bidii Cristu xpida pur binni, zacaca naquiiñeʼ gudii hombre xquendanabani pur xheelaʼ. Pa gusihuinni hombre ca nadxii xheelaʼ, guiénebe laa ne guizaaláʼdxibe laa la? qué zaca nagana para laa guzuubaʼ stiidxabe.

18. Xi zanda gacané ca hombre ni maʼ bichaganáʼ gusisácacaʼ xheelacaʼ.

¹⁸ Ñee nagana nga gusisaca ca hombre ca xheelacaʼ la? Coʼ. Jiobá qué zanabaʼ laacabe xiixa ni qué zanda gúnicabe. Ne ca xpinni Jiobá nápacaʼ ti stipa ni jma nadipaʼ ni nuu guibáʼ ne lu guidubi naca Guidxilayú ni zanda gacané laacaʼ: Nga nga espíritu santu. Jesús guníʼ: «Pa laatu cadi nachaʼhui tu ne nanna tu gudii tu ni galán xiiñi tu la? lágaxa Bixhoze tu ni nuu ibáʼ qué udii Espíritu Santu ni inaba laa» (Luc. 11:13). Nga runi ca hombre ni maʼ bichaganáʼ zanda guinábacaʼ Jiobá gacané laacaʼ gácacaʼ nachaʼhuiʼ ne binni ne jmaruʼ si ne xheelacaʼ (biindaʼ Hechos 5:32).

19. Xi chiguidúʼyanu lu sti tema ca.

¹⁹ Dxandíʼ, naroʼbaʼ dxiiñaʼ nga napa ca hombre ca purtiʼ naquiiñeʼ guzuubacaʼ stiidxaʼ Cristu ne guni mandarcaʼ casi runi mandarbe. Yanna, ximodo naquiiñeʼ guʼyaʼ ca gunaa ca ne jmaruʼ si cani maʼ bichaganáʼ dxiiñaʼ bidii Jiobá laacaʼ yaʼ. Zadúʼyanu nga lu sti tema ca.

Xiñee naquiiñeʼ guni respetar gunaa ni gudixhe Dios gaca xaíque stiʼ

«Hombre nga xaíque sti gunaa.» (1 COR. 11:3)

1, 2. 1) Xi diidxaʼ biquiiñeʼ Pablu para guníʼ tuu nga gudixhe Jiobá gaca xaíque. 2) Xi guendarinabadiidxaʼ zacábinu lu tema riʼ.

APÓSTOL Pablu guníʼ ca diidxaʼ riʼ para guzeeteʼ de ni gudixhe Jiobá gaca xaíque: «Cristu nga xaíque sti irá hombre, [...] ne Dios nga xaíque sti Cristu» (1 Cor. 11:3). Lu tema gudídinu ca bidúʼyanu nabé rusisaca Jesús guzuubaʼ stiidxaʼ Jiobá casi Xaíque stiʼ ne riéchebe ora gúnibe ni. Laaca bidúʼyanu naquiiñeʼ guzuubaʼ ca hombre stiidxaʼ Jesús. Ne laaca bizíʼdinu cásica modo guca Jesús nadóʼ ne binni, gunnaxhiibe laacaʼ, biabe laacaʼ ne bizaaláʼdxibe laacaʼ, zacaca naquiiñeʼ gaca ca xpínnibe ne binni ne jmaruʼ si ne xheelacaʼ.

² Yanna, ñee nuu tuuxa ni naquiiñeʼ guzuubaʼ ca gunaa ca stiidxaʼ la? Nuu pue, apóstol Pablu laaca guníʼ: «Hombre nga xaíque sti gunaa». Ximodo naquiiñeʼ guʼyaʼ ti gunaa xpinni Cristu ca diidxaʼ ca yaʼ. Ñee naquiiñeʼ gúnibe ni na ca diidxaʼ ca neca cadi xpinni Cristu xheelabe la? Ñee riníʼ nga qué zanda guiníʼ ti gunaa xi zanda gaca lu xquendaxheelaʼ la? Ne xi naquiiñeʼ guni ti gunaa para gusisácacabe laa.

«Chiguneʼ tobi ni gacané laabe»

3, 4. Xi ribeendú ca guendaxheelaʼ ca ora ruzuubacaʼ stiidxaʼ ni gudixhe Dios gaca xaíque sticaʼ.

³ Rihuínnica Dios nga gudixhe gaca hombre xaíque stiʼ gunaa. Bizáʼ si Jiobá Adán guníʼ sicaríʼ: «Cadi galán diʼ chuʼ hombre stubi si. Chiguneʼ tobi ni gacané laabe, biáʼsipeʼ para laabe». De raqué bizaʼbe Eva. Nabé biecheʼ Adán purtiʼ gupa laabe casi xcompañera ne ni gucané laa, ngue runi guníʼ ca diidxaʼ riʼ: «Ndiʼ huaxa naca de dxita stiʼ ca dxita ladeʼ ne beela de beela ladeʼ» (Gén. 2:18-24). Adán ne Eva ñanda ñácacaʼ bixhoze ne jñaa guiráʼ binni ni qué nuchee ni nibani lu guidubi naca Guidxilayú ne ñuucaʼ nayecheʼ ndaaniʼ ti paraísu sin qué ñuu dxi ñáticaʼ.

⁴ Cumu bidxiidéchecabe Jiobá la? maʼ qué ñuucabe galán cásica guyuucabe ndaaniʼ jardín ni guyuu Edén (biindaʼ Romanos 5:12). Neca guca nga la? qué nusaana diʼ Dios de ñuuyaʼ hombre casi xaíque stiʼ gunaa. Ne dede yanna naquiiñeʼ ganna ca guendaxheelaʼ ca nuu tu naca xaíque sticaʼ, ne pa guzuubacabe stiidxaʼ xaíque stícabe la? zatadxí ladxidóʼcabe ne ziuucabe nayecheʼ. Zanda guininu riuu ca guendaxheelaʼ ca nayecheʼ cásica guyuu Jesús guibáʼ, bizuubabe stiidxaʼ Bixhózebe ne guyuube nayecheʼ nezalú guiráʼ dxi (Pro. 8:30). Cumu gulené hombre donda la? qué zanda diʼ gácabe ti xaíque ni qué zuchee ora gabi xheelaʼ xi naquiiñeʼ guni nin ca gunaa ca qué zanda guni guiráʼ ni gábibe laa sin guchee. Peru ora guirópacabe gúnicabe stipa pur gúnicabe dxiiñaʼ ni nexheʼ gúnicabe jneza la? ribánicabe jma nayecheʼ que ca guendaxheelaʼ ni nuu yanna riʼ.

5. Xiñee cadi naquiiñeʼ guʼyaʼ ca guendaxheelaʼ ca conseju stiʼ Romanos 12:10 casi guendariguite.

⁵ Para ganda chuʼ ca guendaxheelaʼ ca nayecheʼ, naquiiñeʼ gúnicabe ni na conseju ni gucuá para guiráʼ xpinni Cristu ra na: «Laganaxhii saa casi enda biʼchiʼ, cada tobi usisaca stobi ne cadi laca laa» (Rom. 12:10). Laaca naquiiñeʼ chinanda guirópacabe conseju riʼ: «Lagaca nachaʼhui ne stobi, ne lailaselaʼdxi saa. Laguni perdonar saa» (Efe. 4:32).

Ora cadi Testigu xheelaʼ tuuxa

6, 7. Xi zabeendú ti gunaa xpinni Cristu pa guni respetar xheelaʼ ni cadi Testigu, casi xaíque.

⁶ Nuu guendaxheelaʼ qué runi tobi de laacaʼ ni na Jiobá; ne jma stale biaje hombre ca nga qué runi ni na Jiobá. Xi naquiiñeʼ guni gunaa ca óraca yaʼ. Biblia na: «Hermana caʼ, lauzuuba stiidxa xheela tu, purti pa nuu de laaca qué runi cre stiidxa Cristu la? zándaca iguudxi ra guʼya runi xheela jneza ne runi respetar laa. Ne zacá cadi naquiiñe iníʼ pe tu para ucuudxi tu laacaʼ» (1 Ped. 3:1, 2).

⁷ Casi maʼ bidúʼyanu ca, Stiidxaʼ Dios caguu gana ca gunaa xpinni Cristu ni napa xheelaʼ ni cadi Testigu guzuubacaʼ stiidxaʼ xheelacaʼ, casi xaíque. Xi zándaca cueendúcabe yaʼ. Zándaca guiníʼ ique hombre ca xiñee galán xpiaʼ xheelaʼ, ne nga gucaa laa chuulaʼdxiʼ guiziidiʼ cani runi crebe ne gaca xpinni Cristu.

8, 9. Xi naquiiñeʼ guni ti gunaa xpinni Cristu pa qué guchaa xheelaʼ modo laa neca nacháʼhuibe ne laa.

⁸ Peru, xi guni gunaa ca pa qué guchaa xheelaʼ modo laa yaʼ. Stiidxaʼ Dios na neca gaca nagana para guibaninebe xheelabe naquiiñeʼ gúnibe stipa pur gusihuínnibe ca guenda ni napa ca xpinni Cristu, casi guendarannaxhii. Lu 1 Corintios 13:4 na «pa nadxii lu stobi la? qué zadxiichi né gá lu laa», ni caníʼ textu ca nga naquiiñeʼ guni huantar binni ora gucheené stobi laa. Nga runi, ca gunaa ni maʼ bichaganáʼ naquiiñeʼ gánnacaʼ ximodo gudxiilucaʼ ca guendanagana guidxaagalucaʼ ne guendarannaxhii ne cadi guidxiichicaʼ, cadi gudxiibacaʼ laca laacaʼ, sínuque gácacaʼ nadóʼ (Efe. 4:2). Espíritu santu stiʼ Dios zanda gacaneni ca gunaa Testigu gusihuínnicaʼ ca guenda ni naquiiñeʼ gapa ti xpinni Cristu neca guidxaagalucaʼ guendanagana.

⁹ Sicaríʼ bicaa apóstol Pablu: «Guiráʼ cosa zanda guneʼ purtiʼ cudii Dios poder naa» (Fili. 4:13, NM). Zacaca zanda gacané espíritu santu ca gunaa xpinni Cristu para gúnicaʼ xiixa ni qué ñanda ñúnicaʼ pur stipa si sticaʼ. Nga runi, pa nabé naduxhuʼ xheelabe zándaca gaca nagana gucueezabe laabe de guquíxebe laa ni guni laabe. Peru Biblia rudii conseju riʼ guiranu: «Neca uchee né cabe laatu, cadi uquixe tu ni laacabe [...] purti cá ni lu Xquiʼchi [Jiobá] ra na be: Xcuenta nuu ni, ne naa uquixe ni laacabe» (Rom. 12:17-19). Laaca rábini laanu: «Laguuya gá qué chi uquixe tu ni guni binni laatu, sínuque lagaca nachaʼhui ne irá hermanu, ne zaqueca cani qué runi cre» (1 Tes. 5:15). Dxandíʼ, espíritu santu ca zanda gacané laanu gúninu xiixa ni qué zanda gúninu laasinu. Nga runi, naquiiñeʼ guinábanu Dios gudii laanu espíritu santu stiʼ.

10. Xi biʼniʼ Jesús ora biʼniʼ binni laa xiixa ni cadi jneza ne gúdxicaʼ laabe diidxaʼ feu.

¹⁰ Jesús bisaana ti ejemplu nabé sicarú para laanu. Guidúʼyanu xi bíʼnibe ora biʼniʼ binni laabe xiixa ni cadi jneza ne gúdxicaʼ laabe diidxaʼ feu. Lu 1 Pedro 2:23 zeeda ca diidxaʼ riʼ: «Ne ora uluu dí cabe laabe, qué niguu dí be laacaʼ. Ne ora ucaná be, qué ñabi be laaca gapa gá si ca laacaʼ, sínuque bisaana be irá ni lu ná Dios ti laa ruuya irá cosa jneza». Biblia cayabi guiráʼ ca xpinni Cristu galán gúnicaʼ casi biʼniʼ Jesús ne cadi guidxiichicaʼ ora guni binni laacaʼ xiixa. Laaca cayábini laanu gácanu nachaʼhuiʼ ne cadi gudxíʼbanu laca laanu. Laaca caniʼni: «Neca uchee né binni laatu, cadi uquixe tu ni laacaʼ, ne pa cuʼ dí ca laatu, cadi cuʼ dí tu laacaʼ» (1 Ped. 3:8, 9).

Ñee qué zanda guiníʼ ti gunaa xiixa lu xquendaxheelaʼ la?

11. Xi dxiiñaʼ risaca maʼ gucuaa stale gunaa.

¹¹ Ñee riníʼ nga qué zanda guiníʼ ti gunaa xi zanda gaca ndaaniʼ familia stiʼ o lu xcaadxi cosa la? Coʼ. Xiñee rininu zacá yaʼ. Purtiʼ cásica bidii Jiobá caadxi dxiiñaʼ risaca ca hombre zaqueca bidiibe ni ca gunaa. Guiníʼ íquesinu pabiáʼ risaca dxiiñaʼ bidiibe guiráʼ gunaa ni nuu lade 144,000 binni ni chigaca rey ne ni ruzaaquiʼ guʼxhuʼ guibáʼ ni chiguni mandar ca binni ni guibani lu Guidxilayú riʼ, ne zúnicabe ni modo gabi Cristu laacabe (Gál. 3:26-29). Nga rusihuinni maʼ bidii Jiobá ti dxiiñaʼ nabé risaca ca gunaa ndaaniʼ xquidxi.

12, 13. Bizeeteʼ ti ejemplu ni gusihuinni guyuu gunaa ni gudixhená dxi bibani ca xpinni Dios de dxiqué.

¹² Guietenaláʼdxinu guyuu gunaa ni gudixhená lade ca xpinni Dios ni bibani dxiqué. Ne lu Joel 2:28, 29 guníʼ Jiobá ca diidxaʼ riʼ: «Zusabaʼ Espíritu stinneʼ luguiáʼ stale binni, ne ca xiiñitu hombre ne gunaa zaguixhenacaʼ. [...] Ca dxi que zucheecheʼ Espíritu stinneʼ luguiáʼ cani runi xhiiñaʼ, hombre ne gunaa».

¹³ Lu saa stiʼ Pentecostés ni guca lu iza 33, bidagulisaa ti gayuaa gande discípulo stiʼ Jesús lu guiropa pisu stiʼ ti yoo ndaaniʼ guidxi Jerusalén. Raqué bisaba Jiobá espíritu santu stiʼ luguiáʼ guirácabe, cásica hombre zaqueca gunaa. Ngue runi, gunda guníʼ Pedru ca diidxaʼ ni bizeeteʼ Joel ni riguixhená que ne guniʼbe cayaca ni na cani luguiáʼ ca binni ni nuu raqué, cásica hombre zaqueca gunaa. Laabe guniʼbe: «Cayaca ni bicaa profeta Joel chiqué ra na: Na Dios: “Zadxiña dxi ucheeche Espíritu stinne luguiá stale binni. Zusinié ca xiñi gaana tu ne ca xiñi dxaapa tu [...]. Ca dxi que zucheeche Espíritu stinne luguiá cani runi xhiiñaʼ, hombre ne gunaa, ne zaníʼ ca ni gabe laacaʼ”» (Hech. 2:16-18).

14. Xi dxiiñaʼ nabé risaca biʼniʼ ca gunaa ni bibani lu primé siglu que para gunda bidale ca xpinni Cristu.

¹⁴ Lu primé siglu que, ca gunaa que bíʼnicaʼ ti dxiiñaʼ nabé risaca para gunda bidale ca xpinni Cristu. Bicheechecabe stiidxaʼ Reinu stiʼ Dios ne bíʼnicabe xcaadxi dxiiñaʼ para gunda bireeche diidxaʼ (Luc. 8:1-3). Casi lu carta ni bicaa Pablu ra nuu ca xpinni Cristu de Roma bizeetebe de Febe ne guniʼbe «runi [...] dxiiña lade cani runi cre Cristu ni nuu ndaani guidxi Cencrea». Ne ora biseendabe diuxi para xcaadxi xpinni Cristu ni cadi cusaana de guniné laabe xhiiñaʼ Dios bizeetebe de xcaadxi gunaa xpinni Cristu casi «hermana Trifena ne hermana Trifosa ni runi xhiiña Señor». De raqué guniʼbe: «Laudii diuxi [...] hermana Pérsida ni nadxii nu. Nabé huayuni be xhiiña Señor» (Rom. 16:1, 12).

15. Ximodo racané ca gunaa chuʼ jma binni ndaaniʼ xquidxi Dios yanna riʼ.

¹⁵ Lade jma de gadxe millón de cani rucheeche ca diidxaʼ nacubi ne galán yanna riʼ, nuu stale gunaa de gadxé gadxé iza (Mat. 24:14). Stale de ca gunaa ca nácacaʼ precursora, misionera ne betelita. Rihuinni dxíchica cayaca ni na ca diidxaʼ ni guníʼ rey David: «Jiobá peʼ guníʼ; nabé stale gunaa nga cucheecheʼ ca diidxaʼ nacubi ne galán ca» (Sal. 68:11). Ca diidxaʼ ca rusihuínnicani nabé rusisaca Dios dxiiñaʼ ni runi ca gunaa ni naca xpínnibe ora rucheechecaʼ ca diidxaʼ nacubi ne galán ne racanecaʼ gaca ni naguixhe íquebe. Nga runi, ora rinabaʼ Jiobá laacabe guzuubacabe stiidxaʼ ni naca xaíque stícabe la? cadi cayabibe laacaʼ guyadxísicaʼ sin guiniʼcaʼ ximodo zanda gaca xiixa cosa.

Chupa gunaa ni guniʼcaʼ ni riníʼ íquecaʼ

16, 17. Ximodo rusihuinni ejemplu stiʼ Sara zanda guiníʼ ca gunaa ca xi zanda gaca lu xquendaxheelacaʼ.

¹⁶ Pa rudii Jiobá ca gunaa ca stale guenda, ñee cadi jneza nga gabi hombre xheelaʼ xi chiguni ante quixhe ique guni xiixa cosa risaca la? Jneza gúnibe ni. Biblia ruzeeteʼ de caadxi gunaa ni guniʼcaʼ xi riníʼ íquecaʼ ne bíʼnicaʼ xiixa sin ñanna xheelacaʼ. Guidúʼyanu chupa ejemplu.

¹⁷ Sara qué nusaana de ninabaʼ xheelaʼ, Abrahán, guiladxi sti gunaa ni gulezané ne xiiñiʼ de ralídxicaʼ, purtiʼ maʼ cadi cayápacabe respetu laacaʼ. Nécapeʼ qué ñuulaʼdxiʼ Abrahán ni gúdxibe laa que, Dios gadxé modo guníʼ ique ngue runi gúdxibe Abrahán: «Cadi guiníʼ íqueluʼ cadi jneza ni cayabi Sara lii guʼnuʼ ne hombrehuiiniʼ ca ne esclava stiluʼ. Bicaadiaga laabe» (Gén. 21:8-12). Abrahán bizuubaʼ stiidxaʼ Jiobá ne biʼniʼ ni gunabaʼ Sara laa.

18. Pora nga guníʼ ique Abigail guni xiixa nagueendaca.

¹⁸ Yanna guininu de Abigail, xheelaʼ Nabal, ti hombre ni nabé gupa bueltu ne gupa stale clase maniʼ. Guidúʼyanu xi bizaaca dxi cuxooñelú David ne ca xpinni de Rey Saúl, hombre ni nabé gupa envidia laabe que. David ne ca xpinni gudíxhecaʼ campamentu sticaʼ gaxha de ra nuu ca dendxuʼ stiʼ Nabal ne gúpacaʼ laacame sin ninábacaʼ laabe nin tobi. Peru hombre que nabé «naduxhuʼ ne runi guendaquéiquiiñeʼ», ngue runi ora biseendaʼ David ca soldadu stiʼ para guinábacaʼ laabe gudiibe laacaʼ guendaró, qué ninabe «ne gudindenebe laacaʼ». Rihuinni dxíchica guca hombre que tobi «ni qué liica iquiiñeʼ» ne «nuuné guendahuati laabe». Xi biʼniʼ Abigail ora gunna ni bizaaca que yaʼ. Qué liica ñábibe xheelabe gastiʼ, «nagueendaca gucuaabe chupa gayuaa pan ne chupa jarrón vinu ne bigaaguibe gaayuʼ dendxuʼ ne laaca gucuaabe gaayuʼ medida de sea de biidxiʼ guguiʼ, ne ti gayuaa torta de pasa ne chupa gayuaa torta de duʼgaʼ ni bigaache» ne bidiibe ni David ne ca xpinni. Ñee jneza ni bíʼnibe que la? Ni bizaaca despué de ngue bisihuinni jneza ni bíʼnibe que. Biblia na «bininá Jiobá Nabal, ngue runi guti», ne despué bichaganáʼ gunaa que David (1 Sam. 25:3, 14-19, 23-25, 38-42).

«Gunaa ni naquiiñeʼ gusisácacabe»

19, 20. Xi pur nga zanda gusisácacabe ti gunaa.

¹⁹ Biblia nabé cusisaca ca gunaa ni maʼ bichaganáʼ ni runi ni na Jiobá. Libru stiʼ Proverbios cusisaca «ti gunaa ni nuu xpiaaniʼ ni maʼ bichaganáʼ» ne ca diidxaʼ riʼ: «Jma risácabe que biáʼ risaca ca coral. Xheelabe runi cré zanda gacanebe laa ne gastiʼ qué ziaadxaʼ laa. Biaʼ dxi nabani gunaa ca runi puru si ni galán para xheelaʼ ne qué runi ni cadi jneza. [...] Ora ruxheleruaabe riniʼbe ne guendabiaaniʼ, ne ley stiʼ guendanachaʼhuiʼ nexheʼ lu lúdxibe. Ruuyabe gapa binnilídxibe guiráʼ ni caquiiñeʼ ne cadi nachaababe. Ca xiiñibe riásacaʼ ne rábicaʼ laabe diidxaʼ sicarú; xheelabe laaca riguu naróʼ stibe» (Pro. 31:10-12, 26-28).

²⁰ Xi pur nga zanda gusisácacabe ti gunaa yaʼ. Proverbios 31:30 caníʼ: «Ni rucaa tuuxa chuulaʼdxiʼ stobi zándaca quíteni laa, ne guendasicarú stibe zidíʼdisini, peru gunaa ni ridxibi Jiobá zusisácacabe laa». Gunaa xpinni Cristu ni ridxibi Jiobá ruzuubaʼ stiidxaʼ ni naca xaíque stiʼ, casi ruzeeteʼ Biblia: «Hombre nga xaíque sti gunaa» zaqueca «Cristu nga xaíque sti irá hombre» ne «Dios nga xaíque sti Cristu» (1 Cor. 11:3).

Gudiʼnu xquixe pur guenda bidii Dios laanu

21, 22. 1) Xi razón napa cani maʼ bichaganáʼ para gudiicaʼ xquíxepeʼ Dios. 2) Xiñee cadi naquiiñeʼ gusaana de guni respetarnu ni gudixhe Jiobá gaca xaíque. (Biiyaʼ cuadru ni zeeda lu yaza 17.)

²¹ Ca guendaxheelaʼ ni naca xpinni Cristu nápacaʼ stale razón para gudiicaʼ xquíxepeʼ Jiobá pur gudixhestí guendaxheelaʼ. Tobi de laani nga guibánicabe juntu, peru ni jma risaca nga gúnicabe ni na Jiobá guirópacabe (Rut 1:9; Miq. 6:8). Ni gudixhestí guendaxheelaʼ ca nánnabe xipeʼ nga caquiiñecabe para guibánicabe nayecheʼ, nga runi jma jneza nga gúnicabe ca cosa ca modo nabe. Pa gúnicabe zacá la? guendanayecheʼ stiʼ «Jiobá [...] zeeda gaca casi ti lugar ni naguidxi para laa[cabe]», neca nabánicabe ndaaniʼ guidxilayú ra nuu stale guendanagana (Neh. 8:10).

²² Ti hombre nachaʼhuiʼ la? nadxii xheelaʼ cásica nadxii laa ne qué raca naduxhuʼ ne laabe ne riene laabe. Gunaa xpinni Cristu ca racané xheelaʼ ne runi respetar laabe, ne pur nga jma rannaxhii hombre ca laa. Peru ni jma risaca ora rusihuínnicabe nácacabe ti ejemplu lu xquendaxheelacabe nga guirópacabe rusisácacabe Bixhózenu, Jiobá.