Rucaadiaga Jiobá laanu ora guinábanu laa gacané laanu
«Guielú Jiobá cayuuyaʼ ca binni runi ni jneza, ne rucaadiágabe ora rinábacaʼ gacanebe laacaʼ.» (SAL. 34:15.)
1, 2. 1) Ximodo nuu stale binni yanna riʼ. 2) Xiñee qué ridxagayaanu pur guiráʼ ni cayaca ca dxi riʼ.
ÑEE nápaluʼ xiixa guendanagana ni nabé cayuniná lii la? Pa zacá ni, gunna cadi lii si nga nuuluʼ zacá. Stale binni nga cudxiilú guiráʼ ca cosa malu ni cayaca ndaaniʼ guidxilayú qué iquiiñeʼ riʼ. Caadxi de laacabe ruluíʼ nga maʼ qué zándaruʼ guni huantárcabe ca yuubaʼ ca. Runi sentírcabe casi biʼniʼ sentir David ora bicaa ca diidxaʼ riʼ: «Maʼ nayati nuu ladeʼ ne maʼ guuninácabe naa biaʼ gúndatiʼ; cucaa ridxi purtiʼ guizáʼ naná nuu ladxiduáʼ. Nabé capapa ladxiduáʼ, maʼ qué gapaʼ stipa, ne rihuinni maʼ cadi nayecheʼ nuu luaʼ» (Sal. 38:8, 10).
2 Laanu, ca xpinni Cristu, maʼ qué ridxagayaadinu napa binni stale yuubaʼ ca dxi riʼ, purtiʼ nánnanu guníʼ Jesús zapa binni yuubaʼ ora guihuinni maʼ nuube lade binni (Mar. 13:8; Mat. 24:3). Lu griegu la? biquiiñeʼ diidxaʼ «yuuba» ca para guiníʼcabe pabiáʼ naná ni runi sentir ti gunaa ora maʼ chigale xiiñiʼ. Ejemplu riʼ rusihuinni pabiáʼ naná guiráʼ ca yuubaʼ napa binni lu ca dxi «jma nagana» riʼ (2 Tim. 3:1).
Riene Jiobá guiráʼ yuubaʼ cadídinu
3. Xi nanna guiráʼ ca xpinni Dios.
3 Neca xpinni Jiobá laanu la? runiná guiráʼ ca guendanagana ca laanu ne nánnanu zácaruʼ cani jma nagana ra zidiʼdiʼ dxi. Peru aparte de cayácananu cásica guiráʼ binni la? nápanu sti enemigu, «binidxabaʼ», ne laa racalaʼdxiʼ guirá fe stinu (1 Ped. 5:8). Nga runi, ziuu ora zuni sentirnu nuunu casi na ca diidxaʼ guníʼ David riʼ: «Maʼ gucadé ladxiduáʼ purtiʼ caníʼcabe mal de naa, ne qué ganda diʼ tiidiʼ yuubaʼ ca. Ne gulezaʼ ñuu tu ñuubalaʼdxiʼ naa, peru qué ñuu nin tobi; ne qué nidxelaʼ tu niguixhedxí ladxiduáʼ» (Sal. 69:20).
4. Xi zaguixhedxí ladxidoʼno ora gápanu xiixa guendanagana.
4 Ñee guníʼ David ca diidxaʼ ca purtiʼ dxandipeʼ maʼ qué guidxela xi guni la? Coʼ. Guidúʼyanu xiruʼ guniʼbe lu salmo ni bidúʼndanu ca: «Cucaadiaga Jiobá ca pobre, ne qué rúnibe menu ca xpínnibe ni deguyoo» (Sal. 69:33). Ziuu ora zápanu stale guendanagana dede maʼ qué zadxélanu xi gúninu, ne zuni sentirnu casi ñaca nuseguyoocani laanu. Zándaca dede zaninu qué riene diʼ xcaadxi binni xi cayácanu. Peru cásica David la? ratadxí ladxidoʼno purtiʼ nánnanu riene Jiobá pabiáʼ naná ca yuubaʼ stinu (Sal. 34:15).
5. Xi gunna Salomón zuni Jiobá.
5 Salomón, xiiñiʼ David bisihuinni zacá ni pur cani guníʼ dxi biluxe yuʼduʼ ni gurí Jerusalén que (biindaʼ 2 Crónicas 6:29-31). Gunabaʼ Salomón Jiobá gucaadiaga oración stiʼ ca binni nachaʼhuiʼ ora gábicaʼ laabe xi guendanagana nápacaʼ ne xi yuubaʼ cayuniná laacaʼ. Xi zuni Dios ora gunadiaga oración stiʼ ca binni que yaʼ. Salomón gunna qué zucaadiaga si Dios ca oración que, sínuque laaca zuni ni canabaʼ ca binni que. Xiñee yaʼ. Purtiʼ nanna dxichi Jiobá xi nuu ndaaniʼ «ladxidóʼ guiráʼ binni».
6. Xi zanda gúninu ora gápanu guendanagana, ne xiñee.
6 Zacaca yanna riʼ, zanda guidxíñanu Jiobá ora guni orarnu para gábinu laabe xi guendanagana nápanu ne xi yuubaʼ cayuniná laanu. Ne ratadxí ladxidoʼno purtiʼ nánnanu riénebe ne rizaaláʼdxibe laanu. Apóstol Pedru guníʼ zacá ni ne ca diidxaʼ riʼ: «Laquixhe irá ni lu ná be, purti laabe cayapa be laatu» (1 Ped. 5:7). Zacá nga laani, rizaalaʼdxiʼ Jiobá xi cayácanu. Jesús bisihuinni pabiáʼ risácanu para Bixhoze ora guníʼ: «Laaca tu nanna tu ridoo chupa mani huiini pur chupa domiʼ, peru neca qué risaca came, qué ziaba si tobi de laacame layú pa qué na Dios. Zaqueca ma bigaba be irá xixé guicha ique tu. Nga runi cadi idxibi tu, purti jma risaca tu que ca mani huiiniʼ» (Mat. 10:29-31).
Guni crenu zacané Jiobá laanu
7. Tu zacané laanu lu ca guendanagana stinu.
7 Riquiiñeʼ guni crenu zanda gacané Jiobá laanu lu intiica guendanagana cadídinu, ne dxandíʼ racaláʼdxibe gúnibe ni. Biblia na: «Dios zeeda gaca para laanu casi ti lugar ra zanda guilanu ne laabe nga stipa stinu, zanda gacanebe laanu nagueendaca ora cadídinu lu xiixa guendanagana» (Sal. 34:15-18; 46:1). Ximodo racanebe laanu ya. Guidúʼndanu 1 Corintios 10:13: «Peru jneza runi Dios, ne qué zudii lugar gueeda xiixa luguiá tu ni qué zanda gua tu, sínuque laga zacané laatu tidi tu ni ora idxiña tu ni, ti ganda gua tu ni». Zanda iquiiñebe poder stibe para cueebe ni cayuniná laanu, o laaca zanda gudiibe stipa laanu para guni huantarnu ni. Intiisi gúnibe la? nánnanu zacanebe laanu.
8. Xi caquiiñeʼ gúninu para gacané Jiobá laanu.
8 Yanna, xi caquiiñeʼ gúninu para gacané Jiobá laanu yaʼ. Guietenaláʼdxinu conseju bidii Pedru laanu ora guníʼ: «Laquixhe irá ni lu ná be, purti laabe cayapa be laatu». Textu ca cayabi laanu cadi chúʼpenu xizaa pur ca cosa ni cayuniná laanu, sínuque cuézanu gacané Dios laanu ne gudii guiráʼ ni caquiiñenu (Mat. 6:25-32). Laaca cayábini laanu naquiiñeʼ guni crenu Jiobá ne cadi guininu zanda gúninu guiráʼ cosa laasinu purtiʼ si nánnanu stale. Nga runi riquiiñeʼ gánnanu nuu cosa ni qué zanda gúninu laasinu. Zacá rusihuínninu «gasti nga laa[n]u nezalú Dios ni nandxóʼ» (biindaʼ 1 Pedro 5:6). Ora rúninu ni na ca diidxaʼ ca la? jma rápanu stipa para guni huantarnu guiráʼ ni rudii Jiobá lugar guizaacanu. Nécapeʼ ñuuláʼdxinu niree guiráʼ ca guendanagana stinu nagueendaca la? runi crenu nanna Jiobá pora ne ximodo zanda gacané laanu (Sal. 54:7; Isa. 41:10).
9. Xi guendanagana bisaana David lu naʼ Jiobá.
9 Guiníʼ íquenu ca diidxaʼ guníʼ David ni cá lu Salmo 55:22: «Bilaa guiráʼ ni nuaaluʼ luguiáʼ Jiobá, ne laapebe zacanebe lii. Qué ziuu dxi gudiibe lugar guitende ñee cani runi ni jneza». Salmo riʼ bicaa David ni dxi cadiʼdiʼ lu stale guendanagana (Sal. 55:4). Zándaca bicaabe ni dxi bicaalú xiiñibe Absalón laabe ne gurí casi rey lugar stibe. Ne Ahitofel, hombre ni jma xhamígube ni rudii conseju laabe bidaaguʼ xiiñibe para bicaalucaʼ laabe. Para cadi guuticabe rey David la? gupa xidé bixooñeʼ de guidxi Jerusalén (2 Sam. 15:12-14). Naná ngue guiráʼ ni gudíʼdibe, peru qué nusaanabe de ñuni crebe Jiobá de guidubi ladxidoʼbe, ne gucané Dios laabe.
10. Xi naquiiñeʼ gúninu ora gápanu guendanagana.
10 Cásica biʼniʼ David que, laanu laaca riquiiñeʼ guni orarnu Jiobá para gábinu laa intiisi ni cayuniná laanu. Guidúʼyanu xi cayabi apóstol Pablu laanu (biindaʼ Filipenses 4:6, 7). Xi zabeendunu pa guni orarnu de guidubi ladxidoʼno yaʼ. Pablu guníʼ: «Zaguixhe dxí [Dios] ladxidóʼ to dede iruti zanda guiene ximodo ni. Ma qué zadxibi ladxidóʼ to, ne zata dxí xquenda biaani tu, purti nuu né tu Cristu Jesús tobi si».
11. Xi para ndiʼ racané Dios laanu.
11 Ñee zaca chaahuiʼ ni cayácanu pa guni orarnu la? Zándaca, peru naquiiñeʼ gánnanu cadi guiráʼ diʼ ora ricabi Jiobá ca oración stinu modo racaláʼdxinu. Neca zacá, nánnanu zacané ca oración ca laanu para cadi guninapeʼ ca yuubaʼ ca laanu ne para cadi guiníʼ íquenu maʼ qué zanda gaca chaahuiʼ cani. Ora maʼ gudixhedxí Dios ladxidoʼno la? zánnanu xi gúninu neca nápanu guendanagana. Ne ora riguixhedxí Dios ladxidoʼno la? zeeda gácani casi ora rapa ca soldadu ca ti guidxi de ca xhenemigu. Nga zacané laanu para cadi guidxíbinu, guni crenu zaca ni cabézanu, zaníʼ íquenu ante gúninu xiixa ne qué ziuʼnu triste (Sal. 145:18).
12. Guníʼ ti ejemplu ni cusihuinni ximodo riguixhedxí Dios ladxidoʼno.
12 Ñee zanda gatadxí ladxidoʼno pa cadídinu lu xiixa guendanagana la? Guzéʼtenu ti ejemplu ni rusihuinni zanda gácani. Ti hombre ca rúnibe dxiiñaʼ ti lugar ra nuu ti xaíque ni nabé ranináʼ laabe. Peru ti dxi gunda guníʼnebe xpixuaanapebe para gúdxibe laa xi guiráʼ runi xaíque que laabe. Ora gunna xpixuaanabe que ni la? biá laabe ne biene xi cayuni sentirbe. Laa gudxi laabe maʼ qué zandaa zaree hombre ni cayanináʼ laabe que. Yanna, ximodo biʼniʼ sentir hombre riʼ ora gudxi xpixuaanaʼ laa zaqué yaʼ. Ora bíʼyabe biene xpixuaanabe laabe ne gudxi laabe mayaca guiluxe ni cayácabe que la? biaanarube para gúnibe dxiiñaʼ, neca guni huantarbe hombre ni ranináʼ laabe que xhupa xhonna gubidxa. Laanu laaca nánnanu riene Jiobá guiráʼ ni cadídinu. Ne laaca cayábibe laanu mayaca guiree «ni runi mandar ndaani [guidxilayú riʼ]» (Juan 12:31). ¡Nabé riguixhedxí nga ladxidoʼno!
13. Xiruʼ naquiiñeʼ gúninu aparte de guni orarnu.
13 Yanna, ñee zábisinu Jiobá xi guiráʼ guendanagana cadídinu la? Coʼ, naquiiñeʼ gúnirunu xcaadxi cosa. Guni orársinu la? naquiiñeʼ gúninu ni gunábanu lu oración ca. Dxi biseendaʼ Saúl caadxi hombre para guinaazecaʼ David ti guuticaʼ laabe la? biʼniʼ orar David sicaríʼ: «Bilá naa de ca xhenemiguáʼ, Dios stinneʼ; gupa naa de cani cucaalú naa. Bilá naa de cani qué runi ni jneza, ne bilá naa de ca hombre ni ruuti binni» (Sal. 59:1, 2). Peru biʼniʼ orar si David la? bíʼnibe ni gudxi xheelabe laabe ne bixooñebe de raqué (1 Sam. 19:11, 12). Laaca zanda guinábanu Jiobá gudii guendabiaaniʼ laanu para gánnanu ximodo gudxíʼlunu ni cazaacanu ne ximodo ganda guni chaahuinu ni (Sant. 1:5).
Ximodo zanda gápanu stipa para guni huantarnu
14. Xi zacané laanu para guni huantarnu ora cadídinu ra nagana.
14 Zándaca zadiʼdiʼ stale tiempu para guiree ca guendanagana stinu. Yanna, xi zacané laanu guni huantarnu pa zacá nuunu yaʼ. Primé la? riquiiñeʼ guietenaláʼdxinu rusihuínninu nadxiinu Jiobá ora rúninu ni nabe neca cadídinu xiixa guendanagana (Hech. 14:22). Cadi guiaandaʼ laanu xi pur ngue na Binidxabaʼ cayuni Job ni na Dios: «¡[...] Pa ruzuubaʼ Job stiidxaluʼ la? rúnibe ni purtiʼ ricaabe xiixa! Lii cayápaluʼ laabe ne familia stibe guiráʼ ora; rápaluʼ guiráʼ ni nápabe, ne riguuluʼ ndaayaʼ guiráʼ ni rúnibe. ¡Puru si vaca ne dendxuʼ stibe nuu neza ralídxibe! Peru pa guninaluʼ laabe ne gaxhuʼ guiráʼ ni nápabe la? gábecaʼ lii ¡zaguudibe lii nezaluluʼ!» (Job 1:9-11, Traducción en lenguaje actual). Peru qué nucheené diʼ Job Dios ne zacá bisihuínnibe cadi dxandíʼ diʼ ngue ni guníʼ Binidxabaʼ que. Pa guni huantarnu guiráʼ ni cadídinu la? laaca zusihuínninu nabé rusiguii Binidxabaʼ. Ne jma zuni crenu Jiobá de guidubi ladxidoʼno ne zaguidxi fe stinu ora guni huantarnu (Sant. 1:4).
15. Gunáʼ nga ca ejemplu ni zacané laanu.
15 Guiropa la? naquiiñeʼ guietenaláʼdxinu ni guníʼ Pedru riʼ: «Cadi laasi tu cadiʼdi tu ni, sínuque zacaca cayacaná ca hermanu stitu ni nuu irá ladu» (1 Ped. 5:9). Zacá nga laani, «irá binni ridiʼdi enda naná ni cadiʼdi [n]u ca» (1 Cor. 10:13). Nga runi, lugar de guicá íquenu puru si ca guendanagana nápanu la? jma galán guiníʼ íquenu ca ejemplu stiʼ xcaadxi xpinni Cristu. Zacanécani laanu gácanu nadxibalú ne zudiicani stipa ni caquiiñenu (1 Tes. 1:5-7; Heb. 12:1). Ñee runibiaʼluʼ tuuxa ni cayuni huantar stale guendanagana, peru cayúniruʼ ni na Jiobá la? Guníʼ ique xi zanda guiziidiluʼ de ejemplu stibe. Ñee maʼ huayúbiluʼ historia stiʼ ca xpinni Cristu ni maʼ huadíʼdicaʼ lu xiixa guendanagana cásica ra cadíʼdiluʼ la? Zacané historia stícabe lii stale.
16. Ximodo racané Dios laanu ora maʼ cadídinu lu xiixa guendanagana.
16 Guionna cosa ni zacané laanu guni huantarnu nga guietenaláʼdxinu riá Jiobá laanu ne «laabe nga Dios stinu ne riguixhe dxí be ladxidóʼ no. Rusieche be laanu ora tiica acaná ladxidóʼ no, ne zacá riziʼdi nu usieche nu stobi ni cayacaná ladxidóʼ, cásica bisieche be laanu» (2 Cor. 1:3, 4). Jiobá nuu gaxha de laanu para gacané laanu ne para uguu gana laanu, peru cadi ora si nápanu xiixa guendanagana nga racanebe laanu, sínuque «ora tiica acaná ladxidóʼ no». Nga racané laanu para «usieche nu stobi ni cayacaná ladxidóʼ». Pablu, ni bicaa ca diidxaʼ riʼ, nanna zacá ni pur guiráʼ ni bizaaca (2 Cor. 4:8, 9; 11:23-27).
17. Ximodo racané Biblia laanu para gudxíʼlunu ca guendanagana ridxaagalunu.
17 Guidapa cosa ni racané laanu nga Stiidxaʼ Dios, Biblia. Laani «nuu ni para usiidi ni laanu ne para ulidxe ni laanu ne para gabi ni laanu paraa cuchéʼ nu ne para acané ni laanu ibani nu casi na Dios, ti iziidi chaahui ca xpinni Dios para ganda guni irá ni riree ndu» (2 Tim. 3:16, 17). Stiidxaʼ Dios racané guiráʼ xpinni Cristu para ganna xi guni ora gaca xiixa ni uguu xizaa laa, purtiʼ maʼ bisiidiʼ chaahuini laa modo «ganda guni irá ni riree ndu». Diidxaʼ griegu ni bitíxhicabe «ganda guni irá» ca laaca zanda guibiʼxhiʼ ni casi «ni napa guiráʼ ni iquiiñeʼ» (NM). Dxiqué biquiiñecabe ca diidxaʼ ora caníʼcabe de ti barcu ni maʼ napa guiráʼ ni zaquiiñeʼ ora maʼ chiguni ti biaje o de ti máquina ni maʼ nuu listu para guzulú guni dxiiñaʼ. Zacaca nga runi Jiobá, riquiiñebe Stiidxabe para gudiibe guiráʼ ni caquiiñenu ti ganda gudxíʼlunu guiráʼ guendanagana guidxaagalunu lu guendanabani stinu. Nga runi zanda guininu: «Pa gudii Dios lugar guizaacaʼ xiixa la? zanda guneʼ huantar ni purtiʼ zacanebe naa».
Dxi maʼ guiree guiráʼ guendanagana gápanu
18. Xi naquiiñeʼ gucáʼ íquenu ti ganda guni huantarnu.
18 Ndiʼ nga stobi de cani zanda gacané laanu: qué chuʼ dxi guiaandaʼ laanu mayaca gulá Jiobá ca binni ni cayacaná pur ca cosa malu nuu yanna (Sal. 34:19; 37:9-11; 2 Ped. 2:9). Qué zulá si Jiobá laanu de ca guendanagana nápanu yanna, sínuque laaca racaláʼdxibe guibáninu sin gátinu. Caadxi de ca xpinni Jiobá ziecaʼ guibáʼ para chúʼnecaʼ Jesucristu ne xcaadxi zabani ndaaniʼ ti paraísu lu Guidxilayú riʼ.
19. Xi naquiiñeʼ gúninu ti ganda guni huantarnu.
19 ¡Guizáʼ maʼ racaláʼdxinu guidxiña dxi guiree ca cosa feu ni nuu ndaaniʼ guidxilayú malu riʼ! (Sal. 55:6-8.) Peru, laga cabézanu gueedani la? napa xidé guni huantarnu. Cadi gusaana de guzúʼbanu stiidxaʼ Jiobá ti gusihuínninu rusiguii Binidxabaʼ. Guni orarnu gatigá ne guiníʼ íquenu de ejemplu stiʼ ca xpinni Cristu ni cadiʼdiʼ lu guendanagana casi ni cadídinu, zacá zápanu stipa para guni huantarnu. Guidúʼndanu Stiidxaʼ Dios purtiʼ racá «[r]iziidi chaahui ca xpinni Dios para ganda guni irá ni riree ndu». Ne qué chuʼ dxi gusaana de guni crenu Dios ni riguixhedxí ladxidoʼno purtiʼ zápabe laanu ne stale guendarannaxhii. Cadi liica guiaandaʼ ndiʼ laanu: «Guielú Jiobá cayuuyaʼ ca binni runi ni jneza, ne rucaadiágabe ora rinábacaʼ gacanebe laacaʼ» (Sal. 34:15).
Nannuʼ xi guicábiluʼ la?
• Ximodo biʼniʼ sentir David ora bidxaagalú guendanagana.
• Xi gunna Salomón zuni Jiobá.
• Xi zacané laanu para guni huantarnu cani gudii Jiobá lugar guizaacanu.
[Dibuju/foto ni zeeda lu yaza 13]
Gunna dxichi Salomón zacané Jiobá ca xpinni ora maʼ cadíʼdicaʼ lu xiixa guendanagana
[Dibuju/foto ni zeeda lu yaza 15]
Aparte de biʼniʼ orar David Jiobá ne bilaa ca guendanagana ni gupa luguiabe la? laaca biʼniʼ ni gunabaʼ lu oración que