7. Xi riníʼ ca diidxaʼ riʼ: «Ma biʼni Espíritu Santu laatu tobi si. Nga runi cadi chuʼ dinde tu».

⁷ Cumu napa ca xpinni Cristu ni bibí fe lu guendaguti stiʼ Jesús la? ruuyaʼ Jiobá laacabe casi xiiñiʼ, ne laaca ruuyaʼ Jiobá casi xhamigu cani zeeda gaca casi xcaadxi dendxuʼ, purtiʼ rúnicaʼ ni jneza. Peru laga nabáninu ndaaniʼ Guidxilayú riʼ ante guinitilú ca cosa malu nuu luni, ziuu ora zápanu guendanagana né sti binni (Rom. 5:9; Sant. 2:23). Nga runi, jneza nga conseju cudii Biblia ra na: «Cadi casi ze tu idxiichi né tu stobi». Peru xi naquiiñeʼ gúninu para chuʼnu tobi si né guiráʼ ca xpinni Cristu yaʼ. Conseju riʼ na: «Cadi udxiiba tu laca laatu, sínuque lagaca nadóʼ». Pablu laaca guníʼ: «Ma biʼni Espíritu Santu laatu tobi si. Nga runi cadi chuʼ dinde tu» (biindaʼ Efesios 4:1-3). Para chinándanu conseju ni maʼ bizéʼtenu ca naquiiñeʼ gúninu ni na espíritu stiʼ Dios ne gudiʼnu lugar gacaneni laanu gápanu ca guenda ni rudii espíritu santu. Ca binni ni runi ni na ique, qué randa riuucaʼ tobi si, peru laanu randa runi chaahuinu ca guendanagana ni gapanenu sti binni purtiʼ zinándanu ni na espíritu.

9. Xi naquiiñeʼ guinabadiidxaʼ ti xpinni Cristu para guʼyaʼ pa cayuni stipa pur chuʼ tobi si né xcaadxi.

⁹ Nga runi, cada tobi de laanu naquiiñeʼ guinabadiidxaʼ laca laa: «Pabiáʼ stipa cayuneʼ para chuaaniáʼ ca xpinni Cristu tobi si ne cadi chuʼdíndedu yaʼ. Xi runeʼ ora rapaʼ guendanagana. Ñee rabeʼ guiráʼ xhamiguaʼ xi cayacaʼ ti chúʼcabe pur naa la? Ñee ribezaʼ guni chaahuiʼ ca binnigola ca xiixa guendanagana napaniáʼ sti binni lugar de guneʼ ni naa la? Ñee qué rinaʼyaʼ guuyaʼ tuuxa binni para cadi guietenalaʼdxiʼ xiixa ni bineʼ laa la?». Pa gúninu cani maʼ bizéʼtenu ca zusihuínninu cadi cayacanenu para gaca ni maʼ gudixhe Dios guni: chuʼ ti familia si ni gapa Cristu casi xaíque stiʼ.

10, 11. 1) Pabiáʼ risaca chuʼnu tobi si né ca bíʼchinu ne bizáʼnanu. 2) Xi zanda gúninu para chuʼnu tobi si né Jiobá ti uguube ndaayaʼ laanu.

¹⁰ Jesús guníʼ: «Pa zeda saanu ti ofrenda lu altar para Dios ne guiétenalaʼdxu bichee neu tuuxa la? bisaana gá ofrenda stiuʼ raqué, uyé biene né ni bichee neu que, ne óraque bigueta yetixhe ofrenda stiuʼ lu altar. [...] Biyubi gaca neu laabe tobi si» (Mat. 5:23-25). Santiagu laaca bicaa: «Zaree ndu xhiiña cani runi pur chuʼ binni tobi si, purti cayuni ca jneza ne laca cayacané ca ca xcaadxi guni jneza» (Sant. 3:17, 18). Nga runi, qué zanda gúninu ni jneza pa qué ridxaaganu tuuxa.

¹¹ Guzéʼtenu ti ejemplu. Jma de 30% de layú stiʼ ca guidxi ra guca guerra, ñanda ñaca dxiiñaʼ lúcani pa qué ñápacani mina ni ricaguí. Ora guicaguí ti mina, maʼ qué runi campesinu dxiiñaʼ lu layú stiʼ, raca nagana para laacaʼ guidxélacaʼ dxiiñaʼ ne maʼ qué riuu guendaró ndaaniʼ guidxi ca. Zacaca nga laanu, zaca nagana para gápanu ca guenda ni naquiiñeʼ gapa ti xpinni Cristu pa cadi nuunu tobi si né ca bíʼchinu ne bizáʼnanu. Pa nagueendaca gutiidiláʼdxinu stóndacabe ne gúninu cosa galán para laacabe la? ziuʼnu tobi si né laacabe ne zaguu Jiobá ndaayaʼ laanu.