12. Ximodo biʼyaʼ Pablu guiráʼ cani bisaana.

¹² Apóstol Pablu bisaana stale cosa ora guca xpinni Cristu (Fili. 3:4-6). Ñee guyuu ora biuubaʼ ladxidoʼbe pur ca cosa ni bisaanabe la? Laabe guniʼbe: «Irá nga bisaca para naa chiqué peru qué lica pe rizaaladxe cani, purti ni risaca para naa yanna la? nga Cristu. Ne cadi nga si, sínuque irá ni ma qué iquiiñe ni para naa, purti ma binebiaʼya Cristu Jesús Señor stinneʼ, ne laa si risaca para naa. Bisaana irá xixé ni para zinanda laabe, ne ma casi guixia ni para naa, purti ni jma racaladxe nga laabe» (Fili. 3:7, 8). Cásica guirutiʼ ribanaʼ ti bolsa guixi ni maʼ bisaʼbiʼ la? zaqueca qué ñuubaʼ ladxidóʼ Pablu pur ca cosa risaca ni bisaana, purtiʼ para laabe zeeda gácacani casi guixi.

13, 14. Ximodo zanda chinándanu ejemplu stiʼ apóstol Pablu.

¹³ Xi naquiiñeʼ gúninu pa gudiʼnu cuenta jma caníʼ íquenu guiráʼ cani bisaananu dxiqué yaʼ. Caquiiñeʼ chinándanu ejemplu stiʼ Pablu. Ximodo yaʼ. Ra gusisácanu guiráʼ cani nápanu yanna. Dxandíʼ, zanda chuʼnu nayecheʼ purtiʼ nuunu gaxha de Jiobá ne rusisácabe laanu pur qué huasaana de guzúʼbanu stiidxabe (Heb. 6:10). Ne nin ti cosa ni gudii guidxilayú riʼ laanu qué liica zanda guchaaganu ni né guiráʼ ca ndaayaʼ ni cudii Dios laanu yanna ne guiráʼ cani chigudiibe laanu despué (biindaʼ Marcos 10:28-30).