Ñee riquiiñeʼ guidxíbinu ora gueeda Cristu la?

XI RINÍʼ íqueluʼ zaca ora gueeda Cristu. Ñee riníʼ íqueluʼ zácani ti dxi naná ne triste purtiʼ dxi ca zusabanáʼ Dios binni guidxilayú la? O riníʼ íqueluʼ zaree guiráʼ guendanagana ni napa binni ora gueeda Cristu. Ñee naquiiñeʼ guidxíbinu dxi gueedabe ca la? o naquiiñeʼ guiéchenu.

Biblia cuzeeteʼ xi zaca dxi gueeda Jesucristu: «Zuuya[cabe] zeeda be lade za. Ne irá binni zuuya laabe [...] ne zuuna cabe ora guʼya cabe laabe» (Apocalipsis 1:7). Ca diidxaʼ riʼ caníʼ cani zuzabi ndaayaʼ Jesús binni ni ruzuubaʼ stiidxaʼ Dios ora gueeda ne zusabanabe ca binni malu.

Apóstol Juan, lugar de nidxibi laga gunabaʼ guiuba gueeda Cristu. Biiyasibe visión ra bihuinni dxi gueeda Cristu ne guiráʼ ni zuni lu Guidxilayú riʼ, bíʼnibe ti oración de guidubi ladxidoʼbe ra guniʼbe: «Gudáʼ Señor Jesús» (Apocalipsis 22:20). Yanna, xiñee «zuuna [stale binni] ora guʼya cabe laabe» yaʼ. Ximodo nga «irá binni zuuya laabe». Xi zuni Cristu ora gueeda, ne ximodo zacané nga laanu gápanu fe laga cabézanu dxi ca yaʼ. Lu sti tema ca zeeda gusiene ca guendarinabadiidxaʼ riʼ.