Lu guidubi Guidxilayú nuu binni runi respetar Biblia, neca caadxi si nanna de laani o qué lica ganna gastiʼ. Ngapeʼ nga runi millón binni nabeza Asia, peru laaca nuuruʼ xcaadxi guidxi ra runi respetar binni ni stale.

Zándaca guinabadiidxuʼ: «Xi para guundaʼ Biblia yaʼ». Ora gánnaluʼ xi rusiidiʼ libru risaca riʼ, zanda gacané ni lii:

• Guibániluʼ nayecheʼ

• Guni chaahuiluʼ guendanagana ndaaniʼ familia stiuʼ

• Gudxiiluluʼ cani riguu xizaa lii

• Chuʼluʼ galán né xcaadxi binni

• Iquiiñeluʼ xpuéltuluʼ jneza

Casi ti gunaa de Japón láʼ Yoshiko, biyubi ganna xi rusiidiʼ Biblia, ngue runi gudixhe ique guʼndaʼ ni stubi si. Xi guleendube yaʼ. Laabe nabe: «Maʼ gucané Biblia naa guieneʼ nuu xi pur nabaneʼ ne laaca maʼ bisiidiʼ ni naa zabaneʼ galán despué. Yanna huaxa maʼ nuaaʼ nayecheʼ». Amit, hombre bizéʼtenu que laaca gudixhe ique guʼndaʼ ni. Laa guníʼ: «Nabé bidxagayaaʼ ni biindaʼ que. Zanda gacané ni rusiidiʼ Biblia guiráʼ binni».

Maʼ gucané Biblia millón binni guibani galán. Xiñee qué cueeluʼ tiempu para gúʼndaluʼ ni ne gúʼyaluʼ paraa zanda gacané ni lii yaʼ.

Nánnanu naca Biblia ti libru ni maʼ xadxí de nuu. Bizulú gucuá ni neza Oriente Medio raca biaʼ chonna mil gaayuʼ gayuaa iza. Tiempu que nga cayuni mandar familia Shang China, ni jma xadxí nápacabe registru stiʼ. Ne ti mil iza despué biasa religión budismo guidxi India. (Biiyaʼ cuadru ni láʼ «Cani naquiiñeʼ gánnanu de Biblia».)

Racané ti libru binni ora rudii ni conseju galán ne ora cadi nagana para guiene binni ni cá luni. Zácapeʼ nga Biblia: ricabi ni ca guendarinabadiidxaʼ jma risaca runi binni.

Maʼ xadxí nga nuu binni racalaʼdxiʼ ganna xiñee nuunu lu Guidxilayú. Peru lu primé ne guiropa capítulo stiʼ Génesis, primé libru zeeda lu Biblia, ricabi guendarinabadiidxaʼ riʼ. Racá na: «Primé que», ya, raca mil de millón de iza, guyáʼ universu, dede né ca galaxia, ca beleguí ne Guidxilayú (Génesis 1:1). Ne laaca rusiéneni chaahuiʼ chaahuiʼ beeda gaca Guidxilayú riʼ ti lugar ra chuʼ guendanabani, ximodo beeda chuu guiráʼ ni nabani, ne ximodo guyáʼ binni. Laaca cusiéneni xi para guyáʼ guidubi universu.

ZANDA GUIENE BINNI NI

Rudii Biblia conseju ni racané laanu guni chaahuinu guendanagana ridxaagalunu guiráʼ dxi. Guidúʼyanu chupa razón ni rusihuinni cadi nagana para guiénenu cani.

Nayaʼniʼ modo rusiene ni, qué rirenda ni, ne riuulaʼdxiʼ binni ca conseju stini. Qué riquiiñeʼ ni diidxaʼ nagana ne qué rucaachiʼ ni xiixa, riquiiñeʼ ni diidxaʼ ni zanda guiénenu ne rusiene chaahuiʼ ni stale cosa. Dede ora gusiene ni xiixa cosa nagana riquiiñeʼ ni ejemplu ni runibiaʼnu.

Casi dxi bisiidiʼ Jesús la? biquiiñebe cani runibiáʼ binni para ganda chindá ni rusiidibe ndaaniʼ ladxidoʼcaʼ. Ne zacapeʼ nga rihuinni ni lu libana bidiibe lu ti dani, ni zeeda lu capítulo 5 dede 7 stiʼ Evangeliu stiʼ Mateo. Ti hombre ni rusiene de Biblia guníʼ sicaríʼ: «Nabé racané ca diidxaʼ guniʼbe que, cadi rabi si ni laanu xi gúninu, sínuque racané ni ne ruluíʼ ni laanu modo guibáninu». Biaʼ quince o gande si minutu nga zuundaluʼ ca capítulo riʼ, peru zadxagayaaluʼ ora gúʼyaluʼ pabiáʼ racané ca diidxaʼ guníʼ Jesús, neca qué niquiiñebe diidxaʼ nagana luni.

Sti razón ni rusihuinni cadi nagana guiénenu Biblia nga ni zeeda luni. Qué ruzeeteʼ ni cuentu, sínuque «ruzeeteʼ ni de binni ni biʼniʼ cosa ni ridxagayaanu ne de binni casi laanu, casi dxi gudindenecaʼ xcaadxi guidxi, xi gulézacaʼ nicaacaʼ, ra biníticaʼ ne ra biʼniʼ ganarcaʼ» (The World Book Encyclopedia). Ñee laaca cadídinu ra gudiʼdiʼ ca binni riʼ o laaca cayuni sentirnu ni biʼniʼ sentírcabe la? Laaca cadi nagana para guiénenu cani ne rusiidiʼ cani laanu cosa risaca (Romanos 15:4).

NUUNI PARA GUIRÁʼ BINNI

Para guiéneluʼ ti libru la? napa xidé guicá ni lu diidxaʼ riniʼluʼ. Ra tiica nabézaluʼ zadxélaluʼ ti Biblia lu stiidxaluʼ. Xi huayaca para gaca ni zacá yaʼ.

Traducción. Lu diidxaʼ hebreu, arameu ne griegu nga gucuá Biblia. Nga runi huaxiéʼ binni gunda biindaʼ ni. Lu ca iza ni maʼ gudiʼdiʼ, stale traductor biʼniʼ dxiiñaʼ nadipaʼ para bitiixhicaʼ Biblia ca lu xcaadxi diidxaʼ. Pur dxiiñaʼ ni bíʼnicabe maʼ guca traducir guidubi ni o ti ndaa si de laani lu 2,700 diidxaʼ. Ndiʼ rusihuinni jma de 90% de binni zanda guʼndaʼ neca ti ndaa de Biblia lu diidxaʼ gulené.

Biaʼ maʼ guca. Biquiiñecabe papiro ne guidi para bicaacabe Biblia, peru ca cosa riʼ riuʼdxuʼ cani. Para cadi guiniti ni ná Biblia la? gupa xidé biʼniʼ copiárcabe ni né nácabe stale biaje. Cumu nabé caru bidoo cani la? huaxiéʼ binni gunda guzíʼ cani. Peru dxi biʼniʼ inventar Gutenberg imprenta raca jma de gaayuʼ gayuaa cincuenta iza, jma maʼ gupa binni Biblia. Zándaca maʼ guca imprimir gaayuʼ mil millón de laani dede dxiqué hasta ca dxi stinu riʼ.

Ninruʼ sti libru ni caníʼ de religión qué huayaca traducir biaʼ maʼ guca traducir Biblia ne laasi ni nga ni jma napa binni lu Guidxilayú. Neca raca nagana para laanu guiénenu ni, nuu ni zanda gacané laanu. Xi laani yaʼ. Paraa zanda guidxélanu ni yaʼ. Guidúʼyanu ni lu sti tema ca.

Bixuiʼlú yegánnaluʼ ti guidxi primé biaje. Bidiiluʼ cuenta gadxé ca binni que, gadxé costumbre nápacaʼ, guendaró ne bueltu sticaʼ. Zándaca qué zadxélaluʼ xi gúniluʼ.

Zacaca nga zanda guizaacaluʼ primé biaje gúʼndaluʼ Biblia. Zuxuíʼluluʼ casi ñaca nuuluʼ sti ladu, ti lugar ni qué runibiaʼluʼ. Zunibiaʼluʼ stale guidxi, casi ca filisteu ne laaca zaziidiluʼ caadxi costumbre nacubi, casi guicheza binni xhaba. Ne laaca zuundaluʼ de ti guendaró ni láʼ maná (Éxodo 16:31; Josué 13:2; 2 Samuel 3:31). Zándaca qué ziéneluʼ guiráʼ ndiʼ. Guníʼ ique guidxi ra nuuluʼ que, ñécheluʼ stale ñacané tuuxa lii. Cadi ñuuláʼdxiluʼ nusiene tuuxa lii ca cosa qué riéneluʼ de Biblia la?

NI GUCANÉ BINNI DXIQUÉ

Dede dxi bizulú gucuá Biblia, lu siglu dieciséis ante de ca dxi stiʼ Jesús, qué huayaadxaʼ ni gacané binni para guiene ni. Casi Moisés, primé hombre guca xaíque stiʼ guidxi Israel, bisiénebe ca ley ni nápacabe dxiqué (Deuteronomio 1:5).

Biaʼ chii siglu despué, guyuuruʼ maestru ni bisiidiʼ binni de Biblia. Lu iza 455 ante de ca dxi stiʼ Jesús, bidxiña stale binni ti lugar ra ridagulisaa ca binni de Jerusalén, dede né xcuidi. Cani rusiidiʼ de Biblia biindacaʼ «ra cá Ley stiʼ Dios ni dxandíʼ, bisiénecabe ni ne guníʼcabe xi riniʼni; zacá gucanécabe binni guiene ni cayuundacabe que» (Nehemías 8:1-8).

Biaʼ gaayuʼ gayuaa iza despué, biʼniʼ Jesús ti dxiiñaʼ zaqueca ra bisiidiʼ binni. Ne binibiáʼ binni laabe casi ti maestru (Juan 13:13). Nuu ra bisiidibe ti binni si ne nuu ra bisiidibe stale. Ti biaje bisiidibe ti grupu de binni ne bidiibe ti libana lu ti dani ne nabé runibiáʼ binni ni yanna. «Nabé bidxagayaa ca binni que modo bisiidi be.» (Mateo 5:1, 2; 7:28.) Lu iza 33 byuiʼné Jesús chupa discípulo stiʼ diidxaʼ laga zecaʼ ti guidxihuiiniʼ nuu gaxha de Jerusalén. Bisiénebe laacaʼ «xi na Xquiʼchi Dios» (Lucas 24:13-15, 27, 32).

Laaca gunna ca discípulo stiʼ Jesús gusiidicaʼ Stiidxaʼ Dios. Ti biaje cayuundaʼ ti hombre de Etiopía runi xhiiñaʼ ti reina ti relatu zeeda lu Stiidxaʼ Dios. Bidxiña discípulo Felipe ra nuube ne gunabadiidxaʼ laabe: «Rieʼnu gouʼ ni cayuunda lu ca». Óraque na: «Ximodo ndi guieneʼ pa iruti tu usiene naa». Para bisiene Felipe laabe xiná relatu que (Hechos 8:27-35).

NI RACANÉ BINNI YANNA

Cásica guyuu maestru ni bisiidiʼ ni na Stiidxaʼ Dios dxiqué, zacaca cayuni ca testigu stiʼ Jiobá yanna lu 239 guidxi roʼ ne territorio (Mateo 28:19, 20). Guiráʼ semana racanécabe jma de gaʼ millón binni guiene ni rusiidiʼ Biblia. Stale de ca binni riʼ cadi zinándacaʼ Cristu. Qué riguixe binni para guiziidiʼ, zanda gusiidicabe lii ra lídxiluʼ o ra tiica naluʼ, laaca zanda gácani pur teléfono o pur videoconferencia.

Pa racaláʼdxiluʼ guiziidiluʼ la? guniʼné ti testigu stiʼ Jiobá. Zudiiluʼ cuenta cadi nagana diʼ nga guiene binni Biblia, sínuque «nuu ni para usiidi ni laanu ne para ulidxe ni laanu ne para gabi ni laanu paraa cuchéʼ nu ne para acané ni laanu ibani nu casi na Dios, ti iziidi chaahui ca xpinni Dios para ganda guni irá ni riree ndu» (2 Timoteo 3:16, 17).