Guyachaahuinu ximodo caquiiñenu xtiémpunu
1. Xi guendanagana ridxagalú guiráʼ binni.
1 Ca dxi nabáninu riʼ nápanu stale aparatu ni iquiiñenu para gúninu xhiiñanu nagueenda, peru stale binni rudii cuenta de que ruluíʼ si jma nuu ni gúnicaʼ ne huaxiéʼ tiempu nápacaʼ para laacani. Lii yaʼ, raca nagana chinándaluʼ ca hora naguíxheluʼ para gúʼndaluʼ ne gúniluʼ xhiiñaʼ Reinu la? Ñuláʼdxiluʼ nigucheechelu diidxaʼ jma la? Ximodo zanda iquiiñeʼ chaahuiluʼ xtiémpuluʼ yaʼ. (Sal. 90:12; Fili. 1:9-11.)
2, 3. Xi zanda guni ca aparatu ni caree yanna riʼ laanu, ne xi naquiiñeʼ gúninu ti gánnanu ximodo nuunu.
2 Gúʼyanu paraa runítunu xtiémpunu. Guiranu naquiiñeʼ guiníʼ íquenu ximodo riquiiñenu xtiémpunu. Biblia culidxi laanu ne ca diidxaʼ riʼ: «Yanna, laguuya chaahui ximodo sa tu, cadi casi cani qué riene, sínuque casi cani nuu xpiaaniʼ. Laguni ni iree ndu laga zanda, purti nabé cayuni binni ni cadi jneza ca dxi riʼ» (Efe. 5:15, 16). Guiníʼ íquenu xi guendanagana redané ca aparatu caree yanna riʼ. Nécaxa ca computadora, ca máquina ne xcaadxi aparatu ni nuu zanda iquiiñeʼ cani laanu, peru pa qué guyachaahuinu pabiáʼ tiempu cudiʼnu cani la? zándaca gusaba cani laanu (1 Cor. 7:29, 31).
3 Iranu naquiiñeʼ inabadiidxanu laaca laanu: «Ñee cuniteʼ ziaʼ xtiempuaʼ para guundaʼ ne guicabeʼ guiráʼ ni ruseendacabe naa lu computadora para guchiiñaʼ si naa ne cadi cueenduaʼ gastiʼ la? Nabé riniéʼ pur teléfono o rinieniaʼ tuuxa diidxaʼ ni qué risaca lu computadora ca la? (1 Tim. 5:13.) Riuaa stale tiempu lu internet o pacaa ora maʼ cayuuyaʼ tele nisi maʼ cuchaa ni de canal la? Maʼ huaxiéʼ ruundaʼ o maʼ qué lica ruundaʼ Stiidxaʼ Dios purtiʼ maʼ qué riree ranuu maquinita la?». Guiráʼ ca ndiʼ la? zanda guxhele cani laanu de Jiobá chaahuidugá (Pro. 12:11).
4. Ximodo bichaa ti hombrehuiiniʼ, ne xiñee.
4 Iquiiñenu xtiémpunu ne guendabiaaniʼ. Ca aparatu ca la? ribaʼnaʼ cani xtiémpunu ne ora tiica si maʼ caníʼ íquenu de laacani. Ti hombrehuiiniʼ ni biaba lu bisiu stiʼ maquinita guníʼ: «Nuu tiru riguiteʼ ante chigucheecheʼ diidxaʼ o ante chaa ra guendaridagulisaa, peru despué guizáʼ raca nagana para naa gucaadiagaʼ ni cayeeteʼ raqué, purtiʼ nisi maʼ caníʼ iqueʼ ximodo guneʼ ganar guendariguite que ora ibiguetaʼ. Maʼ qué ñanda ninandaʼ ca hora gudixheʼ para guundaʼ Biblia nin xcaadxi libru ni cusiene de laani, ne bizuluáʼ biniteʼ guendanayecheʼ stinneʼ de guneʼ ni na Jiobá». Hombrehuiiniʼ riʼ bidii cuenta de que naquiiñeʼ gúnibe xiixa, ngue runi bixhiabe guiráʼ ni nápabe lu xcomputadórabe. «Nagana gúcani para naa -nabe-, purtiʼ bisiu stinneʼ gúcani jma nadipaʼ que ni guníʼ iqueʼ. Peru guizáʼ nayecheʼ guyuaa purtiʼ gunda bisaana ni, purtiʼ nanna de que biʼneʼ ni para chuaa galán.» (Mat. 5:29, 30.)
5. Ximodo zanda cueenu tiempu para gúninu ni na Dios, ne xi zabeendunu pa gúninu zacá.
5 Zándaca naquiiñeʼ guʼnuʼ zacaca. Ñee zanda cueeluʼ media hora guiráʼ dxi lu xiixa ni cadi naquiiñepeʼ gúniluʼ la? Biaʼ ca nga naquiiñeʼ para guiuundaʼ Biblia lu ti iza. Ne pa gúninu ni la? stale ni zabeendunu (Sal. 19:7-11; 119:97-100). Naquiiñeʼ gápanu ti hora para gúʼndanu Biblia, gúʼndanu para ca guendaridagulisaa ne guireenu de yoo pur yoo (1 Cor. 15:58). Zacá la? zanda gucaananu cani ribee xtiémpunu ne guyúbinu gánnanu guiráʼ ni na Jiobá (Efe. 5:17).