Ñee ziuuluʼ racá la?
1 Ti testigu ni maʼ xadxí cayuni ni na Jiobá ti biaje guníʼ sicaríʼ: «Pa tuuxa guniti primé dxi stiʼ ti guendaridagulisaa roʼ la?...¡maʼ stálepeʼ ni biniti!». Xiñee biiyabeni zacá yaʼ. Purtiʼ primé dxi ca nga ruzuluʼ guizíʼdinu stale de ni maʼ gudixhe Grupu ni Zaniruʼ ca para laanu (Isa. 25:6). Chuʼnu raqué dede primé dxi ca la? rusihuinni de que runi sentirnu cásica hombre ni bicaa salmo riʼ: «Biecheʼ ora gúdxicabe naa: “chuu ra lidxi Jiobá”» (Sal. 122:1).
2 Peru, maʼ ziné stale iza huaxiepeʼ tu rié ca biernes stiʼ ca guendaridagulisaa de chonna gubidxa ca, que ca sábado ne ca domingo ca. Nga riníʼ de que stale de ca bíchinu ne ca bizánanu riaanacaʼ sin gunadiágacaʼ guiráʼ cani risaca ni rieeteʼ lu ca libana stiʼ primé dxi ca, ne laaca maʼ qué ridxaagacabe stuudxi testigu stiʼ Jiobá.
3 Cadi gudiiluʼ lugar ucueeza xhiiñaluʼ lii. Zándaca stale tu riaadxaʼ ca biernes ca purtiʼ ridxíbicaʼ guníticaʼ xhiiñacaʼ. Peru stale Testigu huayuuyacaʼ de que, pa inábacabe permisu dede ante dxi ni caquiiñecabe ca la? xpatróncabe rudiini laacabe. Ti bizánanu precursora nabé gudixhe ique cadi guiaadxaʼ diʼ nin ti guendaridagulisaa ne pur nga la? bidxagayaa xpatronbe stálepeʼ dede guyé idubi ti dxi ra guendaridagulisaa roʼ ra guyebe que.
4 Cadi guiníʼ íquecaluʼ de que qué zudiicabe permisu lii ra dxiiñaʼ stiluʼ, ne cadi naluʼ de que gastiʼ naca nga guiaadxaluʼ ti dxi stiʼ guendaridagulisaa roʼ ca. Guyuu listu para guluiʼluʼ xpatronluʼ ne Biblia xiñee nga risaca cheeluʼ ca guendaridagulisaa roʼ ca para guni adorarluʼ Jiobáʼ, bisihuinni de que dxandíʼ nga runi creluʼ ni cayaʼbu laabe ca ne biyubi modo gáʼbuni laabe galán (Heb. 10:24, 25). Ne biʼniʼ cré de idubi ladxidoʼloʼ guiráʼ ni maʼ bizabiruaa Jiobá guni, ne bietenalaʼdxiʼ de que laabe zudiibe lii guiráʼ ni caquiiñeluʼ para ibanineluʼ pa uyúbiluʼ gúniluʼ ni nabe primeru lu xquendanabániluʼ (Mat. 6:33; Heb. 13:5, 6).
5 Ni jma zacané laanu nga ganaxhiinu ca «ni dxandíʼ risaca» (Fili. 1:10, 11; Sal. 27:4). Ganaxhiinu cani la? zucaa cani laanu quixhechaahuinu cani chigúninu ti ganda cueendunu stale de cani jma risaca ni cudii Jiobá laanu. Dedeca yanna bizuluʼ gudixhechaahuiʼ guiráʼ ni chigúniluʼ ne guníʼ ique de que lii ziuuluʼ racá guionnaʼ gubidxa ca.