Cani nahuiiniʼ zeeda ácacaʼ casi ti biaaniʼ
1. Ximodo ndiʼ riníʼ Biblia jma zahuinni ca xpinni Cristu lade iráʼ binni, ne ximodo cahuinni ca diidxaʼ riʼ luguiáʼ cani nahuiiniʼ ca dxi stinu riʼ yaʼ.
1 Jesús gudxi ca xpinni sicaríʼ: «[Laatu nga] casi ñaca cuzaani tu» lu guidxilayú riʼ (Mat. 5:14, 16). Laacabe zahuínnicabe jma casi ti guidxi ni zuba ique ti dani ne cuzaaniʼ gubidxa luguiáʼ. Ca dxi stinu riʼ, stale xpinni Cristu ni nahuiiniʼ «zeda gaca[caʼ] casi biaani ndaani guidxilayú cahui riʼ» pur modo galán xpiaʼcaʼ ne pur modo rucheechecaʼ diidxaʼ ne stale gana (Fili. 2:15; Mal. 3:18).
2. Ximodo zanda iníʼneluʼ ca maestru ne cani rineluʼ scuela de Reinu stiʼ Dios yaʼ.
2 Ra scuela. Ximodo zanda ucheecheluʼ diidxaʼ ra scuela. Caadxi de laacabe rúnicabe ni ora maʼ caníʼcabe de evolución, de droga, de endaridinde ni cayaca xcaadxi guidxi, ne ora iníʼcabe de xcaadxi tema. Ti bizánanu gúdxicabe laabe ucaabe de cani ruuti binni para uchibi gobiernu, ora bíʼnibe ni biiyabe zaqué nga zanda iniʼbe Reinu si stiʼ Dios nga ni chiguni chaahuiʼ guidxilayú riʼ. Maestra que bidxagayaa modo uníʼ bizánanu riʼ, ne ngue ucané laabe para gunda bicheechebe diidxaʼ ra scuela ora tiica.
3. Ra aca xpiaʼluʼ nayá, ximodo zanda acaneni uzaaniluʼ casi ti biaaniʼ ra scuela.
3 Ra aca xpiaʼluʼ nayá, pur modo áculuʼ lari ne pur modo uzuchaahuiluʼ la? laaca zanda uzaaniluʼ casi ti biaaniʼ (1 Cor. 4:9; 1 Tim. 2:9). Pa ca maestru ca ne ca ni rineluʼ scuela gúʼyacaʼ maʼ gadxé lii la? zándaca chupa chonna de laacabe chuláʼdxicabe iziidicabe de Dios pur modo lii ne zudiicabe lugar iníʼneluʼ laacabe de ca ni dxandíʼ rusiidiʼ Biblia (1 Ped. 2:12; 3:1, 2). Nagana nga aca xpiáʼ binni casi modo riuulaʼdxiʼ Dios, peru pa gúniluʼ zacá la? Jiobá zuzabi ndaayaʼ lii (1 Ped. 3:16, 17; 4:14). Pa gúʼndaluʼ xiixa libru o revista ora maʼ caziiláʼdxiluʼ o usaanaluʼ cani ra gúʼyacabe ni la? zanda chulaʼdxiʼ tuuxa ca diidxaʼ nacubi ne galán stiʼ Cristu.
4. Xi iráʼ ndiʼ zabeenduluʼ ora ucheecheluʼ diidxaʼ ra scuela.
4 Ra gúniluʼ iráʼ cani maʼ uninu ca zeeda ácani casi nuzaaniluʼ casi ti biaaniʼ ra scuela, ne nga zuquídxini fe stiluʼ ne laaca ziuuluʼ jma nayecheʼ purtiʼ rúniluʼ ni na Jiobá (Jer. 9:24). Ne laaca zápani lii. Ti bizánanu uníʼ: «Ndiʼ nga ni ribeenduáʼ ora riniéʼ cani runeʼ cré, ca baʼduʼ scuela ca qué ruquiindecabe naa guneʼ xiixa ni cadi jneza, ni na Biblia cadi galán».
5. 1) Ximodo cayuni cani nahuiiniʼ ca jma lu xhiiñaʼ Dios. 2) Lii, xi guenda cá íqueluʼ ugaandaluʼ ndaaniʼ xquidxi Jiobá yaʼ.
5 Gúninu jma lu xhiiñaʼ Dios. Sti modo zanda usisaca cani nahuiiniʼ ca Jiobá ne uzaanicaʼ casi ti biaaniʼ nga, gúnicabe jma lu xhiiñaʼ Dios. Biinduuxeʼ si ti bíchinu scuela guyebe ti guidxi ra irútipeʼ ucheeche diidxaʼ stiʼ Reinu, raqué uyuube lade ti neza binni ridagulisaa ra nuu ti binnigola si. Despué bicaabe ra nuu ti xhamígube sicaríʼ: «Ndiʼ nga ni jma galán cadiideʼ lu endanabani stinneʼ. ¡Ucheecheʼ diidxaʼ nabé galán ni para naa! Cumu ca binni que racaláʼdxicaʼ gánnacaʼ iráʼ ni zitídxidu laacaʼ la? riaanadu gande minutu rinínedu laacabe ra puertaʼ lídxicabe». Ne nabe: «Ñuuladxeʼ ñuni iráʼ cani nahuiiniʼ zacaca ne ñuni sentírcabe galán casi cayuneʼ sentir riʼ. Gástiruʼ sti cosa ni jma galán, que gúninu ni na Jiobá ne iráʼ cosa ni nápanu».
6. Xiñee ridxá tipa ladxidoʼloʼ de endanayecheʼ ora ruuyaluʼ cani nahuiiniʼ nuu ra ridagulisaaluʼ.
6 ¡Ridxá tipa ladxidoʼdo de endanayecheʼ nga ora idúʼyadu lii rusisácaluʼ Jiobá ora ruzaaniluʼ casi ti biaaniʼ ndaaniʼ guidxilayú riʼ! (1 Tes. 2:20.) Biʼniʼ ni na Jiobá de idubi ladxidoʼloʼ, idubi xhiálmaluʼ, idubi xquendabiaaniluʼ ne de iráʼ stipa stiluʼ ne zacaaluʼ «ti gayuaa tantu de ni bisaana[luʼ]» tiempu riʼ, «ne dxi usulú guidxilayú cubi la? zapa[luʼ] ti enda nabani ni qué zaluxe» (Mar. 10:29, 30; 12:30).