cadi jneza guni adorar binni bidóʼ o intiica cosa (Éxodo 20:4, 5; 1 Corintios 10:14). Nga runi, cani dxandíʼ xpinni Cristu qué lica rinacaʼ iquiiñecaʼ cruz para guni adorarcaʼ Dios.a

BIʼNIʼ mandar Cristu ca xpinni guieteláʼdxicaʼ guendaguti stiʼ ne runibiáʼcabe ni casi «guendaroxhi stiʼ Señor» (1 Corintios 11:20). Xiñee risácapeʼ nga gaca ni yaʼ. Padxí ne ximodo raca ni.

Jesucristu gudixhestí ni gueelaʼ biʼniʼ ca judíu que Pascua lu iza 33 despué de Jesús. Pascua que nga ti saa ni bíʼnicabe ti biaje lu ti iza, 14 stiʼ nisán (beeu stiʼ calendariu judíu). Para ganna ca judíu que padxí gúnicabe ni la? ribézacabe guedandá ti dxi lu primavera ni napa doce hora ridxíʼ ne doce hora huaxhinni para guzulú ugábacabe ca dxi ca dede chindácabe dxi 14. Primé dxi stiʼ beeu nisán rigabaʼ ni dede primé dxi guiree beeuhuiiniʼ, despué de dxi ni napa doce hora ridxíʼ ne doce hora huaxhinni. Pascua que ruzulú ni trece dxi despué.

Gueelaʼ que nga biʼniʼ Jesús Pascua que né ca apóstol stiʼ, gúdxibe Judas Iscariote guiree ne de raqué la? gudixhestibe Guendaroxhi stiʼ Señor. Guendaroxhi riʼ biaana ni lugar stiʼ Pascua ni biʼniʼ ca judíu que, nga runi napa xidé gúninu ni ti biaje lu ti iza.

Evangeliu stiʼ Mateo cusiene xi guca: «Ucuaa be pan guluu be ndaayaʼ, ne gundaa be ni lú ca discípulu stibe ne rabi be laacaʼ: Laicaa ne lagó. Ndi nga cuerpu stinneʼ. Oraque ucuaa be ti copa ne bidii si be diuxquixe Dios bidii be ni laacaʼ, ne rabi be laacaʼ: Laguéʼ ni, irá xixé tu. Purti ndi nga rini stinne ni chi ixii para ixá stonda stale binni. Ne ra ixii ni la? zaguixhe Bixhoze ti modo [o ti pactu] cubi chuʼ né binni laa tobi si» (Mateo 26:26-28).

Nuu tu na dxandíʼ biʼniʼ Jesús pan que né beela ladi, ne vinu que né rini stiʼ. Peru cadi cayaadxaʼ nin ti ndaa beela ladi Jesús ora bidii pan que. Ñee zanda guininu dxandíʼ gudó ca apóstol que beela ladi Jesús ne güeʼcaʼ rini stibe la? Coʼ, purtiʼ maʼ ñácacabe caníbal ne nucheenécabe ley stiʼ Dios (Génesis 9:3, 4; Levítico 17:10). Sicaríʼ guníʼ Jesús: «Copa riʼ nga riníʼ pactu cubi pur rini stinneʼ ni chiguixii pur laatu» (Lucas 22:20, TNM). Ñee dxandíʼ copa que nga guca «pactu cubi» que la? Coʼ, purtiʼ ti pactu nga ni riaana chupa binni guni; cadi ti cosa ni zanda canaʼ binni.

Nga runi, pan ca ne vinu ca nuu xi riníʼ cani. Pan que zeeda gaca ni beela ladi Cristu ni qué ñalené donda. Ne pan biaana ra gudóxhicabe ra bíʼnicabe Pascua que nga biquiiñebe, ti pan ni qué ñacané levadura (Éxodo 12:8). Gatigá riquiiñeʼ Biblia diidxaʼ levadura para gusiene xii nga donda o ni runi biidiʼ laanu. Nga runi, pan que zeeda gaca ni casi beela ladi Jesús ni qué ñapa donda ne ni bidii pur laanu (Mateo 16:11, 12; 1 Corintios 5:6, 7; 1 Pedro 2:22; 1 Juan 2:1, 2).

Vinu que zeeda gaca ni casi rini stiʼ Jesús ne rini que nga biquiiñeʼ para bizulú pactu cubi que cayuni dxiiñaʼ. Jesús maca guníʼ zuxhii rini stiʼ «para ixá stonda[nu]». Pur laani nayá ruuyaʼ Jiobá caadxi binni ne zacá riuucaʼ lu pactu cubi stibe (Hebreos 9:14; 10:16, 17). Ne pur pactu, o compromisu, guca que la? zanda cheʼ 144,000 de ca xpinni Cristu guibáʼ. Racá chigácacabe rey ne ni ruzaaquiʼ guʼxhuʼ para gacanécabe guiráʼ xixé binni (Génesis 22:18; Jeremías 31:31-33; 1 Pedro 2:9; Apocalipsis 5:9, 10; 14:1-3).

Tuu nga cani napa derechu gó pan ne gueʼ vinu ni riquiiñeʼ ora rietenaláʼdxicabe guendaguti stiʼ Cristu yaʼ. Casi maʼ bidúʼyanu, cani napa si derechu nga cani nuu lu pactu cubi ca, nga nga cani cheʼ guibáʼ. Espíritu santu stiʼ Dios rusiene laacabe ti gánnacabe maʼ bibícabe para gácacabe rey guibáʼ (Romanos 8:16). Ca binni riʼ laaca nuucabe lu pactu cubi para guni mandarnécabe Jesús (Lucas 22:29).

Yanna, xi runi ca binni ni cabeza guibánicaʼ sin qué chuʼ dxi gáticaʼ ndaaniʼ Paraísu lu Guidxilayú riʼ yaʼ. Riécabe Guendaroxhi stiʼ Señor ne zacá rusihuínnicabe runi respetárcabe ni, neca qué rócabe pan ne qué réʼcabe vinu. Ca testigu stiʼ Jiobá rúnicabe Guendaroxhi stiʼ Señor ca ti biaje si lu ti iza, dxi riaba 14 stiʼ nisán guiaaziʼ si Gubidxa. Neca chupa chonna mil si binni ni na cheʼ guibáʼ nuu lu guidubi naca Guidxilayú riʼ, para guiráʼ xpinni Cristu nabé risaca nga ni rúnicabe ca. Laani nga ti dxi ni racané laacabe guiníʼ íquecabe pabiáʼ nadxii Jiobá ne Jesús binni (Juan 3:16).

ORA runadiágaluʼ ca diidxaʼ alma ne espíritu, xi riníʼ íqueluʼ. Stale binni na nga nga ca diidxaʼ ni riquiiñeʼ para guiníʼcabe xiixa ni nápanu lu xcuérpunu, xiixa ni qué rati ne qué zanda guidúʼyanu. Nácabe ora rátinu riree ni lu xcuérpunu ne nabániruʼ ni sti lugar. Cumu stale binni nga runi cré ni la? nuu binni ridxagayaa ora ganna cadi nga diʼ rusiidiʼ Biblia. Yanna, xii nga alma ne espíritu casi rusiidiʼ Biblia yaʼ.

XI RINÍʼ DIIDXAʼ «ALMA» LU BIBLIA

Chiguininu primé de alma. Zándaca rietenaláʼdxiluʼ casi guidubi naca Biblia gucuá ni lu diidxaʼ hebreu ne griegu. Cani bicaa Biblia ca biquiiñecabe diidxaʼ néfesch para guiníʼcabe alma lu diidxaʼ hebreu ne biquiiñecabe psykjé lu diidxaʼ griegu. Lu Biblia diidxazá diidxaʼ psykjé ca bicaacabe ni «binni», «lii», «guendanabani», «naa» ne «espíritu». Ne cásica lu Traducción del Nuevo Mundo ne lu ca nota stini, riquiiñeʼ «alma» para guiropaʼ diidxaʼ riʼ. Gadxé gadxé modo bitiixhicabe