LU CA primé diidxaʼ gucuá Biblia la? rieeteʼ jma de setenta biaje diidxaʼ hebreu scheʼóhl ne lu diidxaʼ griegu rieeteʼ ni háides, ne ora riníʼ Biblia de guendaguti la? riquiiñeʼ ni ca diidxaʼ ca. Lu xcaadxi Biblia rutiixhicabe ca diidxaʼ ca casi «baʼ», «infiernu» ne nuuruʼ xcaadxi modo riníʼcabe ni. Peru lu stale diidxaʼ gastiʼ ti lá ni guiníʼ cásipeʼ na ca diidxaʼ hebreu o griegu ca. Nga runi, lu Traducción del Nuevo Mundo sicaríʼ bicaacabe ni diidxastiá: «Seol» ne «Hades» lu ca nota stini. Yanna, xi riníʼ cani yaʼ. Guidúʼyanu ximodo riquiiñecabe cani lu caadxi textu stiʼ Biblia.

Eclesiastés 9:10 na: «Ndaaniʼ baʼ [o «Seol», casi na nota] ra cheluʼ ca maʼ qué zúniluʼ dxiiñaʼ, maʼ qué zanda guiníʼ íqueluʼ xi gúniluʼ, maʼ gastiʼ zánnaluʼ ne maʼ qué zácaluʼ binni nuu xpiaaniʼ». Ñee Seol nga cada baʼ ra rigaachiʼ binni la? Coʼ. Ora caníʼ Biblia ra igaachiʼ ti binni si la? qué riquiiñeʼ ni diidxaʼ scheʼóhl nin háides, sínuque riquiiñeʼ ni gadxé diidxaʼ hebreu ne gadxé diidxaʼ griegu (Génesis 23:7-9; Mateo 28:1). Seol ca cadi ti lugar ra rucaachicabe gueʼtuʼ ni, casi ti pantión o ti baʼ ra rigaachiʼ stale binni (Génesis 49:30, 31).

Yanna, xii nga caníʼ Stiidxaʼ Dios ora ruzeeteʼ de «Seol» o «Hades» yaʼ. Nga nga lugar jma naroʼbaʼ que ti baʼ ra rucaachicabe stale gueʼtuʼ. Casi riníʼ Isaías 5:14, naca ni ti lugar nabé «nalaga» ne «maʼ bixeleʼ ndaga ruaa [ni] dede biaʼ ra qué zanda». Zanda guininu maʼ stale gueʼtuʼ gubi ni ne racaláʼdxiruʼ ni jma (Proverbios 30:15, 16). Ca pantión ca maʼ gadxé cani purtiʼ rirá lugar ndaaniʼ cani peru baʼ ca qué ridxá diʼ ni (Proverbios 27:20). Seol o Hades ca qué ridxá ni ne qué gapa ni paraa guiluxe ni. Nga runi, cadi ti lugar ra zanda guidúʼyanu ni. Laani nga baʼ ra rigaachiʼ binni ne laaca laani nga zeeda gaca ni ra gaʼchiʼ stale binni ni caziilaʼdxiʼ lu guendaguti.

Ora gánnanu xi rusiidiʼ Biblia de dxi guiasa gueʼtuʼ la? jma riénenu xii nga Seol o Hades. Stiidxaʼ Dios na zabani ca gueʼtuʼ ni nuu racá sti biaje (Job 14:13; Hechos 2:31; Apocalipsis 20:13).a Biblia laaca riníʼ racá nuu cani biʼniʼ ni na Jiobá ne stale tu qué ñuni ni nabe (Génesis 37:35; Salmo 55:15). Nga runi, Stiidxaʼ Dios na dxandipeʼ zadxiña dxi «zusibani Dios gueʼtuʼ, cásica ni nachaʼhui zaqueca ni cadi nachaʼhuiʼ» (Hechos 24:15).

XIMODO ruxuíʼluluʼ zaca dxi cuidxi Dios cuenta binni yaʼ. Stale tu na zadxiña binni tobi pur tobi ra nuu trono stiʼ Dios ti gaca juzgar. Ne laaca riníʼ íquecabe ziuu tu zacaa ti guendanabani sicarú guibáʼ ne nuu tu zacaná dxi ne gueelaʼ. Peru cadi zacá diʼ nga na Biblia chigaca dxi cuídxibe cuenta binni: qué zaca ni ti dxi para guidxibi binni, sínuque ti dxi guiecheʼ binni ne dxi gaca chaahuiʼ guiráʼ cosa.

Lu Apocalipsis 20:11, 12, caníʼ apóstol Juan ximodo chigaca dxi cuídxibe cuenta binni: «De raqué biiya ti trono roʼ naquichi bé, ne biiya zuba Dios lú ni. Bixele guidxilayú ne ibáʼ de ra nuu be, ne ma gasti lugar ra ñaana caʼ. Biiya zuhuaa cani ma guti nezalú Dios, cani risaca ne cani qué risaca. Ne bixele caadxi libru, ne laca bixele libru de enda nabani. Ne guridxi be cuenta cani ma guti, casi cá lu libru que ni biʼni caʼ».

Jiobá nga Juez ni nuu lu guidubi naca Guidxilayú. Peru dxiiñaʼ de gaca juzgar ca maʼ bidiibe ni sti binni. Apóstol Pablu guníʼ xi chiguni Dios lu Hechos 17:31: «Ma gudixhe be ti dxi cuidxi be cuenta laacaʼ. Ma ulí be tobi hombre guni ni, ne zuni ni jneza». Ne Juez ca nga Jesucristu ni maʼ biasa lade gueʼtuʼ (Juan 5:22). Peru, padxí guzulú cuídxibe cuenta binni ne pabiáʼ zandaa ni yaʼ.

Lu libru stiʼ Apocalipsis caníʼ zabídxibe cuenta binni tiidiʼ si Armagedón ni chigunitilú ca xpinni Binidxabaʼ (Apocalipsis