Guiranu zanda gacanenu gaca binni xpinni Cristu
1 Para ganda gaca ti binni xpinni Cristu la? caquiiñeʼ chuʼ chupa chonna binni gacané laa. Jiobá zanda iquiiñeʼ guiráʼ cani runi ni na ti ganda gacanecaʼ binni cayuundaʼ Biblia guiziidiʼ jma de laabe (1 Cor. 3:6-9). Cásica racanenu laacabe ora ricábinu lu ca guendaridagulisaa ca la? laaca racanenu laacabe ora gúninu guiráʼ ni rizíʼdinu purtiʼ zacá zuuyacabe nápanu espíritu stiʼ Dios (Juan 13:35; Gál. 5:22, 23; Efe. 4:22, 23). Xiruʼ zanda gúninu para gacanenu cani nacubi cayuu ndaaniʼ xquidxi Dios.
2 Guiráʼ ca binni ridagulisaa. Guiranu zanda gusihuínninu cayechenenu ca binni ni cayé ca guendaridagulisaa stinu pa gudíʼnanu ne guinínenu laacabe ante guzulú guendaridagulisaa ca o guiluxe si ni. Guidúʼyanu ni guníʼ ti señor dxi guyé primé biaje tobi de ca guendaridagulisaa stiʼ ca testigu stiʼ Jiobá. Laabe guniʼbe: «Ti dxi si binebiaʼyaʼ stale binni ni bisihuínnicaʼ dxandipeʼ nadxiicaʼ naa, ne ca binni de religión stinneʼ, ra biniiseʼ nin qué ñannaxhiicaʼ naa, peru ca binni riʼ bisihuínnicaʼ ni neca qué runibiaʼcaʼ naa. Raqué bidiéʼ cuenta maʼ bidxelaʼ religión ni rusiidiʼ ni dxandíʼ». Gudiʼdiʼ si gadxe beeu de guyé señor riʼ primé guendaridagulisaa que guyuu nisa.
3 Pa gúʼyaluʼ cayuni binni ni caziidiʼ ca guiráʼ ni cá lu Biblia, guluu gana laabe. Ñee cayuni huantarbe burla stiʼ ca binni ni qué náʼ guiziidibe de lu Biblia la? Ñee qué riaadxabe nin ti guendaridagulisaa la? Ñee bíʼnibe stipa para gunda bicábibe lu ti guendaridagulisaa la? Ñee maʼ rudiibe libana lu Scuela stiʼ Cani Rucheeche Diidxaʼ o maʼ rireebe chigucheechebe diidxaʼ la? Guluu gana laabe, purtiʼ nga zacané laabe ne qué zusaanadibe de gúnibe ni (Pro. 25:11).
4 Para cani ruundané binni. Nuu tiru cani rucheeche diidxaʼ ca rinábacabe stobi chiné laacabe chiguundanécabe ti binni, ti gunibiáʼ binni ca chupa chonna de ca bíʼchinu ne bizáʼnanu. Cadi cuézaluʼ tiidiʼ stale dxi para guni invitarluʼ ni cayuundaneluʼ ca cheʼ ca guendaridagulisaa ni rápanu. Ne ora maʼ riebe la? yené laabe gunibiaʼbe xcaadxi bíʼchinu ne bizáʼnanu ni ridagulisaanenu. Ñee cudxiilube para gusaanabe ti viciu, casi cúbabe gueza la? Ñee nuu ti binnilídxibe ni qué náʼ gúʼndabe Biblia la? Laaca zanda guiníʼnebe ti ni rucheeche diidxaʼ ni maʼ gudiʼdiʼ lu ca guendanagana ni cadíʼdibe ca ti cuʼ gana laabe para gudxiilube ni (1 Ped. 5:9).
5 Cani nacubi cayuu ndaaniʼ xquidxi Dios caquiiñecaʼ gacané ca binni ridagulisaa laacaʼ. Guiranu zanda gacanenu laacabe gúnicabe ni caziidicabe pa uguʼnu gana laacabe.