Guniʼné binni stiidxaʼ Dios sin guidxíbiluʼ
1 Ñee ridxíbiluʼ nuu tiru guiniʼluʼ de cani runi creluʼ ora nuuluʼ ra scuela o ra ruʼnuʼ dxiiñaʼ la? Ñee raca nagana para lii guiníʼneluʼ ca binnilídxiluʼ, xpesínuluʼ o sti binni ni qué runibiaʼluʼ de stiidxaʼ Dios la? Xi zanda gacané lii para guiníʼneluʼ binni de stiidxaʼ Dios ora tiica si ne cadi guidxíbiluʼ yaʼ (Fili. 1:14).
2 Cadi guidxíbiluʼ. Xi ñúniluʼ pa málasi ñunadiágaluʼ caníʼcabe mal de tuuxa ni jma xhamíguluʼ o ti binnilídxiluʼ. Ñee cadi ñábiluʼ binni ca nusaana de niníʼ mal de laabe la? Jiobá nga ni jma xhamígunu. Ne pur stale iza huaníʼcabe mal de laabe ne laanu nápanu ti dxiiñaʼ nabé risaca para gusihuínninu ximódopeʼ laabe (Isa. 43:10-12). Pa dxandipeʼ nadxiinu Jiobá, qué zusaananu de guinínenu binni de Stiidxabe ne qué zadxíbinu guininu ximódopeʼ laabe (Hech. 4:26, 29, 31).
3 Bietenalaʼdxiʼ, ca diidxaʼ ni rinínenu binni nacubi ne galán cani. Cani gucaadiaga ca diidxaʼ riʼ zacaacaʼ stale ndaayaʼ ni qué zaluxe. Pa gusisácanu ca diidxaʼ ni rucheechenu, qué zadxíbinu binni ora gábinu laacaʼ xiná stiidxaʼ Dios, neca gucaalucaʼ o sanándacaʼ laanu.
4 Ni biʼniʼ xcaadxi binni. Ora guidúʼndanu ni biʼniʼ caadxi xpinni Jiobá ora bicheechecaʼ Stiidxabe ne qué nidxíbicaʼ la? racanécani laanu gúninu cásica bíʼnicabe. Casi Enoc, laa guníʼ zunitilú Dios ca binni que purtiʼ cayúnicaʼ ni cadi jneza (Judas 14, 15). Noé qué nusaana de nucheeche diidxaʼ, neca guirutiʼ nucaadiaga laa (Mat. 24:37-39). Ca primé xpinni Cristu ni bibani lu primé siglu que bicheechecaʼ diidxaʼ ne stale gana neca «huaxiéʼ [gu]pa ca scuela ne iruti [ña]ca ca» ne guzananda binni laacaʼ (Hech. 4:13, 18-20). Lu ca revista La Atalaya ne ¡Despertad! ni ricaanu, stale biaje reeda ni bizaaca caadxi xpinni Cristu de ca dxi stinu riʼ. Nuu de laacabe bidxíbicabe niníʼnecabe binni de Stiidxaʼ Dios, peru biʼniʼ crécabe zanda gacané Jiobá laacabe ngue runi bicheechecabe Stiidxaʼ Dios ne stale gana.
5 Ora guidúʼndanu ximodo bidxagalú ca xpinni Dios ni bibani dxiqué ca guendanagana sticaʼ la? rudiicani laanu stipa (1 Rey. 19:2, 3; Mar. 14:66-71). Cumu gucané Dios laacabe la? gunda bicheechecabe diidxaʼ ne qué nidxíbicabe. Pa gunda bíʼnicabe ni la? laanu laaca zanda gúninu ni (1 Tes. 2:2).