Gucané cani ruundaneluʼ Biblia ti gucheechecaʼ diidxaʼ
1 Dxiiñaʼ ni bidii Jesús ca discípulo stiʼ ni cá lu Mateo 28:19, 20, naquiiñeʼ gácani lu guidubi naca guidxilayú. Jesús gudxi laacabe gacanécabe binni sanándacaʼ laabe, ti ca binni riʼ gacanecaʼ xcaadxi binni. Modo biʼniʼ ca discípulo que bisihuínnini xi naquiiñeʼ guni ca xpinni Cristu ca últimu dxi riʼ ti ganda gusiidicaʼ guiráʼ xixé binni ni nuu lu guidxilayú riʼ (Mat. 24:14).
2 Zanda gusíʼdinu ca xiiñinu ne xcaadxi binni ni riuulaʼdxiʼ guiziidiʼ ni cá lu Biblia. Ne racaláʼdxinu gacanenu laacabe gúnicabe dxiiñaʼ stícabe: gusiidicabe xcaadxi binni gácacaʼ xpinni Cristu (Luc. 6:40).
3 Bisiidiʼ laacabe para gucheechecabe diidxaʼ. Naquiiñeʼ cuʼnu gana cani cayuundanenu para guiníʼnecaʼ xcaadxi binni de ni caziidicaʼ. Guniʼné laacabe de ni huabeendunu ora maʼ canagucheecheluʼ diidxaʼ ti cuʼ ni gana laacabe gúnicabe ni. Gucané ca xiiñiluʼ gucheechecaʼ diidxaʼ biaʼ ganda gúnicaʼ ni, neca nahuiinicaʼ (Sal. 148:12, 13). Bisihuinni nabé rusisácaluʼ gucheecheluʼ diidxaʼ pur ca diidxaʼ ni guiniʼluʼ ne ra gúʼyacabe lii cayúniluʼ ni (1 Tim. 1:12).
4 Jiobá riquiiñeʼ ca binni si ni ruzuubaʼ stiidxaʼ para gúnicaʼ dxiiñaʼ stibe. Dxandíʼ, ti binni ni nacubi chiguzulú gucheeche diidxaʼ, zándaca qué gánnapeʼ gúnini casi runi ti binni ni maʼ bidii laa Dios, maʼ guyuunisa ne maʼ xadxí rucheeche diidxaʼ, peru naquiiñeʼ gánnabe cani jma rusiidiʼ Biblia ne gánnabe gusiénebe cani (biiyaʼ ni rizaané Xhiiñaʼ Reinu ni Rúninu 12/06 yaza 3 ne 4). Para ganda gucheeche binni ca diidxaʼ la? naquiiñeʼ gusaanabe religión ni qué rusiidiʼ ni dxandíʼ, maʼ cadi naquiiñeʼ chuʼbe lu política ne cadi naquiiñeʼ guiaadxabe ca guendaridagulisaa ca (Apo. 18:2, 4; Juan 17:16; Heb. 10:24, 25).
5 Ora lii gúʼyaluʼ maʼ zanda gucheeche tobi de cani ruundaneluʼ Biblia diidxaʼ la? guniʼné binnigola ni rapa guiráʼ stiʼ ca binni ridagulisaa. Laabe zábibe chupa binnigola cuinecaʼ lii ne ni cayuundaneluʼ Biblia ca, ti gúʼyacaʼ pa zanda gaca binni ca ti ni rucheeche diidxaʼ ni caʼruʼ chuʼ nisa ndaaniʼ neza binni ridagulisaa ca. Despué la? ra chigucheecheneluʼ laabe diidxaʼ zanda gusiidiluʼ laabe ximodo gúnibe ni jma jneza.