Carta stiʼ Grupu Ni Zaniruʼ
Bicheʼ ne bizánacaʼ:
Apóstol Pablu qué nusaana de nusihuinni pabiáʼ nadxii ne rudii xquíxepeʼ ca biʼchiʼ ne bizaʼnaʼ. Ti biaje bicaabe ca diidxaʼ riʼ ra nuu ca xpinni Cristu de Roma, nabe: «Racaladxe inié nia Jesucristu udii [...] xquixe Dios pur irá tu, purti irá ladu ma cuzeete cabe pabiáʼ napa tu fe» (Rom. 1:8). Ca xpinni Cristu de primé siglu nabé binibiáʼcabe laacaʼ ndaaniʼ guidxi Roma pur fe sticaʼ ne purtiʼ qué nusaanacaʼ de nucheechecaʼ diidxaʼ ne stale gana (1 Tes. 1:8). Ngue runi, nabé gunnaxhii Pablu laacabe.
Laadu laaca qué rusaanadu de gudiʼdu xquíxepeʼ Jiobá pur laatu cásica biʼniʼ Pablu. Racaláʼdxidu gánnatu nabé nadxiidu laatu. Ne laganna nadxii Jiobá cada tobi de laatu. Purtiʼ neca nuu caadxi de laatu canazanándacabe la? cadi cusaanacaʼ de gucheechecaʼ diidxaʼ. ¡Nanna pabiáʼ riecheʼ Jiobá guʼyaʼ cayúnitu ni na ne guendanadxibalú ne stale gana yaʼ! (Pro. 27:11.)
Ora gúʼndatu guiráʼ cosa sicarú zeeda lu Anuario stiʼ iza 2008 zaguidxi fe stitu. Ne ora gúʼndatu ndaa ra na: «Ni cayuni ca testigu stiʼ Jiobá ca dxi stinu riʼ» laguiníʼ ique de laani. Lu ndaa diʼ cusiéneni maʼ biree Jesucristu dxiʼbaʼ ti maniʼ «zitixhe dxí cani ucaa lú laa», ne lu ndaa ca laaca zuuyatu intiica guiibaʼ iquiiñeʼ ca xhenemigu Dios para gucaalú ca xpínnibe qué zabeendú diʼ gastiʼ (Apo. 6:2; Isa. 54:17).
Pablu laaca bicaa ra nuu ca xpinni Cristu de Filipo: «Nabé rudiee [...]xquixe Dios [...] purti dede dxi bizulú bini cre tu qué huayaana dxí tu de acané tu naa ra canayué stiidxa Cristu» (Fili. 1:3-5). Laadu, Grupu ni Zaniruʼ, zanda guinidu laaca zacaca cayúnitu. Lu dxiiñaʼ guca iza 2007 riʼ, 6,691,790 ni rucheeche diidxaʼ bíʼnicaʼ 1,431,761,554 hora ra bicheechecaʼ diidxaʼ lu 236 guidxi. ¡Nabé cayacanetu laadu para guireeche diidxaʼ iza riʼ! Laguiníʼ ique pabiáʼ stale binni nga huabeendú ni galán lu dxiiñaʼ cayúninu riʼ, ne zacá cusisácanu Jiobá.
Lu carta bicaa Pablu ra nuu ca xpinni Cristu de Tesalónica, bisihuínnibe nuube xizaa pur laacaʼ, ne sicaríʼ gúdxibe laacaʼ: «Runi tu xhiiña Dios [...] ne [runi huantartu purtiʼ] qué huasaana tu de icá lú tu Jesucristu Señor stinu. Ne irá nga ruzeʼte du lu Dios ora riní né du laa» (1 Tes. 1:2, 3). Zacá ni, lu xquendanabáninu la? rápanu guendanagana, peru naquiiñeʼ guni huantarnu. Casi xi guendanagana rápaluʼ yaʼ. Ñee riuuluʼ triste purtiʼ rucueeza xiixa guendahuará lii de guʼnuʼ xhiiñaʼ Jiobá biaʼ bíʼniluʼ dxiqué la? Ñee maʼ guti xheelaluʼ la? (Pro. 30:15, 16.) Ñee caʼruʼ guichaganaluʼ purtiʼ caʼruʼ guidxeʼluʼ tobi ni nuu ndaaniʼ xquidxi Jiobá, peru neca zacá, zinándaluʼ conseju stiʼ Biblia ra na guichaganáʼ ca xpinni Cristu ndaaniʼ xquidxi Dios la? (1 Cor. 7:39.) Ñee raca nagana para lii gusiniisiluʼ ca xiiñiluʼ purtiʼ huaxiéʼ bueltu napuʼ la? Intiica guendanagana nápatu, bicheʼ ne bizánacaʼ, laganna pa guyúbitu Reinu primeru lu xquendanabánitu la? «qué zusiaanda[be] irá enda nachaʼhui ni huayuni tu ca xpinni[be] purti nadxii tu laa[be]». Nga runi, rinábadu laatu cadi gusaanatu de «guni [tu ni] jneza» (Heb. 6:10; Gál. 6:9).
Yanna, xi zacané laatu guni huantartu yaʼ. Cásica ca xpinni Cristu de Tesalónica que, ni gucané laacabe nga qué nusaanacabe de nicá lúcabe «Jesucristu Señor stinu», ne ngaca nga ni zacané laatu. Ngue runi, ora guníʼ Pablu «guietenalaʼdxi nu ma bilá nu» la? nabe zeeda gácani casi ti cascu ni rapa xquendabiaaniʼ ca xpinni Cristu ti cadi guiníʼ íquecaʼ ni cadi jneza ne guzuhuaa dxiichicaʼ lu ni runi crecaʼ (1 Tes. 5:8).
Pa nayecheʼ riuutu ora guni huantartu la? zusihuínnitu cadi dxandíʼ diʼ ni na Binidxabaʼ dxi guníʼ cadi jneza runi mandar Jiobá. Laabe nabe cani runi ni na Jiobá ruyúbicaʼ puru si para laacaʼ, ne nécapeʼ rúnicaʼ ni na Dios, pa gápacaʼ xiixa guendanagana o gúʼyacaʼ candaa para gueeda dxi stiʼ Jiobá la? zusaanacaʼ de gúnicaʼ ni nabe. ¡Laasitu nga zanda guluiʼtu pabiáʼ rusiguii Binidxabaʼ! Ne zeʼ dxi jma mayaca gaca ni cabézatu.
Cásica Pablu guluu gana ca biʼchiʼ ne bizaʼnaʼ pur biʼniʼ huantarcaʼ, pur fe sticaʼ ne pur bicheechecaʼ diidxaʼ la? laadu laaca riguʼdu gana laatu, ne laganna nadxiidu laatu. ¡Cadi gusaana de gúnitu dxiiñaʼ ca casi maca cayúnitu ni!
Ribézadu cuʼ ndaayaʼ Jiobá laatu iza riʼ. Laganna nadxiidu laatu de guidubi ladxidoʼdo.
Ca bíʼchitu,
Grupu ni Zaniruʼ stiʼ ca Testigu stiʼ Jiobá