Bisiidiʼ cani nacubi ca gánnacaʼ xi gúnicaʼ ora gucaalúcabe laacaʼ
1 Ora guzulú binni guʼndaʼ Biblia ne gacalaʼdxiʼ guibani modo nani la? óraca nga jma rucaalú Binidxabaʼ laa (2 Tim. 3:12). Zándaca zucaalú cani runinebe dxiiñaʼ laabe, cani rinebe scuela o ca xpesínube. Peru jma nagana rácani ora ca binnilídxipebe gabi laabe xiixa ni cuee gana laabe guiziidibe de Dios, purtiʼ riníʼ íquecaʼ zacá nga cayacanecaʼ laabe (Mat. 10:21; Mar. 3:21).
2 Maca cá zácani. Cani nacubi caziidiʼ de Dios ca naquiiñeʼ gánnacaʼ ziuu tu zucaalú laacaʼ. Ne laaca naquiiñeʼ gánnacabe rihuinni maʼ cayácacabe discípulo stiʼ Cristu nga ora chuʼ tu gucaalú laacabe (Juan 15:20). Nuu biaje rucaalú binni laanu purtiʼ runadiágacaʼ riníʼ xcaadxi stale cosa ni cadi jneza de ca testigu stiʼ Jiobá. Peru intiica cosa guni binni, bisietenalaʼdxiʼ laacabe riuʼnu nayecheʼ ora runiná binni laanu purtiʼ zinándanu Jesús ne pur ruzúʼbanu stiidxaʼ Dios (Hech. 5:27-29, 40, 41). Gudxi laacabe qué zusaana Bixhózenu ni nuu guibáʼ de gacané laacabe (Sal. 27:10; Mar. 10:29, 30). Naquiiñeʼ gánnacabe ndiʼ, pa qué gucheecabe la? zusihuínnicabe Jiobá si nga napa derechu guni mandar guibáʼ ne Guidxilayú (Pro. 27:11).
3 Risácapeʼ nga guiziidiʼ chaahuibe. Naquiiñepeʼ ganna binni ni cayuundaneluʼ ca pabiáʼ nga risaca guiziidiʼ chaahuibe de Dios neca guidxagalube intiica guendanagana. Binidxabaʼ riquiiñeʼ ca guendanagana ca para cuee gana binni ti cadi guicaa xcu ni caziidiʼ de Dios ndaaniʼ ladxidóʼ (Pro. 4:23; Luc. 8:13). Nga runi, cadi naquiiñeʼ gusaanabe de guiziidibe ni cá lu Stiidxaʼ Dios para guzuhuaabe dxiichiʼ lu ni runi crebe (Sal. 1:2, 3; Col. 2:6, 7).
4 Caquiiñeʼ guni huantarbe. Lu intiica guendanagana gápanu riquiiñeʼ guni huantarnu, peru ora maʼ gudiʼdiʼ ni la? ribeendunu ni galán (Luc. 21:16-19). Cadi cani nacubi si ni runi huantar nga ribeendú ni galán, sínuque ne xcaadxi binni, purtiʼ ruuyacabe pabiáʼ riguu Jiobá ndaayaʼ ca xpinni ni qué rucheené laabe (Sant. 1:12).
5 Apóstol Pablu biecheʼ ora biiyaʼ pabiáʼ caniisi ca xpinni Cristu ni guyuu Tesalónica que lu stiidxaʼ Dios. Stale de ca binni que laabe bisiidibe laacaʼ, ne bidiibe xquíxepeʼ Jiobá pur laacaʼ (2 Tes. 1:3-5). Laanu laaca zanda guiéchenu ne guidxá tipa ladxidoʼno pa gusíʼdinu cani cayúʼndanenu guni huantarcaʼ ora gucaalúcabe laacaʼ.