Cadi gusaanananu de gúninu xhiiñaʼ Reinu
1. Xi huabeendú cani rié ca lugar ra huaxiéʼ si tu rucheeche diidxaʼ.
1 Lu guidubi guidxi Méjicu maʼ napa iza de careeche diidxaʼ ca lugar ra qué runi tender nin ti neza binni ridagulisaa o ca lugar ra nuu si biaje rireeche diidxaʼ. Zacá huayanda huadxélacabe binni ni riuulaʼdxiʼ guiziidiʼ jma de Dios ne rihuinni zándaca gueeda gácacaʼ xpinni Cristu despué. Stale de cani maʼ yegucheeche diidxaʼ ca lugar ca runi sentircaʼ jma maʼ riuuláʼdxicaʼ gucheechecaʼ diidxaʼ. Ñee maʼ guníʼ íqueluʼ pa zanda cheluʼ o chineluʼ ca binnilídxiluʼ neca ti tiempuhuiiniʼ si lu ti iza ca lugar riʼ la?
2. Xi guiráʼ runi cani riucheeche diidxaʼ ca lugar nuu zitu.
2 Nuu de ca lugar riʼ gastiʼ nin ti neza binni ridagulisaa para gucheeche diidxaʼ o nuu tiru qué randa diʼ runi tendércabe ni purtiʼ qué gápacabe modo gúnicabe ni. Nga runi ruyúbicabe xcaadxi ni rucheeche diidxaʼ ne precursor para chigacanecaʼ ca lugar riʼ, ne guizáʼ riéchecaʼ iquiiñecaʼ tiempu ne stipa sticaʼ para gúnicaʼ dxiiñaʼ riʼ. Laca laacabe nga riguíxecabe pasaje stícabe, ra guiaanacabe ne ni gócabe. Peru, pa nuu modo zanda gacané ca neza binni ridagulisaa ni nuu gaxha laacabe la? zudiicaʼ ni iquiiñecabe ne dede zucheechenecaʼ laacabe diidxaʼ (Pro. 3:27-29).
3. 1) Xi huabeendú cani rucheeche diidxaʼ ora riecaʼ ca lugar ra qué runi tender nin ti neza binni ridagulisaa. 2) Ximodo zanda guinínenu guiráʼ binni ni nuu ra caber laanu (biiyaʼ cuadru ca).
3 Ora rireeche diidxaʼ ca lugar ra qué runi tender ti neza binni ridagulisaa o ca lugar ra nuu si biaje rucheechecabe diidxaʼ la? huayacaneni para guihuinni gunáʼ nga ca lugar ra qué runi tender nin ti neza binni ridagulisaa. Pur dxiiñaʼ ni cayaca riʼ huadii caadxi neza binni ridagulisaa cuenta nuu lugar ra maʼ careeche diidxaʼ peru lu ca guiʼchiʼ napa Betel na guirutiʼ runi tender ca lugar ca. Neca zacá, nuu neza binni ridagulisaa rudiicaʼ lugar gacané ca grupu ni rié ca lugar riʼ laacaʼ, zacá jma nagueenda rucheechecabe diidxaʼ ra raca caber laacabe. O laaca zanda guseendaʼ Betel grupu ca ra nuu xcaadxi neza binni ridagulisaa ni nuu gaxha de ra yendácabe ni caquiiñeʼ gacanécabe laacaʼ.
4. Xi para nga rúninu stipa para chuunu ca lugar ra huaxiéʼ rireeche diidxaʼ.
4 Laaca nuu neza binni ridagulisaa ni napa stale lugar ra gucheechecaʼ diidxaʼ ne rápacaʼ gana chuʼ tu gacané laacaʼ. Pa guinábacabe ni la? Betel zanda guseendaʼ ti grupu ni gacané laacabe neca ti biaje lu ti iza. Stipa ni guni ca grupu riʼ ne ca neza binni ridagulisaa ni nuu ra chindácabe, zacaneni para ganna guiráʼ binni ca diidxaʼ nacubi ne galán riʼ ratiica nuucaʼ. Pa qué gusaanananu de gúninu xhiiñaʼ Reinu la? zedandá dxi guininu ca diidxaʼ guníʼ apóstol Pablu riʼ: «Ma qué gapa ra gune dxiiña ladu riʼ» (Rom. 15:23).
5. Ximodo huayacané ca grupu ne ca binni ridagulisaa ca para guiziidiʼ jma binni de Dios.
5 Stale tu qué huasaananáʼ de guni dxiiñaʼ riʼ ca lugar ca neca maʼ bizaa tiempu gudíxhecaʼ para gúnicaʼ ni (Ecl. 11:6). Cani guyuu lu tobi de ca grupu riʼ guniʼcaʼ gudixhe ique neza binni ridagulisaa ra nuucaʼ chigacané lugar que dede ora guzulú ti neza binni ridagulisaa raqué. Ngue runi, biseendacabe precursor lugar que para gacanecaʼ raqué dede ora ugaandacabe ni gudixhe íquecabe que. Ne nuu de cani rucheeche diidxaʼ racanecaʼ binni ni nabeza zitu para guiziidicaʼ gúʼndacaʼ ne guiénecaʼ stúbicaʼ ca libru ne ca revista ni rudii xquidxi Jiobá. Pa gúninu zacá ne guyúbinu xcaadxi modo gúninu xhiiñaʼ Reinu la? zanda gacanenu jma binni guni adorarcaʼ Jiobá.
[Box on page 6]
XIMODO ZANDA GUCHEECHENU DIIDXAʼ GUIDUBI RA RACA CABER LAANU
▪ Naquiiñeʼ gannuʼ paraa nga raca caber gucheecheluʼ diidxaʼ, ti cadi chuʼluʼ ra chiguni xcaadxi xpinni Cristu dxiiñaʼ.
▪ Biquiiñeʼ guiʼchiʼ ni láʼ Sírvase visitar (S-43-S) para gucaaluʼ lá ca binni ni riníʼ sti diidxaʼ, ne cani qué runadiaga. Zacá zanda gacaneluʼ para gapa ca binni ridagulisaa ni riníʼ sti diidxaʼ ra gúnicaʼ dxiiñaʼ.
▪ Pa raʼbuʼ zanda la? gudixhe ique gucheecheluʼ diidxaʼ ca lugar ra qué runi tender nin ti neza binni ridagulisaa o ca lugar ra nuu si biaje rireeche diidxaʼ.