Tobi de laacani nga ejemplu stiʼ Ittai de guidxi Gat.

Ti hombre ni yendeza guidxi Israel

Ittai guca ti hombre ni nabé nanna tinde, ruluíʼ si de guidxi Gat laabe, guidxi ra gule Goliat ne xcaadxi hombre malu ni gúcacaʼ xhenemigu guidxi Israel. Ittai ne 600 hombre stiʼ bixooñecaʼ de xquídxicaʼ ne yendézacaʼ gaxha de Jerusalén. Lá hombre ca málasi rieeteʼ ni lu historia stiʼ David dxi bixooñeʼ de xquidxi purtiʼ bicaalú Absalón xiiñiʼ laa.

David gunna ximodo nuu Ittai ne ca hombre stiʼ, ne zándaca bietenaláʼdxibe dxi bixooñebe ne 600 hombre stibe para chigucachilúcabe Filistea ne guiaanacabe ra runi mandar Akís, rey stiʼ guidxi Gat (1 Sam. 27:2, 3). Xi guni Ittai ne ca xpinni yanna purtiʼ cucaalú Absalón rey David yaʼ. Ñee zacanécabe Absalón la? o David, o nin tobi de laacabe.

Para guicábinu ni gunabadiidxanu ca guidúʼyanu xi bizaaca dxi biree David de Jerusalén. Ra zireebe de guidxi que yendabe ti lugar ni láʼ Bet-merhaq, lá ca riniʼni «Yoo nuu Zitu». Ne ruluíʼ si lani zacá pur últimu yoo ni nuu ndaaniʼ guidxi Jerusalén ante chindá binni ra nuu ca dani stiʼ Cedrón neza zécabe lu dani Olivo (2 Sam. 15:17; nota). David biiyaʼ ximodo nuu ca hombre stiʼ laga cadíʼdicaʼ lade ca dani que. Cadi ca israelita si ni qué nusaana laabe nga nuu lade ca hombre ca, sínuque laaca nuu ca keretita ne ca peletita. Peru Ittai nga sti hombre ni qué nusaana laabe ne 600 hombre stiʼ (2 Sam. 15:18).

Rey David nanna laaca cadiʼdiʼ Ittai lu guendanagana purtiʼ bixooñeʼ de xquidxi, ngue runi gúdxibe laa: «Xiñee chineluʼ laadu yaʼ. Bibiguetaʼ ne guleza ra nuu rey ca [Absalón nga caniʼbe raríʼ]; purtiʼ de gadxé guidxi lii, ne cuxooñeluʼ de xquídxiluʼ. Neegueʼ nga beedandaluʼ, ne yannadxí maʼ guxooñelúneluʼ laadu ratiica chaa ne ora chaa la? ¡Bibiguetaʼ ne yené ca bíʼchiluʼ, ne gaca Jiobá nachaʼhuiʼ ne lii ne guni cré lii!» (2 Sam. 15:19, 20).

Ittai bisihuinni qué zusaana David ora guníʼ ca diidxaʼ riʼ: «¡Cásipeʼ nuu Jiobá Dios ni cayuuyaʼ naa ne señor rey stinneʼ la? ra cheʼ señor rey stinneʼ ca laaca zie siervu stiluʼ neca gati o guibani!» (2 Sam. 15:21). Zándaca ora binadiaga David ni guníʼ Ittai ca bietenaláʼdxibe ca diidxaʼ ni guníʼ Rut, jñaa bida bixhózebe (Rut 1:16, 17). Ni guníʼ Ittai ca yendá ni ladxidóʼ David, ngue runi gudxi laabe: «Guyé ne gudiʼdiʼ [ca dani stiʼ Cedrón]». Lu historia ca na «gudiʼdiʼ Ittai guitita que lade ca dani que, ne zaqueca ca xpinni ne guiráʼ cani nahuiiniʼ nuuné laa» (2 Sam. 15:22).

«Para usiidi laanu»

Romanos 15:4 na: «Irá ni ucuá lu Xquiʼchi Dios ucuá para usiidi laanu». Xi rusiidiʼ ejemplu stiʼ Ittai laanu yaʼ. Guiníʼ íquenu xiñee gucanebe David ne qué nusaabe laa. Neca filisteu laabe ne bixooñebe de xquídxibe bidiibe cuenta Jiobá nga ti Dios ni nabani ne laa nga gulí David. Ittai qué niníʼ ique diʼ pa xhenemigu ca filisteu ca israelita. Ne qué niníʼ íquebe David ngue biiti Goliat ne xcaadxi binni xquídxibe (1 Sam. 18:6, 7). Ittai biiyaʼ pabiáʼ nadxii David Jiobá ne pabiáʼ galán ca guenda ni nápabe. Pur nga guyuulaʼdxiʼ David modo laabe, ne bisaana lu nabe ti grupu de ca xpinni para gucaalucaʼ ca xpinni Absalón (2 Sam. 18:2).

Yanna riʼ laaca naquiiñeʼ gúninu stipa para cadi gúninu menu binni ne cadi guni juzgarnu laacaʼ purtiʼ si gadxé costumbre nápacaʼ, gadxé raza laacaʼ ne gadxé guidxi laacaʼ. Modo guca xhamigu David Ittai rusiidiʼ ni laanu pa gunibiaʼnu ne gannaxhiinu Jiobá la? zanda gúninu ni maʼ guninu ca.

Ora guidúʼndanu ni biʼniʼ Ittai ca, jneza guiníʼ íquenu sicaríʼ: «Ñee laaca qué zusaanaʼ Jesucristu, David ni jma risaca la? Ñee zucheecheʼ diidxaʼ ne stale gana ne zacaniáʼ binni gaca xpinni Cristu ti gusihuinneʼ qué zusaanaʼ laabe la?» (Mat. 24:14; 28:19, 20). «Xi guiráʼ racalaʼdxeʼ guneʼ para gusihuinneʼ qué zusaanaʼ Jesucristu yaʼ».

Ca hombre ni maʼ napa binnilidxi laaca zanda guiníʼ íquecaʼ ejemplu stiʼ Ittai ne chinándacaʼ ni. Pur ni bidii stiidxaʼ guitita que rey ni gulí Jiobá que ne pur yenándabe rey que la? bicaabe ca xpínnibe guni casi bíʼnibe. Zacaca nga raca ora quixhe ique ti hombre guni ni na Jiobá, binnilídxibe laaca runi ni gúnibe. Neca zadíʼdibe lu guendanagana pur ni gudixhe íquebe gúnibe la? cadi naquiiñeʼ gusiaandabe ca diidxaʼ cá lu Biblia riʼ: «Ti binni ni qué rusaana [Jiobá] laaca qué zusaana[be] laa» (Sal. 18:25).

Ora bicaalú si Ittai Absalón nga rieeteʼ lu Biblia ne maʼ qué ruzeeteruʼ ni de laabe. Neca dxi si gudiʼdiʼ David lu guendanagana nga ruzeeteʼ Biblia laabe la? rusiidini laanu ximodo laabe. Ne pur guníʼ Dios guicá ejemplu stibe lu Biblia rihuinni pabiáʼ rusisaca Jiobá ne riguu ndaayaʼ ca xpinni ni qué rusaana laa (Heb. 6:10).

Xiñee naquiiñeʼ chinándanu Cristu

«Tu gacalaʼdxi gaca xpinne la? gusiaanda laca laa [...] ne gueda nanda naa.» (LUC. 9:23)

1, 2. Xiñee nabé risaca nga guidúʼyanu xi razón nápanu para chinándanu Cristu.

¡NABÉ riecheʼ Jiobá ora guʼyaʼ cani nahuiiniʼ ne cani maʼ huaniisi guzulucaʼ gúnicaʼ ni nabe! Pa nácaluʼ tobi de ca binni ni cayuni zacá la? cadi gusaanaluʼ de gúʼndaluʼ Biblia ne cheluʼ ca guendaridagulisaa ca, purtiʼ zacá zánnaluʼ cani rusiidiʼ Biblia de Dios. Ora maʼ bíʼniluʼ ca nga zanda guiníʼ ique chaahuiluʼ ca diidxaʼ guníʼ Jesús riʼ: «Tu gacalaʼdxi gaca xpinne la? gusiaanda laca laa, ne cadi lica guiá xpida sínuque usaana ni lu naya irá dxi ne gueda nanda naa» (Luc. 9:23). Ca diidxaʼ ni maʼ bidúʼndanu ca rusiidicani laanu naquiiñeʼ gusiáʼndanu laca laanu ne gácanu xpinni Cristu. Xiñee risaca gúninu nga yaʼ. Lu tema riʼ zadúʼyanu xiñee (Mat. 16:13-16).

² Yanna pa maʼ xadxí de zinándanu Cristu yaʼ. Jmaruʼ si naquiiñeʼ gúninu casi biʼniʼ Cristu (1 Tes. 4:1, 2). Neca maʼ xadxí de nácanu xpinni Cristu o nacubi bizulunu la? naquiiñeʼ guiníʼ íquenu xiñee zinándanu laabe. Purtiʼ ora gúninu zacá jmaruʼ si zusihuínninu zinándanu laabe lu guiráʼ ni gúninu, casi guníʼ Pablu que. Guidúʼyanu gaayuʼ razón.

Ziuʼnu jma gaxha de Dios

3. Xi chupa modo zanda gunibiaʼnu Dios.

³ Dxi guyé apóstol Pablu Atenas bizuhuaa galahuiʼ ti lugar láʼ Areópago ne guníʼ: «Gudixhe [Dios] pabiáʼ indaa cada raza ne paraa cueza caʼ. Gudixhe be irá binni ndaani guidxilayú para uyubi laabe casi ñaca zixubi ná ca dede idxela ca laabe, purti cadi zitu nuu