Dios racalaʼdxiʼ guibáninu sin gátinu, cadi chuʼ xiixa ni guchiiñaʼ laanu ne guibáninu nayecheʼ ndaaniʼ ti paraísu lu Guidxilayú.

Peru zándaca guiníʼ íqueluʼ: «Ximodo gaca nga yaʼ». Biblia na dxandíʼ zuni Reinu stiʼ Dios ni. Dios ni bizáʼ laanu racalaʼdxiʼ ganna guiráʼ xixé binni de Reinu ca ne xi naguixhe íquebe gúnibe para guiráʼ binni (Salmo 37:11, 29; Isaías 9:7).

Dios racalaʼdxiʼ chuʼnu galán.

Cásica racalaʼdxiʼ ti binni nachaʼhuiʼ chuʼ ca xiiñiʼ nazaaca la? zacaca racalaʼdxiʼ Bixhózenu ni nuu guibáʼ cadi gusaana de chuʼnu nayecheʼ (Isaías 48:17, 18). Laabe maʼ bidii stiidxabe: «Qué ziuu dxi initilú ni guni ni na Dios» (1 Juan 2:17).

Dios racalaʼdxiʼ sanu lu neza stiʼ.

Biblia na riuulaʼdxiʼ Dios gusiidiʼ laanu ca neza stiʼ ti ganda sanu lúcani (Isaías 2:2, 3). Laabe maʼ gudíxhebe chuʼ ti guidxi ni chiné labe ti ganna guiráʼ binni ni nabeza lu Guidxilayú xi naguixhe íquebe gúnibe (Hechos 15:14).

Dios racalaʼdxiʼ chuʼnu tobi si ora guni adorarnu laa.

Religión ni rusiidiʼ ni dxandíʼ qué ruxhéleni binni, sínuque racaneni laacaʼ chuʼcaʼ tobi si ne gannaxhiisaacaʼ (Juan 13:35). Tuu nga cusiidiʼ hombre ne gunaa de guiráʼ guidxi para chuʼcaʼ tobi si ora gúnicaʼ ni na Dios yaʼ. Cayuni invitardu lii gunibiaʼluʼ laacabe ra gúʼndaluʼ folletu riʼ.

Stale binni runi cré nacubi religión stiʼ ca testigu stiʼ Jiobá. Peru maʼ raca jma de chupa mil gadxe gayuaa iza de biree lá ca xpinni Dios ni dxandíʼ «testigu» stibe (Isaías 43:10-12). Binibiáʼcabe laadu casi ca Binni Ruundaʼ Biblia ante de iza 1931. Peru xiñee gudixhe íquedu guireʼ ladu testigu stiʼ Jiobá yaʼ.

Purtiʼ rusihuínnini tuu nga Dios stidu. Lá Dios nga Jiobá ne stale mil biaje rieeteʼ ni lu Biblia, nuu stale rollo nayooxhoʼ ni rusihuinni zacá ni. Ndaaniʼ stale Biblia maʼ guleecabe labe ne rucaacabe ni Señor o Dios. Peru Dios ni dxandíʼ gúdxibe Moisés Jiobá nga labe ne gúdxibe laa: «Ndiʼ nga laʼyaʼ ne qué ziuu dxi guinitilú ni» (Éxodo 3:15). Zacá bisihuínnibe maʼ gadxé laabe de ca dios ni cadi dxandíʼ. Ne nabé riéchedu chinedu lá Dios ni nandxóʼ.

Purtiʼ rusihuínnini xi dxiiñaʼ rúnidu. Dede dxi bibani Abel huayuu binni ni bisihuinni gupa fe Jiobá. Ra gudiʼdiʼ gayuaa de iza guyuu xcaadxi «binni ni bini cre Dios chiqué» casi Noé, Abrahán, Sara, Moisés ne David (Hebreos 11:4–12:1). Cásica rié binni de testigu nezalú ti juez para gusihuinni qué gapa tuuxa donda la? zacaca nga laadu, maʼ gudixhe íquedu guinidu ni dxandíʼ de Dios nezalú binni.

Purtiʼ rinándadu ejemplu stiʼ Jesús. Biblia na naca Jesús ti binni «ni qué rusiguii sínuque irá ni riníʼ la? jneza ni» o «ti testigu ni qué ruchee ne ni riníʼ puru si ni dxandíʼ» (Apocalipsis [Revelación] 3:14, TNM). Laapebe guniʼbe beeda gusiidibe binni lá Bixhózebe ne beedabe para güínebe «binni xii nga ni dxandíʼ» de Dios (Juan 17:26; 18:37). Nga runi, cani dxandíʼ xpinni Cristu naquiiñeʼ chinecaʼ lá Jiobá ne gusiidicaʼ ni binni. Ne laadu, ca testigu stiʼ Jiobá rúnidu stipa pur gúnidu zacá.

• Xiñee dxiqué bireʼ ladu ca Binni Ruundaʼ Biblia ne yanna maʼ ladu ca testigu stiʼ Jiobá yaʼ.

• Dede padxí bizulú gupa Jiobá Testigu stiʼ lu Guidxilayú riʼ.

• Tuu nga testigu stiʼ Jiobá jma risaca ni huayuu biaʼ dxi huabani binni.