Ndaa 13
Ca rey nachaʼhuiʼ ne ca rey malu
Guidxi Israel beeda gácani chupa reinu, ne stale de cani biʼniʼ mandar lúcani bisaanacaʼ Jiobá. Ca binni de Babilonia binitilucaʼ Jerusalén
QUÉ nindaa de bisaana Salomón de ñuni adorar Jiobá, guidxi Israel beeda gácani chupa reinu, casi maca guníʼ Jiobá. Rehoboam ni biʼniʼ mandar lugar stibe nabé biquiichináʼ guidxi que, ngue runi chii tribu ni nuu ladu guiaʼ que bixélecaʼ de laabe. Ne chupa si tribu ni qué nixeleʼ de trono stiʼ David ni guyuu Jerusalén que nga beeda gaca reinu stiʼ Judá ni guyuu ladu gueteʼ.
Cumu cani biʼniʼ mandar lu guiropaʼ reinu riʼ qué nuzuubacaʼ stiidxaʼ Dios ne qué ñápacaʼ fe la? nabé gúpacaʼ guendanagana ne maʼ qué ñápacaʼ stale cosa. Peru ca binni ni nuu lu reinu ni guyuu ladu guiaʼ que nabé feu cani bíʼnicaʼ. Xiñee yaʼ. Purtiʼ dede dxi gulaa reinu que bicaa ca rey stini que binni guni adorarcaʼ dios ni cadi dxandíʼ. Ne neca biseendaʼ Dios profeta casi Elías ne Eliseo ra nuucabe ne dede gundísacaʼ gueʼtuʼ, peru qué nulábicabe laacaʼ. Biiyaʼ si Jiobá qué nácabe guchaacabe la? bidii lugar gunitilú Asiria laacabe.
Gudiʼdiʼ si ti gayuaa iza, laaca bisabanáʼ Jiobá reinu stiʼ Judá ni guyuu ladu gueteʼ que. Dios biseendaʼ ca profeta stiʼ para gabi ca rey que guchaacaʼ modo laacaʼ, peru chupa chonna si de laacaʼ bicaadiágacaʼ ne gucanecaʼ guidxi que guni ni na Jiobá. Casi rey Josías, gudixhe cadi guni adorar ca binni que xcaadxi dios ne biʼniʼ chaahuibe yuʼduʼ stiʼ Jiobá. Dxi cayaca chaahuiʼ yuʼduʼ que bidxélacabe ti libru ra cá ca Ley ni bicaa Moisés. Ngue runi, jmaruʼ si ne stale gana bizulú Josías gulee guiráʼ ca bidóʼ que.
Ni jma triste nga qué ñuni cani biʼniʼ mandar despué de Josías que casi modo bíʼnibe. Ngue runi bidii Jiobá lugar gunitilú ca binni de Babilonia Judá ne laaca binitilucaʼ Jerusalén ne yuʼduʼ stiʼ. Ne ca binni ni bilá yenécabe laacaʼ de esclavu Babilonia ne guníʼ Dios ziaanacabe setenta iza raqué para guibiguétacabe xquídxicabe. Laga tiidiʼ ca iza que, Judá ziaana casi ti desiertu.
Nin tobi de cani za de David qué zabí lu trono que dede dxi gueeda Mesías, Rey ni maca bieeteʼ gueeda que. Peru stale de ca rey ni beeda de lade xfamilia David bisihuínnicaʼ pur guiráʼ ca cosa malu ni bíʼnicaʼ qué zanda diʼ guni mandarcaʼ. Ni dxandíʼ nga Mesías que si nga zanda gúnini. Ngue runi sicaríʼ guníʼ Jiobá de Mesías que: «Zaca be rey sti irá cani za de Israel, ne qué ziuu dxi guiasa be. Qué ziuu dxi guiaana dxí be de guni mandar be» (Lucas 1:33).
(Zeedani lu 1 ne 2 Reyes, capítulo 10 dede 36 stiʼ 2 Crónicas ne Jeremías 25:8-11.)