Ñee diciembre nga gule Jesús la?

BIBLIA qué rabi laanu padxipeʼ gule Jesús. Peru cudii ni razón laanu ti cadi guiníʼ íquenu diciembre nga gúlebe.

Ximodo riuu tiempu lu beeu diciembre guidxi Belén, ra gule Jesús que yaʼ. Calendariu stiʼ ca judíu napa ni ti beeu láʼ kislev, riaba ni galaa beeu stiʼ noviembre ne rugaanda ni galaa beeu stiʼ diciembre ne beeu riʼ nabé raca nananda ne riaba nisaguié. Nándaca beeu tebet, riaba ni galaa beeu stiʼ diciembre ne galaa beeu stiʼ enero, beeu riʼ jma nananda raca ne dede riaba hielu ca lugar ra jma nasoo. Guidúʼyanu xiná Biblia de tiempu ca neza ra nuu guidxi riʼ.

Esdras, tobi de cani bicaa Biblia, guníʼ nabé nananda lu beeu kislev ne riaba nisaguié. Nabe bidagulisaa stale binni Jerusalén «lu gaʼ beeu [kislev], lu gande dxi stiʼ beeu que» dede «cayacadíticaʼ [...] purtiʼ cayaba dxacha nisaguié». Ne nabe ca binni nuu raqué guniʼcaʼ modo riuu tiempu ca beeu que: «Nabé cayaba nisaguié tiempu riʼ. Qué zanda guiaanadu fuera» (Esdras 10:9, 13; Jeremías 36:22). Cumu zacá nga tiempu beeu diciembre la? guiráʼ cani rapa dendxuʼ guidxi Belén ruseguyoocaʼ laacame ti cadi guiaanacame zacá si lu layú huaxhinni.

Peru Biblia na dxi gule Jesús nuu tu cayapa xtendxuʼ huaxhinni. Ne Lucas, ni bicaa tobi de ca Evangeliu que na: «Gaxha de guidxi Belén nuu caadxi pastor cayapa ca dendxu huaxhinni» (Lucas 2:8-12). Racá ridúʼyanu cadi ridxíʼ si nga nuu ca pastor que lu layú, sínuque nabezapecaʼ raqué. Fuera rusaanacaʼ xténdxucaʼ huaxhinni. Yanna, pa nanándapeʼ raca beeu diciembre ne nabé riaba nisaguié lu beeu que Belén, ñee raʼbuʼ zapa ca pastor dendxuʼ sticaʼ huaxhinni la? Coʼ xa. Nga runi, guiráʼ ni maʼ bidúʼyanu ca culuíʼ cani cadi diciembre gule Jesús.a

Stiidxaʼ Dios caníʼ padxipeʼ guti Jesús, peru qué riníʼ diʼ ni padxipeʼ gúlebe. Ndiʼ rusietenalaʼdxiʼ laanu ca diidxaʼ bicaa rey Salomón: «Jma galán ti lá sicarú que ti aceite ni jma galán, ne jma galán dxi gátinu que dxi gálenu» (Eclesiastés 7:1). Nga racané laanu guiénenu xiñee jma riníʼ Biblia de dxiiñaʼ biʼniʼ Cristu ne de dxi gutiʼ ne xiñee huaxiéʼ riníʼ ni padxipeʼ gule.