17. Pabiáʼ dxi nga napa cani cucaalú laanu, ne xi zietenaláʼdxinu.

¹⁷ Laanu nánnanu cucaaluruʼ Binidxabaʼ laanu, nga runi cucheecherunu diidxaʼ dede ne ra nuu cani cucaalú laanu (Mat. 24:14, 21). Peru maʼ huaxiéʼ tiempu napa cani cucaalú laanu ca para gaca arrepentircaʼ ne guilacaʼ. Ne nuu sti cosa ni jma risaca que guilá ca binni ca, laani nga: guisaca lá Jiobá (biindaʼ Ezequiel 38:23). Ora guidagulisaa guiráʼ ca guidxi ca para gunduuxecaʼ xquidxi Dios, casi cá zúnicabe que la? naquiiñeʼ guietenaláʼdxinu ca diidxaʼ guníʼ salmista que lu oración stiʼ: «Guituí lúcabe ne gaca íquecabe guiráʼ ora, gundeteʼ laacabe dede guituí lúcabe ne gáticabe» (Sal. 83:17).

18, 19. 1) Xi zazaaca cani qué náʼ gusaana de gucaalú derechu ni napa Jiobá de guni mandar. 2) Xiñee risaca para laanu gusihuinni Jiobá laa nga napa derechu guni mandar.

¹⁸ Cani qué náʼ gusaana de gucaalú derechu ni napa Jiobá de guni mandar la? guizáʼ naná ni cabeza laacaʼ. Stiidxaʼ Dios cayabi laanu cani «qué nicaa stiidxaʼ» Dios la? záticaʼ lu Armagedón ne maʼ qué ziuu dxi guibánicaʼ (2 Tes. 1:7-9). Ora gati ca binni ca ne guilá cani dxandíʼ runi adorar Jiobá la? zusihuínnicani Jiobá si nga tobi lucha Dios ni dxandíʼ. Ndaaniʼ guidxilayú cubi stiʼ Dios ca la? qué ziuu dxi guiaandaʼ ni chigúnibe ca. Guiráʼ «ni nachaʼhui zaqueca ni cadi nachaʼhuiʼ» guiasa dxi ca la? zánnacaʼ ni biʼniʼ Jiobá (Hech. 24:15). Laacabe zuuyacabe jma jneza nga gudiicaʼ lugar guni mandar Dios laacaʼ. Cani gaca nachaʼhuiʼ si nga nagueendaca zudiicaʼ cuenta Jiobá nga tobi lucha Dios ni dxandíʼ.

«Ndiʼ nga dxandíʼ lá Dios ni nandxóʼ ca»

Zacá guníʼ Nicolás de guidxi Cusa lu ti libana bidiibe lu iza 1430.a Tu gúcabe yaʼ. Laabe gúcabe ti hombre ni nabé guyuulaʼdxiʼ guʼndaʼ, nga runi biindabe de Filosofía, Teología, Matemática, Astronomía ne biziidibe griegu ne hebreu ne biindarube xcaadxi cosa. Dxi nápabe 22 iza binduuxebe de Derecho Canónico, ne lu iza 1448 gúcabe ti cardenal.

Raca gaayuʼ gayuaa cincuenta iza bizaʼbe ti yoo para ca binni ni maʼ nagola ca ndaaniʼ guidxi Cusa. Yanna riʼ maʼ nácani ti biblioteca stiʼ guidxi ca, ne ndaanini nuu jma de chonna gayuaa guiʼchiʼ. Tobi de laacani nga Códice Cusano número 220, luni zeeda libana bidii Nicolás de Cusa lu iza 1430 que, libana ca biree lani “In principio erat verbum” (Primé que gúcabe Verbu). Lu guiʼchiʼ ca biquiiñeʼ Nicolás de Cusa letra latín Iehoua para bicaabe lá Jiobá.b Lu sti guiʼchiʼ número 56 caníʼ de lá Dios sicaríʼ: «Dios nga bidii ni. Laani nga Tetragrámaton, ti lá ni gucuané tapa letra. [...] Ndiʼ nga dxandíʼ lá Dios ni nandxóʼ ca». Ne ni guníʼ Nicolás de Cusa ca la? rihuinni cá lá Dios ndaaniʼ ca primé guiʼchiʼ ra gucuá Stiidxaʼ Dios lu hebreu (Éxo. 6:3).

Códice Cusano ni gucuá lu siglu XV que nga tobi de ca guiʼchiʼ ni jma maʼ xadxí nuu ra zeeda ca letra Iehoua, ne Tetragrámaton nga biquiiñecabe para bitiixhicabe cani. Ndiʼ rusihuinni maca raca gayuaa iza rutiixhicabe lá Dios sicarigá Jiobá.