Ca promesa stiʼ Reinu: Zaca guiráʼ xixé cosa nacubi

BIXUIʼLÚ maʼ nuuluʼ ndaaniʼ Paraísu ne nagasi bichuuguluʼ ti manzana, peru ante uguuluʼ ni ndaaniʼ dxumi stiuʼ, cucaaxiiluʼ ni para guʼyuʼ pabiáʼ rindáʼ naxhi ni. Neca maʼ xadxí de cayúniluʼ dxiiñaʼ, caʼruʼ guidxágaluʼ ne rapuʼ gana guʼnuʼ sti ratu. Laaca cuchuuguʼ jñaaluʼ cuananaxhi lu sti yaga nuu gaxha de ra nuuluʼ ne cayuuyaluʼ pabiáʼ nayecheʼ cayuíʼnebe binnilídxitu diidxaʼ ne chupa chonna xhamígutu, ca binni riʼ laaca beedacaʼ ra cayasa cosecha riʼ. Nabé nahuiiniʼ rihuinni jñaaluʼ, cásica biʼyuʼ laabe dxi nahuiiniluʼ. Raca nagana para lii guni creluʼ biiyaluʼ dxi bióʼxhobe ndaaniʼ xa guidxilayú ni maʼ binitilú que. Rietenalaʼdxuʼ modo binduuxeʼ ca guendahuará que laabe, ne laaca rietenalaʼdxuʼ naazuʼ nabe últimu biaje gucuaabe bi para bilúxebe. ¡Guizáʼ biinaluʼ ra baʼ stibe! Peru yanna maʼ cayuuyaluʼ laabe né xcaadxi binni, nuube nazaaca ne gastiʼ cuchiiñaʼ laabe.

Zedandá dxi gaca ni bizéʼtenu riʼ. Nanna dxíchinu zácani, purtiʼ runi cumplir Dios guiráʼ promesa stiʼ. Lu sección riʼ zadúʼyanu maʼ cadi candaa para guni cumplir Reinu stiʼ Dios caadxi promesa ante guzulú guerra ni láʼ Armagedón. Ne laaca zadúʼyanu gunáʼ nga xcaadxi promesa ni chigaca cumplir despué. ¡Guizáʼ galán zuni sentirnu dxi maʼ guni mandar Reinu stiʼ Dios lu guidubi Guidxilayú riʼ ne gúnini guiráʼ xixé cosa nacubi!