Referencia para Ni chigaca lu reunión Xhiiñaʼ Dios ne modo nabáninu
7-13 DE MAYO
CA TESORO ZEEDA LU BIBLIA | MARCOS 7, 8
«Guáʼ yaga ni nuayaʼ riʼ ne cadi gusaana de guedananda naa»
nwtsty nota de estudiu para Mr 8:34, TNM
cadi guibani para laa: Laaca zanda guininu «guni renunciar guiráʼ ca derechu stiʼ». Ndiʼ riníʼ naquiiñeʼ chuʼnu dispuestu maʼ cadi guibáninu para laanu o gusaananu xquendanabáninu lu náʼ Jiobá. Laaca riniʼni ziuu biaje zuni renunciarnu ca deseu nápanu ne ca cosa ni ñuuláʼdxinu ñúninu (2Co 5:14, 15). Ne laaca ca diidxaʼ riʼ nga biquiiñeʼ Marcos para guiníʼ biʼniʼ negar Pedro Jesús (Mr 14:30, 31, 72).
14-20 DE MAYO
CA TESORO ZEEDA LU BIBLIA | MARCOS 9, 10
«Ti visión ni ruquidxi fe stinu»
nwtsty nota de estudiu para Mr 9:7
ti ridxi: Chonna biaje riete lu ca Evangeliu guniʼné Jiobá binni ne ndiʼ nga guiropa biaje bíʼnibe ni (Mr 1:11; Jn 12:28).
Guyúbinu ca perla ni gaʼchiʼ
nwtsty nota de estudiu para Mr 10:17, 18
Maistru chaʼhuiʼ: Biquiiñeʼ hombre riʼ ca diidxaʼ de respetu «Maistru chaʼhuiʼ» para gusisaca Jesús, purtiʼ zaqué nga guyuulaʼdxiʼ ca xaíque yuʼduʼ guni tratárcabe laacaʼ. Neca qué nidxiichi Jesús gúdxicabe laa «Maistru» ne «Señor» (Jn 13:13), siempre guniʼbe Bixhózebe nga naquiiñeʼ guisaca.
Iruti ru nachaʼhui jma que tobi lucha Dios: Né ca diidxaʼ riʼ, biʼniʼ reconocer Jesús Jiobá nga riguixhe norma de xii nga ni jneza. Jiobá si nga napa derechu de quixheʼ gunáʼ nga ni jneza ne ni cadi jneza purtiʼ laa nga ni jma Nandxóʼ lu guidubi naca universu. Dxi gudó Adán ne Eva cuananaxhi stiʼ yaga stiʼ guendananna ni jneza ne ni cadi jneza que casi ora ñáxhacabe Jiobá derechu ni napa. Peru Jesús maʼ gadxé modo laa, purtiʼ naca humilde ne runi reconocer Bixhoze si nga riguixhe norma. Yanna maʼ zanda gánnanu gunáʼ nga ni jneza para Jiobá purtiʼ maʼ nápanu Biblia (Mr 10:19).
MODO RÚNINU XHIIÑAʼ DIOS
«Ni ma bichaaga Dios...»
nwtsty nota de estudiu para Mr 10:4, TNM
acta ra gucaa cusaana xheelaʼ: O «acta de divorcio». Ley que ná pa ti hombre gacalaʼdxiʼ gaca divorciar caquiiñeʼ guni ti documentu legal, ne para gúnibe ni zándaca caquiiñeʼ chebe ra nuu ca ancianu. Ndiʼ rudii ni tiempu para guiníʼ íquebe xi chigúnibe. Ley que rusihuínnini cadi naquiiñeʼ gaca divorciar binni nagueendaca ne rapa ni ca derechu stiʼ ca gunaa (Dt 24:1). Peru ca dxi stiʼ Jesús ca xaíque yuʼduʼ bisihuínnicaʼ cadi nagana gaca divorciar binni. Ti historiador judíu ni biree lá Josefo, ni guca ti maestru de ley lu primé siglu ne guca divorciar guníʼ, zanda gaca divorciar binni «pur intiica cosa, ne ca hombre ca nga ni jma ruyubi modo gaca divorciar».
nwtsty nota de estudiu para Mr 10:11, TNM
gaca divorciar de xheelaʼ: Para ganda guiénenu ca diidxaʼ riʼ naquiiñeʼ guietenaláʼdxinu ca diidxaʼ ni guníʼ Jesús: «tutiica gaca divorciar de xheelaʼ ne guichaganáʼ stobi, neca qué ñuuné xheelabe stobi la? maʼ guendarapa jnadxii nga» (Mateo 19:9, TNM). Ca diidxaʼ ni guníʼ Jesús lu Marcos riʼ cayaca referirbe ti binni ni gaca divorciar de xheelaʼ pur intiica si cosa ne cadi pur inmoralidad sexual (lu diidxaʼ griegu porneía).
maʼ napa jnadxii, ne cucheené xheelaʼ: Qué ninanda Jesús idea stiʼ ca rabinu neca stale binni yenanda ni, laacabe guníʼcabe zanda gaca divorciar ti hombre de xheelaʼ «pur intiica cosa» (Mt 19:3, 9). Para stale judíu, qué zanda diʼ ugaanicabe donda ique ti hombre de adulterio. Según ca rabinu que, ti gunaa si nga zanda ugaanicabe donda ique de adulterio. Ngue runi ora guníʼ Jesús biaʼca deber ne obligación napa ti gunaa ne ti hombre de guni respetar xheelaʼ la? bisihuínnibe risaca ca gunaa ne caquiiñeʼ guni respetárcabe laacaʼ.
21-27 DE MAYO
CA TESORO ZEEDA LU BIBLIA | MARCOS 11, 12
«Jma stale bidiibe qué xcaadxi»
nwtsty nota de estudiu para Mr 12:41, 42, TNM
caja ra riaba bueltu: Caadxi libru yooxhoʼ stiʼ ca judíu ruzeetecaʼ modo guca ca cofre que, gúpacani forma stiʼ trompeta ne luguiáʼ de laacani gúpacani ti huecu. Raqué nga bisaba binni bueltu para iquiiñeʼ ndaaniʼ templu que. Diidxaʼ griegu ni riquiiñeʼ raríʼ laaca raca traducir ni casi «tesorería» (Juan 8:20, TNM). Zándaca caníʼ diidxaʼ riʼ de ti lugar ni nuu lu patiu riuu ca gunaa (biiyaʼ sgd, ndaa 15). Según caadxi libru stiʼ ca rabinu biuu 13 caja ra rusábacabe bueltu lu guidubi patiu que. Zándaca ndaaniʼ templu laaca guyuu ti cuartu principal ra riuu guirá cosa risaca, ne raqué nga riguucabe bueltu ni bidopa ndaaniʼ ca caja ra rusábacabe bueltu.
chupa monedahuiiniʼ: Lit., «chupa leptón», ni riníʼ xiixa nahuiiniʼ ne nalaseʼ. Ti leptón nga ti moneda de cobre o bronce ni jma nahuiiniʼ ni biquiiñecabe dxiqué ndaaniʼ guidxi Israel (1 denario = 128 leptón) (biiyaʼ sgd, ndaa 18).
huaxiéʼ risaca: Lit., «biáʼ ti cuadrante». Diidxaʼ griegu kodrántes (ni biree de lu diidxaʼ latín quadrans) caníʼ ni de ti moneda romanu de cobre o bronce (1 denario = 64 cuadrante). Raríʼ Marcos biquiiñeʼ ti moneda de Roma para gusiene pabiáʼ ngue risaca ca moneda ni biquiiñeʼ ca judíu dxiqué (biiyaʼ sgd, ndaa 18).
Guyúbinu ca perla ni gaʼchiʼ
nwtsty nota de estudiu para Mr 11:17, TNM
yoo ra raca oración para guiráʼ guidxi: De chonna evangelista ni ruzeeteʼ ni cá lu Isaías 56:7, Marcos si biquiiñeʼ ca diidxaʼ «para guiráʼ guidxi [binni]» (Mt 21:13; Lu 19:46). Templu que guca ni para ganda cheʼ ca israelita ne ca extranjeru chiguni orarcaʼ Jiobá ne guni adorarcaʼ laabe (1Re 8:41-43). Ngue runi gudxi Jesús ca judíu que cadi jneza ngue ni cayúnicaʼ ra cutoocaʼ ndaaniʼ templu que purtiʼ maʼ bíʼnicabe ni lidxi gubaanaʼ. Modo guca xpiaʼ ca hombre riʼ, bicaa ni binni de xcaadxi guidxi maʼ cadi checaʼ ra lidxi Jiobá, ne maʼ cadi guiziidicaʼ de laabe.