LECCIÓN 57
¿Xi zazaaca pa gúniluʼ ti pecadu grave?
Neca nadxiiluʼ Jehová de guidubi ladxidoʼloʼ ne gúniluʼ stipa para cadi guninaluʼ laabe, ziuu biaje zucheeluʼ. Peru nuu pecadu jma grave que xcaadxi (1 Corintios 6:9, 10). Yanna, pa gueeda gúniluʼ ti pecadu grave, cadi guiníʼ íqueluʼ maʼ cadi nadxii Jehová lii, sínuque nuube dispuestu gacanebe ne guni perdonarbe lii.
1. ¿Xi caquiiñeʼ gúninu para guni perdonar Jehová laanu?
Ora ti binni ni nadxii Jehová guni ti pecadu grave la? nabé riuu triste. Peru riguixhedxí Jehová ladxidoʼbe ne promesa riʼ: «Neca maʼ naxiñáʼ rini ca pecadu stitu, zaca ca ni naquichibé casi nieve» (Isaías 1:18). Nga runi, pa de guidubi ladxidoʼno gaca arrepentirnu, ziuu Jehová dispuestu guni perdonar laanu. Yanna, ¿xi riníʼ gaca arrepentir tuuxa yaʼ? Riníʼ ni guiuubaʼ ladxidóʼ purtiʼ maʼ bicheené Jehová, maʼ cadi guni cosa malu ne guinabaʼ Jehová gutiidilaʼdxiʼ laa. Despué, runi binni ca stipa para guchaa modo riníʼ ique ne maʼ qué runi ca cosa ni bicaa laa guchee ne laaca runi stipa para guni ni ná ca ley stiʼ Jehová lu xquendanabani (biindaʼ Isaías 55:6, 7).
2. ¿Ximodo riquiiñeʼ Jehová ca ancianu para gacané laanu ora gúninu ti pecadu?
Ndiʼ nga conseju rudii Jehová ti binni ni guni ti pecadu grave: «Guiniʼné ca ancianu de congregación» (biindaʼ Santiago 5:14, 15). Ca hombre ni maʼ gulí Jehová né espíritu santu stiʼ nadxiicaʼ Jehová ne ca dendxuʼ stiʼ, ne laacabe nga ca ni zanda gacané laanu para guibiguetaʼ chuʼnu gaxha de Dios (Gálatas 6:1).
¿Ximodo zacané ca ancianu laanu pa gúninu ti pecadu grave? Chupa o chonna de laacabe zaquiiñecabe Biblia para guluíʼcabe laanu xiñee cadi jneza ni bíninu. Zudiicabe laanu conseju ne zaguucabe gana laanu para cadi guibiguetaʼ gucheʼnu. Ne pa tuuxa guni ti pecadu grave peru qué gaca arrepentir la? zabee ca ancianu laabe de ndaaniʼ congregación para cadi cueechube xcaadxi.
GUIZÍʼDIRUNU JMA
Biiyaʼ xiñee naquiiñeʼ guiéneluʼ ne gusisácaluʼ guiráʼ ni runi Jehová para gacané laanu pa gúninu ti pecadu grave.
3. Ziuʼnu jma galán pa guininu ca pecadu stinu
Intiica pecadu gúninu runinani ladxidóʼ Jehová, nga runi caquiiñeʼ gábinu laabe ca pecadu stinu. Laguundaʼ Salmo 32:1-5 ne laiquiiñeʼ pregunta riʼ para güitu diidxaʼ:
¿Xiñee galán gábinu Jehová ca pecadu stinu lugar de gucáʼchinu ni?
Ziuʼnu galán pa gábinu Jehová ca pecadu stinu ne laaca zuni sentirnu galán pa guinábanu ca ancianu gacanecaʼ laanu. Laguuyaʼ VIDEU riʼ ne laiquiiñeʼ pregunta riʼ para güitu diidxaʼ:
¿Ximodo gucané ca ancianu Canon para guibiguetaʼ chuʼ gaxha de Jehová?
Nabé risaca cadi gucáʼchinu gastiʼ ne gábinu ca ancianu ni dxandíʼ, purtiʼ nuucabe para gacanécabe laanu. Laguundaʼ Santiago 5:16 ne laiquiiñeʼ ca pregunta riʼ para güitu diidxaʼ:
¿Ñee rábiluʼ jma zacané ca ancianu laanu pa gábinu laacaʼ guiráʼ ni bizaaca la? ¿Xiñee rábiluʼ zacá ni yaʼ?
Gudxi ca ancianu ca pecadu stiluʼ, cadi gucaachiluʼ gastiʼ ne bidii lugar gacané Jehová lii.
4. Ora guiree tuuxa de ndaaniʼ congregación, racaneni binni ni bichee ca ne congregación
Pa tuuxa ni biʼniʼ ti pecadu grave ne qué naʼ chinanda ca ley stiʼ Jehová la? ribeecabe laabe de ndaaniʼ congregación ne maʼ qué ridxaaga nu laabe. Laguundaʼ 1 Corintios 5:6, 11, ne laiquiiñeʼ ca pregunta riʼ para güitu diidxaʼ:
Né caadxi si levadura zanda gaca fermentar guidubi naca cuba pan. Yanna, ¿ñee rábiluʼ zanda gacaná congregación pa guidxaaganu ti binni ni qué naʼ gaca arrepentir la? ¿Xiñee rábiluʼ zacá ni yaʼ?
Cumu riá ca ancianu binni cásica runi Jehová ni la? nga runi ruyúbicabe ca ni maʼ biree de ndaaniʼ congregación ne racanécabe laacaʼ. Stale de laacaʼ ma biguétacaʼ ndaaniʼ congregación, ¿xiñee yaʼ? Purtiʼ neca naná disciplina ni gucuaacaʼ, peru gucaneni laacaʼ guiníʼ íquecaʼ ni bíʼnicaʼ (Salmo 141:5).
Pur modo runi tratar Jehová binni, ¿ximodo rusihuinni nga riénebe laacaʼ, nápabe misericordia laacaʼ ne nacháʼhuibe né laacaʼ?
5. Pa gaca arrepentirnu zuni perdonar Jehová laanu
Jesús bizeeteʼ ti ejemplu ni zanda gacané laanu gánnanu ximodo runi sentir Jehová ora gaca arrepentir ti binni. Laguundaʼ Lucas 15:1-7 ne laiquiiñeʼ pregunta riʼ para güitu diidxaʼ:
¿Xi rusiidiʼ ejemplu riʼ laanu de Jehová?
Laguundaʼ Ezequiel 33:11 ne laiquiiñeʼ pregunta riʼ para güitu diidxaʼ:
¿Xi caquiiñeʼ gúninu para gusihuínninu maʼ guca arrepentirnu?
Naca Jehová casi ti pastor: nabé rizaaláʼdxibe ca dendxuʼ stibe.
NUU TU NÁ: «Ridxibeʼ guinieniaʼ ca ancianu. Purtiʼ pa gabeʼ laacabe ni bineʼ la? zabeecabe naa de ndaaniʼ congregación».
¿Xi ñábiluʼ tuuxa ni riníʼ ique zacá?
XI BIZÍʼDINU
Pa gúninu ti pecadu grave, zuni perdonar Jehová laanu pa gaca arrepentirnu de guidubi ladxidoʼno ne maʼ qué guibiguétaruʼ gúninu ca cosa malu ni bíninu.
Xi biziidiluʼ
¿Xiñee jma galán gábinu Jehová ca pecadu stinu?
¿Xi caquiiñeʼ gúninu para guni perdonar Jehová laanu?
Pa bíninu ti pecadu grave, ¿xiñee caquiiñeʼ guinábanu ca ancianu gacanecaʼ laanu?
BIIYAʼ XIRUʼ ZANDA GUIZIIDILUʼ
Biiyaʼ ximodo bidii ti hombre cuenta pabiáʼ riaʼ Jehová binni casi ná Isaías 1:18.
¿Xi runi ca ancianu para gacanecaʼ tuuxa ni maʼ biʼniʼ ti pecadu grave?
«Lagannaxhii ne laguiá ca ni maʼ biʼniʼ ti pecadu grave» (Torre stiʼ ni rapa, agosto de 2024)
Ca binni ni caʼruʼ gaca arrepentir, laaca riácabe ne nadxiicabe laacaʼ. ¿Ximodo rúnicabe ni yaʼ?
«Ximodo racanécabe ca ni maʼ biree de ndaaniʼ congregación» (Torre stiʼ ni rapa, agosto de 2024)
Biiyaʼ ximodo gucané ti hermanu ti hombre guibiguetaʼ ndaaniʼ xquidxi Jehová lu historia ni láʼ «Caquiiñeʼ guibiguetaʼ ra nuu Jiobá».
«Gucané Biblia laacabe para bichaacabe» (Torre stiʼ ni rapa, 1 de abril de 2012)