Arca ni bizáʼ Noé

Ra gudiʼdiʼ tiempu, guyuu stale binni lu Guidxilayú. Casi guirácabe gúcacabe malu. Dede caadxi ángel gúcacaʼ malu. Bisaanacabe guibáʼ, lugar ra nabézacabe ne biétecabe ndaaniʼ Guidxilayú riʼ. ¿Nánnaluʼ xi para la? Para ganda gápacabe cuerpu stiʼ hombre ne guichaganácabe ca gunaa ni nuu ndaaniʼ Guidxilayú.

Gupa ca gunaa que xiiñiʼ ca ángel riʼ. Ra biniisi ca xiiñicabe, guizáʼ nadipaʼ gúcacaʼ, nabé gudíndecaʼ ne bininacaʼ binni. Qué nudiiruʼ Jiobá lugar ñúnicabe cosa malu. Ngue runi gudixhe ique gunitilú ca binni malu que né ti diluvio, ti nisaguié naroʼbaʼ ni bindaahua guidubi Guidxilayú.

Peru guyuu ti hombre maʼ gadxé laa, purtiʼ gunnaxhiibe Jiobá. Biree labe Noé. Laabe ne xheelabe gúpacabe chonna xiiñicabe: Sem, Cam ne Jafet. Ca xiiñibe gúpacaʼ xheelacaʼ. Biʼniʼ mandar Jiobá Noé guni ti arca, ti caja de yaga ni zanda xubalaahua lu nisa. Zacá zanda guilá Noé ne familia stiʼ ora gueeda Diluvio que. Ne laaca biʼniʼ mandar Jiobá laabe cuʼbe stale maniʼ ndaaniʼ arca que ti ganda guilacaʼ.

Nagueendaca bizulú Noé bizáʼ ti arca. Laabe ne familia stibe bindaacabe biaʼ 50 iza para bizáʼcabe ni ne bíʼnicabe ni modo gudxi Jiobá laacabe. Laaca yetídxibe ca binni que chigueeda ti diluvio, peru guirutiʼ nulabi laabe.

Bedandá dxi chuʼ Noé ndaaniʼ arca que. ¿Racaláʼdxiluʼ gánnaluʼ xi guca la?