Xhono binni bizulú ti guidxilayú cubi

Noé, familia stiʼ ne ca maniʼ que guyuucaʼ ndaaniʼ arca. Biteeguʼ Jiobá puertaʼ stini ne bizulú biaba nisaguié. Cumu guizáʼ naroʼbaʼ nisaguié que la? dede bixuubalaahua arca que lu nisa. Chaahuidugá bichii nisa que guidubi naca Guidxilayú. Guiráʼ binni malu que biaanacaʼ fuera de arca que ne gúticaʼ. Peru Noé ne familia stiʼ qué ñácacaʼ gastiʼ purtiʼ guyuucaʼ ndaaniʼ arca que. ¿Ñee ruxuíʼluluʼ pabiáʼ biéchecabe pur bizuubacabe stiidxaʼ Jiobá la?

Biaba dxacha nisaguié 40 dxi ne 40 gueelaʼ ne óraque gulezadxí ni. Ra gudiʼdiʼ dxi biete nisa que. De ra bicá arca que lu ti dani. Peru cumu ziáʼ nisa nuu fuera que, biaana Noé ne familia stiʼ ndaaniʼ arca que ti tiempu.

Biete nisa que ra zidiʼdiʼ dxi. Jma de ti iza biaana Noé ne familia stiʼ ndaaniʼ arca que. Óraque gudxi Jiobá laacabe maʼ zanda guireecabe. ¡Ruluiʼpeʼ ti guidxilayú cubi ngue! Cayéchecabe bilá Jiobá laacabe, ngue runi bidiicabe ti ofrenda laa.

Guyuulaʼdxiʼ Jiobá ofrenda que ne biʼniʼ prometer maʼ qué ziuuruʼ dxi gunitilú guiráʼ ni nuu ndaaniʼ guidxilayú riʼ né ti diluvio. Bidii Jiobá ti señal para gúʼyacabe zuni cumplir promesa stiʼ, bíʼnibe guihuinni primé arcoíris guibáʼ. ¿Ñee huayuuyaluʼ ti arcoíris la?

Laaca gudxi Jiobá Noé ne familia stiʼ gápacaʼ xiiñicaʼ ne guchacaʼ Guidxilayú riʼ.