Raca reunirdu pur videollamada

Ndaaniʼ stale guidxi maʼ bicueeza gobiernu guidagulisaa stale binni ti lugar si. Laadu, ca testigu stiʼ Jehová, ruzúʼbadu stiidxaʼ gobiernu, peru raca reunirdu de gadxé modo. Nga runi, stale congregación caquiiñeʼ aplicación ni láʼ Zoom para gaca reunir pur videollamada.

Para cadi gusaana de gápadu ca reunión stidu, gudixhe Grupu ni Zániru iquiiñeʼ donación ni rudii binni biaʼ naʼ ladxidóʼ para guixuíʼ cuenta de Zoom ni iquiiñeʼ ca congregación. Guizáʼ gucaneni caadxi congregación ni qué ñanda niguixe 15 o 20 dólar ne zándaca jma, zaca cuenta riʼ. Biquiiñeʼ ca congregación riʼ caadxi aplicación gratis peru huaxiéʼ si binni randa raca conectar lúcani ne cadi seguru cani. Guiráʼ congregación ni riquiiñeʼ cuenta de Zoom ni riguixe organización zanda guni controlarcaʼ aplicación riʼ ti zacá ganda gaca conectar stale binni. Tiempu riʼ, jma de 65,000 congregación ni nuu ndaaniʼ jma de 170 guidxi riquiiñecaʼ cuenta de Zoom.

Congregación Kairagi, ni nuu ndaaniʼ guidxi Manado (ndaaniʼ provincia stiʼ Célebes Septentrional, Indonesia), dxiqué gúpacaʼ ti aplicación gratis para gaca reunircaʼ, peru yanna maʼ riquiiñecaʼ ti cuenta de Zoom stiʼ organización. Ti hermanu láʼ Hadi Santoso guníʼ: «Dede ca hermanu ni huaxiéʼ nanna iquiiñeʼ Internet randa raca conectarcaʼ lu ca reunión purtiʼ yanna maʼ cadi naquiiñeʼ guireecaʼ ne gaca conectarcaʼ stale biaje».

Sicaríʼ guníʼ Léster Jijón, ti ancianu de congregación Guayacanes Oeste, ni nuu ndaaniʼ guidxi Guayaquil (Ecuador): «Cumu huaxiéʼ napa ca hermanu bueltu, nga runi nagana ñaca para stale congregación niguíxecaʼ ti cuenta de Zoom para gaca conectarcaʼ lu reunión. Peru yanna, maʼ gucané organización laadu ne maʼ nápadu ti cuenta de Zoom ra randa conectar stale hermanu. Ne laaca randa runi invitardu biaʼ tiica binni».

Sicaríʼ bicaa hermanu Johnson Mwanza, de congregación Norte Ngwerere, ni nuu ndaaniʼ guidxi Lusaka (Zambia): «Huayabi stale hermanu laadu: “Pur nápadu ti cuenta de Zoom ni rudii organización, racaneni para chuʼdu gaxha de ca hermanu stidu ne laaca runi sentirdu pabiáʼ nadxii Jehová laadu”».

Bueltu ni riquiiñedu para sidu cuenta de Zoom riree ni lu ca donación ni ridopa para labor de socorro. Ne riree ca bueltu ca lu ca donación ni ridopa para gaca xhiiñaʼ Dios lu guidubi Guidxilayú. Stale de ca donación ca raca cani lu donate.jw.org. Rudiʼdu xquixe peʼ laatu pur ca donación stitu, laaca riquiiñeʼ ni para xcaadxi labor de socorro lu guidubi Guidxilayú (2 Corintios 8:14).