Ximodo zanda guibanineluʼ familia stiluʼ nayecheʼ (guiropa ndaa)

Ti regalu stiʼ Jehová nga xiiñiʼ binni. Nga runi, ribézabe gapa ca padre regalu riʼ, ne rudiibe conseju galán laacaʼ para ganda gúnicaʼ ni. Laaca rudiibe conseju xiiñiʼ binni para ganda chuʼ familia sticaʼ galán.

1. ¿Xi conseju rudii Jehová ca padre?

Racalaʼdxiʼ Jehová gannaxhii binni xiiñiʼ ne cueecaʼ tiempu para laacabe. Laaca ribézabe gapa binni xiiñiʼ para cadi guizaacacaʼ xiixa cosa feu ne gusiniisicaʼ laacabe casi ná ca principiu zeeda lu Biblia (Proverbios 1:8). Sicaríʼ nga canabaʼ Dios ca ni naca xaíque ndaaniʼ familia gusiniisicaʼ xiiñicaʼ: «Lagusiniisi laacabe casi ná Jehová ne casi ná ca conseju stiʼ» (biindaʼ Efesios 6:4). Riuulaʼdxiʼ Jehová guʼyaʼ zinanda ca padre conseju stiʼ ora gusiniisicaʼ xiiñicaʼ ne qué rudiicaʼ lugar gusiniisi sti binni xiiñicaʼ.

2. ¿Xi conseju rudii Jehová xiiñiʼ binni?

Ndiʼ nga ni rinabaʼ Jehová laacabe: «Laguzuubaʼ stiidxaʼ bixhózetu ne jñaatu» (biindaʼ Colosenses 3:​20). Pa ruzuubaʼ xiiñiʼ binni diidxaʼ ne runi respetar bixhoze ne jñaa, zusiecheʼ laacabe ne laaca zusiecheʼ Jehová (Proverbios 23:​22-​25). Guizáʼ galán ejemplu bisaana Jesús, purtiʼ neca nácabe perfectu, bizuubabe stiidxaʼ bixhózebe ne jñaabe ne biʼniʼ respetarbe laacaʼ neca nácacaʼ binni ruchee (Lucas 2:​51, 52).

3. ¿Xi zanda guni ca familia para ganda chuʼcaʼ gaxha de Jehová?

Pa nápaluʼ xiiñiluʼ la? zándaca racaláʼdxiluʼ gannaxhiicabe Jehová cásica nadxiiluʼ laa. ¿Ximodo zanda gúniluʼ ni yaʼ? Ra chinándaluʼ conseju ni rudii Biblia riʼ: «Naquiiñeʼ gusiidiluʼ [Stiidxaʼ Jehová] ca xiiñiluʼ ne gábiluʼ laacabe ni nani, ora maʼ zúbaluʼ ra yoo, ora maʼ zeluʼ paxaraa» (Deuteronomio 6:7). Ne para gusiidiʼ tuuxa la? naquiiñeʼ guiníʼ ni stale biaje. Zándaca lii maʼ nánnaluʼ naquiiñeʼ gábiluʼ ca xiiñiluʼ xiixa stale biaje para ganda guietenaláʼdxicaʼ ni. Nga runi, ni ná textu riʼ nga siempre biyubi modo guiníʼneluʼ ca xiiñiluʼ de Jehová. Laaca galán cuee guiráʼ familia tiempu guiráʼ semana para guni adorarcaʼ Jehová ra gúʼndacaʼ Biblia juntu. Ne neca peʼ qué gápaluʼ xiiñiluʼ, pa guni estudiarluʼ Biblia guiráʼ semana zudiiluʼ cuenta guizáʼ zacaneni lii.

GUIZÍʼDIRUNU JMA

4. Bisiniisi ca xiiñiluʼ né guendarannaxhii

Nagana nga gusiniisi binni xiiñiʼ. ¿Ximodo zanda gacané Biblia lii yaʼ? Laguundaʼ Santiago 1:​19, 20 ne laiquiiñeʼ ca pregunta riʼ para güitu diidxaʼ:

• ¿Ximodo zanda gusihuinni binni nadxii xiiñiʼ ora guiniʼné laacabe?

• ¿Xiñee cadi naquiiñeʼ uguu jneza binni xiiñiʼ ora cadxiichi?a

5. Gupa ca xiiñiluʼ

Para ganda gápaluʼ ca xiiñiluʼ la? guizáʼ risaca guiníʼneluʼ cada tobi de laacabe de sexualidad. Dxandíʼ, zándaca guituí luluʼ ora gúniluʼ ni. Laguuyaʼ VIDEU riʼ ne laiquiiñeʼ ca pregunta riʼ para güitu diidxaʼ:

VIDEU: Gupa ca xiiñiluʼ de ca cosa malu (2:​58)

• ¿Xiñee raca nagana para stale binni guiniʼné xiiñiʼ de sexo?

• ¿Xi huayacané caadxi padre para ganda guiniʼné ca xiiñiʼ de tema riʼ?

Maca cá lu Biblia, ra zidiʼdiʼ dxi jma malu zaca ca binni ni guibani lu guidxilayú stiʼ Binidxabaʼ riʼ. Laguundaʼ 2 Timoteo 3:​1, 13 ne laiquiiñeʼ ca pregunta riʼ para güitu diidxaʼ:

• Caadxi binni malu ni ruzeeteʼ versículo 13 ca riláxoocaʼ baʼduhuiiniʼ. Yanna, ¿xiñee risaca gusiidiʼ binni xiiñiʼ de sexualidad? Ne ¿xi zanda guni binni para gapa ca xiiñiʼ ti cadi chuʼ tu guniná laacaʼ?

¿Ñee nannuʼ ndiʼ la?

Guizáʼ stale información maʼ biʼniʼ publicar ca testigu stiʼ Jehová para gacané ca padre gusiidiʼ ca xiiñiʼ de sexualidad ti cadi chuʼ tu guniná laacaʼ. Ndiʼ nga caadxi de laacani:

• Lagapa ca xiiñitu (videu)

• Guizíʼdinu de Maestru Ni Jma Nanna Gusiidiʼ, capítulo 10 ne 32

• «Ximodo guiníʼneluʼ xiiñiluʼ de sexo» (¡Gutaná! núm. 5 2016)

6. Biʼniʼ respetar bixhózeluʼ ne jñaaluʼ

VIDEU: ¿Xi guneʼ para guinieniáʼ bixhozeʼ ne jñaaʼ? (2:​19)

• ¿Xiñee galán nga guiníʼ ti jovenhuiiniʼ né respetu ora guiniʼné jñaa ne bixhoze?

• ¿Ximodo zanda guni tratar ti jovenhuiiniʼ bixhozeʼ ne jñaa né respetu?

Laguundaʼ Proverbios 1:8 ne laiquiiñeʼ pregunta riʼ para güitu diidxaʼ:

• ¿Ximodo naquiiñeʼ guni reaccionar ti jovenhuiiniʼ ora gabi bixhoze ne jñaa laa xi caquiiñeʼ guni?

7. Laguni adorarné familia stitu Jehová

Ribee ca testigu stiʼ Jehová tiempu cada semana para guni adorarnecaʼ familia sticaʼ Dios. ¿Ximodo nga runi adorárcabe Dios juntu yaʼ? Laguuyaʼ VIDEU riʼ ne laiquiiñeʼ ca pregunta riʼ para güitu diidxaʼ:

VIDEU: Adoración en familia: ni raca nagana para laanu ne ni ribeendunu (8:​04)

• ¿Xii nga ca cosa ni racané para cadi gusaanaʼ de gúnicabe adoración en familia?

• ¿Xi zanda guni ca padre para ganda chuulaʼdxiʼ xiiñicaʼ adoración en familia? (Biiyaʼ foto ni zeeda ra ruzulú lección riʼ).

• ¿Ñee rábiluʼ nuu xiixa ni zanda gucueeza lii para gúniluʼ adoración en familia la? ¿Xii laani yaʼ?

Tiempu bibani ca israelita, gucalaʼdxiʼ Jehová ñapa ca familia que costumbre guiniʼcaʼ de Stiidxaʼ Dios. Laguundaʼ Deuteronomio 6:​6, 7 ne laiquiiñeʼ pregunta riʼ para güitu diidxaʼ:

• ¿Ximodo zanda gúniluʼ ni ná conseju riʼ?

Ni zanda gúnitu lu adoración en familia:

• Lagaca preparar para ca reunión ni rápanu.

• Lacuí ti relatu zeeda lu Biblia ni riuulaʼdxiʼ guidubi familia ne laguiníʼ xi rusiidini laatu.

• Pa nápatu baʼduhuiiniʼ, laguni descargar o laguni imprimir ti actividad ni nuu lu jw.org para ca xcuidi.

• Pa nuu jovenhuiiniʼ ndaaniʼ familia ca, lacuí ti tema ni zeeda lu jw.org para ca joven.

• Laguni escenificar ti historia ni zeeda lu Biblia.

• Laguuyaʼ ne laguiníʼ xi rusiidiʼ xiixa videu ni zeeda lu jw.org laatu.

XI BIZÍʼDINU

Racalaʼdxiʼ Jehová gannaxhii ca padre xiiñicaʼ, gusiidicaʼ laacabe ne gápacaʼ laacabe; ne racaláʼdxibe guni respetar ne guzuubaʼ xiiñiʼ binni stiidxaʼ bixhoze ne jñaa ne guni adorar guiráʼ ni nuu ndaaniʼ familia ca laabe.

Xi biziidiluʼ

• ¿Ximodo zanda gusiidiʼ ne gapa binni xiiñiʼ?

• ¿Ximodo zanda gusihuinni xiiñiʼ binni runi respetar bixhoze ne jñaa?

• ¿Xi zabeendú ca familia ca pa cueecaʼ tiempu cada semana para guni adorarcaʼ Dios?

BIIYAʼ XIRUʼ ZANDA GUIZIIDILUʼ

¿Xii nga ca cosa ni zacané xiiñiluʼ ora guiniisi?

«Xhoopaʼ cosa ni caquiiñeʼ gusiidiluʼ xiiñiluʼ» (¡Gutaná! núm. 2 2019)

Biiyaʼ caadxi conseju ni zacané ca binni ni cayapa ti binnigola.

«¿Ñee ribeza Dios gápanu bixhózenu ne jñaanu ora maʼ nagólacaʼ la?» (Tema ni zeeda lu jw.org)

Biiyaʼ xi gucané ti hombre ni qué ganna ximodo gusiniisi ca xiiñiʼ gaca ti buen padre.

Bisiidiʼ Jiobá laadu modo gusiniisidu ca xiiñidu (5:​58)

Biiyaʼ xi gucané ti hombre para gunda guca llevar ca xiiñiʼ.

«Xi naquiiñeʼ guni ti hombre para chuʼ gaxha de xiiñiʼ» (Torre stiʼ ni rapa, 1 de enero de 2012)