1, 2. Xi huayuuyaʼ ca superintendente de circuito cayaca ndaaniʼ ca neza binni ridagulisaa.

DXI yeganna ti superintendente de circuito ti neza binni ridagulisaa, mayaca guilúxebe guendaridagulisaa ni napanebe ca binnigola. Guizáʼ nadxiibe laacaʼ purtiʼ nabé rúnicaʼ dxiiñaʼ. Ne nuu de laacaʼ maʼ huaniisicaʼ dede ñanda ñácacaʼ bixhózecabe. Peru nuu ti cosa risaca ni nabé naguu xizaa laabe. Últimu biaje yegánnabe laacaʼ gúdxibe laacaʼ cueecaʼ tiempu para gusiidicaʼ xcaadxi hermanu. Ngue runi gunabadiidxabe laacaʼ: «Bíchecaʼ, xi huayúnitu para gusiiditu xcaadxi hermanu ndaaniʼ neza binni ridagulisaa yaʼ». Óraque tobi de ca binnigola que bicabi: «Gástipeʼ qué huayúnidu». Ne zaqueca guníʼ xcaadxi binnigola que.

² Pa nácaluʼ binnigola ra ridagulisaaluʼ, zándaca zacaca nicábiluʼ. Stale superintendente de circuito cudiicaʼ cuenta cadi cabee diʼ ca binnigola ca tiempu para gusiidicaʼ xcaadxi hermanu. Guidúʼyanu xiñee.

3. 1) Xi textu stiʼ Biblia rusihuinni naquiiñeʼ gusíʼdinu xcaadxi hermanu. 2) Xiñee guiranu nga naquiiñeʼ gánnanu de tema riʼ ne de stobi ca. (Biiyaʼ ni cá ñee yaza.) 3) Xiñee raca nagana para chupa chonna binnigola cuee tiempu para gusiidiʼ xcaadxi hermanu.

³ Pa nácaluʼ binnigola, nánnaluʼ risaca nga gusiidiluʼ xcaadxi xpinni Cristu.a Laaca nánnaluʼ caquiiñeʼ jma xpinni Cristu ni gacané ca neza binni ridagulisaa nuu yanna ne ca neza binni ridagulisaa ni chuʼ despué. Biblia na: «Guidxi huiiniʼ riʼ zácani ti mil, ne zácani ti guidxi guizáʼ nadipaʼ. Naa, Jiobá, naa chigutaleʼ ni ora gacalaʼdxeʼ» (Isaías 60:22). Biblia na naquiiñeʼ gusiidiʼ ca binnigola xcaadxi xpinni Cristu (biindaʼ 2 Timoteo 2:2). Neca zacá, zándaca gaca nagana para lii cueeluʼ tiempu para gúniluʼ ni. Xiñee yaʼ. Purtiʼ nápaluʼ xidé gápaluʼ binnilídxiluʼ ne gúniluʼ dxiiñaʼ. Ne laaca naquiiñeʼ gúniluʼ ca dxiiñaʼ ni raca ra ridagulisaaluʼ ne guni tenderluʼ xcaadxi cosa ni málasi guizaaca. Peru casi chiguidúʼyanu, laaca naquiiñeʼ cueeluʼ tiempu para gusiidiluʼ xcaadxi hermanu.

BISIIDIʼ XCAADXI XPINNI CRISTU

4. Xi zándaca guiníʼ ique chupa chonna binnigola.

⁴ Xiñee nuu binnigola qué ribee stale tiempu para gusiidiʼ xcaadxi xpinni Cristu yaʼ. Zándaca riníʼ íquecabe nuu xcaadxi cosa ni jma risaca gúnicabe nagueendaca. O zándaca riníʼ íquecabe qué zaca congregación ca gastiʼ pa qué gusiidicabe xcaadxi xpinni Cristu. Peru, ñee zacá ni la? Dxandíʼ nuu cosa ni naquiiñeʼ gaca nagueendaca. Peru pa qué gusiidiluʼ xcaadxi xpinni Cristu yanna, zándaca guniná ni congregación ra rieluʼ.

5, 6. 1) Xi zándaca guizaaca pa qué guchaacabe aceite stiʼ ti carru. 2) Xi zándaca guizaaca pa qué gusiidiʼ ca binnigola xcaadxi hermanu.

⁵ Guníʼ ique ejemplu riʼ. Xii nga ni jma caquiiñeʼ ti carru para ganda saʼ. Guidaa ni gasolina la? o guchaaluʼ aceite stini. Zándaca guiníʼ íqueluʼ jma naquiiñeʼ guidaa ni gasolina ti ganda saʼ ni. Peru zándaca gaca feu carru stiluʼ pa guiníʼ íqueluʼ zacá. Purtiʼ pa qué guchaaluʼ aceite stini, qué zandaa zaca feu ni. Ne despué zunítiluʼ tiempu ne bueltu para gaca chaahuiʼ ni. Yanna, ximodo cásica ti carru ti neza binni ridagulisaa yaʼ.

⁶ Xii nga ni jma risaca yaʼ. Gúninu ca dxiiñaʼ ni raca ra ridagulisaanu la? O gusíʼdinu xcaadxi xpinni Cristu. Nuu binnigola zándaca guiníʼ ique nagueendaca naquiiñeʼ gúnicaʼ xiixa dxiiñaʼ ni raca ra ridagulisaacaʼ, purtiʼ zacaná congregación pa qué gúnicabe ni. Ne Biblia cayabi laanu naquiiñeʼ gúninu ca cosa ni jma risaca (Filipenses 1:10). Peru xi zazaaca pa ca binnigola ca nabé nuu xhiiñacaʼ ne qué cueecaʼ tiempu para gusiidicaʼ xcaadxi hermanu yaʼ. Qué zandaa maʼ qué ziuu ca hermanu ni zanda guni guiráʼ ni naquiiñeʼ gaca ndaaniʼ ti neza binni ridagulisaa.

7. Ximodo naquiiñeʼ guidúʼyanu ca binnigola ni ribee tiempu para gusiidiʼ xcaadxi xpinni Cristu.

⁷ Qué chuʼ dxi guiníʼ íqueluʼ qué risaca nga gusiidiluʼ xcaadxi xpinni Cristu. Ca binnigola ni riuu xizaa pur xi guizaaca neza binni ridagulisaa ra rié ribeecaʼ tiempu para gusiidicaʼ xcaadxi. Zacá rusihuínnicaʼ jneza cayúnicaʼ xhiiñacaʼ ne risácacaʼ para neza binni ridagulisaa (biindaʼ 1 Pedro 4:10). Xi ribeendú neza binni ridagulisaa ora ribee ca binnigola ca tiempu para gusiidicaʼ xcaadxi xpinni Cristu.

BIQUIIÑEʼ TIEMPU STILUʼ JNEZA

8. 1) Xiñee naquiiñeʼ gusiidiʼ ca binnigola xcaadxi hermanu. 2) Xi dxiiñaʼ naquiiñeʼ guni ca binnigola nagueendaca pa checaʼ sti lugar ra caquiiñeʼ chuʼ tu gacané. (Biiyaʼ cuadru ni láʼ «Ti dxiiñaʼ ni naquiiñeʼ gaca nagueendaca».)

⁸ Xiñee naquiiñeʼ gusiidiʼ ca binnigola xcaadxi hermanu. Dede ca binnigola ni maʼ xadxí nuu ndaaniʼ xquidxi Dios cadi naquiiñeʼ gudxiibacaʼ laca laacaʼ ne nánnacaʼ ora maʼ ziniisicaʼ ziuu cosa ni maʼ qué zanda gúnicaʼ casi rúnicaʼ yanna (Miqueas 6:8). Ne laaca naquiiñeʼ ganna ca binnigola zándaca málasi gápacaʼ xiixa guendanagana ne pur nga maʼ qué zanda gúnicaʼ xhiiñacaʼ (Eclesiastés 9:11, 12; Santiago 4:13, 14). Ne cumu nadxiicabe ca xpinni Cristu la? rúnicabe stipa pur gusiidicabe laacaʼ ni maʼ biziidicabe. Biblia na: «Dios stinneʼ, dede nahuiineʼ huasiidiluʼ naa ne dede yanna cayuʼnuʼ ni, ne qué huasaanaʼ de guiniéʼ guiráʼ ca cosa sicarú ni maʼ bíʼniluʼ. Neca guioxhuaʼ ne guitoope iqueʼ, cadi gusaanaluʼ naa Dios stinneʼ, ti ganda gabeʼ ca binni ni gueeda ca pabiáʼ nadipaʼ naluʼ ne pabiáʼ naroʼbaʼ poder stiluʼ» (Salmo 71:17, 18).

9. Padxí nga jma zaquiiñeʼ chuʼ xpinni Cristu ni maʼ biziidiʼ.

⁹ Nabé risaca ca binnigola ni rusiidiʼ xcaadxi xpinni Cristu purtiʼ zacá racanécabe chuʼ neza binni ridagulisaa jma naguidxi. Ne zacá ziuu jma hermanu para gacané ca binni ridagulisaa gudxiilucaʼ ca guendanagana ni gápacaʼ ne chuʼcaʼ tobi si lu ca últimu dxi riʼ, ne jmaruʼ si lu gran tribulación (Ezequiel 38:10-12; Miqueas 5:5, 6). Nga runi, ca binnigola ni nadxiidu, pa cadi cabeetu tiempu para gusiiditu xcaadxi xpinni Cristu la? laguzulú yánnaca.

10. Xi naquiiñeʼ guni chupa chonna binnigola para ganda gápacaʼ tiempu para gusiidicaʼ xcaadxi xpinni Cristu.

¹⁰ Nánnadu nabé stale dxiiñaʼ ni rúniluʼ ra ridagulisaaluʼ. Peru zándaca galán cueeluʼ tiempu lu xcaadxi dxiiñaʼ ni rúniluʼ ra ridagulisaaluʼ ne iquiiñeluʼ ni para gusiidiluʼ xcaadxi xpinni Cristu (Eclesiastés 3:1). Pa gúniluʼ ni la? zaquiiñeluʼ tiempu stiluʼ jneza ne zacaneluʼ neza binni ridagulisaa cueendú ni galán despué.

GULUU LISTU LADXIDOʼBE

11. 1) Xiñee nabé risaca ni guníʼ chupa chonna binnigola de gadxé gadxé guidxi. 2) Casi na Proverbios 15:22, xiñee galán nga guidúʼyanu xcaadxi conseju ni rudii xcaadxi binnigola.

¹¹ Stale binnigola de guiráʼ guidxi huabeenducaʼ ni galán ra bisiidicaʼ xcaadxi xpinni Cristu. Cadi xadxí gunabadiidxacabe chupa chonna de laacaʼ ximodo rúnicaʼ ni.b Neca gadxé gadxé modo nabánicabe, casi ngueca ni guníʼ guirácabe. Ndiʼ rusihuinni nabé riquiiñeʼ ca conseju ni rudii Biblia para gusiidicabe xcaadxi xpinni Cristu ndaaniʼ guiráʼ ca neza binni ridagulisaa ni nuu lu Guidxilayú (1 Corintios 4:17). Proverbios 15:22 na pa qué güinenu stobi diidxaʼ la? qué zaca cani maʼ gudixhe íquenu. Nga runi, lu tema riʼ ne lu stobi ca zaninu de ca conseju ni bidii xcaadxi binnigola. Ne laaca zadúʼyanu ximodo zanda chinanda ti binnigola ca conseju riʼ.

12. Xii nga ni naquiiñeʼ guni ti binnigola primé, ne xiñee.

¹² Ni naquiiñeʼ guni binnigola ca primé nga cuʼ listu ladxidóʼ hermanu ni chigusiidiʼ ca. Xiñee yaʼ. Guidúʼyanu ti ejemplu. Ora ti binni chigudxiibaʼ biidxiʼ, primé naquiiñeʼ cuʼbe listu layú stibe, purtiʼ zacá jma galán zaniisi ni gudxiibabe. Zacaca nga naquiiñeʼ guni ti binnigola ni racalaʼdxiʼ gusiidiʼ ti xpinni Cristu, primé naquiiñeʼ cuʼbe listu ladxidóʼ. Xiñee yaʼ. Purtiʼ zacá ziuu hermanu ca listu para guiziidiʼ. Ximodo zanda cuʼbe listu ladxidóʼ hermanu ca yaʼ. Zanda chinándabe ejemplu stiʼ ti hombre ni nabé galán modo bisiidiʼ dxiqué, laabe nga profeta Samuel.

13-15. 1) Xi gudxi Jiobá Samuel. 2) Ximodo guluu Samuel listu ladxidóʼ Saúl. (Biiyaʼ dibuju ni zeeda ra ruzulú tema riʼ.) 3) Xiñee naquiiñeʼ guuyaʼ ca binnigola modo guluu Samuel listu ladxidóʼ Saúl.

¹³ Raca jma de chonna mil iza, gudxi Jiobá Samuel zuseendaʼ ti hombre de guidxi Benjamín ra nuu ne naquiiñeʼ guni ungirbe laa, purtiʼ laa chigaca xaíque guidxi Israel (1 Samuel 9:15, 16). Gunna Samuel maʼ cadi laa diʼ nga gaca xaíque stiʼ Israel purtiʼ maʼ gulí Jiobá sti hombre. Ngue runi, para gusiidibe hombre que, guníʼ íquebe gúnibe ti cosa.

¹⁴ Sti dxi que binibiáʼ Samuel Saúl. Ne gudxi Jiobá laabe: «Raríʼ nuu hombre que». Óraque biʼniʼ Samuel ni maʼ gudixhe ique para ganda guiniʼné Saúl. Biʼniʼ invitarbe laa gó gueta ne bidiibe laa lugar jma galán ruaa mexaʼ que. Óraque gudxi Samuel laabe cayapa ca beela jma galán para laabe. Biluxe gudó sícabe biʼniʼ invitarbe Saúl ra lídxibe ne laga zécabe neza ziyuíʼcabe diidxaʼ. Ne ora yendácabe, gudxíʼbacabe ique yoo ne byuíʼrucabe diidxaʼ dede ora gúsicabe. Sti dxi que, bindaateʼ Samuel aceite ique Saúl para guihuinni maʼ biʼniʼ ungir Jiobá laabe. Ne laaca bidii Samuel ti bixiduʼ Saúl ne gúdxibe laa xi naquiiñeʼ guni. Despué, zeʼ Saúl ne maʼ nuu listu para guni ni naquiiñeʼ guni (1 Samuel 9:17-27; 10:1).

¹⁵ Gulí Samuel Saúl para gaca xaíque stiʼ ti guidxi. Dxandíʼ, maʼ gadxé ni de ora rusiidicabe ti hermanu para gaca binnigola o siervu ministerial ra ridagulisaa. Peru stale nga ni zanda guiziidiʼ ca binnigola pa gúʼyacaʼ modo gucané Samuel Saúl para guyuu listu ladxidóʼ. Guidúʼyanu chupa cosa ni rusiidiʼ historia riʼ laanu.

CHUPA GUENDA NABÉ RISACA

16. 1) Ximodo biʼniʼ sentir Samuel ora gunna racalaʼdxiʼ ca israelita que gápacaʼ ti rey. 2) Xi biʼniʼ Samuel ora gudxi Jiobá laa guni Saúl rey.

¹⁶ Bisiidiʼ xcaadxi xpinni Cristu ne bíʼnini de guidubi ladxidoʼloʼ. Ora gunna Samuel racalaʼdxiʼ ca israelita que gápacaʼ ti rey, nabé guyuube triste ne biʼniʼ sentirbe cudxiidéchecaʼ laabe (1 Samuel 8:4-8). Qué naʼ Samuel gudii laacabe ti rey. Ngue runi gupa xidé gudxi Jiobá laabe chonna biaje gucaadiágabe ca israelita (1 Samuel 8:7, 9, 22). Neca zacá, qué ñapa Samuel envidia ne qué nidxiichiné hombre ni chichuu lugar stiʼ. Ora gudxi Jiobá Samuel guni Saúl rey, bíʼnibe ni de guidubi ladxidoʼbe. Bíʼnibe ni purtiʼ nadxiibe Jiobá, ne cadi purtiʼ si naquiiñeʼ gúnibe ni.

17. 1) Ximodo rinanda stale hermanu ni maʼ xadxí de naca binnigola ejemplu stiʼ Samuel. 2) Ximodo runi sentir ca binnigola riʼ.

¹⁷ Ca dxi riʼ, stale hermanu ni maʼ xadxí de naca binnigola rinándacaʼ ejemplu stiʼ Samuel ne rusiidicaʼ xcaadxi hermanu né guendarannaxhii (1 Pedro 5:2). Cumu nacháʼhuicabe la? qué ridxíbicabe gudiicabe chupa chonna dxiiñaʼ xcaadxi hermanu ra ridagulisaacabe. Nabé risaca ca hermanu riʼ para laacabe purtiʼ zanda gacanecaʼ laacabe (2 Corintios 1:24; Hebreos 13:16). Ne nabé nayecheʼ riuucabe ora ruuyacabe ca hermanu riʼ iquiiñecaʼ guiráʼ ni nánnacaʼ para gacanecaʼ neza binni ridagulisaa (Hechos 20:35).

18, 19. 1) Ximodo zanda cuʼ ti binnigola listu ladxidóʼ ti hermanu ante gusiidibe laacaʼ. 2) Xiñee naquiiñeʼ gúnibe ni yaʼ.

¹⁸ Cadi naquiiñeʼ si gusiidiluʼ laabe, sínuque guca xhamigu laabe. Dxi binibiáʼ Samuel Saúl, ñándaca oraqueca nundaatebe aceite ique para ñuni laabe rey, peru qué ñuube listu para laani. Ngue runi, primé ni gucuá ique Samuel nga cuʼ listu ladxidóʼ Saúl. Ximodo yaʼ. Ante guni laabe rey, gudócabe juntu, guzácabe juntu, byuíʼcabe diidxaʼ ne biziiláʼdxicabe juntu. Guleza Samuel chuʼ Saúl listu, óraque gulí laabe para gácabe rey.

¹⁹ Zacagá nga ni naquiiñeʼ gúniluʼ. Ante gusiidiluʼ ti hermanu, guca xhamigu laabe. Zacá jma zápabe confianza lii. Peru para ganda gúniluʼ ni la? naquiiñeʼ chinándaluʼ modo nabani binni xquídxiluʼ ne ca costumbre ni nápacabe neza ra nabézaluʼ. Neca nuu xhiiñaluʼ, gulee tiempu para gusiidiluʼ sti hermanu. Zacá zusihuínniluʼ risácabe para lii (biindaʼ Romanos 12:10). Ne gunna dxichi laaca ziuu hermanu ca nayecheʼ purtiʼ cabeeluʼ tiempu para laa ne purtiʼ nadxiiluʼ laa.

20, 21. 1) Xi runi ti binnigola ni nanna gusiidiʼ. 2) Xi zadúʼyanu lu sti tema ca.

²⁰ Ti binnigola ni nanna gusiidiʼ laaca naquiiñeʼ gannaxhiibe hermanu ni cusiidibe (zadxélaluʼ ti ejemplu ni caníʼ de laani lu Juan 5:20). Xiñee naquiiñeʼ gúniluʼ zacá yaʼ. Purtiʼ pa guni sentir hermanu ca cusisácaluʼ laa la? jma ziuulaʼdxiʼ guiziidiʼ (Proverbios 17:17; Juan 15:15).

²¹ Ora maʼ guluu binnigola ca listu ladxidóʼ hermanu ca, maʼ zanda guzulú gusiidibe laa. Ximodo yaʼ. Lu sti tema ca zadúʼyanu xi zanda iquiiñeʼ ca binnigola para gusiidicaʼ xcaadxi hermanu.

1. 1) Xi nanna ca xpinni Dios. 2) Xiñee nabé risaca ni para laanu ca dxi riʼ yaʼ. 3) Xi zadúʼyanu lu tema riʼ.

CA XPINNI Jiobá nánnacaʼ galán riree xiixa cosa ni cayúnicaʼ ora maʼ biziidiʼ chaahuicaʼ modo gúnicaʼ ni. Guzéʼtenu ti ejemplu, dxi gudindené Abrahán ca xhenemigu yené ca hombre ni maʼ biziidiʼ tinde ne zaqué gunda bilabe Lot (Génesis 14:14-16). Ca dxi bibani David guyuu binni ni maʼ biziidiʼ guundaʼ para gusisaca Jiobá (1 Crónicas 25:7). Xiñee risaca ndiʼ para laanu ca dxi riʼ yaʼ. Primé, purtiʼ napa xidé tindenenu Binidxabaʼ ne guidxilayú stiʼ (Efesios 6:11-13). Guiropa, purtiʼ naquiiñeʼ gúninu stipa pur gusisácanu Jiobá ora rininu de laa nezalú binni (Hebreos 13:15,16). Cásica ca xpinni Dios de dxiqué, laanu laaca naquiiñeʼ guizíʼdinu ti ganda guibáninu galán. Ra ridagulisaanu, maʼ bidii Jiobá ti dxiiñaʼ ca binnigola de gusiidicaʼ xcaadxi hermanu (2 Timoteo 2:2). Lu tema riʼ zadúʼyanu caadxi de ca cosa ni huayuni caadxi hermanu.

GUCANÉ HERMANU CA JMA GANNAXHII JIOBÁ

2. Xi zanda guni ti binnigola ora chigusiidiʼ ti hermanu, ne xiñee.

² Zeeda gaca ti binnigola casi ti binni ni runi dxiiñaʼ layú. Ante gudxiibabe biidxiʼ stibe zándaca riguube abono layú que ti zacá guiniisi ca yagahuiiniʼ ca galán. Zacaca nga ora chigusiidiʼ ti binnigola tuuxa hermanu, zanda guʼndané laabe chupa chonna textu stiʼ Biblia. Xiñee yaʼ. Purtiʼ zacá zacané binnigola ca laabe gúnibe guiráʼ ni guiziidibe despué (1 Timoteo 4:6).

3. 1) Ximodo zanda iquiiñeʼ ti binnigola Marcos 12:29, 30 ora guiniʼné ti hermanu. 2) Xi zándaca guizaaca ora gunadiaga hermanu ca guni orar binnigola ca pur laa.

³ Pa nácaluʼ binnigola ra ridagulisaaluʼ, galán gánnaluʼ ximodo cayacané ni caziidiʼ ti hermanu laa para guiníʼ ique jneza ne ximodo runi sentir. Para gánnaluʼ ni, zanda gúʼndaneluʼ laabe Marcos 12:29, 30 (biindaʼ ni). De racá gunabadiidxaʼ laabe, ra bidiibe laabe Jiobá, ximodo huayacané ni laabe lu cani riguixhe íquebe gúnibe. Guendarinabadiidxaʼ riʼ zanda gucaani laabe guiniʼbe ximodo zanda gúnibe xhiiñaʼ Jiobá de guidubi ladxidoʼbe. Laaca zanda guni orárneluʼ laabe ne guinábaluʼ Jiobá gudii laabe espíritu santu stiʼ para ganda gúnibe ca dxiiñaʼ ni chicaabe. Zándaca ra gunadiágabe guni orarluʼ pur laabe cuʼ ni gana laabe gúnibe jma ra ridagulisaabe.

4. 1) Bizeeteʼ chupa chonna historia stiʼ Biblia ni zanda gacané ca hermanu guiniisicaʼ ndaaniʼ xquidxi Dios. 2) Xii nga naquiiñeʼ guicá ique ti binnigola ora gusiidiʼ ti hermanu.

⁴ Ora guzulú gusiidiluʼ ti hermanu, guniʼné laabe de xiixa historia stiʼ Biblia casi cani zeeda lu 1 Reyes 19:19-21, Nehemías 7:2, Nehemías 13:13 ne Hechos 18:24-26. Casi ca historia riʼ zacané cani laabe gúʼyabe pabiáʼ risaca nga gacanebe xcaadxi binni, gápacabe confianza laabe ne cadi gudxiibabe laca laabe. Ca guenda riʼ zeeda gaca cani casi abono ni rusaba ti binni lu layú stiʼ. Zacané ni hermanu riʼ guiniisi jma nagueenda ndaaniʼ xquidxi Dios. Ti binnigola de Francia guníʼ ora rusiidiʼ ti hermanu, ni ruyúbibe nga gacanebe laa quixhe ique guni ni na Biblia. Laabe nabe ruyúbibe modo ganda gúʼndanebe xpinni Cristu ca caadxi textu para guiene caadxi de ca cosa sicarú ni zeeda ndaaniʼ Biblia (Salmo 119:18). Ximódoruʼ zanda gacané ti binnigola ca hermanu gannaxhiicaʼ Jiobá jma.

GULUU GANA LAABE GÚNIBE JMA NE GUDXI LAABE XIÑEE

5. 1) Xiñee galán nga guiniʼné ti binnigola ti hermanu de cani naguixhe ique ugaanda. 2) Xiñee risaca nga gusiidiʼ ti binnigola ca hermanu ora nahuiinirucaʼ. (Biiyaʼ ni cá ñee yaza.)

⁵ Gunabadiidxaʼ hermanu ca xi naguixhe ique ugaanda. Pa cadi naguixhe íquebe ugaandabe xiixa, gucané laabe guyúbibe tobi ni zanda ugaandabe. Guyuu nayecheʼ ora gábiluʼ laabe xi gudixhe íqueluʼ gúniluʼ dxiqué ne pabiáʼ galán biʼniʼ sentirluʼ ora bigaandaluʼ ni. Cadi nagana para gúniluʼ ni ne zabeenduluʼ ni galán. Ti binnigola ni naca precursor África, bisiene xiñee naquiiñeʼ guni ca binnigola zacá. Laabe guniʼbe, dxi nácabe nahuiiniʼ, gunabadiidxaʼ ti binnigola laabe xi naguixhe íquebe ugaandabe. Ngue gucané laabe quixhe íquebe gúnibe jma xhiiñaʼ Dios. Stale hermanu ni maʼ xadxí de naca binnigola nacaʼ nabé risaca nga guzulú gusiidicaʼ ca hombrehuiiniʼ laga nahuiinicaʼ. Zanda guicaacabe xiixa dxiiñaʼ ni zanda gúnicabe ra ridagulisaacabe. Xiñee galán nga gusiidiʼ ti binnigola ca hombrehuiiniʼ ca yaʼ. Purtiʼ nga zanda gacané laacabe ugaandacabe ni quixhe íquecabe dxi guiniisicabe ante chuʼ xiixa ni uquiinde laacabe. Biblia na: «Lii nga ribezaʼ gacaneluʼ naa Jiobá, Señor stinneʼ, ni runeʼ cré dede dxi nahuiineʼ. Dios stinneʼ, dede nahuiineʼ huasiidiluʼ naa ne dede yanna cayuʼnuʼ ni, ne qué huasaanaʼ de guiniéʼ guiráʼ ca cosa sicarú ni maʼ bíʼniluʼ» (Salmo 71:5, 17).a

6. Xi biʼniʼ Jesús para bisiidiʼ xcaadxi binni.

⁶ Para cuʼbe gana ti hermanu guni jma lu xhiiñaʼ Dios, cadi naquiiñeʼ si gábibe laa xi guni, sínuque naquiiñeʼ gusiénebe laa xiñee risaca gúnini. Ne sicaríʼ nga biʼniʼ Jesús para bisiidiʼ xcaadxi binni. Biʼniʼ mandarbe ca apóstol stibe gucheechecaʼ diidxaʼ. Peru primé gúdxibe laacaʼ xiñee naquiiñeʼ guzuubacaʼ diidxaʼ. Gúdxibe laacaʼ: «Irá xixé ni nuu ibáʼ ne ni nuu guidxilayú ma nexhe ladxi nayaʼ. Nga runi, laché ne lachigusiidiʼ binni de guiráʼ guidxi sananda naa» (Mateo 28:18, 19). Ximodo zanda chinándaluʼ ejemplu stiʼ Jesús yaʼ.

7, 8. 1) Ximodo zanda chinanda ca binnigola ejemplu stiʼ Jesús. 2) Xiñee risaca nga gábibe hermanu ca galán ni cayuni. 3) Xi conseju zanda gacané ca binnigola para gusiidicaʼ xcaadxi hermanu. (Biiyaʼ cuadru ni láʼ «Conseju para gusiidiluʼ xcaadxi hermanu».)

⁷ Ora gábiluʼ hermanu ca guni xiixa, bisiene laabe né Biblia xiñee risaca nga gúnibe ni. Zacá zusiidiluʼ laabe gúnibe ca cosa ca purtiʼ Biblia na gácani ne cadi purtiʼ si naquiiñeʼ gúnibe ni. Quíxhenu ti ejemplu, pa guinábaluʼ ti hermanu guʼyaʼ cadi guixii nisa ra puertaʼ Yoo stiʼ Reinu zanda gúʼndaneluʼ laabe Tito 2:10. Bisiene laabe pa gúnibe ni jma ziuulaʼdxiʼ binni gucaadiaga stiidxaʼ Dios. Ne laaca zanda gábiluʼ laabe pa gúnibe zacá qué zaree chuiʼ ñee cani maʼ nagola. Pa gusiéneluʼ laabe ximodo gúnibe dxiiñaʼ zacané ni laabe guiníʼ íquebe ca hermanu ne qué zacabe tema chinanda ca hermanu ni maca nexheʼ gaca. Ora gúʼyabe xi ribeendú ca hermanu pur dxiiñaʼ ni rúnibe jma ziuuláʼdxibe gacanebe.

⁸ Ne ora gúʼyaluʼ zinanda hermanu ca conseju ni bidiiluʼ laa gudxi laabe galán ni cayúnibe. Xiñee risaca gúniluʼ ndiʼ yaʼ. Purtiʼ zacá zacaneluʼ laabe guiniisibe ndaaniʼ xquidxi Dios. Ora rábiluʼ hermanu ca galán ni cayuni zeeda gácani casi ora nuzeeluʼ ti yagahuiiniʼ para guiniisi (zadxélaluʼ ti ejemplu de laani lu Mateo 3:17).

STI GUENDANAGANA NI RÁPACABE

9. 1) Xi rizaaca ndaaniʼ caadxi guidxi ra nabeza binni ricu. 2) Xiñee stale hombrehuiiniʼ qué ruuyacaʼ xhiiñaʼ Dios casi ti cosa ni jma risaca.

⁹ Ndaaniʼ caadxi guidxi ra nabeza binni ricu, ruuyaʼ ca binnigola huaxiéʼ riuulaʼdxiʼ cani nahuiiniʼ gúnicaʼ jma ra ridagulisaacaʼ. Gunabadiidxacabe ti grupu de xpinni Cristu ni maʼ xadxí de naca binnigola de 20 guidxi xiñee nuu guendanagana ca. Stale de laacabe guníʼ, dxi jma nahuiiniʼ ca hermanu riʼ, qué niguu bixhózecaʼ gana laacaʼ niguixhe íquecaʼ ñúnicaʼ jma lu xhiiñaʼ Jiobá. Ne ora laacabe gucaláʼdxicabe ñúnicabe jma, guluu bixhózecabe gana laacabe gúʼndacabe scuela roʼ para guni ganárcabe stale bueltu. Ngue runi qué ñuu dxi ñuuyacabe xhiiñaʼ Dios casi ti cosa ni jma risaca para laacabe (Mateo 10:24).

10, 11. 1) Ximodo zanda gacané ti binnigola ti hermanu guchaa modo laa. 2) Xi textu zanda guʼndané ti binnigola ti hermanu, ne xiñee. (Biiyaʼ ni cá ñee yaza.)

¹⁰ Nagana nga gacanenu ti hermanu ni qué racalaʼdxiʼ guni jma lu xhiiñaʼ Dios ra ridagulisaa. Peru zanda gacanenu laabe pa gúninu stipa ne gápanu stale paciencia. Guiníʼ íquenu ejemplu stiʼ hombre ni runi dxiiñaʼ lu layú que. Para guiniisi ti yagahuiiniʼ derechu, naquiiñeʼ guni enderesarbe ni chaahuiʼ chaahuiʼ. Zacaca nga naquiiñeʼ gúniluʼ, chahuiʼ chaahuiʼ gucané ti xpinni Cristu guchaa modo laa ne ganda guni jma dxiiñaʼ ra ridagulisaa. Ximodo yaʼ.

¹¹ Gulee tiempu para gaca xhamíguluʼ hermanu ca. Gudxi laabe caquiiñeʼ ca binni ridagulisaa laabe. Guriné laabe ne biindané laabe caadxi textu stiʼ Biblia ni gacané laabe guiníʼ íquebe dxi bidiibe laabe Jiobá (Eclesiastés 5:4; Isaías 6:8; Mateo 6:24, 33; Lucas 9:57-62; 1 Corintios 15:58; 2 Corintios 5:15; 13:5). Biyubi modo chindaluʼ ndaaniʼ ladxidoʼbe ra guinabadiidxaluʼ laabe: «Xi bidii stiidxaluʼ Jiobá dxi bidiiluʼ xquendanabániluʼ laa yaʼ. Ximodo rábiluʼ biʼniʼ sentirbe ora guyuunísaluʼ yaʼ» (Proverbios 27:11). «Xi biʼniʼ sentir Binidxabaʼ yaʼ» (1 Pedro 5:8). Nabé galán gúʼndaneluʼ laabe ca textu riʼ, purtiʼ zacá zanda chindaluʼ ndaaniʼ ladxidóʼ hermanu ca (biindaʼ Hebreos 4:12).b

HOMBREHUIINIʼ, BILUÍʼ ZANDA GUNI CONFIARCABE LII

12, 13. 1) Xi biʼniʼ Eliseo ora gudxi Elías laa gusaana de gacané laabe yaʼ. 2) Ximodo guluu ndaayaʼ Jiobá Eliseo pur bizuubaʼ diidxaʼ.

¹² Hombrehuiiniʼ, caquiiñeʼ ca binni ridagulisaa lii. Xi zacané lii gúniluʼ xhiiñaʼ Jiobá jneza yaʼ. Para gánnanu ni la? guidúʼyanu ejemplu stiʼ ti xpinni Dios de dxiqué ni láʼ Eliseo.

¹³ Raca 3,000 iza, profeta Elías biʼniʼ invitarbe ti hombrehuiiniʼ láʼ Eliseo para gacané laabe. Oraqueca guná Eliseo. Bizuubabe diidxaʼ ne gucanebe profeta riʼ lu caadxi dxiiñaʼ ni qué risácapeʼ (2 Reyes 3:11). Xhoopaʼ iza bisiidiʼ Elías Eliseo. Dxi mayaca guiluxe Elías de guni xhiiñaʼ ndaaniʼ guidxi Israel, gúdxibe Eliseo maʼ zanda gusaana de gacané laabe. Peru Eliseo gudxi laabe chonna biaje: «Qué zusaanaʼ lii». Eliseo gudixhe ique guiaanané Elías. Ne Jiobá guluu ndaayaʼ laabe purtiʼ qué nusaanabe Elías. Ximodo yaʼ. Ra bidiibe lugar laa guuyaʼ ximodo ziné ti bi nadipaʼ Elías (2 Reyes 2:1-12).

14. 1) Ximodo zanda chinanda ca hombrehuiiniʼ ejemplu stiʼ Eliseo. 2) Xiñee risaca nga guni ca hombrehuiiniʼ ca dxiiñaʼ gudiicabe laacaʼ.

¹⁴ Ximodo zanda chinándaluʼ ejemplu stiʼ Eliseo yaʼ. Neca qué risácapeʼ dxiiñaʼ gudiicabe lii, bíʼnini de guidubi ladxidoʼloʼ. Bietenalaʼdxiʼ, binnigola ni cusiidiʼ lii ca xhamíguluʼ laabe. Gudxi laabe rusisácaluʼ ni rúnibe pur lii ne racaláʼdxiluʼ guiziidiluʼ jma. Peru ni jma risaca nga gusihuínniluʼ zanda gápacabe confianza lii ne gúniluʼ ca dxiiñaʼ ni gudiicabe lii. Xiñee yaʼ. Purtiʼ zacá zudii ca binnigola ca cuenta racalaʼdxiʼ Jiobá guicaaluʼ jma dxiiñaʼ ra ridagulisaaluʼ (Salmo 101:6; biindaʼ 2 Timoteo 2:2).

BIʼNIʼ RESPETAR CA BINNIGOLA

15, 16. 1) Ximodo bisihuinni Eliseo biʼniʼ respetar maestru stiʼ. (Biiyaʼ dibuju ni zeeda ra ruzulú tema riʼ.) 2) Xiñee gupa xcaadxi profeta que confianza Eliseo.

¹⁵ Historia stiʼ Eliseo laaca rusihuinni ni risaca nga guni respetarnu ca binnigola purtiʼ nánnacaʼ gusiidicaʼ. Despué de yeganna Elías ne Eliseo caadxi profeta de guidxi Jericó, guyecaʼ ra guiiguʼ Jordán. Óraque, «gucuaa Elías lari risaca stiʼ bizeechube ni ne gudxíbibe ni lu nisa que, ne bixeleʼ nisa que», óraque guirópacabe gudíʼdicabe ndaaniʼ ni ra nabidxi que. Laga zizácabe, ziniʼné Elías laabe ne laabe cucaadiaga chaahuibe laa ne ziziidibe guiráʼ ni cayabi laabe. Qué ñuu dxi ñuni cré Eliseo maʼ nanna de guiráʼ cosa. Despué de ziné Jiobá Elías lu bi nadipaʼ que, bibiguetaʼ Eliseo ra guiiguʼ que. Gudxíbibe xhaba Elías lu nisa que ne gunábabe gacané Jiobá laabe. Óraque bixeleʼ Jiobá, Dios stiʼ Elías, nisa que sti biaje (2 Reyes 2:8-14).

¹⁶ Ñee bidiiluʼ cuenta primé milagru biʼniʼ Eliseo zeeda gácani casi últimu milagru biʼniʼ Elías la? Qué niníʼ ique Eliseo cumu maʼ naca xaíque maʼ ñuni ca cosa que modo riuulaʼdxiʼ, sínuque bíʼniruʼ cani cásica biʼniʼ Elías cani. Zacá bisihuínnibe runi respetarbe maestru stibe. Ne nga gucané xcaadxi profeta que gápacaʼ confianza laabe (2 Reyes 2:15). Guca Eliseo profeta 60 iza, ne bidii Jiobá laabe poder para gúnibe stale milagru, jma que Elías. Xi zanda guizíʼdinu de ejemplu stiʼ Eliseo yaʼ.

17. 1) Ximodo zanda chinanda ca hombrehuiiniʼ ejemplu stiʼ Eliseo. 2) Ra zidiʼdiʼ dxi, xi zanda guni ca hombrehuiiniʼ.

¹⁷ Pa guicaaluʼ jma dxiiñaʼ ra ridagulisaaluʼ, cadi guiníʼ íqueluʼ nagueendaca naquiiñeʼ guchaaluʼ modo raca ca dxiiñaʼ ca. Bietenalaʼdxiʼ zanda guchaaluʼ caadxi cosa ora caquiiñeʼ congregación ca ni ne ora xquidxi peʼ Jiobá canabaʼ gácani. Qué chuʼ dxi gúniluʼ ni purtiʼ si racaláʼdxiluʼ. Bietenalaʼdxiʼ Eliseo biʼniʼ ca cosa ca casi modo biʼniʼ Elías ni. Zacá bisihuínnibe runi respetarbe maestru stibe. Ne laaca gucanebe ca profeta que gápacaʼ confianza laabe. Pa chinándaluʼ guiráʼ ni bisiidiʼ ca binnigola lii de lu Biblia la? zusihuínniluʼ runi respetarluʼ laacabe. Ne ca hermanu ni nuu ndaaniʼ neza binni ridagulisaa zápacaʼ confianza lii (biindaʼ 1 Corintios 4:17). Ora guiziidiluʼ jma, zanda guchaaluʼ caadxi cosa ni gacané neza binni ridagulisaa chinanda xquidxi Jiobá, purtiʼ laani cadi cusaana ni de guiniisi ni. Ne despué zacané Jiobá lii gúniluʼ jma cosa que biaʼ biʼniʼ cani bisiidiʼ lii, cásica guca ne Eliseo (Juan 14:12).

18. Xiñee nagueendaca naquiiñeʼ gusiidicabe ca xpinni Cristu ni nuu ndaaniʼ ca congregación ca.

¹⁸ Rinábadu Jiobá gacané ca conseju stiʼ guiropaʼ tema riʼ ca binnigola cueecaʼ tiempu para gusiidicaʼ xcaadxi xpinni Cristu. Ne laaca runi orardu para guiale ndaaniʼ ladxidóʼ jma hermanu guiziidiʼ ximodo naquiiñeʼ gápacaʼ ca neza binni ridagulisaa. Nga zacané ca neza binni ridagulisaa ni nuu lu guidubi Guidxilayú chuʼcaʼ jma naguidxi. Ne laaca zacané cani cada tobi de laanu guzúʼbanu stiidxaʼ Jiobá laga cabézanu ca dxi jma nagana.